2014-01-18, 07:27
|
رقم المشاركة : 102 |
إحصائية
العضو | | | رد: مذكرات معلّم في العالم الحضري | الحلقة رقم 37 :حوميدي وولادة ابني أنس أنس ولدي أدْزادْ بالضّبْط يوم 5 أكتوبر.سبحان الله صدفة عجيبة يصادف يوم ميلادو عيد المدرس.ولكن ديك لوقيتة ما كانتش الأسرة التعليمية فالعالم تحتافل بيه. أناسْ زادْ أيامات الحوميدي كان زوفري فتاوريرت .النهار اللي خرج فيه للوجود كان يوم الخميس وأنا كنت فالمدرسة كي العادة. من بعد جاني تيليفون قالو لي راه عندك ولد مبروك عليكْ.بالطبع فهاديك لعشية شديتْ الكارْ لوجدة.وصلت مع المغرب.الدار كانو فيها لعيالات ضايْرين بالزوجة.خوكم الحوميدي دخلْ باشْ يْسلّم على المولود الجديدْ.أخِداهْ ثم ودّنْ (يعني أذّنَ)لو في وَدْنيهْ.سمعت لعيالات كيتهامسو بيناتهوم .باينة جاتهوم عْجبْ.زعما هاد الرجل اللي هو أنا ما كيحشمشْ حيت هازْ ولدو وكيفتاخر بيهْ. هادا هو الكلخْ بعينيهْ خوكم من بعد ،جْبد المصحف وقْرى آيات من الذكر الحكيم .دابا خاصني نْوجّدْ راسي لسْبوعْ. ولكن كان خاصني نْديرْ شهادة طبية ديالْ أسبوع يا الله فاشْ تكفيني.راكو عارفين الإدارة كتعطي 3 أيام للموظف (زعما راها قاضْياها؟) من الإجرائات اللي درت هو عملية تسجيل الولد ديالي بسجلات الحالة المدنية.انا عملي وخاصني كل حاجة تكون في وقتها.باقي عاقل مين وصلت للبلدية أعطيت للموظف الورقة باش ينقل المعلومات :
_ آشْ سميَّتْ الولد ؟
_ راها مكتوبة أحْداكْ
_ أناسْ ياكْ ؟
_ راك غالك أنَسْ بْلا مدْ
_ أنت معلم ؟
_ واشْ ما بايناشْ علي ؟ ولكن عيّطْ لي أستاذ
_ واخّا أستاذ شي وقيتة شفتو يكتب الإسم ديال ولدي بالفرنسية.خوكم الحوميدي بْحال هاد النوع ديال الموظفين اللي كيحتاقرو رجل التعليم هو ديما ليهوم بالمرصاد وبالعكس أنا كنْبهدلهومْ بالمعقول
_ شوف أداكْ بنادم ماشي هاكْدا خاصّكْ تكتب أنسْ
_ ولكن يا أستاذ كنكتبوها هاكْدا S-A-N-A _ ماكاينش غير S واحد ، كاين جوج ديال S
_ غريبة هادي .ما عمرو ما سمعت بها
_ هدا يعني باللّي راكْ ناقص فاللغة الفرنسية
_ ياكْ ما أنت أستاذ ديال الفرنسية ؟
