2014-01-11, 17:03
|
رقم المشاركة : 80 |
 إحصائية
العضو | | | 
|  رد: مذكرات معلّم في العالم الحضري
|  |
حلقة ممتازة
الحلقة 29:مذكرات معلم في العالم الحضري
الجزء الأول : حتى المدير الجديد راه يْقلّبْ على جْوى منجلْ
نرجع للمستوى الثالث ديالي وبالضبط في آخر عام ديالي في تاوريرت .هداك العام كان فيه شوية المشاحنات مع الإدارة .تصورو يا الله فاشْ دْخلنا ، قال لي المدير : راني غيّرْتْ لك المستوى .غادي تْشدْ الخامس.
هاد خونا بالله دارْ داكْ الشّي بْلا ما يْشاورني.المشكل شي جوج أخْرين دارْ مْعاهوم نفس الشّي.واحد المعلمة غيّرْ ليها المستوى الأول بالرابع ومعلم اللي كان عندو الرابع أعْطاه الأول.هادو بعدا بان باللي يمكن غير بيناتهوم يتفاهمو وكل واحد فيهوم يرجع لْقسمو.المشكل هو أنا .خاصني بعدا نعرف شْكون اللي خْدى ليا المستوى ديالي.دغيا لقيتو واحد المعلم لاعبها كبير فالمدرسة.لا خدمة من غير الدوران فالساحة .حيت هو بركاكْ ديال الإدارة .اوى راكو عارفين الشغل .
شفت فالمدير وقلت لو : آشْ ضْهرْ لك ؟ ما غاديشْ نْقرّي الخامس
_ غادي تْقريهْ بالسيفْ عليكْ
_ بالسيف ؟ شوف أسّي ، حْنا مفتشين وبغْينا نضّرْبوهوم ماشي معى مدير اللي غادي نْحيرْ
_ انا راني الرئيس ديالك المباشر وعندي كامل الصلاحية باش نسند لك القسم اللي يصلح ليكْ
_ واخّا .وعلاشْ غيّرتي لي الثالث ديالي .واش كنْبانْ ليكْ ماشي كفؤْ فالثالث ؟
_ شوف أنت كتستعمل لعصا مع التلاميد
_ تبارك الله زعما الى شدّيت الخامس ما غاديش نضرب التلاميد
_ ماشي هكْدا .
_ فهّمْنا الله يرحم الوالدين
_ هادو بعدا الى ضْربتيهوم ما يتْقسْحوشْ
_ اوى منطيقْ عندك أخويا .واخّا .واحد المعلم فالمستوى الأول كيْعصّي مزيان التلاميد ديالو ، عْلاشْ هاداك ما غيّرتيلوشْ المستوى ؟
_ ماشي شغلك
_ حتى انت ماشي شغلك فيا أنا
_ بالعكس انا كنحكم فيك
_ اوى أجي أحكم فيا الى قْدرتي
_ غادي نكتب بيك
_ مسكين اكتب حتى تشبع .انا ما نْخاف حتى من واحد وخّا يكون النائب او الوزيرْ.زعما غادي يقطع لي راسي.
المهم هداك النهار كان غير التوقيع. فالغد ليه مْشى معايا خويا بلخضر للنيابة اللي رجعات في تاوريرت. الحمد لله خوكم معروف بالنيابة ، معروف بالجدية ديالو ولقراية والنتائج اللي كيحصل عليها في آخر السنة.
أغلب الموظفين كانو أولادهوم أو بناتهوم قْراوْ عندي.كولهوم قالو لي : بقى تابت فالموقف ديالك ، حْنا مساندينك.
هي هاديك مْشيت عند المفتش ديال الفرنسية.هاد المفتش كيحتارمني مزيان.تصورو يا الله فتّشْني مرة وحدة ؛ من بعد مين يْجي غير يْوقع لي المدكرة ويكتب ليا تقرير ديال التفتيش.
لقيتو فالمكتب ديالو .حْكيتْ لو اللي واقع.فالأول قال لي راه عندو الحق ولكن مع الإصرار ديالي اعطاني واحد النصيحة هي اللي درْتها.
