|
رد: مذكرات معلّم في العالم الحضري الحلقة رقم 39 :مذكرات حوميدي في العالم الحضري عنوان الحلقة : حوميدي والخزانة المدرسية خوكم حوميدي كانت ديما خاطيه الأنشطة منْ غيرْ الانشطة مع التلاميد ديالو فالقسم.كان اللي يهمو هادي قبل ما تبقى تْبرَّحْ بيها الوزارة : حْنا هنا من أجل مصلحة التلميذ. خوكم الحوميدي ما كان منخرط لا في جمعية ولا هيأة مدنية.كانو الأساتدة كيتسابقو باش يترشحو مثلا للتعاونية المدرسية او نائب المدير أو مكلف بالرياضة من غيري أنا اللي كنت ضارب هاد الشّي كلّو بْركْلة . ولكن جا النهار اللي خوكم تْصيّدْ فيه.اللي وْقع كان المدير جْمع الأساتذة والغرض هو تفعيل التعاونية المدرسية .كانت نقاشات حول المداخيل باش زعما نهتمّو بالفضاء الأخضر ديال المدرسة.المهم كلام يْجيبْ كلام ، حوميدي قال ليهوم باللي الثقافة ما كايناش فالأنشطة المدرسية.شي معلمين بحال الى ما عْجبهومشْ الحال _ بالعكس أخويا راه الأنشطة هي اللي كاينة.شوف ها المسابقات الثقافية ..... كان علي نشرح ليهوم :خاص التلميذ يقرى ويطالع الكتب والمجلات والقصص سواء بالعربية أو بالفرنسية.هي هاديك ، قال لي المدير : ماغاديشْ نلْقاوْ أحسنْ منّكْ اللي يمكن يْقابلْ الخزانة المدرسية. فعلا قْبلتْ هاد العرضْ وقلت ليهوم : ولكن حتى واحد ما يدَّخّلْ فالشؤون ديالي. كولهوم وافقو.من بعد سَوْلوني كيفاشْ زعما غادي نْسيّرْ هاد الخزانة .ردّيتْ عليهوم : اعْطيوْني شي وقيتة وغادي نْجيبْ ليكوم البرنامج ديالي. داز واحد الاسبوع خوكم الحوميدي كان عندو واحد لبْلانْ واعر :كل يوم 20 تلميد يمكن ليهوم إعارة الكتب .هاد التلاميذ حسب برنامج غادي نختاروهوم من كل المستويات.هاد الإعارة ماشي مجانية ولكن ماشي شي حاجة كبيرة حيتْ غادي تكون 50 سنتيم للكتاب .هاد الكتاب خاص التلميد يْردّو بعد 3 ديال الأيام والى بْغى يْزيدْ فالمدة خاصّو يخلّصْ نصف درهم أخور.زعما غرامة ديال التأخير. ولكن الحاجة الزوينة فهاد المشروع كل تلميد خْدى قصة خاصّو يْصايبْ ليها ملخّصْ.باش نشجّع هاد التلاميد قلت ليهوم غير جيبو داك الشي اللي كتبتو ، أنا غادي نْصحّو ومن بعد غادي نعطيكوم واحد السّجّلْ باش تكتبو الملخص ديالكوم ويمكن لكل تلميد نضيفو لو الصورة ديالو .المفاجأة لكبيرة أنه في آخر السنة الدراسية أصحاب الملخصات الممتازة غادي يربحو جائزة. المعلمين أعجبهوم الحال وهكدا خوكم الحوميدي إضافة الى التدريس كان شادْ المكتبة ديال المدرسية .فالاستراحة او الأمسية ديالو كيبقى فالخزانة باش اما يسجل اللي باغيين يكْريوْ القصص أو حتى اللي بْغاوْ يقراوْ بْعينْ المكان. الخاصية اللي كاينة انّ اللي يبقى فالخزانة من أجل المطالعة : فابور اوى آشْ جيتكوم فْهادي ؟ بزاف ديال التلاميد بْقاوْ حتى هوما يجيوْ للمدرسة مين تكون عندهوم أمسية باش يستافدو من المطالعة الفابورية . خوكم الحوميدي حقق نجاح كبير وجمع حْصيْصة كبيرة .