2014-01-14, 10:57
|
رقم المشاركة : 89 |
 إحصائية
العضو | | | 
|  رد: مذكرات معلّم في العالم الحضري
|  |
الحلقة 33 من ذكرياتي مع أخي جمال
الجزء 15 : جمال في مرحلة النقاهة
دازتْ الأيام والواليد كي العادة يتّاصل تقريبا يوميا باشْ يتبّع الاحوال ديال جمال.انا حيت كنت رجعْتْ لتاوريرت ، كانت توصلْني لخبار شوية معطلة .على كل حال كانت ديما أخبار سارة.
الاخ جمال خرج من الغرفة الاصطناعية وكلّو حيوية ونشاط.قبل ما يْودّع المستشفى ، داز عند هاديك الأخت اللي كانت جْراتْ نفس العملية والاخ الله يرحمو شْحال واساها ودْعى مْعاها ولكن في نفسو كان يقول "موحال الى خوتنا بالله تعيش".هاد الهضْرة كان ديما يْرَدّدْها مع كل واحد يتلاقى بيه.
قدرة الله كبيرة والغيب ما يعلمو الا هو: هاديك البنت عاشت وطوّلْها ربّي فعمرها.مين سمعات خبر موت جمال شْحال تفقْصاتْ مسكينة.
من بعد كان على الأخ جمال يقضي 3 ديال الشهورا ديال النّقاهة بعيد على البشر .هاد الدار كبيرة جاية فلعروبية ديال باريس .يعني بعيدة على الدخان ديال السيارات والهراجْ والصداع .خاص جمال يستاعد الصحة ديالو فهاد الجو الصافي.باش تفهمو مزيان : الخلايا الجديدة عند جمال باقية ضعيفة حيت ما زال في طريق النمو .جمال راه دابا بحال الرضيع أي مرض او عدوى ولو كانت حتى الزكام تقدر تقضي عليه ويقدر يموت.خويا جمال واخّا نجحات ليه العملية راه ما زال مهدّد بالموت في أية لحظة.على داك الشّي الاطباء اعطاوه تعليمات صارمة .الحاجة الأولى خاصّو يْديرْ كمامة على فمّو.الحاجة الثانية الناس اللي يتواجد معاهوم ما خاصشْ يكونو أكثرْ من جوج .الحاجة الثالثة الراحة والنوم بكثرة والأكل المعتدل.الحاجة الرابعة وهادي الأهم ممنوع يخرج او يمشي لْشي بْلاصة من غير مرافق.
الأخ ديالي ماكانش يقول كولشي للواليد واللي وقع ما كان فالحسبان.كان الله يرحمو على حسب القول ديالو يقنط من الجلوس غير بوحدو.كانو معاه شي ناس ولكن الأغلبية ديالهوم غير ناس كْبار وشارفينْ.هي هاديك ، كان يسْلتْ بحال فالمدرسة ويمْشي بتْخبْيا عند خالي بوزيان .
هدا خالي كان ديما يقول لو : واش ماشي خطار عليك تخرج غير بوحديتك ؟
كان يجاوبو : ما تخافش انا كبير ونعرف آش نْديرْ.
المهم هاد خالي اسكت وخلّاه مع خاطرو.
من بعد هاد خالي اخبر الواليد .الواليد اتاصل بجمال وشحال زْعفْ عليه.جمال يمكن رْجع راسو قاسح بْحالي زاد استامرْ فالخرجاتْ ديالو ولكن ماشي عند خالي اللي فضحو.هاد المرّة مْشى عند واحد أخت الزوجة ديالو ساكنة في نواحي باريس.
هاد الناس حيت ما عارفين والو على العملية من غير أنها نجحات بْداوْ يستقبلوه وفرحو بيه .
من بعد الادارة ديال المستشفى ساقو لخبار وقالو لو خاصْ يْجي شي واحد يْقابْلك وخاصُّو يوقّع التزام.
من الصدف الزّوجة ديالو جاتْ لفرنسا.كانت هي اللي تاخْدو للدار وترجعو للمصحة.
الله يحسن العون ديما سيرْ واجي راها تتطلعْ فالراس.
