منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

الحلقة السادسة : بداية المشاكل مع السكان ومع المدير(2)

الجزء الرابع :بعدما طلع لي الدم

وصلت لمرزوك مع لحضاش وبالطبع طالع ليا الدم وما عندي كانة للخدمة.لقيت خونا الميلود ناعس ومن الفوق يتموسق ( يستمع الى الموسيقى ) مع راسو.التلاميذ ديالو خدامين بالمعقول : كانو يرسمو ويلونو في كتاب التربية التشكيلية.
شوفو هاد خونا بالله ، كل ما ندخل عندو نلقى التلاميد ديالو ديما غير يرسمو أو يلونو.هاد المرة ما بغيتش نفيقو.هي هاديك قلت مع راسي نْدير شي طلّة ونشوف كيفاش دايرة الخدمة ديال الأستاذ.ما نكدبش عليكم الى قلت ليكوم باللي خونا بالله راه محطم الرقم القياسي ....ردّو بالكوم فالتربية التشكيلية !!!!! تصورو أن هاد لبراهش طحنو تقريبا 16 درس من 24 درس مقررة فالبرامج ديال وزارة التربية الوطنية واحنا ما زال في شهر اكتوبر.بالنسبة للرياضيات اوى هادي حاجة أخرى : حتى درس واحد ما مخدوم على حقو وطريقو .بالنسبة للمواد الأخرى : خلّيوْ الجمل راكدْ ههههه.
شفتْ فواحد التلميذ يظهر باللي ذكي وماشي بعيد عندو رغبة كبيرة فالقراءة.الدليل الدفاتر ديالو نقيين وخادم التمارين ديالو ويمكن نقول باللي أن الأغلب ديالها صحيحة.
_ قلْ لي أولدي كاين شي واحد فالدار يعاونك باش تخدم التمارين ؟
جاوبني بدون تردد : الأم ديالي .
الصراحة تعجبت وخاصة راحنا فالبادية والناس هنا أميين ، اللي قاري فيهوم حافظ شي سور قرآنية : واه أمّك قارية !!!!!
رد علي : عندها الباك أأستاذ
أول مرة نسمع باللي إمرأة من لعروبية عندها مستوى عالي والباكلوريا .هاد الملاحظة قلتها لهاد الولد الذكي وبالطبع برهن ليا باللي راه أذكى من داك الشي اللي نتصوّر : أستاذ حنا من لمدينة وراه جينا نسكنو هنا حيت لقينا جو البادية صحي ومفيد.
_ تبارك الله وعندكوم شي دار هنا ؟
_ نعم أستاذ عندنا فيرما كبيرة وفيها الما والضو وعندنا التلفزة والبارابول.
خوكم الحوميدي ديما عزيز عليه التقشاب ومع راه طالع ليا شوية الدم قلت لهاد الطفل الشبه قروي بنبرة التهكم : زعما دالاس ياكْ ولكن خاصكوم غير التيليفون.
هاد التلميذ ضحك وقال لي : ما نقدروش نديروه حيت الركايز ما دايزينش من هاد الجهة
_ ولكن عندكوم البورتابل
_ غير أبّا لعندو يا أستاذ
هزيت راسي باش ننهي الحديت ومنها نوافق على كل كلمة قالها هاد البورجوازي المزيف.
هي هاديك قرّبت من خونا الميلود .نسيت باش نقول ليكوم باللي الراديو هو اللي كان يتموسقْ( يسمع للموسيقى ) ماشي هو .الراديو كان مطفي ، هو كان يشخر .
غير شعلت الراديو على فور جهدو ، خونا بالله قفز من فوق المقاعد وطاح فالأرض بحال شي خنشة ديال البطاطا توزن نص قنطار : اززززدرااااااااف (zdddddroufffffffffffffffffffffff)
غير شافني رجعات فيه الروح وهادا ما منعوش باش يقول ليا : واطيّرتي منّي خلعة واش من خلعة.
خوكم الحوميدي قلبها عليه : أخويا انت اللي خلعتيني .كنت حاسبك مريض .
ناض ودار جوج تنقيزات وقال لي : هانا شوف خوك ديما أون فورمْ (en forme)
_ تبارك الله عليك راك حامض بالنعاس وريحتك راها طالقة
خونا الميلود ماشي من دوك الناس اللي يتقلقو دغيا وهو زيادة على هاد الصفة مراوغ كبير.غير تمْ تمْ ، قال لي : وأنت ياخويا فين هاد التعطيلة ؟ ياكْ ما اسمهان دارتها عاود تاني ؟
_ بالعكس اسمهان بعدما اخديتها للسيكليست راها بخير وعلى خير ..
_ اوى ؟
_ كنت عند المدير .
الميلود راه فهم باللي القضية ما تعجبش .هي هاديك قال للتلاميد : استراحة يا الله اخرجو تستاراحو.
غير التلاميد غبرو ، قال لي : أجي نشربو شي كاس أتاي واحكي لي كولشي.
يا الله الميلود فاش امشى يعمّر المقراج ( الغلّاي) وخوكم تبان لو شي صينية مغطية فوق الطبْلة .قلت للميلود : شوف لهيه ، يمكن شي بركة خرجات ليك من الحَلْمة
الميلود حنزَزْ مزيان ، بحال الى ما تايقْشْ : شكون زعما اللي يكون جاب
هاد البركة ؟
سمعنا شي صوت من برّا يقول : راه جابها عبد العزيز ومين لقاك ناعس ما بغاشْ يفيقكْ وقال لينا مين يفيق الاستاد قولوها لو.
المهم ، كشفنا على الصينية ولقيت براد أتاي ومعاه خبزة وشي بيضات وشوية مسمّن.
كلينا وشربنا بلا ما نهضرو.يمكن الميلود كان عارف باللي دغيا غادي ننفاعل.هادي عندو فيها الحق.
بعدما سالينا من الأكل والشراب حكيت لو كولشي .خونا الميلود سمعني بلا ما قاطعني لحظة واحدة. دازت تقريبا جوج دقايق والميلود كان يخمّم .من بعد قال لي : أشنو هو المعمول دابا ؟
هو اللي جاوب على السؤال ديالو : انا في نظري تشوف مع لخّوت شي توقيت مناسب ...
قاطعتو : ما يبغيوش يا خويا الميلود ومن الفوق تقدر تقول باللي راهوم شادّينّي باليد اللي توجعني
_ كيفاش زعما ؟
_ هوما عارفين باللي المركوب قليل وعلى الخصوص فالصباح
الميلود كان حكيم : شوف احكي ليهوم وقول ليهوم اللي كاين ، ربما يلقاو ليك شي حل
_ عندك الحق.
خليت الميلود ومشيت للقسم ديالي زعما باش نخدم.المشكل ما بقاتش عندي الكانة للخدمة.يا الله دخّلت التلاميذ وأنا نتفكر كلام المدير.ما نكدبش عليكوم يا خوتي اكرهت التلاميد كاملين وكرهت الآباء ديالهوم.شفت فيهوم وقلت ليهوم : هاد النهار ما مقريكومش وحتى واحد ما يسالْ لّي.
التلاميد مساكين حيت هوما ابرياء شافو فيا ساكتين .
شي شوية قلت ليهوم : راني شوية مبرزط .ما نقدرش نقرّيكوم هاد النهار.يمكن غادي نمشي في حالاتي ، ربما غدّا نكون مزيان.
فعلا جمعت حوايجي وصيفطتْ التلاميد لديورهم خلافا لما كنت نقوم بيه، حيت كانو التلاميد ديالي يبقاو مع الميلود حتى للجوج والنص.
الميلود لاحظ هاد التصرف وقال لي : حميد راك كرفصتيها.التلاميد غادي يوصلوها لبّاواتهوم سخونة
قبل ما نركب فالموطور جاوبتو : داكْ الشي اللي أنا باغي