النصيحة ديالو وهو غادي نْشدْ المستوى ولكن نبقى النهار كامل مْرَيّحْ مع راسي .ما نْديرْ والو.خونا بالله اللي هو المدير غادي يْشوف اللي كاين .آشْ غادي يديرْ .يْجيبْ لي المفتش .اوى المفتش غادي يقول لو هادا راه ما يصلاحْشْ ليه الخامس ، رد لو الثالث ديالو
خوكم الحوميدي استقبل الثلامد ديال الخامس.ما بْغى يعطيهوم لا أدوات لا حتى شي حاجة.دازت 3 أيام وخوكم ديما داير رجل على رجل يقرى شي قصة.التلاميد مين شافوني مادّايْهاشْ فيهوم ، نَوْضو الفوضى.المدير سمع لغوات ولمدابزة عندي وقال لي (زعفان) : استاد الله يخليك ضْبطْ شوية القسم ديالك
ردّيتْ عليه: شوف معاهوم أنت .هادو ماشي تْلامدي .انا راني غير مْقابلْهوم حتى يْجي المفتش
_ اوى غادي نْعيّطْ لو دابا
_ بارك الله فيك .سيرْ دغيا راه فقهوة صابرين
خونا بالله فعلا عيّطْ على المفتش.المفتش ما ضارشْ بيا.شي شوية جا عندي وقال لي : غادي ترجع للقسم ديالك الثالث
ضْحكت وقلت لو : كان عليك ما دّيرشْ العيبْ
آه نسيت ما قلتش ليكوم : خونا بالله اللي شد المستوى الثالث جا زعما لعندي وقال لي : استاد الله يْخلّيك اعطيني التحاضير ديالك
طبعا جاوبتو : ياكْ ما انت حْمقْ؟ نحرقهوم ويمكن نعطيهوم لْشي اسرائيلي وانت والله ما تْشوفهوم.
الجزء الثاني :واحد لْزيرو ، مازال ما بْغى يحْشمْ
بعدما انتصرت على خونا بالله ورجعت للمستوى ديالي ، بقى حاضيني فكل صغيرة وكبيرة.مثلا الى ضربت شي تلميد زعما يبغي يديرْ لي المشاكيل.يجي عندي ويقول لي : أستاد راه الله يْخليك ممنوع الضرب.
ممنوع لواهْ الطرح والقسمة.خوكم الحوميدي دابا عْرف هاد خونا بالله باللي ما فْيدّوشْ.بقيت على السياسة ديالي .
المهم واحد النهار 6 ديال التلميدات ماكانوش حفضو شي حاجة كنت طْلبْتها منهوم.الغريب فالأمر كانت بنتو تقرى عندي.شوفو التناقض .هو كيعرف باللي ما كاينش شي واحد فالثالث يقدر يْقرّي بْحالي ولكن بدّل ليا المستوى.ولكن انا بالمنطق ديالي عْرفت السبب.هاد خونا بالله كان باغي شي معلم يْزيدْ لبنتو النقط .المشكل المعلم اللي يمكن يتفاهم معاه هو هاد خونا بالله اللي سْبق قلت ليكوم هو البركاك ديالو.
على كل حال كانت بنتو من التلميدات اللي ضْربْتْ.
فالغدْ ليه، جا عندي نائب المدير عاطيني استفسار جاني من النيابة الموضوع ديالو استعمال العنف ضد التلاميد.غير قْريتْ المحتوى ، طْلعْ لي الدم .مْشيتْ ديريكتْ للإدارة باشْ نخْلي دار بوهْ.مع هو قْليوَلْ كي المُشْ ، راني نقدر نْجيبْ لو التْمامْ.
عندو الزهر ما كانش فالإدارة .رجعت للقسم وخرّجتْ التلامد ديال البارح اللي كنت عاقبتهوم.
_ اوى هادوكْ بني كلبونْ، زعما باغيينْ تشكيوْ بيا
مساكن ب5 بيهوم بْداوْ يبْكيوْ : والله أأستاد ما شْكينا بيك.ياكْ كتضْربنا ديما ......
