مذكرات معلّم في العالم الحضري - الصفحة 19 - منتديات الأستاذ التعليمية التربوية المغربية : فريق واحد لتعليم رائد

2014-01-15, 07:35

رقم المشاركة : 91

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في العالم الحضري

الحلقة رقم 34 : حوميدي والدروس الخصوصية

فهاد الحلقة غادي نتكلّمْ ليكوم على الدروس الخصوصية.خاصكوم تعرفو أنها كانت موجودة من بكري ، غير أو كان كانت تْهمْ فقط التلاميد اللي عندهوم صعوبات فالفهم وكيحصلو على معدلات ضعيفة.هاد التلاميد الكسالى كانوا يْشوفو شي أستاذ باش يْفهّمهوم الدروس اللي جاتهوم صعيبة.بالطبع كانت هاد الدروس الخصوصية تقريبا بالمجان .تقدر تعرضْ على الاستاد للدار عندك ، منها يساعدك فالدروس ديالك ومنها يشرب كاس أتاي أو عصير.
من بعدْ ، الدروس الخصوصية خْداتْ واحد المنحنى آخرْ .الاساتذة شافو باللي يمكن ليهوم يجَّمعو بيها شوية دراهم.فْديكْ لوقيتة الله يحسن العَوْنْ.الاستاد كانت المانضة ديالو على قدْ الحال.ما فيها باسْ الى جْمعْ شي بركة باش يشْري مثلا خروف العيد أويدير السْبوع لولدو اللي عاد تْزادْ أو يمكن لهْلا يْقدّر يْديرْ شي عملية للزوجة ديالو.
انا الصراحة من النهار اللي بدّيتْ كنت نْحاول نبْدل مجهوداتي مع كل التلاميد.مين نْسالي الدروس ، نبغي كاعْ التلاميد يكونو فاهمين.بعض المرات كنت نضْطرْ نْشدْ شي تلاميد فوقت الاستراحة باش نْفهّمهوم شي حاجة جاتهوم صْعيبة.
ربما هدا هو السبب انَّ ما عمرو شي تلميد عندي لحد الساعة شفتو يْديرْ الدروس الخصوصية عند شي أستاد أو فْشي مدرسة حرّة.للأسف الأساتذة ما كيْقوموشْ بالواجبات ديالهوم مع التلاميد .هدا هو السبب علاشْ تلقى حتى التلاميد زعما المجتهدين كيبْغيوْ يستافدو من هاد الدروسْ.كاين شي أساتذة الله يسامحهوم كيقولو للتلاميد إما بطريقة مباشرة أو غير مباشرة "اللي يْزيدْ السوايع عندي غادي نْزيدو فالنقط".القضية ساهلة ماهلة : فلوقيتة اللي يكونو عندو فالدعم يخْدمْ معاهوم شي تمارين ديال القسم.من بعد هاد التمارين كيْحطْها ليهوم فالواجب.خوكم التلميد يعَّجْبو الحال وهاهو عندو نقطة ما كانش يحلم بيها .في حين التلميد اللي زغبو الله وما بْغاشْ يزيد السوايع عند الأستاد واخا بالاجتهاد ديالو يا الله يْجيبْ هاديك 13 أو 14 على 20.أما المستفيدون هادوك يْطْرطْقو غير العشرين على العشرين.
كانت البنت ديالي عفاف تتعجّبْ من هاد الأمر وفعلا هدا غريب نكيف يُعْقلْ أن تلاميد يلقاوْ صعوبات في انجاز تمارين في الرياضيات أو الفيزياء أوالعلوم خلال الدروس العادية ، بين عشيّة وضحاها فواجب اللي من المفروض تكون فيه الصعوبات كولْها مجْتامْعةْ، يْجيبْ لك كولشي صحيح ؟ أما المجتهدون او الى بغينا نقولو النوابغ ياالله مساكين يْنَيْطو (ياخْدو) نقطة لابأس بها.

