2014-10-31, 19:39
|
رقم المشاركة : 15 |
 إحصائية
العضو | | | 
|  رد: مذكرات معلّم في البادية (2005/........)
|  |
الحلقة الرابعة : مين مشيت الى فرعية مرزوك (2)
الجزء الأول : الرجوع إلى وجدة
شدّينا طريق الرجوع لوجدة.الحديث هاد المرة كان مْوجْه للميلود.موسى كان اللّول اللي سوْلو : خويا الميلود سمعت باللي شي معلّم جديد خْدى لك بلاصتك.
الميلود دارْ راسو ما فاهم والو: أنا باقي فبلاصتي في مرزوك.
موسى ماشي من هادوك اللي يقبلو بحال هاد الأجوبة : شوف بلا ما دّوخْ علينا...راه في خبارنا كولشي.
الميلود شافْ فيا.زعما باغيني نعتْقو.داكْ الشي اللي درتْ.
_ شوف أسّي الميلود ، الاخوان راهوم يتكلمو على المعلم الجديد اللي جا معايا.واش ما كتشوفشْ باللي فالحقيقة خاصو هو اللي يخدم معايا في فرعية مرزوك ؟
الميلود بانْ باللي عاد عاقْ : فعلا هو آخر من التحق ولكن ....
موسى قاطعو : انت اللي خاصك تخدم في فرعية لغراسات ماشي هو
الميلود بقى ساكت ، ما عرف آش يقول.هي هاديك انا اللي تكلمت : سّي الميلود ، السؤال بدون لف أو دوران : واش عاجبك الحال تبقى في مرزوك ؟
أمين اللي باقي ما قال والو هو اللي جاوب : الميلود راه خلوي وكيبغي العزلة ومية فالمية راه لاقي راحتو.ياكْ أسّي الميلود ؟
الميلود ابتاسم : بحال الى علمك الله
شي شوية وصلنا لوجدة .الميلود نزل في واد الناشف باش يركب فالطوبيس.أمين حتى هو نزل معاه.بقينا ثلاثة : نور الدين وموسى وأنا.
موسى قال لي : سّي حميد علاش ما تطلبش أنت من المدير تخدم في لغراسات؟
أنا ماشي بحال الميلود ، عندي لكل سؤال جواب : أنا آخر من التحق ومن الفوق لبلاصة اللي خاص ديال معلم معرّب ماشي مزدوج بحالي.
دابا المعلمين عاقو : ايه دابا فهمنا علاش المدير ما عطاشْ هاد لبلاصة للميلود.
نور الدين هو اللي زاد شرح : الميلود بحالك مزدوج
انا اللي ختمت النقاش : اوى شفتو ...المدير كان عندو الحق وحتى سّي الميلود عارف اللي كاين وما بغاش يتكلم
وصلنا لفيلاج الطوبة وخوكم الحوميدي نزل بعدما اتّافق مع لخّوت يتلاقاو يوم الإثنين مع الديك السبعة والنصْ.
الجزء الثاني : أول عطب في الطريق
يوم الاثنين مع الصباح، انطلقات بينا سيارة نور الدين إلى بلدة لبصارة.كان الجو مشمّس ومازال علامات الصيف.هاد المرة السيارة ما مشاتش مع البيست لأن نورالدين بغى يوصلنا عاد يرجع لفرعية الدبّاب.
المهم بعدما وصلنا لقرارشة لقينا لفقيه واقف احْدى المدرسة .غير شافنا ، قال لينا : نشربو شي كاس أتاي.
أنا شفت فالساعة : اسمح لينا الفقيه ، مرة أخرى إن شاء الله
الميلود ضحك وقال لي : باينة عليك عزيزة عليك الخدمة
أنا شفت فيه وابتاسمت : وأنت باينة عليك لعْكيلْ ( الكسل ).
المهم ركبت فالموطور ديالي باش نمشي لمرزوك.الميلود قال لي :غادي نلحق بيك ولكن حتى نشرب شي كاس أتاي
الصراحة كانت الساعة التسعة وحنا من المفروض نبداوْ العمل مع التمنية .التلاميذ غادي يكونو فالمدرسة.
على كل حال مشيت مع الطريق المختصرة باش نوصل بكري.
اللي وقع ما كانش فالحسبان : فجأة الموطور حْبسْ.واه آش عندك يا اسمهان حتى سكتْي ؟ اول حاجة شفت واش خاصها ليصانصْ ولكن مازال فيها.مشيت للْبوجي.: يْبان مزيان.اوى آش خاصني نشوف ؟ خوكم ما عندوشْ مع الديباناج.فلمدينة كانت الدراجة ديالي تحبس ندّيها لسّيكليست.دابا فين غادي نلقى السيكلسيست فوسط هاد الجبال.
المهم قررت باش نْسوقها حتى للمدرسة .يا الله تمشيت واحد 20 متر ويبان مشكل آخور.تصورو أن العجلة الثانية ديال الدراجة تْفشّات.
دابا ما عليا غير نوقف ونسْتنّى الميلود.هادي هي طريقو .
دازت يمكن نص ساعة والميلود داز من جهتي.غير شافني قال لي : ياكْ ما عجبك المنظر هنا.
