منتديات الأستاذ التعليمية التربوية المغربية : فريق واحد لتعليم رائد

الحلقة 26 : ذكرياتي مع المستوى الثالث (المرحلة الثانية)

الجزء الأول :سّي أحمد بْغى يْردْني أبّاهْ

العام الثاني ديالي فالثالث كان مميز .داك العام المعلمين ديال المدرسة جابو أولادهوم وبْناتهوم باش يقراوْ عندي.بيني أُو بينكوم ، الأغلبية ديالهوم كانو طامعين بالجوائز اللي كنعطي للتلاميد المتفوقين.الصراحة أنا ما عندي لا مع وجهيات لا مع معرفة : التلاميد عندي سواسية .اللي جاب أعلى معدل ياخود الجائزة ديالو.
هداك العام ، كان عندي تلميذ ماكاينش بحالو : متخلّق ومؤدب ونشيط وكيسمع الهضْرة.سميتو أحمد.حيت كان عزيز علي بْقيتْ نْعيَّطْ لو مولاي أحمد.هاد التلميد من بعد عْرفت جوانب من حياتو الخاصة .تصوْرو هاد الولد يا الله فاشْ زاد أبّاه سْمح فالوالدة ديالو .هاد الأم جابْ الله لْقات الخدمة حيتْ هي قارية.كانت موظفة فالعمالة .بالطبع سهرتْ على التربية والتعليم ديالو وكانت تتْهلّى فيه مزيان.
انا مين عرفت قصْتو ، أهتمّيت بيه وكنت شْحال من مرّة كنْحنْ فيه وعاملتو بْحال ولدي.
واحد النهار جات عندي أمّو .هادي أول مرة كنْشوفها.المهم دخْلاتْني بلكلام المعهود ديال المجاملة : بارك الله فيك اللي راك واقف مع ولدي وراه فالدار ما يتكلم غير عليك.زعما أنا القُدوة ديالو فْكلشي
خوكم الحوميدي ردْ عيها وْ هو حشمان : لا شكر على واجب هدا راه داخل فالعمل ديالي
هضْرة تْجيبْ هضْرة ، قالت لي : بغيتْ نطلب منّك شي طلب ولكن حْشمت وخفْتْ الى تدّيها منّي من قلّة الصْواب
_ حاشا الالّة ، راني كنسمع ليك ، تْكلمي
_ كيف ما تْشوفْ أحمد راه محروم من أبّاه ملّي زادْ.انا اللي كنْحاول نكون أبّاه وْمّو
_ آشْ نكولَّكْ : الله يعاونك على التربية ديالو
_ بارك الله فيك .
هاد الانسانة عندها واحد السحر يْخلّيك غير تْشوفْ فيها .الصراحة جميلة ومسْرارة .عْمرها تقريبا ديك 26 أو 27 عام .خوتنا بالله سكْتاتْ .خاصني نَحْيي النقاش :
_ سمْحي لي تْباني لي مازال صغيرة ، بحالك ما زال ما ممْزوْجاتْ.
ابتاسمات : عندك الحق .أبّا الله يرحمو هو اللي ارغمني من الزواج من الولد ديال صاحبو ...
_ باينة ما كنتيشْ تبغيه وطلبتي منّو الطلاق
_ والله أأُستاد بالعكس كنت باغية نْعيشْ معاه حياتي
_ إوى ؟
_ اللي كاين هو أمّو الله يسمح ليها كانت تتْدخّل فالشؤون ديال ولدها . هادي قصة ما عندك عْلاشْ تسمعها
_ عندك الحق ، نْرجعو للطَّلب ديالك
_ آه نْسيتْ .الصراحة أستاد ولدي قالها لي : الانسان كيْحسْ بالراحة مين يتكلّم معاكْ
خوكم الحوميدي بْحال الى حسْ بلحْمورية طالعا لو لوْجه ."صافي أخوتي .هادي ناوية شي حاجة .المشكل دازت تقريبا رْبع ساعة وْنا نْعيق باللي كنتْ شاد ليها يدّيها .شوفو يا خوتي مين سلّمت عليها بْقاتْ شادّة لي يدّي وْأنا عْجبني الحال .طْلقْتْ يدّي وقلت ليها : نْعمْ أختي آش حبْ الخاطر ؟
_ أستاد عبد الحميد ....أحمد بْغاكْ تكونْ أبّاه

