مذكرات معلّم في البادية (2005/........) - الصفحة 4 - منتديات الأستاذ التعليمية التربوية المغربية : فريق واحد لتعليم رائد

2014-10-31, 20:17

رقم المشاركة : 16

a.khouya

مراقب عام

إحصائية العضو

a.khouya غير متواجد حالياً

رد: مذكرات معلّم في البادية (2005/........)

استمتعت بقراءة حلقات القصة.اعلم انك بارع في السرد
سلم القلم وسلمت الانامل
تحيتي

التوقيع

يبقى الصمت أفضل
حين يغيب الرد

2014-11-01, 19:48

رقم المشاركة : 17

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في البادية (2005/........)

الحلقة الخامسة : بداية المشاكل مع السكان ومع المدير(1)
الجزء الأول : بداية المشاكل (1)
داز تقريبا أسبوع وخوكم حوميدي يمشي مع الإخوان على الطريقة اللي فرضو عليه وهي فالصباح نخرجو من وجدة مع التمنية وفلعشية نرجعو مع الطناش والنص.الميلوك كان الله يجازيه بخير يقابل ليا التلاميذ ديالي لا فالصباح ولا فلعشية.هو فالحقيقة هو السبب الرئيسي ديال المشاكل.السكان كانو يشوفوه كل نهار ويبان ليهوم غير هو اللي خدّام ، حيت القسم ديالو مفتوح أما القسم ديالي كان مسدود .
واحد النهار يا الله فاش وصلت قال لي الميلود بعد التحية الصباحية :
_ خويا حميد المدير اتّاصل بيا هادي نص ساعة وسوّل عليك .
ردّيت عليه : اوى آش قولتي ليه ؟
_ قلت لو راك باقي ما وصلتي وقلت لو راه ما يكون غير الموطور دارها بيك .
_ مزيان عندك الحق ، حتى انا داك الشي اللي غادي نقول ليه.
يا الله بغيت نمشي للقسم ديالي والميلود يعيّطْ عليا :
_ أجي باقي ما ساليت كلامي ...
_ واه ...ياكْ ما شي حاجة أخرى ماشي زينة للسماع
ضحك الميلوك : بحال الى علمك الله
قرّبت منّو : الله يسمّعنا سماع الخير
_ اودّي موحال الى كاين شي خير فهاد لكلام
_ اوى غير كول راحنا مستعدّين
_ اللي كاين يا خويا حميد ، المدير راها طايرا لو بزاف منك.
خوكم الحوميدي بقى ساكت وينتظر الميلود يشرح لو .
_ راه فخبارو كولشي .الصباح وقتاش تجي ولعشية وقتاش تمشي.راه قالها لي بالطاي طاي
الميلود شافْ فيا وزاد قال لي : خويا حميد انا يظهرأن السكان باعوك وماشي بعيد تكون كاع لقبيلة مورا هاد الشي
_ ولكن يا خويا الميلود ، السكان ما زال ما شفتهوم.يا الله شي جوج ديال الناس كانو جاوْ يسلمو عليك.ياك باقي عاقل : صاحبك الشيشان وهاداك الرجل الزين عبد العزيز
الميلود هزْ راسو : أخويا هاد السكان راهوم موالفين يشكيوْ بالمعلّمين.راهوم من قبل شكاوْ بخونا شْعيبي وبالهواري
هاد الجواب الصراحة فرحني.ااحمد لله أنا ماشي اللّول وهادا عادي حيت اللي جا لهاد القنت ما يمكنش يبقى النهار كامل والّا موحال يلقى المركوب
_ شوف خويا الميلود غدّا ان شاء الله غادي نمشي ديريكت عند المدير ونشرح لو اللي كاين.
الميلود استحسن الفكرة: مزيان ولكن لعشية وقتاش غادي ترجع لوجدة ؟
_ كي العادة مع الطناش والنص.
_ خويا حميد علاش ما تخلّيهاش الوحدة ؟
_ عندك الحق ولكن لخّوت راني ما خبرتهومش
_ ما تخافش ما يقدروش يمشيوْ بلا بيك ومن الفوق انا غادي نتّاصل بيهوم ونقول ليهوم الموطور ديال حميد حبسْ لو فالطريق.
المهم مشيت للقسم ديالي وخدمت مع التلاميد حتى للساعة لحداش والنص.
فوقت الاستراحة مشيت عند الميلود ولقيتو داير كاس أتاي .هي هاديك حطّيت فالطابلة الكاشير والفرماج وجوج خبزات.
الميلود ابتاسم : راك مولا خير أخويا
ردّيت عليه : حميد عايش فالخير من بكري
الميلود جبدْ 20 درهم وقال لي : خويا حميد من اليوم فيفتي فيفتي فالماكلة.حتى انا خاصني نخلص حقي فالكاشير والفرماج
المهم كلينا وتحدثنا في أمور كثيرة ومرة مرة كنا نتكلمو على السكان
- قولْ لي خويا الميلود ، كي دايرة علاقتك مع قوم مرزوك ؟
الميلود ضحك وقال لي : آش غادي نقول لك علاقة فشي شكل .شي وحدين يجيوْ لعندي فلعشية ويبركو معايا حتى لوقت المغرب ويمشيو في حالاتهوم
_ اوى بعدا راهوم يجيبو لك ما تاكول وتشرب.
_ آش عندهوم ما يجيبو الله يهديك .....
_ كيفاش ما فهمتش
_ أسيدي هوما اللي يشمو ريحة المرميطة ويجيو باش ياكلوهالي
_ تبارك الله خويا الميلود حتى نمشي عاد تبان لك الكاميلة
_ أخويا حميد واش بغيتني نصوم النهار كامل
_ واخا أسيدي غادي نجيب معايا كل نهار كاسكروط ونتقاسموه
_ واخا ولكن فيفتي فيفتي
_ مشات !!!!!!

