منتديات الأستاذ التعليمية التربوية المغربية : فريق واحد لتعليم رائد

الحلقة 27 من مدكرات حوميدي مع المستوى الثالث
الجزء الثاني :العشرة مع خونا بالله عبد الله

سكنتْ مع خونا بالله تقريبا عام كامل ، يعني حتى لْأواخر يونيو.يمكن نقول على العشرة مْعاه دازت ب3 ديال المراحل : المرحلة الأولى "شوف فيا نْشوف فيك آطاجين الحوت" .المرحلة الثانية " اللي كْلاه واحد ياكلوه جوج " .المرحلة الثالثة " ها العار الى ما تعطيني التيساع"
فالمرحلة الأولى ، كان كل واحد فينا أدّايها فْبيتو.أنا كنت كناكول ونشْربْ فالبيت ديالي .تقريبا فاش كنت نتْلاقى مْعاه بعض المرات فلوْقيتة ديال أتاي.العجيب فالأمر كان عندنا نفس التوقيت.
خاصكوم تعرفو أن خونا بالله كان عندو البارابول دايرو فالبيت ديالو.غي يخرج من الخدمة يدخل ويْسدْ على راسو.كنت كنسمع غير الصوت وعْرفت أن خونا بالله مبْلي بالجزيرة وكل ما يتعلق بالأخبار .ما عمْرو ما عْرضْني نتفرّج معاه.بالنسبة للماكلة ، كان الصراحة مْهالي فْراسو ولكن ماشي ديما.هدا كان مختلف على البشر العاديين.تْصَورو هاد خونا بالله يومين ياكول فيها غير الخبز وماطيشة (مثلا) والنهار الثالث يْجيبْ الكبدة او الكفتة.عاودْ تاني النهار الرابع والخامس يقْضي باللي كان والنهار السادس يْبرّعْ راسو باللحم .
بالطبع كان يْخبّي ما ياكول ولكن الريحة كتبقى فالكوزينة
المرحلة الثانية بْدات واحد النهار خوكم الحوميدي دارْ واحد المرميطة ما يقْدر عليها لا برغاش لا شوميسة : مْريقَة اللّوبيا (كْريني ) بلحم الغنمي.
خونا بالله كان فْبيتو .غير شمْ ريحة الطْيابْ وخْرج يجْري :
_ الله على ماكلة شْحال بْنينة
خونا عارضْ على راسو بطريقة فنية.خوكم الحوميدي كْريم من طبعو ، قال لو :
_ مرحبا بيك خويا عبد الله.غادي نْكون جد سعيد الى شاركْتيني لغْدا ديالي
فعلا ، تْغدّينا مزيان .خونا بالله كْلا حتى شْبعْ.من بعد قال لي باللي ماعمرو ما كْلى بْحال هاد اللّوبيا.المهم قلت لو : بْصحْتكْ.ردْ علي : الله يْسَلْمكْ
اللي كان ، من بعد صافي ماتْلاشْ تقريبا يْطَيَّبْ شي حاجة.خونا بالله لْقى الريسْطورانْ (المطعم) ديال الفابور.بْدى يتْخبّى فْبيتو .غير يْشَمْ باللي لغدى وْجدْ، يخرج ويقول لي : خويا حميد ياكْ دَوَّقني مْعاكْ.انا كي العادة نقول لو : تْفضَّلْ خويا عبد الله.
للأسف هاد السيد من النوع اللي ما يسْتَحْيى وْما يَحْشمْ.تقريبا شهر أو هو ديما ياكول والمشكل قرْعة موناضا ما يشْريها.هادا فوجدة نْسمّيوَهْ "التْمَحْريدْ"
مين يبغي ربّي جا السْبابْ على يدّو.واحد النهار ما جيتْشْ بكري باشْ نْديرْ لغدى حيتْ كان عندنا اجتماع مع المدير.مينْ وْصلْتْ للدار ، كانت الساعة تقريبا الطْناشْ.خوكم داخل مع الجوج .يعني الوقت غير كافي باشْ نْصاوب لغْدى.هاديك هي جبْتْ مْعايا شي بيضات باش نطبخهومْ مع ماطيشة.