كان ديما مْخبّيها وكياخودها مْعاهْ مينْ يرجع لْدارو. المدير كان كل ما يْجي زعما يْراقب آشْ كاين فالمرميطة ، خوكم الحوميدي كان يْدورْ فيه : شوف الله يْخلّيكْ ياكْ اتافقنا باشْ حتى واحد ما يدّخّلْ فالشؤون ديالي.كان مسكين يْردْ علي : غير بْغيتْ نعرف واش الأمور غادية مزيانة. أنا كنقول ليه : سيرْ سوْلْ التلاميد هوما اللي يمكن يعطيوكْ الخبر اليقين. فعلا كان عندو لخبارْ ولكن خونا بالله كان باغي يعرف شْحالْ فالزعْبولة ؟ زعما باغي يشوفْ واشْ غْنانا الله ولّى ما زالْ. ولكن راه ماشي غالطْ راهْ خاطي الطريق.الحوميدي ما عمْرو يْكون خطّافْ أو سرّاق (ماشي ديال الزيت) حوميدي يقدر يْزيدْ من جيبو الى شاف أن لفلوس غير كافية المهم جاتْ آخر السنة ولْقيتْ باللي جمعت هاديك ل 500 درهم .هي هاديك قلت مع راسي هاد لفلوس ما خاصني نْشيّطْ منهوم حتى دورو (ريال) .لهدا غادي نشريهوم جوائز لكل التلاميذ اللي كتبو الملخص فالسجّلْ.التلاميد كانو تقريبا 36 .المهم لفلوس غير كافيين باش نشريوْ لهوم شي حاجة مزيانة.اوى خوكم الحوميدي اتّاصل بشي معلمين ومعلّمات كانت عندو علاقة زينة معاهوم وطلب منهوم واش يمكن يعاونوه بْشي بركة .هاد لخّوت ولخْواتات كانو فالمستوى ، على داكْ الشّي جمعت تقريبا 200 درهم. دابا التلاميد غادي يتْبرعو بالجوائز. باقي عاقل شْريت هوم من وجدة.اللي نشري من عندو شي حاجة كنطلب منّو يعطيني فاتورة.هادي باش خونا بالله الى حلْ فمّو غادي نْسدّو لو . النهار اللي غادي نوزّعْ الجوائز أخبرت التلاميد والأساتدة والمدير باللي الحفل غادي يكون فالخزانة. بعدما لْقيتْ واحد الكلمة شْكرت فيها التلاميد والمدرّسين ، بْديتْ نْعيّطْ على التلاميذ الفائزين.هي فالحقيقة كولهوم فائزين .اوى كنقول فْلانْ غادي يْسلمو الجائزة فرتلّان (الاستاد او الأستادة) باقي عاقل كانت معايا لغزالة ديالي عفاف وعْجابها الحفل.آه نْسيت أنا اللي شْريتْ الحلويات والمشروبات للأساتدة والفائزين. المهم داز الحفل على ما يرام.من بعد كل واحد مْشى في حالاتو ونقدر نقول ليكوم أن التلاميد الفائزين كانت راشْقا ليهوم حيت ربحو جوج حوايج : الرغبة فالمطالعة والتميّز عن باقي التلاميد. قبل ما نمشي في حالاتي قال لي المدير : أجي نتْحاسبو . بالطبع خوكم كان قانوني ، اعطاه الفواتير والسجل اللي مْسجّلْ فيه كل كبيرة وصغيرة. خونا بالله تْعجّبْ وقال لي : الصندوق خاوي ما فيه حتى دورو ! جاوبتو : انا راني زايد من فلوسي ومن جيب شي معلمين ومعلمات. مسكين قبل ما نخلّيه ، سمعت يقول : وابكْري ربحنا معاكْ! الى اللقاء مع الحلقة القادمة |
رد: مذكرات معلّم في العالم الحضري صارم في تعاملك ومنشط لتلامذتك. تحيتي |
