منتديات الأستاذ التعليمية التربوية المغربية : فريق واحد لتعليم رائد

منتديات الأستاذ التعليمية التربوية المغربية : فريق واحد لتعليم رائد (https://www.profvb.com/vb/)
-   القصة (https://www.profvb.com/vb/f214.html)
-   -   مذكرات معلّم في العالم الحضري (https://www.profvb.com/vb/t134704.html)

houmidi59 2013-12-20 19:03

مذكرات معلّم في العالم الحضري
 
بعد النجاح الذي لاقته مذكراتي في العالم القروي وخاصة التشجيع من طرفكم : ها أنذا استمر في سرد مذكراتي في العالم الحضري وطبعا مستعملا الدارجة المغربية
للإشارة : قضيت زهاء 22 سنة في مدينة تاوريرت وعشت حلوها ومرها وعاينت أحداث غريبة وطرائف مضحكة .ستكتشفون كل هذا من خلال هذه الحلقات .(شحال من حلقة
؟ الله أعلم هههه)


الحلقة الأولى : قسم أو كوري (écurie)



كان التعيين ديالي فمدرسة الرازي المختلطة.بحكم اني آخر واحد التحق بيها، لْقيتْ خوتنا المعلمين والمعلمات خْداوْ التلاميذ المجتهدين وحتى اللي فيهم شوية الضو ، يعني اللي يمكن يْديرو شي حاجة فلقراية.خوكم الحوميدي لقى 55 تلميذ مْساليين.
النهار الأول حسّيت بْوَدْني غادي يطْراشو (يتْصامْكو) تصورو غير الى هضْراتْ غير مجموعة مَنْهوم ، بْحال الى راكْ فالسويقة ديال فيلاج كولوش.من فوق هاد الشي القسم عامر وهذا يعني صعيب التنفس .كنت كنْحَل السْراجم باش القسم يتْهوّى .
الايام الاولى دَرْتْ ليهوم واحد التقويم تشخيصي .لْقيت باللي كولهوم ما داخلينش حتى لمْسيد.
فالحقيقة تاوريرت فْديك لوْقيتة ما كانش فيها التعليم الأولي.كانو شي جوامع يْحفْضو الدْراري الصغار القرآن .هاد الشي اللي كاين.
كان عليا نشوف شي خطة باش يرجع القسم عادي بْحال الاقسام الأخرى.أول حاجة جبْت معايا لعْصا .شي وحدين كانو يْبانو ليا غير ديال الصداع.تْباليت بيهوم بالهرمكة.اللي كاين هو كترات الشكايات عند الإدارة .المدير جا لعندي زعفان :
_ اسمع أخويا راه الضرب ممنوع
السيد زعما بغى يلعبها علي كبير .أنا ما عمرو كنت نخاف من شي واحد .ماشي مدير هو اللي غادي يخْلعني.جاوبتو فلبْلاص :
_ شوف السيد المدير أنت عاطيني سوق ديال لغنم او باغيني نْهار كامل حاضيهْ لكْ.واش عندك شي عقل ؟
_ كيفاش؟ ما فهمتش
_ غادي نفهمك.انا مْوالف نقري قَلْ من 30 تلميذ ماشي قبيلة ديالْ الهاماجْ (متوحشون)اللي عاطيني
_ ما عندي ما نْدير لك.هداك هو القسم اللي بْقى
_ ياك .غير الله يرحم الوالدين شحال كاين من قسم ديال اللّوّل ؟
_ كاين 5
_ شحال كاين من تلميذ فكل قسم من هادوك ؟
خونا بلله بانْ تْلف .بقى يتْلعْتَم فالهدرة.شي شوية قال لي :
_ ماشي شغلك ؟
_ وحتى انت ماشي شغلك داك الشي اللي نْدير فالقسم ديالي
_ انا غادي نكتب بيك
_ سير تكتب راه ما عندك ما تقضي.غادي تْجي لجنة ويْشوفو داك المستور ديالك .شوف كيفاش غادي تْسَلَّكها.
ما زادش فلهضْرة.مشى ديريكت للإدارة.خوكم طلعو الدم .صافي ماشي غادي نكْعى .راني كْعيتْ.يا الله دخلت للقسم ، تباليت بواحد الربعة كانو يْلعبو فوق الطْوابل .عْطيتْهوم واحد السلخة ديال الله الحَدْ.