الزوجة دارت طلب لإدارة المستشفى باش جمال يْكمّلْ العلاج ديالو عند الأخت ديالها.طبعا قبلو الطلب ديالها ولكن بشروط.من هاد الشروط خاص جمال تكون عندو غرفة مستقلة.خاص صباغة ديال البيت تكون بيضا .خاص الأثاث يكون قليل .خاص ينعس بكري.المهم شروط قبلاتْ عليهوم الزوجة .
اللي وقع اّنَّ جمال خلق جو فيه بزاف ديال الاكراهات وعلى داك الشّي وقعو مشاكل .جمال بْدى يْعاني مسكين ولكن ما عمرو قال شي حاجة للواليد.
من بعد تْخاصم هو والزوجة ديالو .الأمر راه باين : الأخت مسكينة عْياتْ وعندها الحق ولكن ماشي لدرجة تجري على جمال من الدار
الجزء 16 : كيفاش توفى أخي جمال ؟
جمال صافي ما بقاشْ حْملْ يبقى فالدار .واحد النهار قال في نفسو غادي نمشي عند خالي ونحكي لو كولشي .من الزهر ديالو ما لقى حتى واحد فالدار.رْجع ولكن فين غادي يمشي ؟ للمصحة ؟ ما يمكنش على حقّاش راه سالا مْعاهوم مين وقّعْ على الخروج ديالو .عند دار أخت الزوجة ؟ لا ما خاصّو صْداع معاهوم.
اوى آشْ المعمول ؟
هي هاديك تفكّر صاحبنا ادريس التوبيس (مدكرات معلم في البادية) .هدا ادريس حنْ عليه ربي ومْشى لفرنسا وتْزوّجْ فرانساوية ودار معاها لولاد.فديك لوقيتة كان ساكن في مدينة رْوينْ(Rouen) هاد المدينة كتبعد على باريس ب90 كيلومتر.
جمال بدون تردد ، ركب القطار السريع المتوجه الى تلك المدينة معرضا حياته للخطر.
فعلا اللي وقع هو أنّه فْقد الوعي ديالو في محطة القطار غير فاشْ وصل.الناس شافو جمال بالكمامة ديالو طايح فالأرض.دغيا جات لامبيلانص وخْداتو للمستعجلات.لخّوت دارو من جهدهوم دارو لو الانعاشات شحال من مرة.كل مرة كان يسكت ليه القلب.المهم من بعد بحثو فالملف ديالو ولكن لقاوه بعد فوات الأوان.
هي هاديك مات جمال موتة نهائية بعدما المخ حتى هو تْعطّل على الخدمة وكان ذلك صباح السبت 4 غشت من عام 1990 مع الجوج و30 دقيقة
الجزء 17 : جمال يعود في صندوق الى المغرب
لخبر كان كالصاعقة خصوصا بالنسبة اللي كانو يقولو أن العملية نجحات.انا كنت من هاد الناس اللي حاسبين أن جمال كان بخير وعلى خير.ديك لوقيتة كنت في تاوريرت مين الواليد اتّاصل بواحد الحانوت كان جاري يقولو : قلْ للولد ديالي يْجي دغيا للرباط.
انا الصراحة جاتني واحد الخلعة كبيرة .قلت مع راسي شكون اللي يكون مات؟ واشْ الواليدة واش الاخوة والاخوات ؟ الصراحة كولشي كنت نضنْ يقدر يموت من غير خويا جمال.مول الحانوت بْقيتْ معاه حتى قال لي : خوك اللي ففرنسا.الزوجة طاحت بالبكا أما أنا بْقيتْ واقف وساكتْ.ما عرفت آشْ وقع لي .حسيتْ بالضّلْما .ما بْقى يْبانْ لي شي واحد.كرهت نفسي وكْرهت الدنيا كاملة.
مول الحانوت مسكين شْحال واساني وجا واحد لفقيه وشْحال قال لي من الأحاديث والآيات القرآنية في شأن الموت.خوكم حوميدي ما فادو غير قال كي ما يقولو المؤمنون في مثل هاد الظروف " لا حول ولا قوة الا بالله العلي العظيم وإنّا لله وإنا إليه راجعون.
المهم من بعد بْكيتْ وأنا تنتْفكر داك الشّي اللي وْقعْ لي معاه أيامات كنت أنا المشْ وهو الفار.ولكن حمدت الله لأني قمت بالواجب ديالي باش انَّقْدو من الموت.المهم اللي عليا راني درتو.