أنا صراحة ضد الدروس الخصوصية اللي كيعتامدوها الأساتذة بهاد الطريقة واللي يبغيوْ يربحو لفلوس.
تصورو كاين شي أساتذة بوجدة كيدخلو حتى مليون ديال لفرنك فالشهر ، يعني راتب سلم11 . هدا مع المانضة ديالو وديال الزوجة ديالو راه بْحالو بْحال برلماني.
اوى الله يستر ويْبقي الستر.
باقي عاقل فلوقيتة مين كانت النِّيَة .كنّا نْديرو الدروس الخصوصية فقط للتلاميد اللي اليوم يطلق عليهم إسم متعثرين.هاد التلاميد كنّا نشرحوليهم القواعد ونعطيوْهوم التمارين باشْ ينجْزوها أحْدانا.خوكم الحوميدي كان يْجيبْ التلاميد للدار ديالو .كنت نطلب منهوم مبلغ ديال 10 ديال الدراهم فالشهر.هاد الفلوس اللي كنت نجمع كنت نْديرْ بيها الفوطوكوبي ونشري بيها مشروبات وحلويات للتلاميد.إيه كيفْ ما قْريتو : كانو يراجعو ومن بعد يْزرْدو مع راسهوم.فآخر الشهر كنت نلقى باللي ديما زايد من جيبي ما بين 50 و100 درهم.
الحمد لله حْنا كنّا نخدمو لله.
شي أعْوامْ من بعد ، جا عندي معلم وقال لي:
_ سّي عبد الحميد ، عندي ليك مشروع مربح
_ واه أخويا ! ياكْ ما نبيعو الببّوشْ ؟
_ واشْ راك تضحكْ علي أصاحبي ؟ واشْ أحنا أصحاب الستيلو والطباشير ولّى أصحاب بطاطا ؟
_ حاشا ولكن المعلم ما عمْرو رْبح شي حاجة من غير دْعاوي الخير والأجر ديالو ماشي هاديك المانضة اللي يْشدْ فالشهر راه الله عز وجل غادي يغْنيه فالآخرة ويكون مع الصِّدّيقين والشهداء.
_ آه يا سّي عبد الحميد منّا لْتَمّا يْحنْ الله.دابا خاصْنا نْدوْرو شوية الناعورة
_ اوى ندورو هاد الناعورة على ضْهَرْ الناس البوفْريا (الفقراء) اللي ما لْقاوْ ما ياكلو .
_ باراكا من الفلسفة وعرّي على كْتافكْ الى باغي تخدمْ !
_ كْتافي ديما مْعرّي عليهوم مين نْكونْ فالقسم
خونا بالله ما عجبوش الحال .باشْ زعما يْبيّنْ ليا باللي راه يْديرْ فيا الخير حيتْ جا عندي قاصدني .زعما كاين اللي يتمنى يربح فْليْسات معاه.خونا بالله عندو مَحالْ مجهّزْ : فيه المقاعد والسبورة يعني قسم بمعنى الكلمة.
_ واخّا أسيدي آشْ هاد البيعا وشرْية؟
_ نْزيدوالسوايع للتلاميد
_ مزيانْ اوى ؟
_ انا عليا المحالْ وأنت اللي تْقرّي
_ ولخلاصْ ؟
_ فيفْتي فيفْتي.
_ زعما النَّصْ بالنَّصْ
_ راني مْهلّي فيكْ
_ واخّا والتلاميد موجودين ؟
_ أعْطى الله الخير .مع غادي يسّمْعو باللي أنت اللي غادي تْزيدْ ليهومْ السْوايع غادي دغيا القسم يعمرْ.
_ تبارك الله ولكن التلاميد اللي يقراوْ عندي ما غاديشْ يزيدو السوايع.
_ وعْلاشْ أسّي عبد الحميد ؟
_ ما نَقْدرْشْ نْزيدْ أكْتر من داك الشّي اللي نعطي فالقسم
_ واخا أسيدي غادي نْجيبْ لك تلاميد من أقسامْ أخْرى
_ ولكن عندي جوج شروط ..
_ آش هي شروطك ؟
_ انا ما نْقرّي غير التلاميد اللي محتاجين للدعم هدا من جهة.من جهة أخرى اللي ما فْحالوشْ نْزيدو لو السوايع بالمجّان
شاف حتى عْيى ومن بعد قال لي : قابل أسيدي.
قبل ما يمشي ، عيّطْتْ لو : أجي بعدا شْحالْ راكْ دايرْ فالواجب الشهري ؟
_ عندك الحق نْسيتْ.إوى أسيدي غادي نْبدّيوْ ب50 درهم .من بعد نقّدْرو نْزيدو الى شفنا باللي عْلينا الطّلبْ
_ لا أنا ما متّافقشْ معاكْ.الثمنْ مرتفعْ شي شوية
_ شْحال بغيتي يْجيبو التلاميدْ؟
_ 30 درهم للواحد راها كافية
_ آه ياخويا بكْري رْبحنا مْعاكْ
_ أنا ما باغيشْ نربحْ
_ هاداكْ شغلكْ
فعلا بْداتْ عملية التسجيل ونقدر نقول ليكوم أن عدد كبير تْسجّلْ لْجوجْ أسباب.الأوّلْ : عرفو باللي أنا اللي غادي نْزيد ليهوم السوايع .السبب الثاني : لخلاصْ كان فالمتناول ديالهوم.
باشْ نوفي بوعدي ، واحد المجموعة ديال التلاميد ما فحالهومش كنت نْديرْ ليهوم الدعم فابور.
ولكن ها هي المفاجأة :لفلوس اللي تقاسمت مع خونا بالله يعني حقّي كنت كنْدير بيه الفوطوكوبي وكنشري بيه الجوائز للمتفوقين اللي جابو نقط مرتفعة فالاختبارات اللي كنت نْوجّدْ ليهوم كل 15 يوم.
الصراحة عام واحد ربحت معنويا أكثر من ماديا .خوكم الحوميدي اشْتاهرْ مزيان وبْداوْ الآباء يْجيبو وْلادهوم من مدارس أخرى باش يْديرو الدعم.من بعد لقيت بأن الوقت ديالي ما كنسْتافدشْ بيه.هي هاديك قاطعتْ الدروس الخصوصية .ما نْديرْهاشْ واخّا يغْنيوْني.
العام اللي انتاقلت لوجدة ، لقيت الاغلبية ديالْ الأُسَرْ كيْزيدو لوْلادهوم السوايع .بصفتي أستاد جاوْ عندي شي آباء باشْ نْدير لوْلادهوم الدعم واقتارحو علي مبلغ 100 درهم فالشهر.خوكم الحوميدي باشْ يْبعدهوم ، ماعمرو ما يْدورو بيه ، قال ليهوم : واخّا تعطيوْني ألْفْ درهم للواحد ما نْديرْشْ الدروسْ
هادي هي قصتي مع الدروس الخصوصية .هدا راه رأيي الشخصي وكل واحد عندو رأيو.

يوم الخميس 16 يناير: الحلقة رقم 35
حوميدي وتلقيحات الأطفال

التوقيع

2014-01-15, 13:36

رقم المشاركة : 92

a.khouya

مراقب عام

إحصائية العضو

a.khouya غير متواجد حالياً

رد: مذكرات معلّم في العالم الحضري

اخي حوميدي
الدروس الخصوصية يستعملها البعض من أجل المادة لا غير.رغم المغريات لم أومن بها يوما. إنها الموضة يا أخي .القناعة كنز لا يفنى.