يمكن الى قسَّحت ليهوم ، حيت جاو عندي جوج معلمات كانو يخَّدمو حدايا.
- مالك يا أستاذ ؟ سمعنا لغواتْ عندك
- راه طالع لي الدم مع هاد لبْراهش؟
- غير برَّدْ يا أستاذ .أنت باقي جْديد.غادي دغيا تْلاشي(تنهار)
شفت فيها وبقيت نضحك .المعلمة تْعَجْباتْ
_ بْغيت نْسَوْلك الله يخلّيك : شْحال عندك من تلميذ فالقسم ؟
المعلمة سَكْتات بالمرَّة.لكن صاحبتها الظاهر شجاعة ، قالت
لي :
_ انا عندي 28 تلميذ وفاطمة (يعني صاحبتها) عندها 30
_ اوى تبارك الله انتوما مْبرْعين وانا اللي شادْ الصهدْ
_ كيفاش ما فهمناش
_ اجيو دخلو تشوفو
يا الله طلّو .شافو لعجب .شي يلعب فوق الطاولة ، شي يْنَقَّزْ، شي تحت الطْوابل.المهم الحيحة نايْضة.
المعلمات بْجوجهوم حشْمو .واحدة بْداتْ تْشوف فْلخْرى
_ اوى آش أضْهرْ ليكوم يا أستاذات ؟
مازادوش كلمة وحدة .بَعْدو عليا شي شوية.شفْتهوم يتكلْمو بيناتهوم.
خليتهوم ودخلت للقسم .عاود تاني جْبَدْت لعصا وطحت على شي وحدين ...هاد الشي غير باش نْرجَّع الهدوء للقسم.
دازت واحد الرْبع ساعة .المعلمات بجوجهوم جاوني
_ اسمح لينا واحد الدقيقة يا أستاذ
_ نعم ما كاين مشكل
_ غادي ناخدو ليك التلاميذ اللي من المفروض كانو عندنا
_ يا الله تفضلو ، غير أو كان .....
_ غير أو كان واشتا (أشنو) ؟
_ بغيت نقول عنداكوم عاودْ تاني تختارو المزيانين ديال هاد الديشي وتْخلّيوْ لي صْحابْ الصداع
_ أحشومة أخويا
_ ظاهرة عليكوم لحشومة أنتوما
_ واش رك أخويا تْعايرنا
_ حاشا ، انتوما اللي راكو تضّحْكو عليا.واش انتوما ب4 خْتريتو التلاميذ الزينين وْ خلّيتو لي غير لَمْقَرْعْشين (الكوسالى)
يمكن دابا عاقو باللي انا واخّى جْديد ماشي كامبو
_ دابا آشنو هو المعمول ؟
_ تردّو ليا التلاميذ ديالي اللي كانو فاللائحة الأصلية
_ واخا غادي نْشوفو مع المدير
اللي وقع هو أنه مْشاو المعلمين ديال التحضيري (القسم الأول ) عند المدير .كانو 3 ديال المعلمات ومعلم.
المهم عاود تاني رْجعت للقسم .لكن هاد المرة بْحال الى لصْداع نْقَصْ.يمكن حتى هاد لبْراهش عاقو باللي أنا واعر.هي هاديك سكتو ..او تقريبا سكتو ، لأنه كاين شي مجموعة مازال باغية الهرمكة.
المهم جا وقت الخروج بعد الحصة الاولى.كاين واحد الاستراحة ديال 5 ديال الدْقايق.موراها يدخل فوج آخر يْقرّي حتى لطْناش وال25 دقيقة.هاديك هي لوقيتة اللي خاصني نرجع فيها باش نخدم لعْشية
اللي وقع اني تْفاجأْتْ بأن التلاميد رجعو 32 تلميذ او 34 (ما رانيش عاقل) بانو لي شي كْمامَرْ(وجوه) جدادْ ما عمرو ما شفتهوم.
لقيت فالمكتب لائحة أخرى فيها الاسماء ديال التلاميذ.هي هاديك بْديتْ نْعيّط عليهوم بالواحد.كل واحد يْرَدْ علي : حاضر أو حاضرة
غير ساليتْ ، بانو لي شي وحدين ما عيَّطْشْ عليهوم:
_ اوليداتي يمكن راكو تالفين .انتوم ما مْسجْلينْش عندي
_ أستاد كُنَّا عندك البارح
_ دابا ما بْقيتوشْ.سيرو شوفو المدير.
لمهم غبْرو .
هاديك لعشية ما درتْ والو من غير كتبت المعلومات على كل تلميذ.الحمد لله ، كاين شي تلاميذ نْقيّين ومن عائلات قارية.هدا بعدا غادي يْساعدني فالخدمة ديالي.