مع ديك الخمسة ديال لعشية ركابنا فالكار.تصورو ديك الفترة ديال الصيف كولشي كومْبلي(complet) لا كيران لا طاكسيات لا قطارات.
مْشيت مع الزوجة ديالي .فالطريق ما كْلينا ما شْربنا.الغريب فالأمر واحد ما كلّم لاخورْ.وصلنا ديك الجوج ديال الصباح.بقينا فالمحطة حتى صْبحْ الحال ، من بعد شدّينا طاكسي صغير لحي اليوسفية فين يسكن الواليد.
مين وصلنا لقينا الدار مقلوبة .كولشي يبكي ويْغوّتْ.منظر الموت شْحال صعيبْ.يكون ربي فعْوان اللي مات لو شي حدْ.
المهم بعد تبادل التعازي ، مْشيتْ ديريكتْ وطحْتْ بْلا ما نْفيقْ.لعْيا ديال السفر وخوكم ما نْعسْ دقيقة وحدة فالكارْ.
دازت تقريبا 15 يوم وحْنا كنْنْتاضْرو وصول النعش ديال جمال الله يرحمو.مشاكل كبيرة فالاجرائات ولكن الحمد لله واحد لعشية جابو الصندوق اللي فيه جمال.كانو العائلة والجيران وأصْحاب جمال فالخدمة كولهوم حاضرين.يا الله وصلوه للدار ، قال لينا الواليد : ما خاصّوشْ يْباتْ فالدار.تْصوْرو ان جمال دْفنّاه مع المغرب.هادي حالة استثْنائية ماعمرو ما وقعات.
الموكب ديال السيارات اللي مشى معى الأخ ديالي ما يمكن يتْصوْرو غير اللي شافو .واش 100 سيارة أو أكثر .الصراحة العدد الهائل ديال السيارات كان خير دليل بأن هاد الناس اللي جاوْ راه جمال كانت عندو مكانة عندهوم وكان محبوب.فتلك اللحظة بْقيتْ نفتاخر بالأخ ديالي جمال وباللي قمت بالواجب ديالي.هاد الناس حتى انا سوْلو فيا ومساكنْ قالو لي : بارك الله فيك على التضحية ديالك ولكن اصبر ربي يفعل ما يشاء .كنت نجاوبهوم : ونُعْم بالله.
بعد عملية الدفن، رجعنا كاملين للدار .الواليد كنْتْ باقي عاقل كان شاري لعسل كان جابها من تازة(عسل حرة).المهم العزّايا كْلاوْ وشربوا مدة 10 ديال الأيام.
من بعد بقى الواليد والواليدة يمشيوْ لقْبر ديال جمال الله يرحمو كل يوم مدة طويلة يمكن الى دازت 5 سنوات.
اليوم فالمناسبات والأعياد الواليدة كدّيرْ شي طلّة على لقبر ديالو باش تترحّم عليه.
رحم الله جمال وأسكنه فسيح جنانه.الله يرحم كل المسلمين والله يلحقنا بيهوم على شهادة لا إله الا الله وأن محمدا رسول الله
هذه هي الحلقة الأخيرة من مذكراتي مع أخي جمال.
عودة لمذكرات معلم في الوسط الحضري مع ما تبقى من الحلقات
يوم الأربعاء 15 يناير : حوميدي والدروس الخصوصية
يوم الخميس 16 يناير : حوميدي وتلقيحات الأطفال
يوم الجمعة 17 يناير : حوميدي وقصتو مع صاحب الطبسي ديال الطعام كل جمعة
يوم السبت 18 يناير : حوميدي وولادة ابني أنس
يوم الإثنين 20 يناير : حوميدي والتلفزة كولور وشرارة
يوم الثلاثاء 21 يناير : حوميدي والخزانة المدرسية
يوم الأربعاء 22 يناير : حوميدي ومعلمة بنتو عفاف
يوم الخميس 23 يناير : حوميدي وصديقي السقرام نبيل (1)
يوم الجمعة 24 يناير : حوميدي وصديقي السقرام نبيل (2)
يوم السبت 25 يناير : حوميدي والإنتقال إلى وجدة (نهاية المذكرات)
|
|
|
|  |
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
455الشكر 
