مذكرات معلّم في البادية (2005/........) - الصفحة 7 - منتديات الأستاذ التعليمية التربوية المغربية : فريق واحد لتعليم رائد

2014-11-19, 08:34

رقم المشاركة : 31

الرميساء

أستـــــاذ(ة) ذهبــــي

إحصائية العضو

الرميساء غير متواجد حالياً

رد: مذكرات معلّم في البادية (2005/........)

قصة جميلة لنمودج من المعلمين المغاربة تميزت بالعفوية والصدق في التعبير
سرد رائع أخي الفاضل جعلنا نستمتع ونحن نتابع أحداث هذه القصة
أتمنى لك التوفيق في مشوارك المهني وايضا في عالم الكاتبة
لك ودي وتقديري

التوقيع

2014-11-19, 08:52

رقم المشاركة : 32

فاطمة الزهراء

بروفســــــــور

إحصائية العضو

فاطمة الزهراء غير متواجد حالياً

رد: مذكرات معلّم في البادية (2005/........)

ههههههههههههههههههه
كثرة الهم تضحك
أخي حوميدي أولا السلام عليكم ورحمة الله وبركاته
هذا أول موضوع لك أدخله بعد غيابات كثيرة
كنت مخاصمة مع راسي ههههههههههههههه
ثانيا
كعادتك متمكن من قواعد السرد المتسلسل ومتقن لفنون السبك القصصي ...
مذكراتك مشوقة تشد الأنفاس وتغري بالمتابعة وتبهج القلب
هنا ,,,ليس بوسعي أن أكون أكثر من مستمعة
تسترق صوت الصور الساحرة الهاطلة
من هذه اللوحات الصادقة , و في أحسن الأحوال أكون عيناً تلتهم السطور بنهم ....
بانتظار الكثير يروي الذائقة العطشى....
ملحوظة:راني يلا وصلت للحلقة الثالثة ....باقا معطلة .....معكازة بامتياز
تصلح أن تترجم مسلسلا تلفزيونيا على الأقل سيكون مناسبا لكل الأذواق بدل ما يعرض الآن من أعمال مقرفة تصيبنا بالغثيان و الإشمئزاز
ماأيك ؟؟؟؟؟؟؟؟

لك كل الشكر والتقدير

التوقيع

الوفاء أن تراعي وداد لحظة ولا تنس جميل من أفادك لفظة"

2014-11-20, 20:03

رقم المشاركة : 33

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في البادية (2005/........)

اقتباس:

المشاركة الأصلية كتبت بواسطة الرميساء

أهلا وسهلا ومرحبا بالأخت الرميساء في عالم مذكراتي في البادية.شكرا على كل كلمة كتبتها في حقي وأنا جد سعيد لأنه بكل بساطة تفاعلت مع موضوعي وطبعا قد راقك المضمون
هذه مذكرات نابعة من الواقع المعاش وكتبتها بكل تلقائية وعفوية مستعملا الدارجة المغربية حتى تكون أكثر واقعية.
بارك الله فيك على المتابعة وفي انتظار الحلقة رقم 10 لك مني أجمل تحية وأحلى أمنية

التوقيع

2014-11-20, 20:12

رقم المشاركة : 34

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في البادية (2005/........)

اقتباس:

المشاركة الأصلية كتبت بواسطة فاطمة الزهراء

:d :d:d

لك كل الشكر والتقدير

وعليكم السلام أختي فاطمة الزهراء.الله يفرحك ويعطيك كل ما تمنيتي.
التعليق ديالك أثلج صدري وجعل الدم يجري في عروقي وطبعا القلب انشرح ودقاته كادت أن تشبه أغنية الربيع ( انا عارف عيّقت شي شوية )
تصوري كون كانو 3 ديال التعاليق بحال هادا خوك الحوميدي يبقى يكتب المذكرات ديالو 24 ساعة على 24 بدون توقف
ههههه
ولكن شكون أدّاها فيك الزّميطة نهار العيد ؟
على كل حال أنا مستمر في كتابتها ودائما انتظر تعليقاتكم وردودكم وطبعا تشجيعكم.كل أملي أن أوفق في سرد ما عشته وأن اتذكر كل صغيرة وكبيرة والحمد لله الأمور لحد الساعة على أحسن ما يرام
للإشارة وهذه دائما أقولها : أنا من الذين يكتبون على المباشر ولا استعمل مسودة قط
لذا كتاباتي لها علاقة مع " مجاجي " هههه
تحياتي اختي فاطمة الزهراء ومن الآن اعتبرك مشجعة رسمية لي
ليلتك مباركة والى اللقاء

التوقيع

2014-11-20, 22:03

رقم المشاركة : 35

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في البادية (2005/........)