يتبع غدا إن شاء الله












houmidi59 2013-12-21 15:01

رد: مذكرات معلّم في العالم الحضري
 

الحلقة الثانية : الكاراج والبولة (lampe)والجوع

في الحلقة الثانية من مذكراتي في المدينة ، غدي نحكي ليكوم على حياتي الشخصية من نهار تعينت بمدرسة الرازي.
المهم داك النهار اللي وقعت فيه على محضر الدخول وتعبئة المعلومات الشخصية ، داك النهار مشيت للأوطيل ويمكن حتى بالنسبة لليوم الثاني والثالث.
فداك الأسبوع ، مْشيت عند صاحبي مول الحانوت عبد الله باش ناخود الرسائل ديالي.هضْرة تجبد هضْرة تْكلَّمنا على لكْرى.هي هاديك، قال لي : كاين واحد المحال فيه الما والضو ويقدر يصلح لي.سوّلتو فين كاين.جاوبني باللي موجود شوية بعيد فواحد الحي سْميتو بْلان الحلفا.قلت لو باللي ما كاين حتى مشكل حيت معايا اسمهان .
المهم اتفقت معاه نمشيو نشوفو المحال.الغدّ ليه مع العشرة ديال الصباح .لوقيتة اللي نخرج فيها من الخدمة. فعلا مْشى معايا راكب على لاموطو ديالي وصلنا لشي دروبة سبحان لله العظيم دكروني بالطرقان ديل أولاد سليمان.وقفنا حْدى واحد الكاراج ، أو هو يقول ليا : هذا هو المحال اللي تكلمت لك عليه
_ واه واش انا وجه سيمكا (simca) باش تْسكّني فكاراج ؟
خونا بالله ما غضب ما والو .افتح الكاراج وقال لي تفضل.
دخلت .الصراحة كاراج نقي : فيه ناموسيا (سرير) وطبلة وفيه روبيني(حنفية) وسطل وحتى لبوطاجي .يعني مجهز .
_ واخا أخويا وهاد الكارافان(caravane) بشْحال لكرى ديالها ؟
_ دابا تكلمتي بالمعقول.هادي أسيدي غير 100 درهم ولكن أنا غادي نْخليها لك ب70 درهم وما تخلّص لا ما لا ضو.
فعلا هادي همزة الى طاحت فْيد شي بخيل ما شي غير يسكن فيها راه يقدر يْخلّيها ورت لولادو وأولاد وْلادو.بقيت نْخمّم باش نشدْها غير حتى نلقى شي دار او مع منْ نسكن
_ هاديك هي قلت لو : صافي أخويا غادي ناخودها بعدا هاد
الشهر .
_ اوى طلّع ب70 درهم .
_ هاهي وزيد عليها هاد العشرين درهم بوربوار(pourboire)
المهم دابا خاصني نمشي لولاد زايد باش نْجيب حوايجي.
مع ديك الجوج والنص لوقيتة ديال الخروج ديالي مشيت للفرعية اللي كنت نخدم فيها او اللي خدمت فيها 10أيام أو أقل.مين وصلت للمدرسة لقيت يا الله جوج معلمين .يعني الثالث مكاينش وهدا يعني ان واحد فيهم راه شاد العربية والفرنسية.
المهم سلّمت عليهوم .هي هاديك عرضو علي نشرب معاهوم أتاي.
من الزّهر كانو يا الله فاش جابو ليهوم برّاد ديال أتاي مع حرشة مدهونة بالسمن والعسل.
حْنا كانكلو ، جا الشيخ عبد الرحمان .
_ تبارك الله على مولاي عبد الحميد .هادا نهار كبير .غادي ان شاء الله تْقصّر معانا
_ لا اسمح لي بزاف الحاج.انا جيت غير باش ناخود حوايجي ونمشي.
_ اوى غير ديرها او بات معانا
_ ما يمكنش غدّى ندخل بكري ولكن هادا وعد مني نهار الجمعة غادي نجي ، غير وجدو الطعام (كسكسو)
_ واخا .ما تكون غير على خاطرك
فعلا خْديتْ حْوايجي ومشيت لتاوريرت.
فالبيت الجديد ديالي حطيت البوطة ولمّاعن والفراش .قبل ما نخرج عمّرت المدكّرة اليومية .
باش نبدّل الجو ، مشيت للقهوة باش نشرب شي كاس قهوة بالحليب ونْرد مجاجي.
انا هاكْدا ، جا عندي أحمد (الأخ ديال حفيظة) باين مفْليبي (يعني مقرقب )
_ خويا حميد ما نقدرش نلقى عندك واحد الميلة ؟
_ واش أخويا كالو لك انا عندي البانكا
_ الله يرحم الوالدين غير اعْتقني باللي كاين
_ واخا هاهي 5 دراهم وما تبقاش ادّور بيا
مشى خونا بالله وبقيت بوحديتي حتى لْديك التسعة ديال الليل .رجعت للبيت بعدما دُزْت على الشريف وخديتْ ليا شوية كفتة فالخبز
هاد السكن بقيت فيه قل من شهر على ودّاش واحد النهار شي معلم خدّام معاي قال لي كاين جوج معلمين باغيين يْزيدو شي واحد معاهوم.