فالدارْ شمّيتْ ريحة الكبدة بْلاصوصْ.خوكم بالل اللي هو أنا سالو رْيوكو .قلت مع نفسي الله على ريحة شْحالْ بْنينة.بالطبع قلت عْلاشْ نْديرْ البيضْ ولغْدى موجود .كنت ناوي غادي يَعْرضْ علي باشْ نتْغدّى مْعاهْ.ياكْ زعما شْحال خوكم غدّاه من نهار ، زعما غادي يا الله يْردْ جزءْ من الخير اللي كنتْ نْديرْ فيه.
آهْ يا خوتي هادي ما كنتشْ نتْصوّرْها.جاب الطبسي ديال الكبدة وبْدى يهْرمْ كي الوحشْ بْلا ما يْشوفْ فيا.شي شوية مين وْصل لْنَصْ الطّبسي قال لي هاكْ دوقْ.أعطاني شْدقْ وقال لي بسم الله.الحوميدي ما يرضاشْ يتْصدْقو عليه، ردّيتْ عليه : غير كولو راه بَحْرى داكْ الطبسي يَكْفيك.هو جْبَرها من الجنة والنّاس وكْلى كل ما فالطّبسي.
الحوميدي ما فادو غير طيّبْ البيضْ بْماطيشة .باشْ نْبنَّنْها زَدْتْ ليها شوية ضامة البنّى كْنور.
المهم صايبْتْ واحد البرّادْ أتايْ.
هي هاديك كْليتْ وانا نْفكّرْ فهادْ الكَنْسْ الحافي.شي شْوية خونا بالله جا لْعندي ، بْحال الى ما عمرو كْلى وقال لي : ريحة البيضْ شْحالْ بْنينة
زعما باغي ياكولْ.ما يعرفش مزيان الحوميدي.
خوكم قال لو : حدَّكْ تمّا
_ كيفاشْ زعما ما بْغيتْشْ تْخلّيني ناكولْ مْعاكْ
شوفو التْقَزْديرْ فينْ وْصلْ.خوكم عْطاه قُرْطاسَة ما عمرو ما ينْساها :
_ أعلاه أخويا مينْ أنتْ كنتْ كتْزرّدْ فالكبدة خلّيتيني ناكولْ
مْعاكْ ؟
هادي ما كانشْ ناوي عْليها.عْرفتو باشْ جاوبني ؟
_ خويا حميد كنت نحْسابْ ما عندكشْ مع الكبدة
_ واه أخويا واشْ أنت الطبيبْ ديالي باشْ تمْنعْها عليا؟
المهم رْجعْ لْبيتو وْسدْ على راسو.خونا بالله راه غْضَبْ.سبحان الله انا اللي خاصني نغضبْ
المهم لعْشيا ما بْغاشْ يْكلّمْني .لْغدْ ليهْ، قلت مع راسي عْلاشْ ما نشْري شْوية الكبدة ونقْليها باشْ نتغدّى بيها.
فعلا داكْ الشّي اللي درتْ.
خونا الشَّمشام جا يجْري لْعندي .قبل ما يلْحقْ للطّبْسي ، قلت لو : سّي عبد الله هاد الكبدة اللي شْريتْ يا الله تكفي واحد.ياكْ راكْ بفْلوسك ، ديرْ بْحالي.
خونا بالله صافي وغْضَبْ وبْدى يْسبْ .أنا ما دّيتْهاشْ فيه وكْليتْ حتى نقّيتْ الطّبْسي.
شي وْقيتة سْمعنا واحد جارنا كان ساكن فالطبقة الأولى .جا مسكين يسْحابْ ليه راحنا كنْتْخاصْمو.مين عْرف اللي كاين ، شْحالْ ضْحكْ وقالْ لْخونا بالله : سّي عبد الله واشْ الناس يتْخاصْمو على الماكلة ؟

المرحلة الثالثة صافي خونا بالله قاطعني بالمعقول.حتى السلام ما بْقاشْ يْقولها لي.مين يدخل يمشي ديريكت للبيت ديالو ويْسَدْ على راسو.بْقينا على داك الحال حتى لديك أواخر ماي.