تحيتي

2014-01-16, 15:19

رقم المشاركة : 93

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في العالم الحضري

الحلقة رقم 35
حوميدي وتلقيحات الأطفال

الحلقة رقم 35 : حوميدي والتلقيحات

فهاد الحلقة غادي نتكلّمْ ليكومْ عْلى تلقيحات الأطفال.الى ما خانتْنيشْ الداكرة ديالي كانت في سنة 88/89 .قالكْ أسيدي منظمة الصحة العالمية شافت باللي الأغلبية ديال لبْراهش في المغرب كيْموتو قبلْ ما يْبدْلو سْنانْ لحليبْ.هادي كارثة كبيرة خاصْ بْلادنا تَلْقى ليها شي حلْ.الحمد لله هاد المنظمة وبتعاون مع اليونيسيف المنظمة العالمية اللّي عندها البرهوشْ بمختلف أجناسه هو كولشي اقتراحو على بلادنا تنظّمْ تلقيحاتْ للأطفال.داكْ الشّي اللّي كانْ : وزارة الصّحّة ديالنا لانْسات (هادي راها من فعل lancer)حملة تلقيحية للأطفال في كافة مدن وقرى المملكة.بالطبع دارو إعلانات فالتلفزة وفالراديو فالمدن لكبيرة.امّا بالنسبة للمدن الصغيرة والقرى والمداشر ، عَيْطو على البرّاحْ وكلْفوه باشْ يعْلمْ السّكان باللي كاينة حملة ديال لبراهش ديالهوم وخاصهوم يمشيوْ لأقرب مستوصف .
اللي وقع الناس الاغلبية ديالهوم كانو متْخوْفين.كاين شي وحْدينْ عاطيهوم ربّي عْقل كبير يْخدْموه غير فالتّاحْرامياتْ شافو باللي هادي راها عملية لتحديد النسْل.زعما المغرب فيه كثرة البشرْ وخاصْ العدد ينقصْ.فعلا الى مشينا لدْيورْ ماكاينشْ اللي ما فيها على الأقل 4 أو 5 ديال البزاقيل(لبراهش) يْغوْتو وزيدْ عليهم 4 أخْرين رْكايْبية (بالغين)شادّينْ الرّكْنا.المهم هادي راها ماشي دار هادي راها علبة ديال السردين.الكثافة راها الى كانت راها جايّا من عند الفقراء والمساكين.
شي ناس وحدين أخرين هادو عندهوم الحكمة الخاوية .قالك أسيدي هادا دْوى أعْطاوَهْ للمغرب باشْ يْجرْبو على الشعبْ ديالو .يمكن ينجح او يفشل .وفي كلْتا الحالتين راهوم دايرين خير فالدول النامية.
المهم كان تقريبا عزوفْ فالتلقيحات والمشكل المنظمات بْجوجهوم حاضْيين المغربْ.اوى آشْ المعمول ؟
صافي لْقاوْها !
شي عفريت ديال بنادم ما يكون غير شي مدير أو مفتشْ قال ليهوم : هادي ما يسلّكها ليكوم غير المعلّمين.
شافو المسؤولين ولقاوْ باللي لمْيوطا ديال ديك لوقيتة (هادو ديال دابا اللي عندهوم لاليسانْسْ(الإجازة) اللي ما تسْوى حتى الشهادة الابتدائية ديالْ الواحد والسبعين ما يْسوكْرو(ما يقْضيوْ والو) والو )قلت لمْيوطا ديال ديك لوقيتة عندهوم سمعة طيبة وكلامهوم ديما مسموع واللي قالوها هي اللي تكون.من الفوق فيهوم لعنادْ وراه الى بغاوْ يوّصْلو لشي نتيجة يوّصْلو ليها وربّي كبيرْ.
على داك الشّي اتّاصلو بالمديرين ديال المدارس الابتدائية وطلبو منهوم يعزْلو ليهوم معلمين قارْيينْ مزيانْ لفرانسوية باشْ يْشاركو فحملة التلقيح.المدير (راكو عارفينها هادي) اختارني أنا مع واحد المعلم (صاحبي علي) .
غادي تتْساؤْلو علاشْ اللغة الفرنسية ؟ اوى التمويل راه أجنبي ومّاليه (أصحابو)غير النْصارى ، يعني خاص شْكون اللي يتْكلّم معاهوم.ثانيا وزارة الصحة (ما زال لحد الآن) كتعْتامد لوْراق ديالها باللغة الفرنسية.
كان الرّانْديفو(الموعد) فالمستوصف لكبير ديال تاوريرت.اجتامعوا واحد النهار المعلمين باشْ يْديرو لينا سْطاجاتْ.الاطباء جايين من الخاريج شرحو لينا الله يْجازيهوم الأمراض اللي راها موجودة بالمغرب وكتَفْتكْ بالألوف ديال الاطفال كل عام ومن هاد الأمراض والأوبئة الله يستر كاين بوحمرون ولمكلْفة وبوصفير (الملاريا) والجدري .المهم عرفنا الأعراض ديالهوم وكيفية العلاج فقط نظريا.من بعد جاوْ خوتنا الأطباء المغاربة شرْحو لينا كيفية ملءْ المطبوعات اللي غادي نستعملوهوم فالحملة التلقيحية.
من بعد يمكن 3 أيام ديال التكوينات المعلمين اللي كان عددهومْ 40 معلّم كانو جاهزينْ باشْ ينْطالقو مع الممرضين داخل المدينة أو في القرى المتفرقة .
هداكْ النهار قسْمونا مجموعات .كل مجموعة فيها 4 ديال المعلمين و3 ديال الفرْمليا.
حْنا عندنا لوراقْ والستيلواتْ والممرضون عندهوم الشوكة والسيروم.