الجزء الثاني : الحديث عن المشاكل فالسيارة (2)

مع الوحدة شدّيت الطريق لقرارشة.بالطبع لقيت نور الدين وأمين وموسى يستانّاو فيا وباينة عليهوم ما عاجبهومش الحال.
نور الدين هو اللي بدى النقاش :
_ أخويا حميد كيفاش هاد التعطيلة ؟
جاوبتو : ياكْ قالكوم سّي الميلود اللي كاين
أمين تابع النقاش : ما قال لينا والو
جاوبتو : راه ماشي معاك اللي تكلّم مع نور الدين
موسى بغى يوضع حد للنقاش : صافي ما كاين مشكل.السيد خسر ليه الموطور فالطريق .اوى ما فيها باس الى اليوما مشينا مع الوحدة والنص
شفت فموسى وقلت لو : خويا موسى ، حتى غدّا ان شاء الله غادي نجي مع الوحدة ويمكن كاع الايام ديال الخدمة
نور الدين طارت لو : ها اللي ما بغيناش ؟
بالطبع كان علي نقول ليهوم اللي كاين، ربما هاد الاخوان يشوفو لي شي حل.
فعلا موسى اتّافق معايا على التوقيت وزاد قال لي : خاصك غدّا تمشي عند المدير وتشوف آش تحت راسو
فالطوموبيل كان الحديث غير على سكان مروزك وحتى على الميلود.
شي شوية قال لي موسى : خويا حميد انا يبان ليا أن الميلود هو السبب ديالك فهاد المشكل اللي راك واقع فيه.
هي هاديك شرح لي : الميلود يبقى النهار كامل فالمدرسة.السكان مين يشوفوه يقولو باللي راه خدّام ويشوفو القسم ديالك غادي يحسبوك سالت.
_ اوى المعمول ؟
_ خاصو حتى هو يبقى يمشي ويرجع كل يوم
_ زعما ما خاصّوش يخيّم فالمدرسة
أمين ضحك وقال لينا : الميلود ما يقدرش يدير لانافيط حيت ما يقدرش يتمشى.راه مسكين دار عملية
اللي كان ختمت الموضوع وقلت ليهوم باللي غدّا يبان لخبر.
وصلنا لوجدة وتفارقت مع الاخوان بعدما طلبت منهوم باش غدا يجيو شوية بكري حيت خاصني ندوز عند المدير.
نور الدين جاوبني : ما كاين مشكل .نلقاوك مع السبعة والنص