جا واحد النهار باقي عاقل كانت 1 يونيو .عبد الله كان فوجدة .كانت عندو شي رخصة ديال 3 أيام.المهم كان خاصني نمشي نْخلّصْ لكْرى .المشكل ما زْعمتْشْ نْخلَّصْ عليه ولكن الحمد لله كان مْخلّي لَفْلوس ديالو عند جارنا بلخضر.
جارنا لخضر قال لي : ها الحصة ديالو ديال لكرى ، زيدْ عليها دْيالك وسير عند فْلانْ باش تخلْصو لكْرى ديال الشهر.
فعلا مْشيتْ عند مول الدار .عْطيتو فلوس لكْرى وكانت مناسبة باش نعرف حقائق غريبة على خونا بالله عبد الله.
أول حاجة عْرفت وهو أن خونا بالله كان يْخلّصْ لكرى حتى ل15 من الشهر.مول الدار تْعجَّبْ مينْ أوّلْ مرّة يْشَدْ فلوسْ لكرى ف2 فالشهر.
الحاجة الثانية وهادي هي الخطيرة .مينْ عْطاني مول الدار التوصيل .يا الله قْريتو لاحظتْ باللي التوصيل مكتوب فيه : من 1 مايو1996 الى 31 مايو 1996 . اللي متعارف عليه ان لكْرى كيْخلْصوه الناس بالتسبيق .من الفوق خونا بالله نْهار اللي جيت قال لي خاصني نْخلّصْ فلوسْ لكْرى.
عْرفتو آشْ ردْ علي مول الدار : صاحبك كيْخلّصْني حتى يْسالي الشهر.
دابا تْاَكَّدْتْ باللي هادا صهيوني كبير كان يستغل النية والثقة اللي أنا دايرْ فيه.
هي هاديك غير جا ما خلّيتْ ما عْطيتْ لو .خونا بالله هادْ المرة سْكتْ حيتْ عارف راسو بازلْها.المهم باشْ ننهي الموضوع قلت لو : هادا آخر شهر مْعاك.غيرْ أوكانْ ديرْ حسابك غادي تْخلّصْ الحصة ديالك وديالي اللي سْرقتيها مني طيلة هاد الشهورا اللي دازو
خونا بالله فضحتو مع المعلمين باش حتى واحد ما يسكن معاه .
بقى هاد المجرم ساكن غير بوحدو لسنوات حتى تْزوّجْ.

يتبع هاد المساء الجزء الثالث : العشرة مع بلخضر والحلقة 28 من مدكرات معلم في المدينة

الحلقة 28 من مدكرات حوميدي مع المستوى الثالث
الجزء الثالث :العشرة مع خويا بلخضر وعبد الحي(1)

العشرة مع خويا بلخضر كانت رائعة حيت هاد الأخ الكريم كان نعم الصديق والرفيق والناصح.اللي عْجبني فيه أنه ديما كيْتصرّف بحكمة.سكنتْ معاه فالبداية مع أستاذ آخر سْميتو عبد الحي.كنا ساكنين بْثلاثة بينا مينْ كْرينا دار كبيرة فيها 4 ديال لبيوت .هادي لكْرى ديالها كان غالي حيت كنّا كندفعو كل شهر لمولْ الدار 1200 درهم ، يعني 400 درهم للواحد.
خويا لخضر كان أستاد ديال الرياضيات فالإعدادي والأستاد الثاني كان كيدرّس التربية التشكيلية.هو على فكرة رسام ماهر كيرسم شي لوحات غاية في الروعة.للأسف كان مْسالي مع قبّو .
هاد خونا بالله كان غريب فالطباع ديالو: مرّة راه راشقا ليه ومرة طايرة ليه.المهم يقدر يتغير فالنهار حتى ل20 مرة.