مْشيت معاه باش نشوف الدار.هاد الدار تبان مزيانة ونقية .فيها جوج بيوت وكوزينة ووسط الدار.المعلمين بجوجهوم استقبلوني وعرفوني بنفسهوم .الاول سميتو عبد النبي والثاني البكاي.
تكلمنا على لكرى .واحد فيهم قال لي : هاد الدار راحنا كارين ها ب350 درهم للشهر .
التاني قال لي : واش باغي تسكن بوحدك فالبيت او تختار بيت مشروك.
فالحقيقة ما فهمت والو
شرحو لي الأمر : الى خديتي بيت غير بوحدك غادي تخلص 150 درهم وحنى بجوج نخلصو 200 درهم
_ واخا نخود بيت بوحدي
من غدا غادي تسكن معانا
ديك لوقيتة كنا يمكن فأواخر اكتوبر .جات مزيانة .هي هاديك ما غاديش نخلص مول الكاراج
العشرة مع هاد الخوت ماشي صعيبة بل مستحيلة .هاد الناس الله يستر كيتغداو بالبيض ويتعشاو بالبيض وبين لغدا ولعشى كيشربو أتاي مع الخبز والزيتون.
ريحة المرميطة ماكايناش عندهوم.
النهار الأول جا خونا بالله (عبد النبي) جاب 3 ديال البيضات ، هرّسهوم حدايا ودارهوم فالمقلى .دغيا طابو .عيّط على صاحبو : البكاي لغْدى راه واجد.
خوكم على نيْتو بان لي هاد الشي قليل : صبْرو شي شويا ، غادي نْجيب شي قرعة موناضة
_ واخا ولكن ما داخلاش فالحساب
_ ما تقلقش انا باغي نْبرّعكوم
فلعشية ، خونا بالله عاود الدّيسك ديال لغدى : 3 ديال البيضات
يا الله فاش تعشينا قلت ليهوم : لله يرحم الوالدين بغيت نعرف البرنامج ديالكوم في الأكل
_ راك تشوف أخويا البيض فالصباح والبيض فلعشية
_ واش ماكاينش المرميطة ؟
_ أخويا ما كرهناش ولكن على حسابك
_ انا الَخّوت يمكن ما غاديش نتْعاشر معاكوم
_ علاش أخويا ؟
_ اولا انا كنت كناكول البيض البلدي ، غير فوق الشبعة.تانيا البيض الرومي ما شي مزيان للصحة كيْضرْني فالمعدة ويْدير لي الحساسية
_ إوى اخويا خاطرك
فعلا بْقيت ناكول برّا اللي بغيت .بعض المرات كنْجيب معايا كاسكروط باش ناكلو فالدار.الحمد لله ما كنتش نلقاهوم فالدار والا كنت غادي نضْطرْ نتقاسم معاهوم.
واحد النهار لقيت البولة (المصباح) ديال المرحاض محروقة.
شي شوية جا عبد النبي وقال لي : واش انت اللي حْرقتي البولة؟
_ لا أخويا أنا لقيتها هكدا
حْنا فالهضْرة ، جا البكاي.
قالّو عبد النبي :
_ أنت اللي حْرقتي البولة؟
_ ماشي أنا
_ اوى شكون اللي حْرقها ؟
بقين فالهضْرة الخاوية.شي شوية لقيت الحل : صافي انا غادي نمشي نشري بولة جديدة
عبد النبي ما بْغاش : والله ما تشريها .انا حالف .هو اللي يشريها على حقّاش هو اللي حْرقها
البكاي ضحك وقال لو : واخا غادي نشريها ولكن غادي تشوف
خونا البكاي شْرى البولة .مين يدخل للمرحاض يْركَّبها ، مين يخرج يْحيَّدها
بقيت نشوف هاد خيْنا والبخل ديالو فين وصل.واه بنادم جيعان فماكلتو وفشرابو وفتصرفاتو
المهم واحد النهار حْضيتو مين بغى يْحيد البولة وانا نقول لو : خويا البكاي حشوما عليك انت تقضي غراضك فالضو وحْنا تخلينا فالضّلمة
_ أنتوما ما بغيتوش تخلصو البولة
_ هاك خويا انا للي غادي نخلّصها.
_ لا صافي راها خالصة ولكن خاصّك تعطيني حقك منها
_ شحال حقي أخويا ؟
_ اعطيني 15 دورو (ريال)
_ هادا ماكان .هاك ها 20 دورو
_ لا أخويا هاك الصرف
_ دابا ما غاديش تْحيَّد البولة
_ واش حمقتي .خاصك تْحيّدها مين تخرج من المرحاض
_ ولكن علاش أخويا ؟
_ عبد النبي باقي مامخلًّصشْ الحق ديالو
_ واخا انا غادي نْخلّصْ حقو
_ ما مْعاناش
_ واه .شوف رمي عليا البولة ديالك أنا غادي نشري وحدة جديدة
داك الشي اللي درت .غير او كان شْريتها عليه ب50 ريال وخا هي كتسوى غير 45 دورو
من داك النهار نْدمت اللي خلّيتْ الكاراج وسكنت مع قبيلة الجوع
على كل حال رّجعت لصاحبي عبد الله ، لقيتو كْرى الكاراج وهاد المرة كْراه ب150 درهم
اوى خاصني نرحل باش ما كاين