الجزء الثالث : زيارة المدير

فالصباح يا الله وصلت لفرعية لقرارشة ، خديت الموطور ومشيت لبصارة .الأخ موسى كان نصحني باش نمشي مع واحد الطريق مختصرة.هي فالحقيقة بيست ولكن دغيا نوصل ومنها نمشي لواحد السيكليست حيت كان عندي مشكل فالموطور.
فالطريق حبسات ليا الدراجة.هاد المرة ماشي المشكل ديال البوجي او حتى الرويضة.اللي كاين ما بغاتش تتمشى.
جاب الله ما كنتش بعيد على هاد البلدة.تمشيت واحد ربع ساعة ووصلت عند السيكليست .
دام الاصلاح ديال الموطور ساعة تقريبا .مين خرجت من عندو كانت الساعة تقريبا العشرة.وصلت للمركزية كانو الاساتذة فالاستراحة.هي هاديك عيطو عليا باش نشرب معاهوم أتاي...ولكن كان خاصني نشوف بعدا المدير.
الاخوان قالو لي : أجي بعدا واحكي لينا على اولاد مرزوك.راحنا نعرفوهوم مزيان.
حكيت ليهوم اللي كاين وهوما يسمعوني .من بعد واحد فيهوم قال لي : هادوك السكان راسا خامجة.المعلم اللي يخدم عندهوم يشكيوْ بيه
شي معلم آخور قال لي : الى بغيت تتهنى من صداعهوم ، ديرْ بحال الميلود
معلم ثالث قال لي : وايّاك هادو بغاونا نكونو خدّاما ديالهوم
المهم الاخوان قالو لي ما تقلش راحنا معاك
هي هاديك مشيت عند المدير .بعد التحية والسلام ، اعطاني المدير ورقة وقال لي هدا استفسار خاصك ترد عليه .
درت راسي ما عارف والو : ديالاش هاد الاستفسار ؟
المدير ماشي من دوك الناس اللي يرضعو اصباعهوم : شوف الله يخليك راك عارف كولشي
_ الله يخلّيك يا السيد المدير أنت عاطيني استفسار وتقول لي عارف.زعما آش عارف ؟
_ واخا أسّي عبد الحميد السكان في مرزوك كيشكّاو منك حيت كيقولو راك تجي معطّل وكتمشي بكري.واش هاد الشي كاين او لا ؟
خوكم الحوميدي ديما صريح : كاين ، اوى من بعد
_ اسّي عبد الحميد راه عندك استعمال الزمان خاصك تحتارمو وهو الدخول من التامنة صباحا والخروج مع الثانية والنصف
_ ما يمكنش ليا نطبق هاد التوقيت في ظروف بحال هادي.
_ كيفاش زعما ؟
_ اوى الموطور يحبس مرة مرة وزيد عليها الطريق واعرة كلها حفاري وحجر.
_ عندك الحق .حتى انا شرحت للسكان باللي الاستاذ ما يقدرش يوصل فالوقت حيت عندو مشكل مع المواصلات فالصباح ولكن فلعشية خاصك ترجع فالوقت .
_ ما يمكنش خاصني نمشي بكري باش نلحق على الاساتذة والا خلّاوني
_ شوف أأستاذ خاصك تحتارم الوقت والا غادي نكتب بيك.
قبل ما نخليه قلت لو : غادي نرسل ليك جواب الاستفسار مع الميلود مين غدّا يوصل عندك
_ وهو كذلك
بالطبع يا الله خرجت من عند المدير عيّط لي صاحبي حميد وقال لي : ياكْ
ما داروها ؟
جاوبتو : داروها وها العربون: المدير اعطاني استفسار وخاصني نجاوب عليه.

الى اللقاء مع الحلقة السادسة

التوقيع

2014-11-01, 20:19

رقم المشاركة : 18

a.khouya

مراقب عام

إحصائية العضو

a.khouya غير متواجد حالياً

رد: مذكرات معلّم في البادية (2005/........)