بالنسبة للعشرة ، كان كل واحد فينا مْدَبَّرْ على راسو.الكوزينة كانت جامعاتنا غير باش نشربو كاس أتاي.من غير هاد الكاس ديال أتاي ، كل واحد حر يْطَيَّبْ داكْ الشّي اللي بْغى.
خوكم الحوميدي كان طبّاخ ماهر .لهادا كان دائما كيْصاوبْ لْراسو الشهيوات اللي كان من قبل ياكلْهوم مع الأسرة ديالو.خويا بلخضر كان تقريبا الوقت ديالو ديال الفراغ يقضيه فالقهوى حيت هو مبْلي بالشطْرنج.المكْلى ديالو ساهلة .فالغدا يْدوزْ ديريكتْ للسوق باش ياكولْ شوّاية ديال السردين مع كاس أتاي.
من بعد غير يدخل للدار يمشي ينعس حتى لْهديك الخمسة ديال لعْشية.من بعد يمشي للقهوة ويبقى تمّا حتى لْديكْ العشرة ديال الليل. كيف ما شفتو كنا قليل فينْ نتْلاقاوْ
خونا بالله عبد الحي هادا فْشي شْكلْ.اول ملاحظة عليه كان ينعس بزاف.تصوْرو كان بعض المرات ما يْفيقْ حتى الوحدة او الجوج ديال لعْشية.المشكل كان شْحال من مرة كيتْخاصم مع المدير وحتى الأساتدة.
اللي كان يْحيَّرني هو أنّه كان يْسخّنْ الما فوق البوطة ويْخليه حتى يبْقى لَفْوارْ يخرجْ من نيفْ المقْراجْ (الغلّاي).من بعد يْجي ويَطْفي البوطة ويرجع لْبيتو.بعد رْبع ساعة أو حتى 30 دقيقة يرجع خونا بالله للكوزينة وبْهاداك الما اللي يْكونْ بْردْ يْصاوَبْ أتايْ
هاد خونا بالله كان عزيز عليه الكاسْكروط ديال الزنقة ولكن الكاسكروط اللي ما يتعدّاش 5 ديال الدراهم.كنت مْشيتْ معاه واحد النهار.زعما عْرضْ علي نتعشّى مْعاه بْشي كاسكروط على حسابو.
إيه ياخّوتي كاسكروط تعطيه لْشي صومالي جيعان موحال الى يقبلْ ياكْلو.هاد الكاسكروط ديال خونا بالله فيه شوية ماطيشة ، شوية بْصيلة ، شوية شْلاضة ، شوية زيتون ، بيضة ، شوية كاشير ، شوية باربا ، شوية خزّو مع لاصوصْ والمايونيزْ
كاسكروط الى عْطيتيه لْشي واحد سكْرانْ يقْدر يْفيقْ او بمعنى آخر يصْحى.آه نْسيت حاجة كيْزيدها فالكاسكروط ديالو علبة ديال السردين
هاد خونا بالله سكن معانا حتى لشهر أبريل .
واحد النهار فوسط الشهر غْبَرْ بْلا ما يعلم.العجيب فالأمر داك النهار اللي كان غادي يغْبرْ فيهْ قال لي باللّي غادي يمشي لوجدة.دازت 3 أيام وخونا بالله مابانْ عليه أثارْ.خويا بلخضر قال لي : ياكْ ما خونا بالله راه مشْدودْ فالكوميسارية حيت هو مولا مشاكيل.بعدما مشينا عند البوليس ماكاين خْبار عليه.هي هاديك سوّلنا عليه شي اساتدة كيْخدْمو معاه.قالو لينا راه خدّام كي العادة ولكن راه كيْجي بكْري للمدرسة.جانا لعجبْ أنا وخويا بلخضر.كيفاشْ زعما خونا بالله رْحلْ بْلا ما يعلمنا.اوى الى دارْها هدا راه أحْمقْ
مْشينا للدار ولْقينا بيتو مسْدود .فْتحناه : البيت كان خاوي .وقتاش خْدى الامتعة ديالو ؟ العلم عند الله.
