2014-12-07, 16:10
|
رقم المشاركة : 36 |
 إحصائية
العضو | | | 
|  رد: مذكرات معلّم في البادية (2005/........)
|  |
الحلقة العاشرة : سنتي الثانية بفرعية مرزوك
الجزء الأول : حدثان مهمان في سنتي الأولى
الصراحة بقية العام الأول ديالي دازت عادية من غير 2 أحداث مهمة .
الحدث الأول وقع لي مع مول الطومومبيل .هاد خونا بالله بانت لو باللي المبلغ ديال لانافيط اللي كيشد من عندنا وعلى الخصوص من عندي ماشي كافي.تصورو أني كنت نعطيه 75 درهم كل 5 أيام وبالطبع مع الاخوان موسى وأمين ولحصيصة ديال الميلود ليوم الجمعة كان خونا بالله يجمع مبلغ يصل إلى 240 درهم كل صيمانة .كان يصرف منها بيدون ونصف ديال البنزين يعني 45 لتر واللي تنقام عليه ب180 درهم.
باختصار خونا بالله كان يركب فابور ورابح كل أسبوع 60 درهم.
اوى آش بغى هذا؟
قالك أسيدي خاصني نعطيه 20 درهم كل يوم حيت أنا الطريق ديالي زايدة على آخر نقطة يوصل ليها.شرحت لو باللي حتى أنا عندي مصاريف أخرى حيت كنستعمل الموطور ديالي باش نقطع 5 أو 6 كيلومترا ذهابا وإيابا وحتى هادي كتكلفني تقريبا 3 لتر من البنزين فالأسبوع.
خونا بالله قال لي " خاصك تزيدني أو صافي
ردّيت عليه : والى ما بغيتش نزيدك ؟
ضحك الكافر بالله وقال لي : شوف ليك شي مركوب آخور
خونا بالله كان يعتاقد باللي ما عندي حتى وسيلة وزعما غادي نرغبو ولكن مسكين كان غالط.هي هاديك قلت لو : خويا نور الدين من غدا ان شاء الله ما تستانانيش فالصباح حيت غادي نبقى نركب فالطاكسي لكبير وفلعشية نرجع فالكار.
سّي نورالدين غير سكت وما صابّ ما يقول.
فعلا فالغد ليه فقت بكري ومشيت لمحطة الطاكسيات .كانت مناسبة باش نتعرّف على شي معلمين من رواد لانافيط فالطاكسيات.هادو كل يوم يشدّو الطاكسي لكبير باش يقطعو 40 كيلومتر.ولكن مازال تابعاهوم الطريق.غير يوصلو لتافوغالت يركبو على الموطورات ديالهوم باش يقطعو 10 كيلومتر كلها بيست.
فلعشية يرجعو فالكار ولكن خاصهوم يخرجو مع الوحدة والا بقاو فبلاصتهوم حيت ما كا ينش المركوب مع لعشية.
هادو مكرفصين أكثر مني وقابلين الوضع.اوى حتى أنا غادي نشاركهوم شوية ديال التكرفيص.
على كل حال كنا نتلاقاو كل يوم فالذهاب وحتى فالإياب.
المهم دازت تقريبا 5 أيام وجا يوم السبت يوم الراحة الاسبوعية.كنت فالدار مين اتّاصل بيا الميلود بالتيليفون وقال لي ضروري نتلاقاو باش نهضرو بخصوص لانافيط وراه معايا نور الدين.
خوكم حوميدي دائما قلبو أبيض من الثلج وما عمرو كره شي واحد.لذلك لبيت الدعوة وقلت للميلود غادي نجي عندهوم لقهوة مازاكران بعد تقريبا ساعة من الوقت
فالمقهى وحنا نشربو كأس أتاي ، الميلود هو اللي تكلم وقال لي : خويا حميد راه نور الدين قابل يردك وبنفس المبلغ اللي كنت أنت تعطيه لو ولكن كيطلب منك طلب واحد ويتمنى ما ترفضولوش .