ما فادني غير قلت لو الحقيقة.هاد المرة الميلود ضحك علي بالمعقول : باين راك حاصل ، ياكْ ؟
جاوبتو : راكْ تشوف
المهم نزل من الدراجة ديالو وجا يشوف آش عندها اسمهان.
الصراحة تقال ، الميلود يفهم مزيان لدرجة أنه في ظرف ربع ساعة لقى الخلل وبالطبع حتى لبياسة تكلّف بيها.
مين سالا ، قلت لو : الله يرحم الوالدين وبالطبع واعدتو بأن غدّا إن شاء الله الكاسكروط على حسابي
الميلود ضحك وقال لي : الى كان هكدا غادي نصايب لك الدراجة ديالك كل ما توْقع en panne
الجزء الثالث :العمل في مرزوك
وصلنا لمرزوك مع العشرة وربع.الحمد لله لقينا التلاميذ باقيين يلعبو قدّام المدرسة.غير شافونا جاوْ يجريوْ لعندنا.هي هاديك دخّلت التلاميذ ديالي باش نقرّيهوم.
أول حاجة اللي قمت بها هي مراقبة الأدوات المدرسية.الحمد لله التلاميذ شاريين الكتب والدفاتر.كان خاصهوم شي حوايج بحال الأغلفة والتيكيتات هادو جبتهوم معايا.
تقريبا ساعة قضيتها باش نغلّف ليهوم الكتب ونكتب الأسماء ديالهوم فالدفاتر.
مع ديك لحْداش و30 دقيقة ، قلت ليهوم : الاستراحة .
هي هاديك مشيت عند الميلود ولقيتو يوجد أتاي ويسلق شي بيضات.خوكم الحوميدي ما دخلش بيدّيه خاويين .حتى أنا جبت معايا الفرماج والكونفتير والخبز .
كلينا وتحدثنا فأمور عادية لا علاقة لها بالتعليم.
جات الطْناشْ، قلت للميلود غادي نخدم واحد الساعة مع التلاميذ.
التلاميذ ديال الثالث قرّيتهوم شوية الرياضيات والفرنسية والتلاميذ ديال الأول اعطيتهوم ورقة وقلت ليهوم : يا الله كتبوا اللي بغيتو
شافو فيا بجوجهوم .واحد فيهوم قال لي : أسّي ما نعرفش نكتب
ابتاسمت : انا عارف باللي ما تعرفش تكتب ولكن شدْ الستيلو ، غادي تخرج منّو لكتابة.
التلميد حار لو لعجب : أسّي غادي تعلّمني .
شجعتو : غير اكتب
المهم بداو يخرمزو فالورقة حتى رجعات الورقة كلها رموز غريبة .
من بعد اعطيتهوم ورقة تانية وقلت ليهوم : باراكة عليكوم من لكتابة .فهاد الورقة غادي ترسمو.
بحال المرّة اللّولى ، عاود قالو لي : ما نعرفوش نرسمو.
قلت ليهوم : رسمو ولد .
بداوْ يشوفو فيا حالّين فمْهومْ.كان علي نساعدهوم.
_" شوفو ...رسمو دائرة بحال هادي....زيدو خط بحال هدا.....
بقيت نمشي معاهوم خطوة خطوة حتى رسمنا ولد
التلاميذ فرحو : أسّي نعرفو نرسمو
ابتاسمت : تعرفو ترسمو مزيان ...اوى لكتابة حتى هي بحال الرسم .غادي نرسمو كل نهار حرف .واش مستعدّين
_ نعمْ أسّي مستعدّين
_ يا الله كتبو معايا هاد الحرف. " ب"
التلاميذ كتبوه وخا بصعوبة ولكن بعد 10 ديال المرات نجحو فالكتابة ديالو.
_ اوى هدا نقراوه بَ
بهاد الطريقة اجعلت التلاميذ يبغيو لقراية .
في ظرف تقريبا نص ساعة تقريبا جعلت الرغبة ديالهوم فالقراءة والكتابة تقوى .
_ اليوم باركة عليكوم غير هاد الشي.غدّا ان شاء الله غادي نجيب ليكوم أوراق الكتابة والقراءة
مع ديك الوحدة شدّيت الطريق لمدرسة لقرارشة.الميلود حيت ساكن فالمدرسة كلّفتو باش يقابل التلاميذ ديالي حتى لموعد الخروج اللي هو الجوج والنص.
مين وصلت لقيت نور الدين يساين فيا.بالطبع باين زعفان :
سّي حميد الله يرحم الوالدين تبقى تجي شوية بكري.راه تقريبا ساعة وْ أنا واقف هنا.
شفت فيه وجاوبتو : اسمح لي ما يمكنش ليا نجي بكري .خاصني نخدم مع التلاميد على الأقل 3 ساعات .
المشكل أنهم بتلاثة بيهوم كانو متافقين بيناتهوم لدرجة أنني فهمت باللي يقدرو يكركبوني الى ما تفاهمتش معاهوم.في الأخير تفاهمت معاهوم نْجي لعندهوم مع الطناش و30 دقيقة.كان علي نوصل لهاد الحل والا غادي نحصل غير فالمواصلات.
من بعد وقعو لي مشاكل مع السكان وبالطبع حتى مع المدير بسبب هاد التوقيت .هادا موضوع آخر غادي نتحدثو عليه فالحلقة القادمة
الى اللقاء مع الحلقة الخامسة
|
|
|
|  |
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
130الشكر 