لانافيط هي سبب العديد من المشاكل.
هناك بعض الاشخاص سامحهم الله لا شغل لهم الا الاستاذ
متى دخل ومتى خرج...ولو كان مريضا وبترخيص..
كان الله في العون
اتبارك الله عليك ...الذاكرة قوية
سلامي

التوقيع

يبقى الصمت أفضل
حين يغيب الرد

2014-11-03, 20:07

رقم المشاركة : 19

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في البادية (2005/........)

الحلقة السادسة : بداية المشاكل مع السكان ومع المدير(2)

الجزء الرابع :بعدما طلع لي الدم

وصلت لمرزوك مع لحضاش وبالطبع طالع ليا الدم وما عندي كانة للخدمة.لقيت خونا الميلود ناعس ومن الفوق يتموسق ( يستمع الى الموسيقى ) مع راسو.التلاميذ ديالو خدامين بالمعقول : كانو يرسمو ويلونو في كتاب التربية التشكيلية.
شوفو هاد خونا بالله ، كل ما ندخل عندو نلقى التلاميد ديالو ديما غير يرسمو أو يلونو.هاد المرة ما بغيتش نفيقو.هي هاديك قلت مع راسي نْدير شي طلّة ونشوف كيفاش دايرة الخدمة ديال الأستاذ.ما نكدبش عليكم الى قلت ليكوم باللي خونا بالله راه محطم الرقم القياسي ....ردّو بالكوم فالتربية التشكيلية !!!!! تصورو أن هاد لبراهش طحنو تقريبا 16 درس من 24 درس مقررة فالبرامج ديال وزارة التربية الوطنية واحنا ما زال في شهر اكتوبر.بالنسبة للرياضيات اوى هادي حاجة أخرى : حتى درس واحد ما مخدوم على حقو وطريقو .بالنسبة للمواد الأخرى : خلّيوْ الجمل راكدْ ههههه.
شفتْ فواحد التلميذ يظهر باللي ذكي وماشي بعيد عندو رغبة كبيرة فالقراءة.الدليل الدفاتر ديالو نقيين وخادم التمارين ديالو ويمكن نقول باللي أن الأغلب ديالها صحيحة.
_ قلْ لي أولدي كاين شي واحد فالدار يعاونك باش تخدم التمارين ؟
جاوبني بدون تردد : الأم ديالي .
الصراحة تعجبت وخاصة راحنا فالبادية والناس هنا أميين ، اللي قاري فيهوم حافظ شي سور قرآنية : واه أمّك قارية !!!!!
رد علي : عندها الباك أأستاذ
أول مرة نسمع باللي إمرأة من لعروبية عندها مستوى عالي والباكلوريا .هاد الملاحظة قلتها لهاد الولد الذكي وبالطبع برهن ليا باللي راه أذكى من داك الشي اللي نتصوّر : أستاذ حنا من لمدينة وراه جينا نسكنو هنا حيت لقينا جو البادية صحي ومفيد.
_ تبارك الله وعندكوم شي دار هنا ؟
_ نعم أستاذ عندنا فيرما كبيرة وفيها الما والضو وعندنا التلفزة والبارابول.
خوكم الحوميدي ديما عزيز عليه التقشاب ومع راه طالع ليا شوية الدم قلت لهاد الطفل الشبه قروي بنبرة التهكم : زعما دالاس ياكْ ولكن خاصكوم غير التيليفون.
هاد التلميذ ضحك وقال لي : ما نقدروش نديروه حيت الركايز ما دايزينش من هاد الجهة
_ ولكن عندكوم البورتابل
_ غير أبّا لعندو يا أستاذ
هزيت راسي باش ننهي الحديت ومنها نوافق على كل كلمة قالها هاد البورجوازي المزيف.
هي هاديك قرّبت من خونا الميلود .نسيت باش نقول ليكوم باللي الراديو هو اللي كان يتموسقْ( يسمع للموسيقى ) ماشي هو .الراديو كان مطفي ، هو كان يشخر .
غير شعلت الراديو على فور جهدو ، خونا بالله قفز من فوق المقاعد وطاح فالأرض بحال شي خنشة ديال البطاطا توزن نص قنطار : اززززدرااااااااف (zdddddroufffffffffffffffffffffff)