فالغد ليه مْشيتْ للمستوصف مع ديكْ السّتة ديال الصباح.رْكبنا فلاندْروفيرْ (land rover)متوجهين لأول عْروبية كتبعد بْشي 20 كيلومتر.مين وصلنا الدْيور مْفَرْكتة (متفرقة) .الحل هو نمشيوْ للمسجد.لقينا لفقيه خارج لينا .قال لينا : مرحبا بلمْيوطا ومرحبا بلْفْرامْلية(زعما المعلمين والممرضين).هادا نْهارْ كبير اللي جيتو عندنا.
يا الله تفضلو لمحاضرة راهوم كولهوم كاينين باش تْلقْحوهوم.التلاميد غير سمعو اللي كاين شدّاتهوم الخلعة.بْداوْ يبْكيوْ.الآن جا دور المعلمين.دخلنا عليهوم .غير شافونا يا خّوتي اطمائنّو .قلت ليهوم : ما تْخافوشْ هادي غير شوكة بْحالْ الخبْشة ديال المشْ (القط)غادي نْديرو ها ليكوم فْيدّيكوم.
واحد البرهوشْ صغير قرّبْ منّي : انا ديما يخْبشني المشْ
_ اوى ولدي انت راكْ مجرّبْ .ماغادي تْحسْ بْوالو
باقي لمْحاضرة سكتو .وْأنا نقولْ ليهوم :شكون اللي شي نهار خبْشو مشْ؟
التلاميد بْداوْ يْغوْتو : أنا ..أنا ...أنا.....
_ حتى انتوما ما غاديشْ تْحسّو بْشي حاجة
بعد هاد الحملة التوعوية واللي شارك فيها المعلمون اللي كانو مْعايا عيّطْنا للفَرْملي باشْ يقوم بعملية التلقيح.حْنا كنّا نْسجلو الاسم والنسب والعمر ديال كل ولد تْلقّحْ.
من بعد عيّطْنا على النْسا ديال القرية
حتى لعيالات كان خاص يضّرْبو ليهوم اليبْرى على ود شي حاجة مْخرْمْزة بْحالْ الطيطانوس.
لعيالات غير سمعو باللي فيها المعلمين ، جاوْ يجريوْ
الحمد لله السمعة ديال المعلم كانت واضحة للعِيّانْ.المعلم كان هو كولشي لا فالمدينة ولا فالبادية.
مع ديك العشرة ديال الصباح القرية بصغيرها وكبيرها تْلقْحو كاملين.
هي هاديك جابو لينا واحد الحرشة تقول رْويضة ديال التراكْتورْ.معاها طبسي سْمن وطبسي عْسلْ وبرّادْ عْشاري .كْلينا وشربنا وحمدنا الله.
فالنقاشات ديالي مع السكان عْرفت شي حوايج غريبينْ.تْصوْرو أن واحد لمْرى قالت لي أن هادي أولْ مرّة يوْصلْ لعندنا ممرضْ.قلت ليها : ولكن عْلاشْ ما تمشيشْ للمستوصف اللي قْريبْ ليكومْ؟
جاوباتني : أخويا هادو كيضّحْكو علينا .
_ كيفاشْ يضّحكو عليكوم ؟
_ ما يْقلْبونا ما والو غير يعْطيوْنا هادْ الأسْبرو
هي هاديك مسكينة قالت لي باللي لفضل راه ديال المعلمين لأنّهوم كيشْريوْ ليهوم الدْوى وكيساعدوهوم فكتابة الرسائل.المهم المعلم عندهوم يسوى 100 طبيب.
مع ديك الوحدة رجعنا لتاوريرت ومشينا ديريكت للمستوصف لكبير.لقينا المعلمين والممرضين تقريبا كاينين.اعطينا لوراق ديالنا لْخلية اليقظة.هادي مجموعة ديال الأطباء كتجمع لوراق باشْ تْوجّدْ التقاريرْ.
شي شْوية ، جا القايد ومْعاه المرافقين ديالو وقال لطْبيبْ المسؤول : اوى دكتور كي داز اليوم الأول ديال التلقيح ؟
رد عليه : على أحسن ما يرام سعادة القائد
_ كاين شي إحصائياتْ ؟
_ غير هي .بالنسبة لهاد اليوم راحنا غطّينا تقريبا 40 فالمية وهادا راه مهم بزاف.أحنا كنا دايرين ما نتعدّاوش 20 فالمية
_ اوى بْرافو عليكوم يا دكاترة
_ اسمح لي سعادة القايد راه الفضل كلّو راجع لهيأة التدريس.الصراحة تقالْ كانو خير محفّزْ لسكان اللي تْوافدو علينا بكثافة لا مثيل لها.
شاف فينا حْنا المعلمين وضْحكْ .من بعد قال لينا:
لبْلاصة اللي فيها المعلمين فيها التْبَرْزيطْ والمعلمين معروفين راسهوم قاسح الحاجة الى دارو شي حاجة فْراسهوم ماكاينش اللي يْحيّدْها ليهوم .دابا هاد لَعْناد ديالهوم راه فالصاليحْ ديالنا.
المعلمين حتى هوما ضحكو
_ اوى راها راشقا ليكوم ، ياكْ؟
_ يا الله وجدو راسكوم راه لغدا موجود وكولشي فابور.
بْقينا نْشوفو فيه .شي شوية قرّبْ منّو شي خونا بالله من المعاونينْ ديالو وهْمسْ ليهْ فْودنو .
القايد ابتاسم وقال للحضور : سمحو لي يا سادة آشْ بغيتو تتْغدّاوْ ؟ كاين الكفتة ، كاين الكوتليتْ ، كاين لحم مْفوّرْ ، كاين طاجين لبطاطا والزيتون بالدجاج.
هي هاديك ناضتْ القربلة فالمستوصف.كلْ واحدْ يلغى بلْغاهْ.شي باغي الكفتة ، شي عندو مع الكوتْليتْ ، شي اللي يعجبو الطاجين ، شي اللي خاصّو اللحم مْفوّرْ.المهم الطلبات كتراتْ.آشْ المعمولْ؟
القايد شافْ ياللي حاجة وحدة هي اللي غادي تْسلْكو : هاد المأكولات كاملة يْجيبها واللي بغى شي حاجة راها حْداهْ
_ اوى تْبرعو مع ريسانكوم