صاحبي بلخضر كان ديما حكيم .قال لي : شوف أحميد واخّا تتْلاقا بيه ما تْكلْمْلوشْ على لكْرى .خلّيه يهضَرْ غير بوحدو.
فعلا واحد النهار تْلاقينا بيه فالقهوى.خونا بالله بْدى يْحاول يْبَرَّرْ داك الشّي اللي دارْ مْعانا.انا درْتْ بالنصيحة ديال بلخضر ما بْغيتْشْ نْردْ عليه.من بعد كل ما يتلاقى بينا يْعاودْ يحكي وحْنا صُمْ بكْمٌ .يعني والو ما نْردّو عليه ما نْجاوبوه.
واحد النهار كنت غي بوحدي.جا كي العادة بْدى يشْكي ويبْكي.المهم حْكى لي اللي كاين .
خونا بالله كان جاه لكْرى شوية غالي وكان باغي شي حاجة رْخيصة.هي هاديك شي شاوشْ كيخدم فالاعدادية اللي هو فيها قال لو كاين واحد البيت فوق شي حمّامْ رْخيصْ وكْليماتيزي.هادي زعما راها باينة حيت السْخونية ديال البَرْما.لكْرى ديالو كان يا الله 150 درهم ومن الفوق ما يْخلّصْ لا ما لا ضو.والربحة لكبيرة أنه يقدر يْدوَّشْ كل نهار الى بْغى فابور بْلا ما يْخلّصْ ريالْ.
مول الحمّام قال لو باللي خاصّو يْخلّصْ 3 شهورا تسبيق.جاتو 450 درهم.خونا بالله عجْباتو لافيرْ(l'affaire).وفرح وقال مع راسو : داك الشّي اللي كنت نْخلْصو فشْهر دابا غادي نْخلْصو فثلاثة ديال الشهورا
اوي المثل كيقول الطماع ما يخْلي دار بوه غير الكدّاب
اللي وقع ان خونا بالله فاليوم الثاني ديالو فالبيت هْجمت عليه الحشرات من كل انواعها.ها البق ها البرغوت ها لقمل ها النمل ها البعوش ها سراق الزيت.مسكين حتى السروال والفيستا ديالو سكْنولو فيهم.خونا بالله رْجع ماشي يْفيقْ بكري ، راهْ ما تْلاشْ ينعس.
المشكل دابا راه دافع 450 درهم .مول الحمّام قال لو : كْلاكْ بوبي .هادا معنى بالوجدية معناه ما غاديش نْردْ لك فْلوسكْ
اوى خونا بالله قهْراتو الحشرات .شوفو مسكين وْقعْ ليه بْحال دلك الشّي اللي وْقع لْفرْعونْ مع سيدنا موسى .ياكْ زعما ربّي سلَّطْ على فرعون وقوْمو الجراد والحشرات وْخلّاوْهوم فايْقينْ بلا نعاس
إيه دابا عاد فْهمت كلام خويا بلخضر الحكيم : ربّي يْخلْصو على الفَعْلة ديالو
قعلا راه ربّي خلْصو
القضية ما وقْفاتْشْ لهادْ الحدْ.خونا بالله بْغى يرجعْ لينا ولكن حْنا كنا نْعامْلوهْ بِبُرودة.على داكْ الشي ما زْعمْ يطلبْ منّا يْعاودْ يسكن مْعانا.
المهم خونا بالله بْدى يْقلَّبْ على لكرى .هاد المرة لْقى كارْسونْييرْ (garçonnière)فيها بيت صغيرة وكوزينة لكْرى دْيالها ب900 درهم .اللي كان هو أنه كان لازم عليه يسكن فيها ويْخلّصْ كْراها لمدة 2 شْهورا .

يتبع غدا الحلقة 28 والجزء الرابع : العشرة مع بلخضر وعبد الحي (2)