غير شافني رجعات فيه الروح وهادا ما منعوش باش يقول ليا : واطيّرتي منّي خلعة واش من خلعة.
خوكم الحوميدي قلبها عليه : أخويا انت اللي خلعتيني .كنت حاسبك مريض .
ناض ودار جوج تنقيزات وقال لي : هانا شوف خوك ديما أون فورمْ (en forme)
_ تبارك الله عليك راك حامض بالنعاس وريحتك راها طالقة
خونا الميلود ماشي من دوك الناس اللي يتقلقو دغيا وهو زيادة على هاد الصفة مراوغ كبير.غير تمْ تمْ ، قال لي : وأنت ياخويا فين هاد التعطيلة ؟ ياكْ ما اسمهان دارتها عاود تاني ؟
_ بالعكس اسمهان بعدما اخديتها للسيكليست راها بخير وعلى خير ..
_ اوى ؟
_ كنت عند المدير .
الميلود راه فهم باللي القضية ما تعجبش .هي هاديك قال للتلاميد : استراحة يا الله اخرجو تستاراحو.
غير التلاميد غبرو ، قال لي : أجي نشربو شي كاس أتاي واحكي لي كولشي.
يا الله الميلود فاش امشى يعمّر المقراج ( الغلّاي) وخوكم تبان لو شي صينية مغطية فوق الطبْلة .قلت للميلود : شوف لهيه ، يمكن شي بركة خرجات ليك من الحَلْمة
الميلود حنزَزْ مزيان ، بحال الى ما تايقْشْ : شكون زعما اللي يكون جاب
هاد البركة ؟
سمعنا شي صوت من برّا يقول : راه جابها عبد العزيز ومين لقاك ناعس ما بغاشْ يفيقكْ وقال لينا مين يفيق الاستاد قولوها لو.
المهم ، كشفنا على الصينية ولقيت براد أتاي ومعاه خبزة وشي بيضات وشوية مسمّن.
كلينا وشربنا بلا ما نهضرو.يمكن الميلود كان عارف باللي دغيا غادي ننفاعل.هادي عندو فيها الحق.
بعدما سالينا من الأكل والشراب حكيت لو كولشي .خونا الميلود سمعني بلا ما قاطعني لحظة واحدة. دازت تقريبا جوج دقايق والميلود كان يخمّم .من بعد قال لي : أشنو هو المعمول دابا ؟
هو اللي جاوب على السؤال ديالو : انا في نظري تشوف مع لخّوت شي توقيت مناسب ...
قاطعتو : ما يبغيوش يا خويا الميلود ومن الفوق تقدر تقول باللي راهوم شادّينّي باليد اللي توجعني
_ كيفاش زعما ؟
_ هوما عارفين باللي المركوب قليل وعلى الخصوص فالصباح
الميلود كان حكيم : شوف احكي ليهوم وقول ليهوم اللي كاين ، ربما يلقاو ليك شي حل
_ عندك الحق.
خليت الميلود ومشيت للقسم ديالي زعما باش نخدم.المشكل ما بقاتش عندي الكانة للخدمة.يا الله دخّلت التلاميذ وأنا نتفكر كلام المدير.ما نكدبش عليكوم يا خوتي اكرهت التلاميد كاملين وكرهت الآباء ديالهوم.شفت فيهوم وقلت ليهوم : هاد النهار ما مقريكومش وحتى واحد ما يسالْ لّي.
التلاميد مساكين حيت هوما ابرياء شافو فيا ساكتين .
شي شوية قلت ليهوم : راني شوية مبرزط .ما نقدرش نقرّيكوم هاد النهار.يمكن غادي نمشي في حالاتي ، ربما غدّا نكون مزيان.
فعلا جمعت حوايجي وصيفطتْ التلاميد لديورهم خلافا لما كنت نقوم بيه، حيت كانو التلاميد ديالي يبقاو مع الميلود حتى للجوج والنص.
الميلود لاحظ هاد التصرف وقال لي : حميد راك كرفصتيها.التلاميد غادي يوصلوها لبّاواتهوم سخونة
قبل ما نركب فالموطور جاوبتو : داكْ الشي اللي أنا باغي

الجزء الخامس : مين تلاقيت إخوان لانافيط.

