2014-11-13, 21:11
|
رقم المشاركة : 26 |
إحصائية
العضو | | | رد: مذكرات معلّم في البادية (2005/........) | الحلقة الثامنة: نهاية المشاكل مع السكان ومع المدير(2) الجزء الثالث : نتائج الخطة العزوزية فالصباح كي العادة ، دخّلت التلاميذ للقسم و خرجت للساحة باش نتفجّج على قوم مرزوك.دازت واحد الساعة ، بانو لي شي وحدين واقفين ولكن ما زعموش يجيوْ لعندي.عالم الله آش كانو يقولو ؛ على كل حال باين باللي ما عاجبهومش الحال.خوتنا بالله كانو يتناقشو وماشي بعيد كانو يشوفو شي حل باش يخرجو من هاد المأزق اللي طاحو فيه. شي شوية مشاوْ في حالاتهوم .دابا تأكدو باللي ما غاديش نخدم وغادي نبقى على هاد الحال حتى يشوفو لي شي حل. المهم مع ديك لحضاش والنص موعد فترة الاستراحة ، خرّجت التلاميذ باش يستراحو وياكلو الكاسكروط ديالهوم؛ أنا مشيت عند الميلود.لقيتو يا الله فاش فاق من النعاس: _ مالك أخويا الميلود ؟ واش راك مريض ؟ الميلود تكسّل مزيان وجاوبني : واه راها الطناشْ !!!! خوكم الحوميدي لقاها مناسبة باشْ يْقَصَّرْ على هاد المعكازْ _ راكْ غالط يا خويا مازال التمنية ما لحقات .أنا غادي ندخّل التلاميذ.يا الله وجّدْ راسك للخدمة.. الميلود شْعل الراديو .شي شوية قال لي : خويا حميد باركة من التفلية .ها لخبار ديال ميدي آن.دابا راها الطناش قل ربع. _ اوى الله يجيبك على خير . المهم الميلود وجّدْ لينا شي بيضات مع أتاي .كلينا وشربنا.شي شوية ، جا عزّوز باين يضحك : _ السلام عليكم .راني جايب ليكوم اخبار الخير. الميلود هو اللي جاوبو : اشرب بعدا شي كاس أتاي ولكن البيض ما بقاش . لمقدم كان خاصّو يوصل لخبار .شافْ فيا : أستاذ عبد الحميد ، القوم طيْحو كواريهومْ _ كيفاشْ زعما ؟ واشْ تراجعو على داكْ الشّي اللي دارو ؟ _ إوى راهوم يطلبو منّك تقرّي اولادهوم والوقت اللي درتيه قابلين عليه. شفت فالميلود : آش ظهر لك فالتوقيت ديالي غادي يكون كل يوم من التسعة حتى الوحدة والنص ، من غير الجمعة غادي نبقى نمشي مع لحضاش والنص باش نلحق على صلاة الجمعة في وجدة. لمقدّم عزوز ضحك : أستاذ عبد الحميد راك تهلّيطي فيهوم.راهوم كانو ناويين غادي يا الله تخدم جوج سوايع أو 3 .مساكين صافي ما عمرو يدورو بيك. قبل ما نودعو لمقدّم قلت لو : قولْ ليهوم راني عند كلمتي ولكن يعطيوني شبر وْسع. الجزء الرابع : زيارة السيد المدير تنهي المشاكل الصراحة من الغد ليه بقيت نمشي ونجي على خاطري.بالنسبة للمدير حتى هو ميّك وما بقاش يتكلّم لي على التوقيت .فاش يتاصل بيا مثلا غير باش يعرف النسبة المئوية ديال المواظبة أو مثلا شي احصائيات.انا كنت فالمستوى .هاد المسائل عاطيهوم حقهوم. واحد النهار باقي عاقل في شهر أبريل .كنت خدّام مع التلاميذ ديالي ودخل علي المدير.الصراحة ما شفتوش حتى لقيتو حْدايا: _ السلام عليكم أستاذ عبد الحميد. مفاجأة واش من مفاجأة : وعليكم السلام ورحمة الله تعالى وبركاته. المدير شاف فيا وابتاسم : تبارك الله على الاستاذ عبد الحميد والله الى خدّام بالمعقول خوكم الحوميدي ما عندذوش مع المجاملة : بطبيعة الحال خدّام .