_ إيهْ أستاذ ونصْ خونا بالله ما فادو غير كتبها Anass ومن ديكْ لوْقيتة ما زال مكتوبة فالحالة المدنية بهاد الطريقة من يعد شْرحتْ لْخونا بالله عْلاشْ كاينْ جوجْ ديالْ S . ماشي غير واحد.هادي غادي نْخليها فالإضافات ديال هاد الحلقة حيت الشرح ديالها يلزم الكلام بالفرنسية المهم خوكم الحوميدي اتّاصل بالواليد ديالو وخبْرو بالمزيود .ما نخْفيشْ عليكوم أن الواليد فْرحْ بزافْ.غادي تعّرفو عْلاشْ. لوْقيتة مينْ زادتْ عفاف ديالي ، الواليد ما عجبوشْ الحال.هادا فكّرني بداكْ الشّي ديال الجاهلية .انا بالعكس عندي سواسية ولد أو بنت .والصراحة اليوم كنفضّل البنت على الولد .البنت حْنينة بزّاف مع واليديها، أما الولد ما مْسوّقْ حتى لْشي حاجة. المهم يوم كانت ادزادتْ عفاف ، الواليد كيفْ ما قلت بيّنْ عدم الرّضا..من بعد سمعت شي هضْرى ديالو بْقاتْ فيا المعنى ديالها أنّ الحوميدي ما فْيدّوشْ.هادا هو لحماق بْعينيهْ.ياكْ زعما ربّي هو اللي يعطي الذكر والأنثى واللي بْغاه يكون عقيم هو المريدْ ..كولشي بمشيئة الله. على كل حال ، من بعد الواليد ساق لخبار عن قرب الولادة ديال أخ أو أخت عفاف ، قال ليا شوف أحميد الى كان ولد الكبش الجاوجْ على حْسابي وأنا غادي نْجيبْ العرْفا حتى للدارْ وعلى حْسابي. هي هاديكْ قلت لو : ما تنساشْ تشري الكبش وتجيبْ العرفا. نرجع للولادة ديال أنس .الصراحة كانت صْعيبة .كل مرّة كانت الزوجة ديالي تْحسْ بالمخاضْ ولكن غيرْ توصل لسْبيطارْ، ما كاين والو .شي وْقيتة بْقاتْ أسبوعْ.واحد النهار الطبيب قال ليها يمكن الى خاصّك العملية القيصرية .الزوجة ديالي تْخلعات ماشي بْعيد حتى أناسْ خافْ مينْ شافْ باللي القضية فيها المنشار والموس ولمقصْ.هي هاديك قال ليهوم : الَخّوتْ راني موجود خاصْني شي دفعة لله. وفعلا خْرج أنسْ للوجود وْهو كيْغوّتْ بْحالْ الى ما ساخيشْ بالجوْ اللي كان فيه. كاين حاجة أخرى خوكم دارها فالسْبوع ديالْ ولدو أنسْ.يمكن موحالْ الى يْديرْها شي حدْ.كان عندي صديق ديالي قلت لو : خويا سليماني واشْ تعرفْ شي ناسْ يقْراوْ القرآن ويمتْعونا بالأمداح بْلا ما يطلبو لفلوسْ.انا ما عمرو في حياتي نْعطي لفلوسْ للفقها .مينْ نعطي لفلوس من الأحسن نتصدّق بيهوم. ردْ علي هادْ الصديق : فعلا عندك الحق .كْلام الله ما يتباعْ ، ما يتَّشْرى
_ اوى خويا واشْ كاين شي ناس فهاد الدنيا يقراوْ في سبيل الله؟
_ كاين ولكن خاصّكْ تتهلّى فيهوم ؟
_ غادي ياكلو ويشربو ولكن الدّورو(الريال) ما يدّيوهْشْ
_ صافي انت فاهمْ. فعلا خويا سليماني جاب ليا 4 ديال الأساتذة صْحابْ لْحايا. من قبل كان جا عندي الواليد وقال لي : راني تْكلّمتْ لك مع لفقيه ديال الجامع باشْ يجي لعشية.ردّيتْ على الواليد : غير قولّو ما يْجيشْ.راني لْقيتْ شي ناسْ معقولين.