يتبع يوم الإثنين القادم

a.khouya 2013-12-21 16:39

رد: مذكرات معلّم في العالم الحضري
 
السلام عليكم.
لكل مقام مقال.القسم الجديد ومشاكله,السكن وفضائحه.
المشكل هو تصرفات أناس التربية المفروض ان يكونوا في المستوى اللائق.قد نلتمس لهم العذر في بعض الحالات الخاصة جدا لا في المدرسة ولا في السكن.لكن التقشف الى اقصى حد.........
/ابحال هاذ النماذج اقلال/ كان الله في عونك.

houmidi59 2013-12-21 21:47

رد: مذكرات معلّم في العالم الحضري
 
اقتباس:

المشاركة الأصلية كتبت بواسطة a.khouya (المشاركة 703816)
السلام عليكم.
لكل مقام مقال.القسم الجديد ومشاكله,السكن وفضائحه.
المشكل هو تصرفات أناس التربية المفروض ان يكونوا في المستوى اللائق.قد نلتمس لهم العذر في بعض الحالات الخاصة جدا لا في المدرسة ولا في السكن.لكن التقشف الى اقصى حد.........
/ابحال هاذ النماذج اقلال/ كان الله في عونك.



يا أخي يجب أن تعلم أنه خلال السبعينات والتمانينات كانت أجرة رجل التعليم زهيدة وهذا سبب كان يدعو البعض منهم الى التقشف بل وربما الزهد .
في تلك الفترة كنت أشاهد المئات من المدرسين يشترون يوميا البيض إذ كان ثمنه لا يتعدى 30 سنتيما ، أما الخضر فلا يعرفون منها سوى البطاطس (50 سنتيم للكيلو ) والبصل (30 سنتيم للكيلو)
على كل حال هناك فئة نادرة تعدت التقشف الى أقصى الحدود ومن الصدف عايشت مثل هؤلاء والبرهان النموذج الحي لعبد النبي والبكاي
شكرا على مرورك العطر
تحيتي الخالصة