رد: مذكرات معلّم في العالم الحضري الحلقة رقم 40 من مذكرات معلم في الوسط الحضري حلقة اليوم : حوميدي ومعلمة بنتو عفاف فالحقيقة ماعمرو ما كنت ننْوي نْقرّي بنتي عفاف .بزاف ديال المعلمين كيرتاكْبو هاد الخطأ .من بعد يْبان ليهوم كان عليهوم يكون ولدهوم أو بنتهوم بعيد عليهوم فالتيقار .شْحالْ من واحد ولدو حشْمو مع التلاميد.مالْنا أخوتي مع هاد لفضايحْ؟ خلّيه تمّا يتربّى والى دار عْلَياشْ ياكول لعمود وْأنا غادي نْزيدْ لو واحد المرّة كانت عفاف تبكي .سوّلت ماماها ، قالت لي راها المعلمة ضربتها. خوكم بالله مشى عند بنتو وعاود سوّلها _ مالكي تبكي ؟ _ ضرباتني المعلمة خوكم الحوميدي ما عمرو ما ضْربْ بنتو ولكن هاد المرّة جْبدْ معاها بْطرشة لوْجه وقلت ليها _ مالكي تبكي ؟ _ ضرباتني المعلمة الحوميدي للمرة الثانية يعاود ليها بتصرفيقة تانية حتى سالو دموع عينيها.هي هاديك قلت ليها ما حدّك تقولي المعلمة ضرباتني وأنا عليك بالصْفيعْ .فهمتيني ، ياكي ؟ _ نعم فْهمت . _ واشْ ضرباتك المعلمة _ لا ما ضرباتنيش _ مزيان ! عقْلي مزيان على لكلام ديالي النْهار اللي نسمعك تشكي ليا من المعلمة ديالك غادي نقتلكْ فعلا ما عمرو بنتي ما تْشكّات لي من أي معلم أو معلمة الصراحة لعصا راها ضرورية باش التلاميذ يقراوْ ويتْربّاوْ.أمّا هديك السياسة ديال البيداغوجي غير لكدوب وما تصلاحْشْ مع اولاد لعرب مرة أخرى جاتْ عندي بنتي وقالت لي : أبّا عْطيني باشْ نشري دفتر! ديكْ لوْقيتة باقي عاقلْ ، كنا في شهر يناير .اللي حارْ لي فيه لعجب أن هاد المعلمة طلبات فاللائحة 10 ديال الدفاتر ديال 24 ورقة و5 ديال 50 ورقة .تصورو معايا هادْ الدفاتر كاملين آشْ غادي تْعمّر فيهوم معلمة تْقرّي المستوى الثالث.واللي ما بْغاشْ يتصوْرو عقلي أن خوتنا بالله كتْقرّي الفرنسية. واه ياكْ حتى أنا مدرس ديال الفرنسية.الدفاتر اللي نحتاج يا الله 3 : واحد ديال القسم واحد ديال الأختبارات والثالث ديال المنزل.حتى المعلمة ديال السادس موحال الى تطلب هاد العدد ديال الدفاتر. خوكم الحوميدي ما بْغاشْ يْديرْ المشاكل مع المعلمة فبداية السنة .لهادا شْرى لبنتو كل الدفاتر اللي طلْباتهوم المعلمة.اللي كان هو أني ننْتضَرْ الفرصة باش هاد المجرمة نْسمَّعْها لكلام اللي ما عمرو قالو ليها شي حدْ. هي هاديك ، قلت ليها : سيري للقسم وقْرايْ كي العادة.الى سَوْلاتكْ المعلمة على الدفتر باشْ تكتبي ، قولي لها أن بّا غادي يْجيبو لي مع الاستراحة. انا فالاستراحة ما مْشيتشْ.مع ديك الطْناشْ جاتْ البنت تبكي . _ عفاف مالكي تبكي؟ _ لا والو ! _ياكْ ما ضرباتكْ المعلمة _ لا والله ما ضرباتْني خلّيتها ومْشيتْ لبيتي . فْلعشية رجْعاتْ عادية ما عندها والو حيت كانت تقرى اللغة العربية.هاد المعلمة كانت تشكرها وتعتبرها من أنجب التلاميد ديالها. فالغد ليه قالت لي عفاف : بابا راك نْسيتي ما شْريتيشْ لي الدفتر _ غير سيري أنا غادي نْجيبو لك _ ولكن المعلمة غادي تضربني _ ياكْ ما ضرباتكْ ؟ _ لّا ولكن قالت لي الى ما جبتيش غدّا الدفتر غادي نعاقبك _ ما يمكنش معلمة تْعاقبْ تلميدة على دفتر _ ولكن أبابا راها ضرباتني البارح على الدفتر _ ولكن راكي قلتي لي باللي ما ضرباتكشْ _ ضرباتني على الدفترْ _ ما يمكنش تضّربكْ على الدفتر.