شفت فالميلود وابتاسمت وردّيت عليه : مين هاد الطلب ما يتعلقش بالفلوس ما كاين مشكل نسمعوه.
الميلود شاف فصاحبنا نور الدين اللي لحد الآن ما قال كلمة واحدة فالموضوع ، ثم قال لي : خويا حميد نورالدين ما غاديش يزيدنا حتى لقرارشة كي موالف.غادي يبقى يوقف عند الريّاحة واحنا نبقاو نجيو لعندو.
هادي شوية صعيبة : زعما نبقى نتمشى 4 كيلومتر على رجلي
الميلود ضحك : لّا غادي تكون راكب فالموطور ديالك
جاوبتو : ولكن الموطور زعما راه يكون فلقرارشة.ما يمكنش
الميلود عندو الحل : شوف خويا حميد من اليوم غادي تحط لاموطو ديالك فالريّاحة.ها الساروت .
كان عليا نقبل .الصراحة بيني او بينكوم الصيمانة اللي دازت مع الطاكسيات كنت نفيق بكري وكنت نتمشى على رجلي تقريبا 7 كيلومتر باش نوصل لفرعية لقرارشة .
هي هاديك رجعت لأصدقائي موسى وأمين وبقينا على هاد المنوال حتى لنهاية السنة الدراسية.
الحدث الثاني هو أن أب واحد التلميذ باقي عاقل على الاسم ديالو منير عرضنا نتغداو عندو .هاد الأب عجباتو الطريقة ديالي فالتدريس وقالها لي صراحة : أستاذ انا كنشكرك بزاف على المجهودات اللي بدلتيها مع ولدي .
انا حار لي لعجب وقلتها لو بنفس الصراحة : أسيدي ياك ما راك غالط .الولد ديالك كيقرى عند السّي الميلود ماشي عندي
الأب ضحك وقال لي : عارف أأستاذ ولكن هاديك ال5 أيام اللي قرى هي اللي شجعاتنو فالقراية
_ ما يمكنش ؟
_ والله العظيم يا أستاذ راه الولد ديالي بدى يهتم وراه ياك كان يجي لعندك فوقت الاستراحة باش تشرح لو شي دروس
_ فعلا كان يجي عندي مرّة مرّة
_ اوى أستاذ راه الفضل يرجع ليك ونتمنى العام الجاي يقرى عندك
_ الى بغى الميلود
الميلود غير ضحك وقال لي : خودهوم كاملين وخليني نستراح مع راسي
المهم جا معانا موسى ونور الدين وأمين حيت حتى هوما كانو معروضين للزردة.
آش نقول ليكوم كانت زردة رائعة ودايزها لكلام.
بعدما تغدينا وشربنا كاس ديال أتاي ، شدّينا الطريق لوجدة
باقي العم داز بخير وعلى خير .
حاجة وحدة مدكّرها وهي قبل ما نوقعو محضر الخروج ، قال ليا المدير يمكن العام الجاي غادي تدخل للمركز .بالطبع اخبرني باللي شي معلم راه انتاقل لمدينة وجدة وغادي يجي شي وافد جديد .هاد الوافد غادي يخدم في مرزوك.
الصراحة فرحت بزاف ، حتى العطلة الصيفية كنت بغيتها تمر بسرعة باش نشد البوست الجديد
فالمركز .
الجزء الثاني : بداية السنة الثانية ولكن بمرزوك
المهم انتاهات العطلة ورجعنا نوقعو محضر الدخول .لحد الساعة ما كاين والو .لهادا التاحقت بمرزوك بنوع من النفور .زعما ما عابنيش الحال.
دازت تقريبا 20 يوما ودخلنا في شهر اكتوبر ولا جديد .في ديك لوقيتة كنت انا والميلود نقرقبو الناب على الوافد الجديد وجات المفاجأة ...المفاجأة من عند الميلود.خونا بالله طيّرها لي بالمعقول مين قال لي :
_ خويا حميد أنا اللي غادي نمشي ننزل نخدم فالمركز
_ ما يمكنش المدير راه مواعدني باش أنا اللي نمشي للمركز
_ خويا حميد انا سابقك فالنقط وأنا اللي عندي الحق والمدير راه عارف هاد الشي
_ ولكن باك أنت تخاف من المفتش .علاش غادي تمشي للغول وتقول لو كولْني.