الحلقة التاسعة : العشرة مع الميلود

الجزء الأول : قصة الكاشير والفرماج

الصراحة العشرة مع الميلود دايزها لكلام .خونا بالله واخّا معكاز ولكن مسكين علاقتي معاه طيبة.كنّا تقريبا نتلاقاوْ فالاستراحة ديال لحضاش والنص .كنت نمشي عندو للقسم ديالو.في أغلب الأحيان نلقاه يا الله فاش فاق من النعاس ولكن شي مرّات نلقاه موجّد أتاي .خوكم الحوميدي كان يجيب معاه شي مرّات الماكلة إما لعشى ديال البارح أو المرقة اللي شاطت من لغدى وبطبيعة الحال ديما الفرماج والكاشير.
واحد النهار جا الميلود أعطى شوية كاشير لواحد البنت.باقي عاقل عليها كنّا نعيطو ليها عويشة.الصراحة هادي أنظف بنت عرفتها فالعالم القروي.تلبس مزيان وكانت تتعطّر.واه زعما أفخم العطور....من بعد عرفت باللي الأم ديالها كانت عايشة فلمدينة وعندها الباكلوريا.
هاد البنت كانت ذكية مين اعطاها الميلود المورصو ديال الكاشير.تصورو أنها ما كلاتوش، بالعكس أعطاتو لواحد البنت مسيكينة .أنا فهمت المقصود من البنت .هي هاديك جمعت التلاميذ كاملين وقلت ليهوم : آش ظْهر ليكوم نديرو شي زردة بالكاشير والفرماج.
التلاميذ تقريبا كولهوم جاوبوني : نْعامْ أسّي باغْيينْ
الميلود ضحك وقال ليهوم : كل واحد فيكوم يجيب معاه 5 ديال دراهم
شي وحدين بحال الى حدْرو راسهوم .مساكين مية فلمية ما يقدروش يجيبو المبلغ اللي طلبو الميلود.
شافو فيا زعما باش نقول شي حاجة.فعلا الحوميدي سلّاك لوحايلْ : وليداتي أنا اللي غادي نخلّص عليكوم الكاشير والفرماج وحتى الخبز
التلاميذ فرحو وكولهوم بداوْ يهتفو ويغوْتو : عاش سّي حميد
الميلود حتى هو بغى يرضي التلاميذ : اوى أنا غادي نخلّص عليكوم الموناضا
التلاميذ زادو غوْتو : عاش سّي الميلود وعاش سّي حميد
المهم الميلود ضارْ لعندي وقال لي :
_ دابا وقتاش نديرو هاد المشروع ؟
_ من غدّا أخويا الميلود
الميلود تعجّبْ : واهْ دغيا بغيتي تبرّع التلاميد !!!!!
_ اسمع أسّي الميلود ، التلاميذ راهوم فرحانين وراه اللي طلبتيها منهوم يديروها
_ زعما يراجعو دروسهوم ؟ هادي راهوم يديروها بلا صداع
ضحكت من كلام الميلود
_ عندك الحق ولكن مزيانة ليك أنت
_ كيفاش زعما ؟
_ مرة مرة اطلب منهوم يجيبو ليك برّاد أتاي أو زلافة حريرة أو شي مْسمْنات
_ راني موالف نطلب منهوم وقليل فين يجيبو
_ دابا غادي يبرْعوك
جات الطناش ودخّلنا التلاميد.هي هاديك بْدينا فالدروس.شي شوية جات عندي عويشة وقالت لي : أستاذ بغيت نجيب البيض ، واش ممكن ؟
شفت فيها وبانت لي حشمانة
_ بيض مسلوق ، ياكي ؟
_ خاصني نسلقو ؟
_ اوى الى بغيتي تكمْلي الخير ديالك
بدون تردد قالت لي : واخا أستاذ غادي نقولها لْماما
قبل ما ترجع لبلاصتها قلت ليها باش تجيب على الأقل 10 ديال البيضات .واخا حنا 22 ، نقسمو بيضة على جوج.
قبل الخروج خلّيت ليهوم التمارين ديال غدّا وقلت ليهوم باش كل واحد يجيب معاه كاس باش يشرب الموناضا
هي هاديك ركبت فالموطور ديالي قاصد لقرارشة.
آه نسيت باش نقول ليكوم باللي واحد البنت جديدة سكنات هي والام ديالها عند شي واحد والمشكل هاد الدار بعيدة على المدرسة تقريبا 3 كيلومتر.خوكم الحوميدي ديما مول الخير، اقترحت على الواليدة ديالها باش نبقى ندّيها ونجيبها معيايا كل نهار.
هاد السيدة قالت لي : شحال نخلْصك أسيدي ؟
جاوبتها : برحمة الوالدين
مسكينة ما كانتش ناوية بحال هاد لكلام.
من بعد كانت تْصيفط مع بنتها 4 ديال البيضات مسلوقة أو شوية زيت الزيتون وبعض المرات إما الحرشة أو الخبز.
مين وصلتها للدار : لقيت الأم ديالها واقفة وفي يدّيها ميكة كحلة .قرْبات منّي وحطّات الميكة فوق الكرسي ديال لاموطو ومشات تجري.
زعما آش زعما يكون فهاد الميكة ؟
قلت مع راسي " مع غادي يكون غير الخير." هي هاديك رْبطت الميكة وتابعت طريقي باش نتلاقى باصحابي.
مين وصلت لقيتهوم عند لفقيه .كانو كي العادة يتْغدّاوْ
لفقيه قال لي : يا الله أسّي حميد لا سلام على طعام أدخل دغيا راه الطبسي غادي يْسالي معاه صاحبك نور الدين.
صاحبي نور الدين مسكين ماكانو عندو اسْنان .كان يا الله ياكول غير الحاجة الرطبة .الطبسي باقي عاقل فيه لبطاطا بالدجاج.هي هاديك قلت لفقيه : نور الدين ما عندي ما نخاف من جيهتو، الخطر هو أنت.انتوما الطّلبا كتاكلوالماكلة سخونة وبجوج يدّين
لفقيه شحال ضحك وقال لي : انت باينة تعاشرتي مع الفقها ؟
جاوبتو : عندي معاهوم مغامرات وكنعرف خْروبهوم....
المهم درنا يدّينا وكلينا اللي كتّب الله ..من اللحم حيت نور الدين ما عندو اسنان باش يطمع فيه.
شي شوية مشينا لوجدة شبعانين.
خوكم الحوميدي أول ما وصل لدارو ، حلْ الميكة.
في نظركوم واش لقيت ؟
هاد السيدة اعطاتني شوية لوز وقرعة سمن.
سبحان الله العظيم الناس اللي ما فحالهومش هوما اللي يكونو كرماء.شحال مسكينة دعيت معاها