مين وصلت لفرعية لقرارشة ، لقيت أمين مع لفقيه في حديث عن قال الله وقال الرسول.اول حاجة قلتها لسّي أمين : تبارك الله أخويا أمين والمعلّم آش قال ؟
بجوجهوم شافو فيا .لفقيه ابتاسم : اسّي حميد قولْ بعدا غي السلام عليكم
ردّيت عليه وعليكم السلام
أمين قرّبْ منّي : ياكْ ما تخاصمتي مع الميلود ؟
اضحكت : الميلود غير دريويش
_ اوى شكون اللي طيّرها ليك ؟
_ انتوما أخويا وراكو خرجتو علي وندّمتوني على الانتقال لوجدة
أمين شدني من يدّي : أجي أخويا حميد واشرب شي كاس حليب بارد ومن بعد احكي لينا اللي واقع.
بعدما سمع القصة ديالي مع المدير، حتى هو بْدى يفكّر وقال لي : فعلا مشكل هادا .
شي شوية ، قال لي : غادي نعيَّطْ على لخّوت باش يجيوْ ونشوفو كي نديرو نحلّو المشكل.
يمكن ربع ساعة دازت وموسى ونورالدين يدخلو علينا.للمرة الثالثة حكيت ليهوم اللي واقع وختمت كلامي : دابا آش المعمول ؟
نور الدين قال لي : ما عندو ما يدير .
خرّجت لو الاستفسار : وهادا ما كافيش ؟
موسى كان حكيم : شوف اسّي عبد الحميد ، أنا في نظري ترد على الاستفسار وتقول لو باللي الظروف ديال العمل ما متوفْراش ومن ذلك الحجرة مظلامة والطريق كلها حجر والاهم المواصلات منعدمة وباللي راك تمشي مع أساتذة ديال عين الصفاء
فعلا داك الشي اللي غادي ندير.المهم قلت للإخوان يا الله نرجعو في حالاتنا لوجدة.
يا الله تمشينا شي ربع ساعة ويتّاصل بيا الميلود وقال لي : حميد ، راه سوّل فيك المدير .
_ اوى آش جاوبتيه ؟
_ قلت لو باللي راك عيّان شي شوية وراك مشيتي لوجدة.
_ مزيان واشْ قال ليك ؟
_ قال لي باش نقول لك مين تجي غدّا ماتنساش تجيب جواب الاستفسار
غير ساليت المكالمة ، قلت لخّوت : خونا بالله باقي شاد فيا .راه باغيني نجاوب على الاستفسار.