الجزء الخامس : مين تلاقيت إخوان لانافيط.

مين وصلت لفرعية لقرارشة ، لقيت أمين مع لفقيه في حديث عن قال الله وقال الرسول.اول حاجة قلتها لسّي أمين : تبارك الله أخويا أمين والمعلّم آش قال ؟
بجوجهوم شافو فيا .لفقيه ابتاسم : اسّي حميد قولْ بعدا غي السلام عليكم
ردّيت عليه وعليكم السلام
أمين قرّبْ منّي : ياكْ ما تخاصمتي مع الميلود ؟
اضحكت : الميلود غير دريويش
_ اوى شكون اللي طيّرها ليك ؟
_ انتوما أخويا وراكو خرجتو علي وندّمتوني على الانتقال لوجدة
أمين شدني من يدّي : أجي أخويا حميد واشرب شي كاس حليب بارد ومن بعد احكي لينا اللي واقع.
بعدما سمع القصة ديالي مع المدير، حتى هو بْدى يفكّر وقال لي : فعلا مشكل هادا .
شي شوية ، قال لي : غادي نعيَّطْ على لخّوت باش يجيوْ ونشوفو كي نديرو نحلّو المشكل.
يمكن ربع ساعة دازت وموسى ونورالدين يدخلو علينا.للمرة الثالثة حكيت ليهوم اللي واقع وختمت كلامي : دابا آش المعمول ؟
نور الدين قال لي : ما عندو ما يدير .
خرّجت لو الاستفسار : وهادا ما كافيش ؟
موسى كان حكيم : شوف اسّي عبد الحميد ، أنا في نظري ترد على الاستفسار وتقول لو باللي الظروف ديال العمل ما متوفْراش ومن ذلك الحجرة مظلامة والطريق كلها حجر والاهم المواصلات منعدمة وباللي راك تمشي مع أساتذة ديال عين الصفاء
فعلا داك الشي اللي غادي ندير.المهم قلت للإخوان يا الله نرجعو في حالاتنا لوجدة.
يا الله تمشينا شي ربع ساعة ويتّاصل بيا الميلود وقال لي : حميد ، راه سوّل فيك المدير .
_ اوى آش جاوبتيه ؟
_ قلت لو باللي راك عيّان شي شوية وراك مشيتي لوجدة.
_ مزيان واشْ قال ليك ؟
_ قال لي باش نقول لك مين تجي غدّا ماتنساش تجيب جواب الاستفسار
غير ساليت المكالمة ، قلت لخّوت : خونا بالله باقي شاد فيا .راه باغيني نجاوب على الاستفسار.