الجزء الثاني : التلميد اللي هرب فالتْرانْ لوجدة

سمحو لي الى خلّيتْ القصة واقفة على داك الطّلب الغريب.طبعا راكو عارفين باللي الحوميدي كان متزوج وعندو بنت عندها 8 سنين او 9 .وعندو ولد فعمرو 5 أو 4 سنين.
القصة الثانية ديال واحد التلميد كان عندي يمكن يكون مْباطي (مْحطّمْ)الروكورْ فالتْزامْبيلْ (الغياب).هاد خونا يالله كل مرة هاهو مْعوطَلْ يوم أو يومين.الجمعة ماعمرو ما جا حيت كيمشي للواد .فالمشْتا يْصيّد لقْراقرْ (الضفادع) والربيع باينة العومان.
خونا بالله كل ما يْجي نعْطيه حقّو من الهرمكة ونطْلب منّو يْجيبْ أبّاه.العجيب فالأمر كل مرّة جايب ليا شي واحد : هادا عمّو ، هدا خالو ، هادا جدّو ، هادي حنّاه ، هاد عمْ جارو ، هادي خالة ولد جيرانهوم ....المهم تقريبا العائلة المحترمة ديالو كولها درت معاها العرْفْ
أرانّا الأسباب اللي كان اللي يْجي مْعاه يدْلي بيها .هنا ماكاين غير النكت.تصورو المرة الأولى جاب خالو وقال لي : أستاد سْمح لو الله يرحم الوالدين راه كان عمّو مات الله يرحمو .
المرة الثانية جاب عمّو وحتى هو قال لي : الله يرحم الوالدين الى ما تسمحلو كنّا شْوية مْلاهْيينْ مع الموت ديال خالو .
هاد خونابالله قاتل العائلة ديالو كاملة غير بالقصص .أطرف وحدة من هادو نهار اللي قال لي واحد خونا بالله جا مْعاه :أنا أبّاه.
شفْتْ فيه مزيانْ : أنت بّاه ؟
_ واشْ ما بايْناشْ علي أأستاد ؟
_ الصراحة انا اللي عارف أن بّاه مات هادي شْحال
_ آه يا ودّي واش أنا باقي حيْ وْقْتلْتيني
_ أسّي محمد سوّلْ ولدك هو مول لخْبارْ
خونا بالله صْفع ولدو حتى يمكن بانو لو النْجومْ : تْكلّم ياولد لْحرام وقْتاشْ قْتلتيني.
انا اللي ردّيتْ علي ، حيتْ ولدو قْلبها بْكى : لخبار ديال الموت ديالك أسيدي جابو لي واحد خالو اللي حتى هو مسكين مات الله يرحمو حيت عمّو الله يرحمو قالها لي
_ عمّو زعما خويا .واه ، خويا مات ؟
_ اوى سوّلْ ولدك
هاد المرّة زادْ لو واحد الدّيريكتْ حتى نيفو سالْ بالدم : وقتاش عمّكْ ماتْ ؟
أنا عاود تاني رديت عليه : اوى جدّاتو الله يرحمها هي اللي قالتها ليا هادي واحد الاسبوع
_ حتى جدّاتو ماتت زعما أمّا مسكينة.غير البارحة راني كنت عندها وشْربت لحليب ديال البقرة اللي شْرات
بغى عاود يْزيدْ لو ، ما خلّيتوشْ : صافي أخويا واش باغي حتى هو تقتلو ؟
_ أخويا ياكْ غير هو اللي باقي فالعائلة اللي ماماتْشْ.
المهم الولد ما بْقاشْ يْغيبْ بعد السلخة اللي عْطالو أبّاه وْعمّو وْ خالو وْجدّاتو .خونا بالله قال ليهوم : عَوْ ما عمّرْني ما نْغيّبْ
زعما تَقْتوهْ ؟ والو يا الله دازت شي أيّامات خونا بالله غْبرْ.المشكل حتى فْالدّار ما بانشْ.أبّاه جا لْعندي يْسَوّلْ فيه : أستاد ولدي مابْقاشْ ضْهر .آشْ درْتي ليه؟
السيد باغي يمسح فيا تهمة خطيرة : أسمع يا داك بنادم سير قلّبْ على ولدك فالسبيطارات يمكن ضَهْسو كامِيّو أو سيرْ للواد راه شي حوتة تْكون كْلاتو
_ باراكا ما تضحك علي .انا غادي نعْلمْ البوليسْ
_ اعلم حتى الجادارْمية والقيادة
دازت أيّامات ، جا لْعندي صاحبي سعيد وْقال لي : هادي واحد ال10 أيّام تْلاقيتْ فالقطار جوج تلاميد واحد فيهوم يقرى عندك.راه قال لي باللي باغي يمشي للجزائر باش يهرب من والديه اللي قاهْرينو
_ واه كي سْميتو ؟
_ جمال لم.....
_ خويا سعيد هاد البرهوش راه داير ليا مشكيل .دابا فين يكون فهاد لوقيتة ؟
_ ما يكون غير فوجدة .
المهم سعيد أعطاني لبْلاصة ديالو.اللي كان هو أني مْشيتْ للبوليس واعلمتهوم .الحمد لله الاساتدة فتاوريرت عندهوم سمعة طيبة.رجال الأمن اتّاصلو بصْحابهوم ديال وجدة وفعلا جابو الزّرْطايْ (الهرّاب ) حتى لبّاه