اليوم الثاني كان خاصني نكون فالمستوصف مع الجوج ديال الصباح.كان خاصنا نمشيوْ لواحد القرية تبعد بْشي 60 كيلومتر.هاد القرية السكان ديالها متنقّلين.يعني ما يبقاوْشْ فمكان واحد.لهادا خاصنا نْشدّوهوم او هوما باقيينْ ناعسينْ.
فعلا مْشينا شي 50 كيلومتر والطوموبيل حبْساتْ حْدى وادْ كانْ حامَلْ.من الصدف كانو ناس المنطقة دايْرين خشْبة طويلة شادّة العرض ديال الواد.آه يا خّوتي ضروري نقطعو الواحد وحْنا نتْمشّاوْ فوق الخشبة.خوكم يْجيهْ دغيا الفيرْتيجْ (الدوخة).صافي غادي نْطيحْ ويَدّيني الواد.
شي وحدين معلّمين بْغاوْ يرجعو في حالاتهوم ولكن ما يمكنش ليهوم حيت حْنا بْعاد على تاوريرت.
فْلخَّرْ ما فادْهوم غير يتْمشّاوْ من فوق الخشبَة.شْحالْ من واحد طاحْ ولكن الحمد لله دغْيا لقْفوه.خوكم الحوميدي مْنعْ ولكن ب66 كْشيفة.
المهم تمشينا على رجلينا واحد الساعة ديال الطريق.هي هاديك وْصلنا لواحد الخيمة كبيرة.قبل ما نقرْبو جاوْنا شي كْلابْ كوحَلْ .باغيينْ يهَّجْمو علينا.الحمد لله خرج شي نومادْ (من الرُّحَّل) من الخيمة وقال لينا : شكونْ انتوما واشْ باغْيين عندنا.جاوبناه : حْنا المعلّمين جينا نْلقحو وْلادكوم .
_ ما عندنا وْلادْ
_ اوى خَرجْ لينا لعْيالاتْ !
النومادْ طارتْ ليه (ماشي معْزةْ) : الله ينْعلْ اللّي ما يحشمْ.آشْ دّاكوم للنْسا ديالْنا ؟
_ خاصْهوم يتلقحو
_ واخّا صبْرو ولكن ما غاديشْ يخّرجو ليكوم
_ حتى حْنا بْغينا غيرْ يدّيهوم.
_ الله ينعل ما يحشمْ أنتوما ضاسرينْ
عادْ عقنا باللي خونا بالله يْسْحابْ ليه باغيين نتزوْجو.كيفما تعرفو بالدارجة المغربية طلب يد البنت هي معناها باغي يتزوجها.
_ اسمح لينا يا الشريف.بغينا نْدكّو ليهو لبْرى فاليدْ
_ واخّا
هي هاديك خرجو لينا شي عْيالات مْلثْماتْ.يا الله عرّاوْ يدّيهم كولْها معَمْرة وْشامْ.
المهم انتهات هاد العملية على خير وسلام.
شي شْوية ، جا لعندنا واحد الولد كبير وقال لينا : حتى أنا بْغيتْ نتْلقّحْ.
الفرملي ردْ عليه : لا يا ولدي انت كبير على التلقيحْ
خوكم الحوميدي ديما فنصرة المظلوم والمقموع والجيعان والعطشان.هي هاديك دُرْتْ فالممرضْ : مالكْ أخويا حارَمْ الولد من التلقيحْ؟ واشْ راكْ مادّو من جيبك ؟
_ ولكن راه ما يحقْشْ عليه
_ باراكا من لفهامة ، اوى لقّحْ الولد
_ واخا أخويا على مسؤوليتكْ
الولد مسكين فْرحْ.غير الممرضْ لقْحو دخَلْ يجري للخيمة وقال لبّاهْ: ابّا حتى انا تلقّحْتْ
من بعد شفنا باقي الخيمات .الاغلبية ديالهوم ما عندهومش لبراهش.اللي كان اننا لقحنا لعيالات .
مع ديكْ السبعة ديال الصباحْ رجعنا لتاوريرت منهوكين عيّانين .أنا مْشيتْ ديريكت للدار باشْ ننعسْ.
مع ديك الوحدة مْشيتْ للمستوصف باش نعطيهوم الرّابّور(التقرير).قال لي الطبيب : أخويا واش عاد دابا جاي؟ صحابك كانو هنا مع ديك العشرة ديال الصباح.
المهم ما فادو غير خْدى لوراق ديالي وقال لي راهوم تْغدّاوْ ولكن بْقى باشْ تاكول معانا.
فعلا كْليتْ معاهوم .من بعد اكتاشفت باللي هاد الناس المهمين يْخلّيوْ الطبسي تقريبا عامر.هوما عندهوم مع الفواكه .
اليوم الثالث والأخير من زهري قْضيتو فواحد المستوصف ديال لمدينة .المشكل كاين البشر بزاف والتنظيم ماكاينش.كان هاد النهار اصعب يوم قضيتو في الحملة التلقيحية