_ ولكن هادا فقيه وقاري 60 حزب
_ عندك الحق قاري 60 ومْتلّفْ 70
_ آشْ كتقولْ ، الله ينعل اللّي ما يحشمْ
_ شوفْ أبّا أنا ما عنديشْ مع الفقها اللي يمشيوْ لدْيورْ باشْ ياكلو ويشربو ومن الفوق تعطيهوم لفلوسْ
_ اوى أولدي هاداكْ شغلكْ
_ واخّا غيرْ ما تنساشْ تْجيبْ العَرفا
_ ياكْ ما ناوي ما تعطيهوم والو ؟
_ اللي بغى يْبرّحْ يْشوفْ جيبو المهم فالليلة الموعودة جاوْ خوتنا بالله معاهوم سليماني صاحبي.الصراحة تقال دازت ليلة كان فيها القرآن قْراوهْ الأساتذة بخشوع وكانت أمداح نبوية تْفاعل مْعاها الحضور.بإختصار دازت ليلة فاعلة تاركة النْسيبْ ديالي (الله يرحمو) ما عجبوشْ الحال .هو والواليد ديالي ما بْغاوْشْ يدخلو عند الفقها الجْدادْ.بْقاوْ فالبيت بوحديتهوم . سبحان الله العطيم دازت تقريبا 3 سنوات .كنت واحد النهار مشيتْ عند صاحبي سعيد فمدينة العيون الشرقية.هاد المدينة بعيدة على تاوريرت ب50 كيلومتر وعلى وجدة ب60 كيلومتر.باقي عاقلين على صاحبي سعيد.راه ما بْقاشْ في تاوريرت حيت طْلبْ الانتقال لمدينة لعيون. المهم واحد النهار مْشيتْ لعندو كان يوم ديال الأربعاء حيتْ عندي سْواري(أمسية).المهم قرّرْتْ نباتْ عندو .هاديك الليلة قال لي سعيد راحنا معروضين عند واحد الأستاد .قلت لو : ولكن أخويا أنا مانمْشيشْ لعندو حيت موحال الى يْكون عارضْ علي. جاوبني سعيد : بالعكس قال لي أجي مع الضيوف ديالك
_ اوى باشْ عْرفْ باللي عندك شي ضيفْ ؟
_ غادي نكون معاك صريح .كان عْرضْ علي وخوكْ ما كانْشْ باغي يمشي ، هي هاديكْ بْغيتْ نْديرْ بيكْ السّبّةْ (العذر)
_ سعّى القضية تْقلْباتْ ، ياكْ ؟
_ فعلا ، أعرضنا بجوج بينا؟ باقي عاقل مزيان .هاديك لوقيتة كانت أيامات العيد لكبير.كنّا عيّدنا هاديك 10 أيام او 15 يوم . مْشينا عند خونا بالله صديق سعيد والصراحة تُقالْ تْهلّى فينا مزيانْ.شي شْوية بْقيتْ نتمعّن فيه .قال لي : خويا شفْتكْ غيرْ تْحَنْزَزْ (تتمعّنْ) فيا .واشْ كتعرفني ؟
_ آشْ غادي نقولْ ليك يا أخي.راه سْبقْ لي شفتكْ ولكن فينْ ؟ الله أعلم
_ حتى أنا ياخويا سابق لي شفتك .فين ؟ حتى أنا ماعارفْشْ فكّرتْ شي شوية وقلت لو: صافي ، ما نكونو تْلاقينا غير فوجدة أو هو يْردْ علي : انا ساكن في لعيون .ما نمشيشْ لوجدة .ليلة وحدة كنت قصّرتْ عند واحد السيد الله يْعمّرها دار كان عندو السْبوع وراهْ كْرمْنا الله يكّرْمو فالجنة خوكم الحوميدي وْقفْ وقالْ ليه : هو أنا عودة لمذكرات معلم في الوسط الحضري مع ما تبقى من الحلقات يوم الأحد : راحة سأخصصه لتعليقاتكم.غير ما تبخلوشْ علينا بيهوم يوم الإثنين 20 يناير: حوميدي والتلفزة كولور وشرارة يوم الثلاثاء 21 يناير: حوميدي والخزانة المدرسية يوم الأربعاء 22 يناير: حوميدي ومعلمة بنتو عفاف يوم الخميس 23 يناير: حوميدي وصديقي السقرام نبيل (1) يوم الجمعة 24 يناير: حوميدي وصديقي السقرام نبيل (2) يوم السبت 25 يناير: حوميدي والإنتقال إلى وجدة (نهاية المذكرات) | |
| |