غدا مع الحلقة 27 من مدكرات حوميدي مع المستوى الثالث
الجزء الأول : حوميدي رْجعْ زوفْري (رُواسي)
الجزء الثاني : العشْرة مع عبد الله ولخضر

الحلقة 27 من مدكرات حوميدي مع المستوى الثالث
الجزء الأول : حوميدي رْجعْ زوفْري (رُواسي)

حوميدي زوفري ؟ غادي تْجيكومْ عْجبْ.فعلا عندكوم الحق غير أُو كانْ ما خاصْكومْشْ تْصوْرو الأسوء.ما كاين والو : ألام ديال مولاي أحمد ما عندي حتى علاقة معاها ولوْية ديالي ما زال عايشة معايا.اللي كاين أنه فْتاوريرت هاد الزغبية ديال الزوجة ديالي كانت عندها الحساسية وكانت دائما طايْحة كْريز.الطبيب قال لي أن الجو ديال تاوريرت ما يصلحشْ ليها.هي هاديك جاتني الفكرة باش نمشي نستقرْ في وجدة .الزوجة وبنتي عفاف يسكنو في وجدة وخوكم الحوميدي يكْري مع أصحابو شي دْويْرة على قد الحال.اوى يوم السبت والأحد يمشي لوجدة باش يقضي آخر الاسبوع مع العائلة ديالو.وبالطبع كاين العطل والعام راه يدوزْ دغيا
المهم خوكم الحوميدي رْجع لْأيّامات التازوفْريتْ.الحاجة المهمة خاصّو يلقى مع منْ يسكن.مشكل كبير لقيتو حيت أصحابي اللي كنت نعرفهوم كولْهوم متزوجين وعندهوم ولادهوم يقراوْ فالمدرسة.هدا يعني خاصني نشوف شي سكنى صغيرة.
على داكْ الشّي قلَّبْت ما لْقيت غير من 1000 درهم للفوق.شي ليلات مْشيتْ للْ أوطيل ولكن تْقامتْ علي غالية حيت الليلة تقريبا ب50 درهم الثمن الأدنى .مين تْفيق تلقى باللي البق والبرغوت دارْ فيك حالة.أما الفندق اللي ما بيهْشْ غير من 100 درهم للْفوقْ
الحمد لله واحد السيد حلّاق قال لي راه عندو واحد الكارْسونْييرْ (garçonnière) فيها الأثاث والفراش .راه كاريها غير ب300 درهم للشهر.هو تقريبا كيمشي ليها جوج مرات فالاسبوع باش يسهرْ فيها مع أصْحابو في ذكر الله وتلاوة القرآن.السيد باين معقول ولكن ما خفِيَ أعظم.زعما خونا بالله غير ودّنْ المغرب ، سدْ الحانوت وقال لي أنا ما خاصْنيشْ نْفلّتْ المغرب.بحال هدا شكون اللي غادي ينوي فيه لحْوايجْ
الخايْبينْ ؟
المهم سكنت معاهْ شي أيّامات.كنت تقريبا ديما بوحْدي.كان مرّة مرّة يْجي عندي يشرب معايا شي كاسْ أتايْ.من بعد يمشي في حالاتو.
نسيت ما قولتشْ ليكوم ان هاد السكن فيه بيت ومطبخ ومرحاض.
المهم واحد لعشية مع ديك الربعة ، جا الكوافير عندي وقال لي : خويا حميد راني باغي نطلب منك واحد الطلب ولكن ما تدّيهاش مني من قلّة الصواب.
قلتْ لو ما كاين مشكل غير طْلبْ.