عودة لمذكرات معلم في الوسط الحضري مع ما تبقى من الحلقات

يوم الجمعة 17 يناير : حوميدي وقصتو مع صاحب الطبسي ديال الطعام كل جمعة
يوم السبت 18 يناير : حوميدي وولادة ابني أنس
يوم الإثنين 20 يناير : حوميدي والتلفزة كولور وشرارة
يوم الثلاثاء 21 يناير : حوميدي والخزانة المدرسية
يوم الأربعاء 22 يناير : حوميدي ومعلمة بنتو عفاف
يوم الخميس 23 يناير : حوميدي وصديقي السقرام نبيل (1)
يوم الجمعة 24 يناير : حوميدي وصديقي السقرام نبيل (2)
يوم السبت 25 يناير : حوميدي والإنتقال إلى وجدة (نهاية المذكرات)

التوقيع

آخر تعديل houmidi59 يوم 2014-01-16 في 15:22.

2014-01-17, 05:32

رقم المشاركة : 94

houmidi59

بروفســــــــور

إحصائية العضو

houmidi59 غير متواجد حالياً

رد: مذكرات معلّم في العالم الحضري

الحلقة رقم 36 : حوميدي وقصتو مع صاحب الطبسي ديال الطعام كل جمعة

الجزء الأول : لكْرى من دارْ لْدارْ وقصتي مع ولد فجيج

هاد القصة مْشاتْ لي من بالي ويا الله فاشْ تفكّرتها.هادي يا خّوتي فالعام التاني ديال التْزوفيرة ديالي في تاوريرت.كنت من قبل قلت ليكوم باللي سكن معايا خويا حسن.ياكْ باقي عاقلين؟ اللي كان أنه بعد العطلة الصيفية تْلاقيت مع خويا حسن باشْ نْقلبو على لكْرى.
فالأول لْقينا واحد البيت وكوزينة فواحد الباطيما مولاها مْقسّمها بيوت للكراء.هادي كان كْراها رخيص ما يتْعدّاشْ 300 درهم للشهر فيها خْلاصْ الضّو والما.سكنت فيها أنا والأخ حسن لمدة شهر فقط وهربنا منها دغيا.الأسباب كانت كثيرة.السبب الأول هو أننا اكتشفنا ان هاد العمارة وكْرْ ديال الفساد.السبب الثاني : كاعْ اللليل كامل والَخّوت مقصْرين.السبب الثالث : هجمو علينا الحشرات (بْحال داكْ الشّي اللي وْقع لْخونا بالله عبد الحي)
من الزهر ديالنا لقينا واحد الأستاذ (هادا أصلو من فجيج) ساكن غير بوحدو فْدار كبيرة ، فيها 3 ديال لبيوت وكوزينة وحمّام .الصراحة دار نْقية.خونا بالله يا الله فاش دخلنا باش نسكنو معاه قال لينا : بغيت كومْ تعّرفو حاجة مهمة وهي أنه نْهار اللي نتزوّج غادي تخويوْ الدّار.
شوفو الوقاحة ديالو !
خوكم الحوميدي مْقزْدرْ أكثر منّو : اوى خويا وقتاشْ غادي تتزوّجْ بالسلامة
رد علي هاد الكامبو : ما زالْ ما عارفْ لْحدْ الساعة .
صاحبي حسن كان ذكي مينْ طْرحْ عليه هاد السؤال : واشْ بعدا خاطبْ ؟
_ ما زالْ
_ اوى انت كتْبيعْ الحوتْ فلبْحرْ !
_ شوفو الله يْخلّيكومْ انا النْهارْ اللي نبغي الدار خاصْكومْ تخويوْ
أنا اللي ردّيتْ عليه : اوى حتى يْزيدْ ونْسمّيوَهْ سْعيدْ
المهم سكنّا معاه واحد الأسبوع .خونا بالله قال لينا أنا اللي نتْكلّفْ فالماكلا.قلنا لو ما فيها باسْ.خونا بالله كان يْوجّد كل يوم الماكلا .ها لبْطاطا بالجلبان، ها الكرعة باللحم ، ها اللوبيا بالدجاج....المهم برنامج غني ، الصراحة تقال.
كان خونا زعما حادق حيت كان مع هاد لمْراقي يْصايبْ مرّة فلفلة بماطيشة ومرّة ماطيشة بالبصلة.
اوى هادا حادكْ (ماهر باللغة العربية)بمعنى الكلمة.
اللي انا تْعجَّبتلو من هاد السيد انّه تقريبا النهار كامل فالدار، قْليلْ فينْ يمشي يخدمْ.
المهم واحد النهار خوكم جا من الخدمة مع ديك الطْناشْ وكي العادة كان ضارّو الجوع.
مينْ وْصلتْ شمّيتْ المرميطة : لعدسْ ! الله شْحالْ بنين!
خوكوم بالله قال لصاحبنا (عبد لكبير) يا الله نتغدّاوْ راني قريبْ نموتْ بالجوع
فعلا حطْ الماكلة ، جا خويا حسن.شفتو بْحال الى شبْعان .يا الله نْقبْ (بحال الدجاجة) شْوية عْدسْ .قلت لو : خويا حسن : ياك الفلفل عزيزْ عليكْ.اوى جاهدْ شي شْوية وكولْ حقّي.
_ لا أخويا حميد هاد النهار ما عندي شهية
خوكم الحوميدي كْلى حقّو وزاد عليه حقْ صاحبو.
هاداك النهار كانت عندي سْواري، هي هاديك ضْربتها بْتكرْشيخة حتى للمغربْ.
مينْ فقْتْ من النعاسْ، توضيتْ وصلّيتْ العصر والمغرب وخْرجتْ نْديرْ شي دورة فالقهوة.لْقيتْ خويا حسن كيشرب أتاي وحْداه الحرشة ولمسمّنْ .
_ واه أخويا حسن يمكن الشهية راها تفتْحاتْ ليكْ !
_ خويا حميد راني ميّتْ بالجوع .خلّيني ناكولْ ، من بعد نحكي لك.
الصراحة كونْ غيرْ ما حكى لي.
_ سّي عبدالحميد انا فلغْدا كنت جيعانْ وْما بْغيتْ ناكولْ والو
_ ياكْ ما طيّرْها لكْ خونا بالله ؟
_ بالعكس كان مْعايا مزيانْ
_ اوى فينا هو المشكل ؟
_ آه يا خويا اللي شفتو كرّهني فالماكلة
_ واه لهاد الدرجة !
_ واشْ راكْ عارف واشْتا (آشنو)شفتْ ؟
_ لّا ولكن خاصك تقول ليا
_ شفت عبد لكبير فالمرحاض...
_ اوى حاجة عادية أخويا ، حتى أنا راني نمشي للميضا (المرحاض) غير ما راكشْ تْشوفني
_ خويا حميد ما راكشْ فاهمني.
_ واخا شفتي عبد لكبير فالمرحاض، إوى؟
_ شفتو ...حاطْ الفلفل فلْأرضْ ويغسل بالسطل ديال المرحاض.....