هاد الهضرة هي اللي قربلات كولشي : خويا حميد بلا معيور .زايدون غادي نمشي بغيتي ولّا كرهتي
_ غير سير أخويا وغادي نشوف
الصراحة كان عندي أمل باللي الميلود ما يقدرش يخدم فالمركزية حيت هو مسالي مع قبّو: لا تحاضير لا مذكرات ، ما عندو والو ومن الفوق عاطيها للنعاس.ماشي بعيد مايقشع والو فالمناهج وحتى فالبيداغوجيا.
لهذا كنت نقول " موحال يمشي موحال يمشي"
كنت غالط حيت يا الله فاش جابو المعلم الجديد الميلود جمع حوايجو وقال لي " باي باي خويا حميد
المدير ما صاب ما يقول حيت حتى هو ماكانش يعرف باللي الميلود يطمع فالمركز.شاف فيا مسكين متأسف وأنا نقول ليه ما كاين مشكل.هادي فرصة باش نغير المستوى
المدير ضحك وقال لي : نيْتك زينة يا أستاذ عبد الحميد أنا كنت ناوي نغير ليك المستوى .الاستاذ الجديد صدق معرّب والأقسام اللي يقرّي هي الأول والثاني.أما أنت خاصك تقري الثالث والرابع والخامس والسادس عربية وفرنسية
جاوبت المدير ما كاين مشكل
المدير كان راجل : سّي عبد الحميد نواعدك باللي العام الجاي تقرّي فالمركز
قبل ما نودعو قلت لو : ان شاء الله
المهم التلاميذ فرحو فرحة كبيرة وقالو لي : استاذ حنا فرحانين مين غادي تقرّينا انت ماشي الميلود
واحد لمسيخيط قال لي : الميلود ما عمرو قرينا نعاه شي حاجة .كان قاتلنا غير بالتربية التشكيلية
ضحكت وقلت ليهوم : هاد العام موحال الى غادي تلقاو الوقت باش ترسمو
الجزء الثالث : مين المعلم الجديد وصل لمرزوك
دازت واحد 10 أيام كنت نخدم فيها مع التلاميد ديالي اللي قسمتهوم الى جوج مجموعات : مجموعة الخامس والسادس وكنت نخدم معاهوم مقرر السنة السادسة والمجموعة الثانية ديال الثالث والرابع واللي قررت نخدم معاهوم بالمقرر ديال الثالث حيت اكتاشفت باللي التلاميذ اللي كانو عند الميلود ما يعرفو يقراو حتى حرف فالفرنسية.
بالنسبة للأول والثاني كنت مرة مرة نضور جيهتهوم ونقرّيهوم شوية قراءة وتعبير ورياضيات.
المهم واحد النهار كنا فالاستراحة.شي شوية بانت لينا طوموبيلا بيضا من النوع رونو4 جايا تتمشى بحال الفكرون.مولاها حيت ماكانش عارف الطريق كان كل 100 متر يوقف..دازت يمكن ربع ساعة وصل لتحت المدرسة ونزل من الطوموبيل.
اول مرة نشوف واحد السيد عظيم الجثة يتجه لجيهتنا.التلاميذ غير من الشوفة اللّولى خافو منو .
مساكين قالو لي : شكون هادا أأستاذ؟
طمأنتهوم : ما تخافوش هادا ما يكون غير الأستاذ الجديد ديال الأول والثاني
دابا التلاميد ديال الأول والثاني هوما اللي شدّاتهوم الرعدة .كان عليا نشجعهوم :
ما تخافوش هادا أستاذ ظريّف انا نعرفو مزيان.واخّا يبان ليكوم صحيح راه يحشم.