قالك أسيدي خاصني نغبرْ من الدار 3 أو 4 سْوايع حيت شي ناس مهمين غادي يْجيبْهومْ للدار.وقتاش زعما يمكن نرجع ؟ قالكْ أسيدي غير يْودّنْ لعشا يمكن ليا نلتحق بالدار.
خْديتْ لوْراق ديال الخدمة ومْشيتْ للقهوة .منْها نْديرْ الخدمة ديالي ومنْها نشرب شي قهوة.مع ديك لوقيتة ديالْ لعشى رْجعت للبيت .بانت لي الضّو طافْية .بغيتْ نْحلْ الباب .ما قْدرتشْ.بْقيتْ نْدقْ حتى سمعوني الجيران ديال العمارة
_ آشْ كاين أخونا مالكْ تفرعْ الباب.
واحد آخور غوّتْ علي: ما كْفاكْ داكْ الشّي اللي درتو مع صْحابكْ
سمعت شي وحدين يْسبّو : الله يلعن اللي ما يحشمْ تضّحكوعلى بْناتْ الناس
انا بْقيتْ غير نشوف فيهومْ .ما صَبْتْ ما نْقولْ ليهوم.
الحمد لله ربّي كبير واحد السيد نعّرفو يقرى عندي خوه عْقلْ علي : أنت ماشي الأستاد عبد الحميد؟ بعدما تْأكّدْ باللي أنا هو ، زادْ قالْ لي : آشْ كدّيرْ هنا ؟ ياكْ أنت بْدارك ووْلادك.
كان علي نحكي لو اللي كاين.
شاف فيا أو قالْ لي : أجي نفّرعو البابْ.داكْ الشّي اللي درنا.لقينا العجبْ العُجابْ.خونا بالله ناعس فالأرض ومْعاه شي وحدة في حالة يخجلْ منها حتى الشيطان.لخّوت بْغاوْ يقْتصّو منهوم ولكن جا مول الدارْ وقال ليهوم : اخرجومن داري.خونا بالله باينة ما عْقلش علي بْدى يْسبْ فمول الدار .
المهم الناس كولهوم جْراوْ عليهوم بْجوجْ هو والبنت.
شي شْوية صاحبي مْشى لْشي بْلاصة ورْجع معاه قْفل.
_ غادي تْسدْ الباب بْلقْفلْ مين تخرج.مينْ تكون فالدار كاين الساقطة.
مول الدار ما بْغاشْ فاللّوّل يْخلّيني نسكن ولكن هاد السيد الأخ ديال التلميد ديالي قال ليهوم : هدا نعرفو مزيان راه أستاد محترم.
المهم واخا مول الدار ما قْتانَعشْ.قال لي : غادي تسكن حتى لآخرْ الشهر.غادي نحْضيكْ مزيانْ
دازت يومين ، جا عندي صاحبي الحلاق.كانت الساعة التسعة ديال الليل.خونا بالله ما عجبوش الحال.بْقى غيرْ يْسبْ .من بعد قال لي غادي تعطيني الساروت ديال لقْفل باش مرة مرّة نبقى نْجي.مسكين قطّعْتْلو لِياسْ (الرجاء)
_ كيفاش زعما ما باغينيش نسكن معاك ؟
_ أخويا ماشي أنا اللي ما باغيش راه مول الدار
_ واخا نْديرو داكْ الشي بالساكوتي وْحتى واحد ما شافنا
_ أسمع الله يرحم الوالدين أنا ما عنديش مع السْكايْرية
_ كيفاش تْعايرْني؟
_ اوى أفْهمْ راسك
واخّا
شافْ فيا مزيان وضْحكْ : باغي زعما تْشَدْ الدار غير بوحْدك ؟ واخّا.يالله انا بغيت فراشي وحوايْجي.