الجزء الثاني :مين التلاميذ تبرعو بالكاشيروالفرماج

فالغد ليه التلاميذ كولهوم خرجو من القسم باش يستقبلوني.خاصكوم تشوفوني باش تعرفو علاش.
خوكم الحوميدي جايب صندوق معمّر بما لذّ وطاب من كاشير وفرماج وخبز وموناضا.
التلاميذ غير شافو الخيرات ، فرحو.شي ينقز وشي يصفق وشي يصرخ.المهم الحيحة نايضة
حتى الميلود هاد المرة كان فايق واخّا ماشي من العادة ديالو.
خوكم الحوميدي نزل من الموطور وقال لشي تلاميد صحاح : يا الله هزّو الصندوق وادّيوَهْ للقسم عندي.
دابا خاصنا نقراوْ باش نجوعو ومين نجوعو مع لحضاش غادي ناكلو.
يا الله للقسم باش نقراوْ
التلاميذ كولهوم جراوْ للقسم.الميلود بقى واقف
_ مالك أخويا الميلود ؟
_ أخويا مْفيّقني مع النبّوري باش تقول لي الماكلة حتى لحضاش.ما هْنا فكرة هادي
الميلود خاص اللي يقنعو : خويا الميلود راها التسعة .يعني ما زال الصباح.سير اخدم شوية باش تفتح ليك الشهية....
قاطعني : راها مفتوحة وراني باغي ناكول
كان علي نضورْ فيه ضورة شيطانية : أسّي الميلود سير تخدم وباركة من خدمة لبراهش.
المهم مع ديك لحضاش قلت للتلاميذ : سيرو غسلو يدّيكوم ومن بعد صايبو الطْوابل.
من بعد جاوْ باش يعاونوني.الميلود حتى هو جا مع التلاميد ديالو.
أول حاجة درنا قطّعنا الخبز والكاشير .شي تلاميذ كبار وزعو الكيسان والموناضا.
عويشة كانت عند كلمتها حتى هي جابت البيض المسلوق .جابت 22 بيضة مسلوقة ومقشرة.هاد البنت تفهم كولشي.
المهم كل واحد كلى الكاسكروط ديالو .واحد التلميد باقي عاقل ضحكنا مين قال لينا : انا ما غاديش ناكول 3 أيام حيت كرشي عمرات
دازت تقريبا ساعة كلها نشاط وفرحة والصراحة كانت أحسن من 100 حفلة منظمة.
مع ديك الطناش استأنفنا العمل ديالنا حتى لموعد الرجوع.