houmidi59 2013-12-22 20:04

رد: مذكرات معلّم في العالم الحضري
 
الحلقة رقم 3 : المفتش يْقلّب على جْوى منجل

في هذه الحلقة سأعود إلى حياتي العملية.كيف ما قلت من قبل ، بعدما أصبح القسم مْقادْ وارْجع عندي 36 تلميذ ، خْدمتْ مزيان اُو ما قصَّرْتش فالعمل مع التلاميذ. تصورو أنا اللّول يمكن فالمغرب اللي فكّر يْلوّن الصويرات.فديكْ لوقيتة كانوباقيين بالأبيض والأسود بحال الأفلام ديال اسماعيل ياسين. من الأعمال الشخصية ديالي كنت كنْجيت مورْسوياتْ (قطع) ديال الجرائد نعطي لكل تلميذ مورْسو (قطعة ) من الجورنال ونطلب منّو يحسب الحرف اللي قريناه .اللي لْقى أكبر عدد ديال داك الحرف عندوجائزة.كنت كذلك نوزع عليهوم بطاقات ديال الحروف .كل تلميذ عندو مجموعة ديال الحروف وخاصو يْصاوب بها كلمات سبق لينا قْريناها.
الصراحة في ظرف شهر ونصْ التلاميذ ديالي بْقاوْ يطيرو (بلا جنْحين) فلقراية.تقريبا كولهوم يقراو ويكتبو . فشهر دجنبر كنت مرتاح مع راسي.يا الله نعطيهوم التمارين ونمشي للمكتب ديالي نْقاد لوراق اونقرى شي كتاب نكون جبتو معايا.
واحد النهار كنت صايم (الله يقبل) .كانت الله أعلم ديك الجوج ، يعني كان باقي واحد 30 دقيقة للخروج.حسّيت بشوية ديال لعيا ، هاديك هي مْشيت نستراح فالمكتب.كانو التلاميذ كيرسمو على وداش كانت عندهوم حصة الرسم.
انا بحال الى ساهي دخل المفتش على غفلة.خونا بالله يسْحاب ليه غادي نشوفو نمشي نجري لْعندو.خوكم الحوميدي كان فاتكي (fatigué)ومن الفوق ما كنتش عارف باللي هدا هو المفتش.انا بانْ ليا بحال شي أب ديال تلميذ جا يْسوّل على ولدو.انا باقي كالسْ ، قلت لو : تفضل أسّي محمد .راني شوية عيّان ، أجي قرّب عندي وما تاخودهاش مني قلّة صواب.
خونا بالله ما عجبوش الحال : تبارك الله على المعلم .واش ما عرفتيش شكون أنا ؟
_ الصراحة لّا ولكن ماشي بعيد تكون الأب ديال شي تلميذ
ضحك خونا بالله وقال لي : نوضْ راك مع المفتش
خونا بالله يسْحابلو غادي نمشي نجري عندوونقدّم لو الاعتذار ديالي .بالعكس زاد طَيَّرْهالي بالطريقة ديال الجواب ديالو .على داك الشي ، ردّيت عليه : من بعد أخويا واش باغي تخْلعني ؟
المفتش ما كانشْ ناوي على هاد الجواب قْلبها لدرب ليهود (هادا مصطلح وجدي المعنى ديالو ولّى ظريف ، بمعنى آخر بغى يْجاملني ): واش هادي طريقة باش تستقبلو الضياف ديالكوم؟
_ حاشا أالسيد المفتش ولكن راني شوية عيّان حيت راني صايم
ليهودي دغيا شْعل : الى كنت مريض أسيدي ديرْ رخصة أو سير للطبيب