داك الشي اللي قلت للتلاميذ ما منّوش .أنا بداتي خلعني.
يا الله وصل لعندنا ، قال واحد السلام عليكم غير ديال هادوك اللي ناويين يسرقو البانكا (banque)
شاف التلاميذ اللي كانو جامدين فبلايصهوم وقال لي : فينا هوما لبراهش ديالي ؟
جاوبتو : أستاذ شرّفنا بعدا بالإسم ديالك .
حنْززْ فيا وقال : وأنت بعدا شكونْ ؟
_ انا الاستاذ عبد الحميد
_ متشرفين .أنا سمّيني بوعمامة
_ التلاميذ الأعزاء نقدّم ليكوم الأستاذ بوعمامة
خونا بالله قال للتلاميذ : أجيو قربومنّي ما تخافوش ما غاديش ناكلكوم
التلاميذ شي وحدين قربو وشي وحدين بقاو فبلايصهوم.
بوعمامة قرّب من واحد كبير وقال ليه : واش تعرف أدّير بحال لحمار ؟
التلميد هزْ راسو بحال اللى باغي يقول ليه " ما عارفش"
بوعمامة جاوبو " حيت أنت حمار "
التلميذ قال لو بكل عفوية : سْميْتي مجيد
كان علي التدخّل باش ما يوقع ما لا تحمد عقباه: ولدي مجيد الأستاد بوعمامة كان يقصد واش تعرف تقلد لحمار فالنهيق؟
مجيد ضحك وقال لي : هادي يعرفها حتى الولد اللي ما عمرو دخل للمدرسة
بوعمامة ضحك وقال لو : انا غادي نقلد صوت لحمار.
حيييييييييحان حيييييييييحااااااااااان
فعلا قلدو لدرجة ان صوتو كان أحسن من نهيق الحمار وبالطبع خوكم الحوميدي فالتقشاب ما كاينش اللي يقدر عليه .بالطبع كانت مني هاد الدعابة :
_ أستاذ بوعمامة اللي شافك ما يقول غير حمار
التلاميد كولهوم ماتو بالضحك ولكن بوعمامة علّا يدو باغي يضربني : أنا حمار !!!!!!
_ سّي بوعمامة برّد ، راني ما عايرتكش بالعكس انت فنان حيت كتتقن تقليد الأصوات.
دابا بوعمامة بحال الى حس بالقوة ديالو وشوية علّى اكتافو وقال لي : معلوم انا نقلد جميع الأصوات
شفت فيه : واخّا يا الله قلّد صوت الحلوف .
صافي بوعمامة طاح فالشبكة .ما عرفتش واش قلدو أو لا ولكن المنظر ديالو وهو يصرخ راه ديال الحلوف ديال الغابة.دابا نحمد الله راني شفت الحلوف
من بعد التلاميذ بداو يقربو منو وكل واحد يطلب منّو تقليد صوت معين.
دازت تقريبا ساعة وسي بوعمامة قلّد فيها أصوات كل الكائنات الحية
الحمد لله سالات الاستراحة ومشيت لقسمي وخلّيتو مع التلاميد ديالو.
مع ديك الوحدة والنص خرّجت التلاميذ.خونا بالله شافني وقال لي : ياك الخروج مع الجوج و30 دقيقة
_ فعلا سّي بوعمامة ولكن أنا تابعاني الطريق.
_ اصبر نوصلك معايا
_ بارك الله فيك عندي لاموطو
_ واه غادي تمشي بيها لوجدة
كان علي نشرحو باش يعرف باللي راني ندير لانافيط مع شي أساتذة
هاد خونا بالله كان ناويني نبقى نمشي ونجي معاه
انا بغيت نبيّن لو من الأول باللي ما معاناش
على كل حال مع خونا بالله مغامرات كثيرة .غادي نحكي ليكوم عليها في الحلقات القادمة
الى اللقاء مع الحلقة رقم 11 ومغامرات بوعمامة
|
|
|
|  |
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
130الشكر 