_ صافي أخويا واشْ باغي تْقيّيني
_ ما زال ما ساليت حتى لعدس كان .......
_ أخويا غادي نتقيّى (حاشاكوم)
يمكن هاديك الليلة ما نعستْ تقريبا والو.فالصباح قلت لحسن خاصنا نرحلو من هنا وخّا نمشيو نسكنو فالأوطيل ديال البخّوشْ
قال لي : حتى أنا راحل معاكْ ومنْ دابا
فاشْ يا الله جْمعنا حْوايجنا ، خرجْ لينا خونا بالله : اوى واشْ راكو زاهْقينْ (هاربين) ؟
_ لّا غير كنّا نديرو شوية النظافة
_ لاعنداكْ أخويا أنا وحسن غادي نرَّحْلو
_ تبارك الله بْلا ما تْخلصوني ؟
_ عْلاشْ أخويا نْخلْصوك.شحال بعدا جاتكْ
_ صْبرْ كولشي مْسجّلْ فالكارني.
خونا بالله بْدى يقرى علينا لحوايج اللي شْرى من نْهار اللي جينا لْعندو.الغريب فالأمر مْسجّلْ شي حوايج ما عندهوم حتى علاقة بالكوزينة بحال ورق المرحاض ، الساعة ديال البوطة ، فوطة ديال الحمّام ، صندالة ميكة.
حسن قالّو : الله يخلّيك بْلا ما تقرى غير أحسب واقسم وقولْ لينا شْحالْ جاتْ لكلْ واحد فينا ؟
_ هادا هو لكلام
خونا بالله جْبدْ شي آلة حاسبة عندو تقريبا الأرقام ديالها ممسوحين.بْدى يكتب ويحسب.شي شوية ، قال لينا راها جاتكوم أسيدي 400 درهم .
_ 400 درهم ؟ أحنا بْجوجْ ، ياكْ ؟
_ الّا للواحد !
هاد السيد إما خطّافْ كبير او مسكين ما يعرفشْ يحسبْ
_ شوف مزيان أخويا ياكْ ما راكْ زايدْ شي صفر بْلا ما تْفيقْ
_ كولشي محسوب نيشانْ
_ اسمح لي انا ما يمكنشْ نْعطيك هاد القدر ديال لفلوس على 10 أيام كْليتهوم معاك
_ واشْ باغيينْ تاكْلوني ؟
_ حاشا ولكن أنت باغي تخْطفْنا
_ واخّا أسيدي شْحالْ شْريتي ديال اللحم فهاد 10 أيام ؟
هاد السؤال ما كانشْ طايح لو فالبال .
انا اللي ردّيتْ عليهْ : 4 كيلو ؟ موحال ..اللحم كنّا تقريبا ما نتعدّاوش رطل.
حسن زاد قالّو : 4 كيلو يا الله تسوى 200 درهم .
زدتْ قلت لو أنا : الخضرى هاديك كاملة ما غاديش تتعدى 100 درهم
حسن خويا هو اللي كمّلْ : 200 درهم و100 درهم ونْزيدو عليها 60درهم ديال لحليب والخبز والزبدة المجموع 360 درهم نقسموها على 3 جاتك 120 درهم للواحد.هادي راها بالزيادة
_ شاف حتى عْيى وقال لينا اللي بغيتو
هدا دليل باللي خونا بالله كانْ رابح مْعانا بالمعقول.