ولكن شوفي الى ضرباتك اليوما على الدفتر أنا غادي نمشي باشْ نتفاهم مْعاها فعلا مع وقت لغدى جاتْ عفاف تبكي .سوّلْتها واشْ ضرباتك؟ هاد المرة ما ردّاتشْ علي.زادت فلبْكى.المهم فهمت باللي فعلا خوتنا بالله راها عْطاتْها شي سلْخة ديالْ لعصا. دابا الحوميدي غادي يمشي عند المعلمة باشْ يتفاهم معاها. مع ديك التسعة وربع ديال الصباح ، مْشيتْ ديريكْتْ للقسم ديالها.لْقيتْها كتضْربْ عفاف.غير شافتني قالت لها : يا الله سيري لبْلاصتك يا الكسولة .مْزيَة جا أبّاكْ باشْ نشرح لو كولشي. نْسيتْ ما قلتشْ ليكوم أن هاد المعلمة كتسكن فالحومة ديالنا ولكن بعيدة شي شْوية من الدار ديالي.كانت تعرفني وتعرف الزوجة ديالي ، واخّا هكْدا ما راعاتْ لا معرفة ولا جورَةْ. المهم خوتنا بالله بْداتْ عليا بالمحاضرة ديالها باللي بنتي راها تتْهاونْ فالقسم وأن النقط ديالها راهوم تحت المعدّل وأنها كتلعب فالقسم .المهم شي كلام ما دخلْ لي منّو والو فراسي. _ لعجبْ المعلمة ديال العربية كتشكرها حيت هي اللّولى عندها فالقسم _ عندك الحق أسّس عبد الحميد ولكن عندي راها من التلاميد الكسالى شوفو سبحان الله العظيم ! هاد المعلم بْحالْ الى كتْكلّم مع شي واحد يبيع الشفنج أو شي واحد ما قاريشْ.زعما كتعرفني باللي معلّم وسابقها بسلّم (أنا السلم 10 وهي ما زال فالسلم 9 واخّا سابقني فالتعليم بْشي 15 عام) خوكم الحوميدي قال ليها : سمحي ليا يا أستادة ياكْما راكي تتكلْمي ليا على شي عفاف من غير بنتي ؟ _ لا عفاف بنتكْ وهي اللي كاينة بهاد السْمية _ واخّا غير اللّي بغيتْ نقول ليك واشْ كاين شي كسولْ كيْجيبْ ديما فالواجباتْ ديالو 9 أو 10 على 10 ؟ _ ما فهمتشْ.واشْتا (أشنو)هو قصدك ؟ _ قصدي أن عفاف دائما عندها النقط ديالها مرتفعة .أنا اللي كنوقّعْ ليها الواجبات اللي كتْجيبْ للبيت ماشي أمْها خوتنا بالله كانت تقول فْراسها اللي بان باللي راه خاوي بأنّ حوميدي حيت كيخدم في تاوريرت راه ما عندو خبر.من الصدف أيضا أن ديك لوقيتة كنت في رخصة مرضية ديال 10 ديال الأيام. ما كنتشْ مريض ولكن كنت باغي نرتاح من الجو ديال تاوريرت. خوتنا بالله غير سكتاتْ.ما عندها ما تْزيدْ حيتْ دابا اللي غادي تْكولو غادي يْكونْ ضدْها _ شوفي يا أستاذة يا محترمة بنتي كنعرفها مزيانة وانت كتعرفيها : هي تلميدة مجتهدة وهي عندك الأولى فالقسم.انا غادي نقول ليك علاشْ ضربتيها ؟ _ ............... ؟ _ ضربتيها على حقّاشْ ما جابتشْ دفترْ جديدْ خوتنا بالله لْقاتْ الفرصة باشْ تهجم _ اوى أستاد مينْ أنت عارف علاشْ ما شْريتيشْ ليها دفتر جديد ؟ خوكم بالله ضحك حتى يمكن يكونو سمعوه من برّا. _ والله الى قتلتيني بالضحك. هادوك الدفاتر اللي خْديتي من عندهوم شْحالْ هادي ، فينْ مْشاوْ ؟ _ الدفاتر ؟ _ إيه يا أستاذة : باشْ نْفكْرك 10 دفاتر ديال 24 ورقة و5 ديال 50 ورقة دابا خوتنا بالله دْبالت وصْفارتْ.