صافي هاد خونا بالله راه يْقلّبْ عليها .على داك الشي خنْزرت(شَفْت فيه غضبان) فيه مزيان وقلت لو : شوف أسي محمد أنت اللي راك تقلّب على الطبيب
_ كيفاش ؟
_ غادي تخْرج من القسم والّا غادي نَضَّربك ونْديرْ لك شي فضيحة حدى التلامد.يا الله بينكا ( يعني برّا)
خونا بالله مشى او هو يتوعد : غادي نكتب ، غادي نْدير .......
شفتو مشى نيشان عند المدير .شي شوية بانو لي شي معلمين يلتاحقو بالادارة.المهم قلت مع راسي : ماشي سوقي ومن الفوق هاد خيْنا آش عندو يْدير؟ ياك راني مْرسَّمْ .
المهم بقيت مْريّحْ فالمكتب. دازت واحد الربع ساعة ، جا عندي المدير وقال لي : يا أستاد واشتا عندك مع المفتش ، راه بان ليا فيه الخلعة.
_ والو ، شوف هو اللي واشتا عندومعايا
المدير ضحك وقال لي فْوَدْني : واش بصّاح كنتي غادي ضَّرْبو ؟
_ بحال هداك الكَمْكومْ راه وجه البونيا (اللكمات)
المهم المدير قال لي : برّد السوق أأستاذ أنت باقي جديد ، غادي تهلك غير صحتك
قبل ما يمشي حيت كان وقت الخروج ، قال لي باللي المعلمين جاو وتكلمو مع المفتش وراه ما غادي يْدير والو ولكن خاصني نحْضي راسي مْعاه على حقّاش غادي يْدير ليا شي تفتيش فْأقرب فرصة ماشي بعيد مورا العظلة ديال الدورة الأولى
المهم دق الجرس وخْرجت في حالاتي بعدما رْكبت على اسمهان ديالي (لاموطو، هدا تنبيه لهادوك اللي ما مْتبْعينشْ القصة ديالي الأولى )
يومان مورا الحدث جا عندي المدير .قالك أسيدي بْغى يْدير ليا زيارة.الشغل باين .خونا بالله (المفتش) طْلب من المدير يشوف عن قرب الخدمة ديالي.
خوكم الحوميدي ديما داير الميزاجور (MISE A JOUR) يعني حاضي سْواريه مزيان

السيد المدير حْضر لي فحصة الرياضيات وحصة القراءة .عجبو الحال بزاف.أنا لْعبتها عليه كْبير.قلت لو :
_ السيد المدير تعطي للتلاميذ ديالي أي كلمة غادي يقراوها بشرط يكونو الحروف هادو اللي فالسبورة
_ واخّا غادي نْشوفو
المهم بْدا يكتب فالكلمات والتلاميذ يقراوهوم بالزربة
_ واه هاد الشي عندك م****
المهم قبل ما يودّعني أعطاني التقرير اللي كان كاتبو فالوسخ وقال لي : الله يرحم الوالدين الى ما تكتبو ليا فورقة نقية وتْجيبو ليا فلعشية باش نصيفطوه لهداك الك.....
_ شكون الكي....
_ ههه على المفتش راه مشات لي سميتو



يتبع غدا إن شاء الله















الساعة الآن 17:27

جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها

Powered by vBulletin® Copyright ©2000 - 2024, Jelsoft Enterprises Ltd