الكامبو يَسْحابْلو غادي نْرغبو ولكن ما يعرفشْ مزيان حوميدي.
_ تفضلْ خودْ حْوايجكْ راهْ فيهوم ريحة الشْراب
خونا بالله جْمع كولشي ما خلّالي غير طبْلة وكرسي ديال مول الدار.مْشى في حالاتو وبْقيتْ كنْخمّمْ.
الباب بْقاتْ محلولة .دابا ما عندي لاشْ نْخاف.آشْ يمكن يسّرقو ؟ والو
هي هاديك قلت نْصلي لَعشى ولها مدبّر حكيم.
سبحان الله جا عندي مول الدار .باينة شافْني نْصلّي .هي هاديكْ غْبرْ حتى ساليت ورْجعْ.
قال لي أجي معايا .جاوبتو : أعلاشْ.قال لي : أجي يا أستاد راني باغي لك غير الخير.المهم فْتح واحد الباب وقال لي : خدْ اللي بغيتي من لفراش والأواني المنزلية.
المهم وصّلْ معايا كولشي.
هاديك الليلة نعسْتْ مرتاح .فالصباح مول الدار غيّرْ السوارت ديال الكادْنا وقال لي من اليوم غادي نكري لك غير ب200 درهم حتى تلْقى اللي يسكن معاك.
دازت تقريبا 5 أو 6 شهور الى ما خفتش نغلط بالضبط في شهر مارس.كنت خدّام فالقسم ديالي .جا عندي الشاوش وقال لي شي واحد راه يْقلّبْ عليكْ.خْرجْت باشْ نشوفْ شْكونْ هادْ السيد.الصراحة ما عمرو ما شفتو.
الأخ عرّفني بنفسو وقال لي : راني يا الله فاش تْعيَّنْت في تاوريرت وراني ما نعرف حتى واحد وكَنْقلّبْ على لكْرى.شي واحد معلّم قال لي باللي يمكن لي نسكن مْعاك.
خوكم الحوميدي دائما يبغي الخير والنية ديالو صافية ، جاوبو : ما كاين مشكل.غادي تمشي تتْسارى شي شْوية وارجع لي مع الطْناش باشْ نمشيوْ للدار.
هي هاديك فلوْقيتة المعلومة جا ومْشينا للدار.لغدى كان موجود .تْغدّينا .صاحبي الجديد كان جايب مْعاه شي حْوايج .قال لي : أنا دابا غادي نمشي لوجدة وها حوايجي.غادي نْجيب اللي نحتاج لو .
المهم قبل ما يمْشي اتافقْنا على لكْرى .
العشرة مع خويا حسن كانت جد إيجابية.مع هاد الأخ رْجعت مواضبْ على صلاة لفْجر بعدما كنت يا الله نْصلّي مرّة مرة.خونا بالله كان كل ليلة يْفيّقْني .حاجة أخرى حتى المسجد رْجعت نمشي لو 5 مرات فاليوم.
كنت كدلك نْصوم كل إثنين وخميس والفضل كله لأخي حسن الله يْكثّرْ من أمثالو.
بقيت فهاد السكن حتى لْأواخر يونيو حيت جات العطلة.
فالدخول المدرسي المقبل ، صاحبي حسن كان لْقى مع من يسكن .كان هو باقي شاب ماشي بْحالي أنا كبير عليه ومتزوج.عندو الحق خاصّو يْكون مع اللي نْتيجو (فالعمر ديالو)
حتى أنا لْقيتْ معلم باقي ما مزوج ولكن كبير تقريبا العمر ديالي.
معاهْ قرّرْت نسكن

يتبع غدا إن شاء الله : الجزء الثاني : العشرة مع عبد الله ولخضرْ