مسكينة صافي تلْفاتْ ليها الهضْرة .بْداتْ غير تتْلعثم . _ واه واه عندك الحق هادو راني نْسيتهوم .والله الى مْشاوْ ليا من البالْ _ اوى سيري بعدا شوفي يقدر يكون كْلاهوم الفار المهم خلّيتْ خوتنا بالله وْشيتْ في حالاتي. المشكل أن خوتنا بالله زادت فالعناد .عاود تاني ضربات عفاف.هاد المسخوطة بيْناتْ على الخبت ديالها : دارت ليهوم شي اختبار وأعطات لبنتي نقطة بين 2 و4 على 10 زعما التمارين ديالها غلطْ.باش تْبيّنْ لي باللي بنتي كسولة. الورقة راجعتها ولْقيت باللي هي اللي غالطة حيت كان فيها التصحيح. كانت فرصة ومْشيتْ عند المدير وبعدما قدّمت لو نفسي باللي أنا الأب ديال عفاف ورجل تربية وتعليم. المهم خونا بالله عرف باللي المعلمة ديال عفاف هي المخطئة .ما نشْقاشْ نقول ليكوم باللي سَخْسَخْها منْ ديك لوقيتة ما بْقاتشْ تتكلم مع عفاف حتى لنهاية السنة.اللي وقع من جهة أخرى أن الأستادة ديال العربية وشي أساتدة ديالها كولهوم جاوْ مع عفافْ عفاف انتاصرت عليهوم ونجحات وكانت طبعا هي اللّولى فالقسم. |
رد: مذكرات معلّم في العالم الحضري 15 دفتر لتلميذ بالمستوى الثالث؟ الحماق هذا بعينه. سبحان الله في خلق الله |
رد: مذكرات معلّم في العالم الحضري الحلقة رقم 41 : مذكرات حوميدي في العالم الحضري الجزء الأول : خونا بالله داخل عليا طولْ كل واحد فينا عندوأصدقاء .الصديق كي ما تعرفو يكون فيه الخير او الشرْ.لهادا اختيار صديق راها مسألة ماشي ساهلة ؛يعني أنت وزهرك ! ولكن يبقى أنّ الصداقة ديال الطفولة ماكاينش بْحالها.فْديكْ لوقيتة كتْكون البراءة والعفوية وما كاينشْ شي أطماع منْ موراها. اسمحو لي على هاد المقدمة حول الصداقة.اللي كنت باغي نقول أن هاد الصديق ديال الموضوع ديالي كنت نعرفو شْحال هادي ، من أيامات الاعدادي ولكن دازت سنوات كان غابر فيها.المهم فالأعوام ديالي الأولى وخاصة فالسنة الأولى ديال الزواج ديالي ، ضْهر هاد خونا بالله. من بعد عْرفت باللي الأخ نبيل راه تْعيّنْ في نواحي دبدو فْشي عْروبية.اليوم الأول جا غير بوحديتو.خوكم الحوميدي استقبلو وفْرحْ بيه بزّافْ.دازت شي 10أيام وخونا باللي جا عاود تاني ولكن معاه الزوجة ديالو وجوج بناتو. الزوجة ديالي عجبها الحالْ حيت تقريبا ما كان يْجي عندها شي واحد من غير الإخوان ديالها والواليد ديالها يا الله مرة كل شهر أو ربما حتى لجوج شْهورا.على كل حال كان خونا بالله هو والعائلة ديالو يْدوْزو الويكاند (نهاية الأسبوع)عندي واكلين شاربين وشابعين راحة .أما الحوميدي هو اللي يصرف وجيبو يخْوى من شي دراهم كانو يمكن ينفعوه للأيام القادمة.بالنسبة للزوجة ديالي مسكينة تقريبا راها غير فالكوزينة كتوجد فالشهيوات ديال المأكولات وما لدَّ وطاب. العجيب فالأمر أن خونا بالله كيدخل طويل .والو.... ما يشري والو ! تصورو أن الزوجة ديالو كانت حاملْ ديك لوقيتة .بدل باشْ يشري ليها مقوّيات أو حتى الدْوا ، والو ! واحد النهار طاحت عندنا فالدار حيت كانت فاشلة .