الجزء السادس : مين بغيت ندبّر على راسي

فالدار لاحظت الزوجة ديالي باللي ما رانيش مزيان.بالطبع قلت ليها اللي كاين.الزوجة ديالي كتعرفني نخدم وما عمرو ما غشّيت فالعمل .لهادا قالت لي : شوف شي واحد يتكلّم مع هاد المدير قبل ما يكتب بيك .
شي شوية بانت لي فكرة : والله الى عندك الحق ...كاين واحد الصديق هو مدير وعندو المعارف فالنيابة.راه يقدر ينفعني.
غادي نمشي عندو دابا.
_ تغدّى عاد سيرْ لعندو.
_ نمشي دابا ما حدْني سخونْ ومن الفوق خاصني نْشدّو فالدار قبل ما يخرج.
فعلا لقيتو كان غادي ينعس .
_ اسمح لي يا سّي محمد الى جيتك فهاد لوقيتة
_ بالعكس راني فرحان بالزيارة ديالك.ادخل.
فعلا دخلنا للصّالة ديال الضيوف وجاب لي كاس موناضا .
كان علي نحكي لو اللي صار من الطاق الطاق للسلام عليكم.اسمعني بلا ما يقاطعني .فالأخير قال لي : ما تقلقش .ما غادي يوقع والو.غير انت عنداك تتغيب على العمل.خاصك تمشي كل يوم للخدمة واعتمد على توقيت ما يضرش التلاميد ديالك.
هي هاديك تفاهمنا نخدم من التسعة حتى للوحدة والنص .
قبل ما نخليه نصحني باش نجاوب على الاستفسار ونعطي للمدير الاسباب اللي جعلتني نخرج قبل الوقت.زاد فرّحني وقال لي : من جهة الاستفسارات ما تضرب ليها حساب ، أي استفسار يوصل للنيابة عندي شي صحابي فمكتب الضبط غادي يغبروه وما عمرو شي حاجة توصل.
هي هاديك رجعت راشقا لي بعدما شكرت صديقي المدير ووعدتو باش نزورو في اقرب فرصة ممكنة
فالغد تلاقيت مع الاخوان ديال لانافيط وكانت الساعة التمنية.الاخوان لاحظو باللي ما بقيتش غضبان وطالع لي الدم كي البارح.أنا حكيت ليهوم كولشي.
هي هاديك قال لي نور الدين : واخّا أسيدي غادي نمشيو مع الاستعمال الجديد ديالك ونشوفو فين غادي يوصّلنا.
يا الله وصلت لمرزوك ، لقيت الميلود ناعس كي العادة وكان عليا نفيقو من النعاس .يا الله فاق فكّر فلفطور.هاد المرة ماكاينش الصينية.
المهم خليتو يوجّد القهوة ومشيت دخّلت التلاميد باش يقراوْ.
خدمت معاهوم هاديك الساعة.شي شوية قالو لي التلاميد شي راجل راه واقف فالباب.
الصراحة أول مرة نشوف هاد السيد.قلت للتلاميد واش هادا أب ديال شي واحد فيكوم؟
كولهوم جاوبوني : لا أستاذ
هي هاديك سلّمت عليه .بعدما رد علي السلام ، قال لي ، انا رئيس جمعية آباء وأولياء التلاميذ
بعد عبارات الترحيب ومتشرفين بالمعرفة ديالكوم ، خونا بالله دخل فالموضوع : سّي عبد الحميد السكان راهوم يتشكّاوْ منّك .
_ كيفاش زعما واش ما رانيش نقرّي ليهوم اولادهوم ؟
_ حاشا ولكن ماراك تجي فالوقت وراك ترجع قبل الوقت
شفت فيه وضحكت : دبْرو لي المركوب ونحتارم التوقيت
_ أخويا هاداك شغلك
_ تبارك الله مين هادا شغلي ، علاش جاي لعندي ؟
بالطبع خونا بالله بحال الى غضب.خوكم الحوميدي اكثر منّو : شوف أسّي محمد راك هاجم علي فالمدرسة وراه معندكش الحق تدخل علي في اوقات العمل وتكون اللي تكون
قبل ما يمشي قال لي : واخّا أسيدي انا غادي نشوف مع سعادة المدير
_ اوى سعادة المدير فخبارو
قبل الساعة ديال الرجوع اعطيت الاستفسار للميلود وقلت لو الى عندك شي مشية لبصارة وصّلو للمدير او اعطيه لشي واحد غادي لهيه
جاوبني انا غادي نمشي حيت عندي شي غرض.غادي نمشي دابا باش نلحق عليه.

يتبع بعد يومين الحلقة السابعة

التوقيع

2014-11-03, 21:10

رقم المشاركة : 20

أم طه

بروفســــــــور

إحصائية العضو

أم طه غير متواجد حالياً

رد: مذكرات معلّم في البادية (2005/........)

فعلا هذه معانات يومية يعيشها العديد من الاساتذة اللذين يعملون في مثل هذه المناطق النائية
وقد عشت مثلها عندما صاحبت زوجي الى احدى الفرعيات بجرسيف حيث كانت تبعد الفرعية عن المركزية
باربع ساعات على الاقدام ,انا كنت ارافقه كان هو يصل في ظرف ساعتين وعندما ارافقه نصل بعد اربع ساعات
المهم كل ما قلته عايشته برفقتي زوجي ومن جرسيف الى تازة وفرعياتها المتعددة واخيرا والحمد لله الادارة بالرباط
شكرا لكعلى هذا التقاسم وعلى هذه الذكريات

التوقيع


	للتوصل بجديد الموقع أدخل بريدك الإلكتروني ثم فعل اشتراكك من علبة رسائلك :