الجزء السادس : مين بغيت ندبّر على راسي

فالدار لاحظت الزوجة ديالي باللي ما رانيش مزيان.بالطبع قلت ليها اللي كاين.الزوجة ديالي كتعرفني نخدم وما عمرو ما غشّيت فالعمل .لهادا قالت لي : شوف شي واحد يتكلّم مع هاد المدير قبل ما يكتب بيك .
شي شوية بانت لي فكرة : والله الى عندك الحق ...كاين واحد الصديق هو مدير وعندو المعارف فالنيابة.راه يقدر ينفعني.
غادي نمشي عندو دابا.
_ تغدّى عاد سيرْ لعندو.
_ نمشي دابا ما حدْني سخونْ ومن الفوق خاصني نْشدّو فالدار قبل ما يخرج.
فعلا لقيتو كان غادي ينعس .
_ اسمح لي يا سّي محمد الى جيتك فهاد لوقيتة
_ بالعكس راني فرحان بالزيارة ديالك.ادخل.
فعلا دخلنا للصّالة ديال الضيوف وجاب لي كاس موناضا .
كان علي نحكي لو اللي صار من الطاق الطاق للسلام عليكم.اسمعني بلا ما يقاطعني .فالأخير قال لي : ما تقلقش .ما غادي يوقع والو.غير انت عنداك تتغيب على العمل.خاصك تمشي كل يوم للخدمة واعتمد على توقيت ما يضرش التلاميد ديالك.
هي هاديك تفاهمنا نخدم من التسعة حتى للوحدة والنص .
قبل ما نخليه نصحني باش نجاوب على الاستفسار ونعطي للمدير الاسباب اللي جعلتني نخرج قبل الوقت.زاد فرّحني وقال لي : من جهة الاستفسارات ما تضرب ليها حساب ، أي استفسار يوصل للنيابة عندي شي صحابي فمكتب الضبط غادي يغبروه وما عمرو شي حاجة توصل.
هي هاديك رجعت راشقا لي بعدما شكرت صديقي المدير ووعدتو باش نزورو في اقرب فرصة ممكنة
فالغد تلاقيت مع الاخوان ديال لانافيط وكانت الساعة التمنية.الاخوان لاحظو باللي ما بقيتش غضبان وطالع لي الدم كي البارح.أنا حكيت ليهوم كولشي.
هي هاديك قال لي نور الدين : واخّا أسيدي غادي نمشيو مع الاستعمال الجديد ديالك ونشوفو فين غادي يوصّلنا.
يا الله وصلت لمرزوك ، لقيت الميلود ناعس كي العادة وكان عليا نفيقو من النعاس .يا الله فاق فكّر فلفطور.هاد المرة ماكاينش الصينية.
المهم خليتو يوجّد القهوة ومشيت دخّلت التلاميد باش يقراوْ.
خدمت معاهوم هاديك الساعة.شي شوية قالو لي التلاميد شي راجل راه واقف فالباب.
الصراحة أول مرة نشوف هاد السيد.قلت للتلاميد واش هادا أب ديال شي واحد فيكوم؟
كولهوم جاوبوني : لا أستاذ
هي هاديك سلّمت عليه .بعدما رد علي السلام ، قال لي ، انا رئيس جمعية آباء وأولياء التلاميذ
بعد عبارات الترحيب ومتشرفين بالمعرفة ديالكوم ، خونا بالله دخل فالموضوع : سّي عبد الحميد السكان راهوم يتشكّاوْ منّك .
_ كيفاش زعما واش ما رانيش نقرّي ليهوم اولادهوم ؟
_ حاشا ولكن ماراك تجي فالوقت وراك ترجع قبل الوقت
شفت فيه وضحكت : دبْرو لي المركوب ونحتارم التوقيت
_ أخويا هاداك شغلك
_ تبارك الله مين هادا شغلي ، علاش جاي لعندي ؟
بالطبع خونا بالله بحال الى غضب.خوكم الحوميدي اكثر منّو : شوف أسّي محمد راك هاجم علي فالمدرسة وراه معندكش الحق تدخل علي في اوقات العمل وتكون اللي تكون
قبل ما يمشي قال لي : واخّا أسيدي انا غادي نشوف مع سعادة المدير
_ اوى سعادة المدير فخبارو
قبل الساعة ديال الرجوع اعطيت الاستفسار للميلود وقلت لو الى عندك شي مشية لبصارة وصّلو للمدير او اعطيه لشي واحد غادي لهيه
جاوبني انا غادي نمشي حيت عندي شي غرض.غادي نمشي دابا باش نلحق عليه.

يتبع بعد يومين الحلقة السابعة