مْشى خوكم الحوميدي وشْرى ليها لحليب باش مسكينة رجعات ليها الروح والدم لوجهْها. آه يا خوتي هادا أكبر سقرام عرفتو في حياتي ، هدا تْعدى هداك مول البولة (المصباح) أو خونا بالله اللي كان يشري 60 بيضة باشْ يدوّزْ بيها الشهر. هدا تْمَحْرايْدو مْقزْدرْ وماشي بعيد تكون هاد الكلمة مكتوبة فالجبهة ديالو حيت عندو التْسَنْطيحة المهم يا خّوتي لْقيتْ راسي خاسر بالمعقول ولمرى تْهلْكاتْ بالخدمة المنزلية.المشكل أن خونا بالله كان يْجي مع ديك لعشية ديال لخميس ويبقى عندنا حتى لصباح الاثنين عادْ يمشي في حالاتو ولكن الحمد لله كان يجي غير كل 15 يوم ، يعني اسبوع من جوج كنّا نلقاوْ راحتنا . اوى يا خّوتي صافي الزوجة ديالي طْلعْ ليها الدم وقالت لي _ " اسمع الله أيْخلّيكْ راني عْييتْ.شوف شي حلْ مع هاد صاحبك! _ ما عندي حل وحتى أنا السيد راه خْرجْ علي _ اوى زعما ديما فايق وعايق وهاد صاحبك نبيل قْضى عليكْ _ ماركا علي ماشي غير إصابة وحدة بزّاف ديالْ الأهدافْ _ ولكن أخويا أنت اللي ضسّرْتيهْ علينا _ كيفاش زعما راني ما فْهمْتْ والو _ غادي نْفهْمكْ : ياكْ كل ما يْجي تبقى علي كَتْري اللْحم ، بْغيتْ اللوبيا ! فينا هو الديسيرْ ؟ واشْ كاينة هادي أوْ ما كايناشْ ؟ _ كاينة وعندك الحق .انا فيَا شوية ديالْ البُخْ _ اوى أخويا باراكة من البُخْ _ عندك الحق.ولكن واشْ عندك شي حلْ؟ _ عندي ولكن الله يرحم الوالدين الى راكْ باغي الخطّة ديالي تنجح خاصك تسكتْ ما تْعلّقْ والو _ واخّا ما تكوني غير على خاطركْ _ انا نعَّرْفكْ مزيانْ دغْيا تنْسى _ صافي والله كلمة واحدة ما نْكولها واخّا تْغدّينا بالنَّخّالة _ دابا غادي نتْبالى بْصاحبك وبمْراتو الجزء الثاني : خونا بالله خْرجتْ فيه عرضْ الجمعة فلعشيا هاد المرّة ، خونا بالله جا ومْعاه مْراتو وجوج بناتو ومن الفوق شي بنت عْرفنا من بعد باللّي هي بنت أختو. فْديك الليلة الزوجة ديالي ما طيْبَتْشْ لعْشا كي العادة.يا الله جابت براد أتاي مع الخبز .لا زبدة لا كونفيتير ، والو هادا هو الخبز الحافي اللي تْكلّم عليه محمد شكري (الله يرحمو) تصوْرو كنت باغي نتْكلّم ولكن الشّوفة ديال لمرى دْيالي فكّرتني بالوعد ديالي وباللي راني حْلفْتْ باشْ نبقى ساكتْ خوتنا بالله بْحالْ الى ما عجبْهومشْ الحال خصوصا مع الضيفة ديالهوم.واخّا هكْدا بْدى خونا بالله يدفع فالهضْرة _ حْنا ما عمرو ما تْعشّينا بالخبز وْأتايْ خوكم الحوميدي ما ردْشْ عليه.خلّيتو مع الدّاخلية (الزوجة ديالي) _ أخويا راحنا مْعمْرينْ كريديَاتْ واللّوّلْ ديال الشهر ما زال بعيد. خونا بالله يعرف يهضرْ : _ اوى سّي حميد خاصّكْ تعْرفْ كيفاشْ تْسَيَّرْ الميزانية ديالك .أنا كنعرفك مزيان أنت يدّكْ مطلوقة غير كترمي فِْلفْلوسْ بْلا ما تْخمَّمْ _ عندك الحق أخويا نبيل .دابا راني حاصل وما لْقيتْ اللي يعتقني _ ياكْ ما خاصّكْ شوية ديال لفلوس ؟ _ بارك الله فيك كنت عارْفكْ كْريم _ آها صْبرْ شي شوية .أنا باغي نْسَلْفكْ _ حتى أنا غير كنضحكْ معاك الحمد لله ما خاصني خير. المهم باشْ ما نْطوْلوشْ فالهضْرة قلت لو : _اسمح لي راني شْوية عيّانْ وغدّا أنا ندخل مع التْمنْية.غادي نمشي ننْعسْ الزوجة ديالي تبْعاتني . يا الله خْرجنا سمعناهوم كيتكلمو علينا.شي هضرة ماشي زينة . فالصباح خونا بالله مْشى للسوق ديال الخوردة وانا مْشيتْ للخدمة ديالي. جيت مع وقت لغدى.شمّيتْ آشْ كاينْ فالكوزينة .والو ! ياكْ ما لمْرى ما طيْباتْ والو ؟ ما يمكنْشْ ؟ ولكن خاصني نصبر ونْشوفْ المهم بعدما صلّينا الضْهور ، قالت لينا الزوجة ديالي : وجْدو راسكوم لغْدى راه موجود. اوى الَخّوت دَرْنا (من فعل دار يدور)على الطّابْلة كي العادة.انا الوحيد اللي كننْتظر آشْ غادي تْكون المفاجأة.زعما آشْ يمكن الزوجة ديالي غادي تْقدّم لينا فلغْدا ؟ بْطاطا بْلا لحم ؟ طبسي عْدسْ ؟ بيضات مسلوقين؟ انا هكْدا دخْلاتْ زوجتي المحترمة وبيدها صحن كبير يبدو من بعيد أبيَضْ آشْ هادا ؟ إنه طبسي شوربة (شعرية ) بالحليب _ يا الله كولو ومرحبا بيكوم ! هدا راه نْهار كبيرْ نبيل والقافلة ديالو طاحو على الطبْسي وْصاطو فيه .يعني ما خلّاوْ والو _ واشْ نْزيدْكومْ ؟ راهْ ما زال الخير _ الله يخلف والله الى شبعنا _ بصحتكوم خونا بالله بان لي هاد المرّة حْواجْبو تْلوّاوْ.ماشي بعيد غير يمشي لبيتو ماغادي ما يْخلّي ما يْقطّعْ فيا أنا والزوجة ديالي فلعْشية ، جابت الزوجة ديالي أتاي بالخبز حافي. كلينا وشربنا ولكن هاد المرة كي ما نقولو باللغة العربية في صمت رهيب. من بعد أنا مْشيتْ نكتب المذكرات ديالي بعدما خلّيتْ خونا بالله يتفرّجْ فالتلفزة. خوتنا بالله (ماشي بعيد يْكون نبيلْ كورَدْها) قالت لللزوجة ديالي : واشْ نْعاوْنك باشْ نْديرو لعْشى؟ الزوجة ديالي ذكية وكتعرف تْردْ (ماشي الصرف) : بارك الله فيك أختي ولكن لعْشى راه موجود. مع ديك التسعة ديال الليل ، قلت لمْرى ديالي : إوى راحنا جعنا .وشْ كاينْ شي عْشا _ كاينْ يا الله وجّدْ الطابلة، راني جايباتو . خونا بالله شفْتو بْحال الى الروح رجْعتْ فيه.ابتاسمْ وقال لي : الشوربة ديال لغْدى جوْعاتني آه يا لخّوت مْنعْ ليكوم منظر يقتل بالضحك.منظر ما تلقاوهشْ حتى فالأفلام ديال شارْلو جابت الزوجة ديالي لعْشا : الشوربة بلحْليبْ خونا بالله غير شافْ الطبسي المعلومْ كانْ غادي يسكت ليه القلب.أمّا أنا جاتني ضحْكة كبيرة ، راني شدّيتْها غير بلكْشايفْ. المهم كْلينا ولكن شي حاجة قليلة.خونا بالله يمكن كْلى جوج معيلْقاتْ أو ثلاثة وقال لي مسكين : شْبعتْ الله يخلفْ خوكم الحوميدي دائما مْأدَّبْ قال للضيفْ ديالو : زيدْ أخويا نبيلْ .الشوربة مزيانة بللّيلْ وراه فيها لحليبْ ! خونا بالله يمكن حسْ باللي راني كنضْحكْ عليه ولكن ردْ علي بْشي كْلامْ فيه المعنى : نَسْتاهل أنا اللي خلّيتْ الزردة فداري وجيتْ نطلبْ الصدقة عند جيراني. شفتو طْياحْتْ الهضْرة .