الجزء الثاني :قصتي مع مول الطعام (كسكسو) ديال الجمعة

المهم حْنا كانْقلْبو جهة السوق ، شي أستاد ديال الإعدادي قال لينا الى بْغيتو تسكنو معانا راني موافق ولكن خاصكوم تْشوفو الدار.مْشينا نشوفوها.فيها جوج طبقات : فالطبقة الأولى 2 بيوت وفالطبقة الثانية 2 بيوت والكوزينة.المرحاض جاي فوق السطوح.خونا بالله قال لينا باللي هوما بْجوجهوم ساكنين فالطبقة الثانية حْنا خاصنا نْشدّو الطبقة الأولى ولكن الى بْغينا ناكلو نْجيوْ للكوزينة حيت ما كاينْ غيرْ وحدة
اما على العشرة ، قالك أسيدي هوما يتْعاشْرو غيرْ بيناتهوم.حسن لْقاها من الجنة والناس وردْ عليه : داكْ الشّي اللّي بْغينا.
المهم جبْنا حْوايجنا وتْعرّفنا على الأستاد الثاني.
دازت ايّامات تْعاشرتْ فيها أنا وخويا حسن.كنّا ناكلو جميع فالكوزينة ولكن كل جوج او ماكلتهوم: هوما من جهة وحْنا من جهة.ما عمرو شي واحد دوَّقْ لاخورْ.
هاد جوج أساتدة فْشي شْكلْ.عندهوم تقريبا نفس الهوايات : بْجوجهوم كيسمعو للموسيقى الهندية ، أما الصلاة ، خاطيهوم.بجوجْهوم كَيْكاليوْ الشمّا (طابا) المهم قوم ديال الجاهلية ولكن لحد الساعة ما عمرو ما ضرّونا.
كنت أنا وحسن خاصة يوم الجمعة كنمشيو نصلّيوْ .من بعد نرجعو من المسجد عاد نتْغدّاوْ.
واحد النْهار كنت راجع من المسجد.كان داك النهار الجمعة.تْلاقيتْ واحد التلميد ديالي كان يقرى عندي فالثالث.سبحان الله ما عقلتشْ عليه ولكن هو عْرفني.جا لعندي مسكين وسلّمْ علي بْحرارة وقال لي : استاد ما عمرو ما ننسى الفضل ديالك .أنت هو سْبابي باشْ رجعت م**** فالرياضيات.
المهم من خلال الهضرة عْرفتو مزيان: صافي انت ما تكون غير داكْ التلميذ الذكي هشام
_ نعم أستاد راك باقي شادْ
_ واه أولدي الداكرة هي راسْ مالي
المهم سوّلْ على الأساتذة وعلى الأحوال ديالي.من بعد قال لي : اسمح لي يا أستاذ على حسب العلم ديالي انت متزوّجْ ولكن شفتك عايش مع الزوفرية.ياكْ ما...
_ لّا أولدي ، غادي نحكي لك.
مينْ ساليتْ القصة ديالي ، شاف فيا مسكين بْحالْ الى باغي يبكي : يا أستاد انت دائما كضّحّي من أجل الآخر
_ ما عليهش أولدي الجزاء راه عند الله.
قبل ما يمشي قال لي عند مَنْ تسكنو؟
قلت لو عند : قدّوري
_ صافي عرفت الدار.غير سيرو راني لاحق بيكوم.
فعلا مْشيتْ انا وحسن للدار.حَطّينا لغدى باشْ ناكلو.باقي عاقل حسن كان طيّبْ الماقارونية بْلاصوصْ.سمعنا الدّقْ.نزلو الأساتذة يْشوفو شْكونْ.واحد فيهوم قال لي : تْكلّمْ
نزلتْ.لقيتْ هشام فْيدّو طبسي كبير ديال الطعام (كسكسو): راه صيفطو ليكوم الواليد بالصحة والراحة
طلّعنا الطعام للدار.حْنا ديما كْرامْ ، عيّطْنا على الأساتدة باشْ يْشاركونا الطعام.كْلينا جميعْ والحمد لله شبعنا
الجمعة اللي جات من بعد ، مْشينا للجامع كي العادة وتْلاقينا هشام.قال لي مسكين : أستاد راني حطّيتْ الطبسي ديال الطعام عندكوم فالدار
_ الله يخلف عليكوم أولدي
_ بالصحة يا أستاد .انا ما كْرهتشْ كل يوم تتْغدّاوْ معانا
المهم رجعنا للدار.اللّي شفنا يْحيرْ لو لعجبْ.بجوج خوتنا بالله سالاوْ مع الطبسي ديال الطعامْ
_ واه شكون اللي عْطا ليكوم التسريح تاكلو الطعام ديالي؟
_ أعْلاه أخويا واشْ مكتوبة فيه سْميْتكْ ؟
_ هاداك الطعام راه صيفْطو لي التلميد ديالي.
_ راك غالط راه قال لينا ليكوم أنتوما
_ واخّا تاكلو ان شاء الله الرّهْجْ
الاسبوع الثالث ، نفس القصة.لخّوتْ فازو بالطبسي ديال الطعام.المشكل ان هاد جوج أساتدة ما بْقاوْشْ يْطيْبو شي حاجة يوم الجمعة حيت صافي ضمْنو الطبسي ديال الطعام كل جمعة.
صاحبي حسن قال لي : خلّيهومْ راكْ تشوف الجوع قاتلهومْ
_ عندك الحق ولكن خاصني نعلم التلميد ديالي.
فعلا واحد الصباح ديال الجمعة كنت ما زال ما مْشيتْ للجامع، تْلاقيتْ هشامْ :
_ أستاد الله يْخلّيك راه عندك 3 أو 4 ديال الطْباسلْ باقي ما رديتوهوم لينا
_ اسمع أولدي هاداك الطعام اللي كتْجيبْ شْحالْ هادي ما كْليتو .شوف مع هادوك الأساتدة اللي كتْجيبو ليهوم.
هشام ما كانشْ يتوقّع هاد الرّدْ : ولكن أأستاد ان الطعام كنْجيبو ليك ماشي لهادوك الأساتدة مع احتراماتي.كونْ ما كنتيشْ انت والله ما نْجيبو
_ اوى ولدي سير دابا دقْ عليهوم والله يْخلّيكْ ما تبْقاشْ تْجيبْ لينا الطعام .
_ واخّا يا أستاد
مْشيتْ مع حسن للجّامع وفي الطريق حْكيتْ لو اللي وْقعْ مع التلميد ديالي .حسن ماتْ بالضحك .قال لي : خاصنا نْرجعو دغيا راه يمكن يسرقو لينا الماكلة ديالنا
_ واشتا بعدا راكْ مْوجّدْ لغْدا ؟
_ لعْدسْ
_ ما تْخافشْ هادوك الكانيبالْ ما عندهومشْ مع القطاني.
المهم مين رجعنا لْقيناهوم باقي يْسايْنو لغْدى.حْنا حطّينا لعدس باشْ ناكلو
_ أجيوْ تاكلو معانا
_ الله يخلف
_ غير شوية عدس قبل ما يْجي الطعام
_ أخويا غير كولو حْنا صابرين حتى يْجي الطعامْ.
المهم سالينا من الماكلة وجات الوحدة و30 دقيقة.الطعام ما بانشْ.
هي هاديكْ ، قلت ليهوم : ياكْ ما راكو تسْتانّاوْ الطعامْ؟ راه موحالْ الى تاكلوه هاد النهار
_ وأعْلاشْ أخويا واشْ حاسدنا ؟
_ حاشا غير كنت شفتْ عندهوم الضْيافْ (الضيوف)
_ زعما موحال الى نتغدّاوْ
هي هاديك خوتنا بالله اقْتانْعو باللي صافي هاد الجمعة ما فيها طعام.هنا يا خّوتي عْرفتْ أنَّ بنادم شحال نكّار الخير.شوفو شْحال من جمعة وهاد الأساتدة كياكلو من خير الغير واحد النهار ما جابش ليهوم الطعام ، بْداوْ يْسبّو ويْعايرو فمول الطعام : سيرْ الله يْلكّيها لكْ ، الله يعطيك موصيبة ، الله يْريّبْ عليكْ الدار......
الأساتدة دْعاوْ حتى شبعو ولكن الحمد لله ربي ما عمرو ما يسمع لدعوة الظالمين والجاحدين للخير
الجمعة اللي من بعد ، مشينا للمسجد كي العادة .رجعنا كي العادة .دخلنا للدار كي العادة .يا الله بغينا نتغدّاوْ، جا هشام ودقْ.خْرج ليه هاد خونا بالله (شعيب) قالو هشام : انا الطعام ما كنتش نْجيبو ليكوم ، كنت نْجيبو للأستاد ديالي
هاد شعيب طلع يجري للبيت ديالو ، بْحال الى تقولو هشام صفعو لوجهو.
حْنا نْزلنا ولْقيتْ هشامْ فْيدّو طبسي طعام كبيرْ وقال لي : أستادي هادا طبسي ديال الطعام غير ليك أنت وصاحبك سّي حسن.

عودة لمذكرات معلم في الوسط الحضري مع ما تبقى من الحلقات

يوم السبت 18 يناير : حوميدي وولادة ابني أنس
يوم الإثنين 20 يناير : حوميدي والتلفزة كولور وشرارة
يوم الثلاثاء 21 يناير : حوميدي والخزانة المدرسية
يوم الأربعاء 22 يناير : حوميدي ومعلمة بنتو عفاف
يوم الخميس 23 يناير : حوميدي وصديقي السقرام نبيل (1)
يوم الجمعة 24 يناير : حوميدي وصديقي السقرام نبيل (2)
يوم السبت 25 يناير : حوميدي والإنتقال إلى وجدة (نهاية المذكرات)