فعلا عندهوم الحق .هي هاديك بانت لي بنت المدير حادْرة راسها
_ أجي ياديكْ لمسيخيطة .أنت مولاتْ الفعلة.اعتارفي ولّا داك الشّي اللي كنت غادي نْديرو مع أبّاكْ غادي تْخلْصيهْ
اللي كان هو أنها حْكاتْ لي كولشي : اوى خونا بالله شافها تبكي ، هي قالت لو راه ضْربني الأستاد.زادْ تْباحتْ مْعاها.شكون ضْربْ من غيركْ؟ أعْطاتو السْميَاتْ ديال التلاميد.هو زعما ذكي باش ما يتَّفْضاحْشْ راسل النيابة باللي 5 ديال الآباء جاوْ يتْشكّاوْ منّي.النيابة صيفطو لي هاد الاستفسار.
لعشية مْشيت للنيابة ديما مع خويا بلخضر.استقبلنا واحد المسؤول كبير .غير شاف الورقة ، بْدى يضحك وقال لينا : النيابة ما كترسلش بْحالْ هاد الاستفسارات
_ كيفاش زعما ؟ قالو بلخضر
_ هادا المدير هو اللي كتبها ويمكن يعرف شي واحد دار ليها الكاشي (الطابع) باش تْبانْ إدارية.هدا باغي يخّلْعك .هاد الشّي اللي كاين.شوفو مزيان ما كاينش رقم الارسال الالي من المفروض يكون فكل مراسلة نيابية.
_ انا خاصني نشكي بيه
_ شوف أأستاد انت معروف عندنا بالجدية .ما تْوسّخ راسك مع هاد المدير
_ اوى المعمول ؟
_ دير شغلك كيف مْوالفْ
_ بارك الله فيكْ
الجزء الثالث : عاود تاني رْجعْ لْطبيعتو اللّولى
المهم خونا بالله ما بقاشْ يْبانْ تقريبا.واحد النهار تْلاقيتْ بيه فالساحة وقلت لو : الله يرحم الوالدين أدّي علي بنتك لْشي قسم آخور
_ هي اللي ما تْعاودشْ
المشكل أن بنتو ما بغاتش تتبدّلْ .عْيى مْعاها أبّاها.من بعد جاوْ عندي المعلمين يْرغبوني .فاللّخّرْ خلّيتها عندي حتى نجحات للرابع.
هاد خيْنا ماشي شرّاني هادا صهيوني .تصورو راحنا نْديرو توزيع الاقسام بالنسبة للسنة الموالية.عاود تاني أمام الملأ ، قال لي سّي عبد الحميد غادي تْشَدْ السادس .هاد المرة والله ما نتْراجع فيها
خوكم أكتر منّو ، رد عليه : والله ما نْشدْ ليك السادس واخا تعطيني 100 مليون
_ والله حتى تْشدّو
_ أنت واحد الظالم كبير كانت تْبانْ لي ندخل عليك الحبس ولكن ما تستاهلش
_ بزاف عْليكْ
_ عندك الحق انا داعيك لله .ربّي غادي يستاجب ليك انا غادي نْخليلك ماشي غير السادس المستويات ديالك كاملة رْبحْ بيهوم.
جاتْ العطلة وجْمعت حْوايجي كي العادة وخَلّيتهوم عند الحارس ديال المدرسة.
سبحان الله العظيم كنت فواحد العرس ديال واحد الصديق ديالنا.كان معايا بلخضر.شي شوية صونا التليفون ديالي .الزوجة ديالي قالت لي : حميد مبروك عليك الانتقال راك انتقلت لشي مجموعة مدرسية فوجدة.
آه يا خّوتي فديك لوقيتة تفكّرْت داك عدو الله وحْمدت الله وشكرتو مين عْرفت بأن الله راه استاجب لي.
فأواخلر غشت مْشيت للمدرسة وخْديتْ حْوايجي من المدرسة .خونا بالله جا زعما يْبارك لي ، قلت لو : اوى سير شوف اللي يْشَدْ ليك السادسْ
من داك النهار مين نتلاقى بيه نْديرْ لو سلام باردْ
غدا مع الحلقة 30 من مذكرات معلم في المدينة
الجزء الأول :حوميدي وعلاقته بالمديرين
الجزء الثاني : حوميدي وعلاقتة بالمعلمين والآباء
|
آخر تعديل houmidi59 يوم 2014-01-11 في 17:06. |
|
|  |
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
455الشكر 