واش زعما حْنا مانخافوش من الله؟ المدير ضحك وقال لي : اسمح لي ، أنا بغيت نقول أول مرة كنشوف أستاذ فالعالم القروي لابس الطابلية بيضا ( الوزرة ) وداير وسائل الإيضاح بحال هاد الصويرات الملونة الجميلة. دابا ابتاسمت : السيد المدير راك ما شفتي والو . المدير تنبْهضْ : واه كاين شي حاجة أخرى ؟ انا باركة علي غير هاد الشي. _ ما يمكنش خاصك تراقب سجل الغياب والمذكرة اليومية والتحاضير وحتى الدفاتر ديال التلاميذ _ ما عليهش بحال الى شفتهوم. خوكم الحوميدي قانوني : بالعكس تفضل ودير شغلك. فعلا راقب المدير كل ما دكرت ونقدر نقول ليكوم كان يطأطأ راسو بالاعجاب .فالأخير قال لي : الصراحة راك فاجأتني _ اسمح لي السيد المدير .كون شفتي الملف ديالي ما غاديش تتفاجأ بالمرّة ضحك المدير : بالعكس شفتو وما تيّقتشْ _ دابا ؟ _ من اليوم غادي نعطيك التيقار.بالعكس خاصّك تخدم معايا فالمركز .أنت عنصر نشيط وكتبغي الخدمة.هاد الشي اللي شفت ماكاينش حتى فلمدينة. المهم قال لي نمشي نشوف الميلود.خونا بالله على حسب الأقوال التلاميذ تلفات ليه الربعة أو القبلة.أول حاجة بغى يلبس الطابلية ولكن مسكين عندو شي وحدة كان راميها والمشكل باقي فيها علامات المرق والفلفلة الحمرى وحتى الغيس والتراب .هادي حتى البنّاي ما يقبلش عليها.خونا بالله بغى يلبسها ولكن التلاميذ قالو لو : أستاذ راها مْودْحة ( بمعنى متّسخة) الكامبو باش يمشي يوجّدْ المذكرة او على الأقل يكتب غير شي حاجة فالسبورة .ما طاحت لوش هادي على الباب. ما فاق براسو حتى لقى المدير حداه.ولكن كنت مع المدير. _ السلام عليكم سّي الميلود.واش كاين شي أتاي ؟ _ كاين ولكن باقي ما طاب المدير ضحك مين سمع جوابي : عندي أبّا مْبصّح ميّتْ على كل حال هاد المرة المدير ما راقب والو للميلود.هي وحدة من جوج إما ما باغيش يْخسّرْ الفرحة ديالو معايا أو هو عارف الميلود .أنا الصراحة كيْبان ليا باللي الميلود راه معروف عند الاساتذة والمديرين السابقين بالخمول وكثرة النعاس. شي شوية جا رئيس جمعية آباء التلاميذ وفيدّو صينية فيها أتاي والحرشة وطبسي فيه لعسل. بعد السلام قال لينا سّي أحميدة : هادا شرف كبير يزورنا السيد المدير المهم شربنا وكلينا وتحدثنا في أمور كثيرة منها صعوبة المواصلات والظروف القاسية ببلدة مرزوك. شي شوية المدير مشى في حالاتو ولكن مشى معاه السيد رئيس جمعية آباء وأولياء التلاميذ.ماشي بعيد كان باغي يتكلّم معاه علي ولكن دابا راني متأكد باللي ما غادي يكون غير فالخير. سبحان الله العظيم هاد خونا بالله غادي يرجع من بعد من أكبر المدافعين علي.تصورو أنه يوم انتقلت باش نخدم فالمركزية جا لعندي وقال لي باقي عاقل : أرجع اسّي عبد الحميد والله حتى ندبحو على قِبالك جدي كل صيمانة . بالطبع ما قبلتش حيت خوكم خدم عاميْن في مرزوك .اوى باركة علي . هادي قصة أخرى مين يجي وقتها نحكيها ليكوم الى اللقاء مع الحلقة التاسعة | |
| |