الجزء الثالث : مين الميلود عرف باللي لكدوب ما ينفعشْ

علاقتي مع السكان رجعات مزيانة .تصورو أن بعض الآباء كانو مرة مرة يدوزو على المدرسة .كنت نعطيهوم الوقت بالتحية ونسوّل على الاحوال ديالهوم.حاجة مهمة اكتاشفوها : كل ما يدوزو يلقاو الميلود ناعس .
دابا راهوم عرفو قيمتي وعرفو باللي حوميدي واخا يخدم مع التلاميد غير 4 سوايع فالنهار راها فايت كافية ليهوم وعرفو باللي خونا الميلود واخا باركِْ مع اولادهوم تقريبا النهار كامل ولكن بدون فائدة.
شي أيامات دازو الميلود تغيب على المدرسة لمدة تقريبا 4 أيام.كان عندو شي طارئ الى ما خفت نكدب كانت بنتو والزوج ديالها تعرضو لحادتة سير ولكن الحمد لله لا الولد ولا البنت ما وقع ليهوم والو ولكن الطوموبيل كْلاتها بالمعقول.الاخ الميلود النهار الأول وباقي عاقل كان يوم الاثنين لقيناه في وجدة وقال لي : دخّل التلاميد عندك فالقسم والى سوْلك المدير علي عنداك تقول ليه باللي راني في وجدة
خوكم الحوميدي ما عمروكان كداب ، جاوبتو : ما غاديش نخبرو بالغياب ديالك .كونْ هاني ولكن الى سوّلْ عليك غادي نقول لو الحقيقة.
الميلود زْعف وغضبْ : أنت ما تسْواشْ أصاحبي ...كنت نعتقد باللي راجل ولكن....
المهم ما نشقاش نقول ليكوم باللي شبّعني هضرة ومعيور.
الحمد لله كان نور الدين وموسى وقالو ليه : غير سير اصاحبي راه حميد غير يضحك معاك.
المهم فالسيارة قال لي نور الدين : ساكْ ما أسّي حميد غادي تعلم بيه ؟
ضحكت وجاوبتو : ما غاديش نعلم بيه ولكن كاين اللي غادي يعلم بيه.
لخّوت فهمو قصدي
_ عندك الحق .انت كنتي تجي غير معطّل وما رحموكش.هادا راه مغيّب نهار وعالم الله الى ما غادي يزيد نهار أو يومين.
على كل حال غير وصلت لمرزوك ، دخلت التلاميذ ديال الميلود للقسم ديالهوم وقلت ليهوم خرجو الرياضيات باش تخدمو التمارين.
التلاميذ شافو فيا .واحد فيهوم سميتو منير قال لي : استاد هاد الدرس ما فاهمينوشْ
جاوبتو : غادي نجي ونشرحو ليكوم ، غير اصبرو عليا
فعلا بعد ما قرّيت شوية التلاميد ديالي ، مشيت للقسم ديال الميلود باش نْوَرّي للتلاميد كيفاش تكون لقراية الحقيقية.
اول مرة كنشوف تلاميد عاجبهوم الحال بالمعقول لدرجة أنهوم قالو لي بكل عفوية وتلقائية : الله يخلّيك أأستاد الى ما تبقى تشرح لينا الرياضيات.الطريقة ديال الشرح ديالك عجباتنا
مع ديك العشرة والنص اتاصل بيا المدير وأول حاجة سوّلني على الميلود.خوكم كي ما سبق لي قلت ، حكيت للمدير آش واقع للميلود يعني الحادثة ديال بنتو.
المدير كان راجل ونص ، قال لي : شكرا استاذ عبد الحميد على الابلاغ.
انا ما فهمت والو وبالعكس بانت لي بحال الى قفّرتها .شي شوية شرح لي الأمر وفهمت باللي فعلا قمت بعمل جليل.
تصورو أن بعض السكان ديال المنظقة مشاوْ لعند المدير باش يوصلو لو خبر غياب الميلود وقالو لو راحنا شفناه يتسارى في وجدة ويمكن غادي يتغيب يوم أو يومين.
دابا المدير عرف الحقيقة واقتانع باللي السكان باغيين يخسرو العلاقة بين المعلمين والادارة
قبل ما يودعني قال لي باللي غادي يتّاصل بالميلود باش يْحمّد لو وغادي يقول لو باش ياخود رخصة ديال 3 أيام حتى يْفضّي الامور ديالو وأنا غادي نْقرّي التلاميذ ديالو .
بالطبع الميلود فرح والدليل أنه اتّاصل بيا وقال لي : خويا حميد اسمح لي على لمعايرة.عندك الحق ما كاينش أحسن من الصدق.
وزاد قال لي بأن المدير قالو ما تجي حتى لجمعة غير خودْ راحتك.السكان غادي نعطيهوم درس ما عمرو ما ينساوهْ
ما نشقاش نقول ليكوم أن هاديك 4 أيام جعلت التلاميد ينساوْ الميلود .الحمد لله ما كانتشْ أكثر والّا كانو غادي ينكروه ...هههههههه

يتبع إن شاء الله الحلقة العاشرة

التوقيع


	للتوصل بجديد الموقع أدخل بريدك الإلكتروني ثم فعل اشتراكك من علبة رسائلك :