ولكن ماخاصْنيشْ نْردْ عليه. _ خويا نبيل تسمح لي غادي نمشي ننْعسْ.أنا هاد النهار خْدمْتْ ماشي بْحالك أنت اللي ضالْ غيرْ فالسوق والقهوة. فالصباح شربنا القهوة كحلة بْلا حْليبْ. _ هاد المرة خونا بالله قال لي : واشْ ما عندكومشْ لحليبْ ؟ الزوجة ديالي ردّاتْ عليه: والو أسّي نبيل .لحليب اللي كانْ درْتو مع الشوربة ديال البارح صافي خونا بالله غادي ينوض ويجمع حْوايْجو باشْ يمشي في حالاتو . ولكن ، والو يا الله قال للزوجة ديالو : أجي نْديرو شي دورة فالسوق ! يا الله خرجو ، قالت لي الزوجة ديالي : إوى كي جاتك الخطة ديالي ؟ _ حامْضةْ شي شْوية _ ياكْ ما ما عجْباتاكْشْ _ صْحابْنا اللي ما عاجْباهومْشْ، ماشي أنا _ يسْحابْ لي أنت _ لا حاشا ...غير زيدي وكْلينا الشوربة ....بْحالْ والو نقَّدرو نشْريوْ فيلّا فالسعيدية الجزء الثالث : خونا بالله طلْعاتْ ليه الشوربة فالرّاسْ اوى جا لغدى وكي العادة الشوربة بلحليبْ. صافي خونا بالله غادي ينْفاجرْ : أخوتْنا مالكومْ مع الشوربة بلحليبْ ؟ _ أخويا أنت اللي مالكْ معاها؟ أنا بعدا عاجباني وبالعكس راها صحّية وبْنينة _ خويا حميد ما كنتشْ نعّرْفكْ هاكْدا قرْزازْ (سَقْرامْ) _ ياكْ أخويا نبيلْ تْعايرْني في داري _ أخويا واشْ ما كاينْ لحم ما كاينْ مرْقةْ ؟ _ كاين أخويا وهادْ الخير ماشي بْعيد راهْ فالسوقْ _ إوى ؟ _ اوى أخويا الله يْجيبْ اللّي يفهمنا خونا بالله طْلعْ لو الدّمْ وخْرج من الدارْ.دازتْ شي 6 ديال السْوايع وخونا بالله ما بانْ ليه حتى أثَرْ. ولكن الحمد لله مع الآذان ديالْ لعشى جَا .....ديما طْويلْ.واه هادا ما عندو وجه ديال الحشمة. الزوجة ديالي غير شافتو قالت لو : واشْ نْجيبْ لك لعشى ؟ _ واشْ الشوربة بلحليبْ ؟ خوكم الحوميدي هو اللي ردْ عليهْ: بْحالْ الى علْمكْ الله _ لا لا ما خاصنيشْ راني شْبعتْ.هاديكْ الشوربة راها طلْعاتْ لي فالرّاسْ كي العادة قلت لو : خويا نبيل تصبح على خير غادي نمشي ننعس حيت غدّا خاصني نْفيقْ بكري. فالصباح مع ديك الخمسة ، سمعنا شي حركة فالبيت ديالْ الضْيافْ.نبيل والزوجة ديالةو كيتخاصْمو .ما كاين غير المعيور .الصراحة ماشي من طبعي التجسس ولكن سمعت عن غير قصد خوتنا بالله كتْعايرْ الزوج ديالها وتقولّو باللي هو اللي جيعان وراه يسْتاهل أكثر من هاد الشّي.زادتْ قالت لو : هاد لمْرى (يعني الزوجة ديالي) راها بعدا وكْلاتكْ الشوربة بلحليب حيتْ حتى هادي راها خْسارة فيكْ. المهم خونا بالله قال ليها : يا الله نمشيوْ لدارنا وما عمرو ما نْجيوْ لهْنا _ الزوجة ديالي فرحات وقالت لي : بالما والشطّابة حتى لْقاعْ لبْحرْ واخّا هكدا مشات لعندهوم وقالت ليهوم : بْقاوْ حتى تشربو القهوة ولكن ما فيهاشْ لحليبْ إلى اللقاء مع الحلقة 42 من مذكرات حوميدي في العالم الحضري ومغامرات أخرى مع صديقي السقرام نبيل |
| الساعة الآن 05:58 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd