2014-01-19, 20:25
|
رقم المشاركة : 115 |
 إحصائية
العضو | | | 
|  رد: مذكرات معلّم في العالم الحضري
|  |
الحلقة رقم 38 من مذكرات حوميدي في العالم الحضري : حوميدي والتلفزة كولور وشرارة
الجزء الأول : حوميدي شْرى تلفزة كولور
قبل ما نتزوج ماكنتشْ مْسوّق ْ للتلفزة .مين نبغي نتفرّج شي فيلم نمشي للسينيما ؛ إلى بْغيتْ نعرف الجديد ديال الأخبار ، نمشي للقهوة ؛ أما الموسيقى هاديك ساهلة ماهلة ، راها عندي مسجلة
ديال الكاسيط والموسيقى غير هي فالسوق.
مينْ تزوّجت ، إوى الحالة تْغيْراتْ.خوكم الحوميدي ما بْقاشْ يخرج عند صْحابو حيت لوْلية ما يمكنشْ نْخلّيها فالدار بوحديتها.المشكل الى بْقيتْ فالدار ما كاين كا يدّارْ .اوى الراديو ؟ بعض المرات حتى هو يبقى غير يْخرّفْ. الكاسيطْ ؟ راه طْلعْ فالراسْ.لكتاب والمجلة ؟ ما يصلحوش مينْ يكون مْعاكْ شي حدْ .ياكْ أنتوما عارفينها الكتاب هو الأنيس في الوحدة .هكْدا علْمونا فالمدرسة وحْنا دابا كنعلْموها لوْلادْ ديالْنا.اللّي كان أن هاد البراهشْ ديال هاد العصر عايْقين.هوما ما عندهومش مع الكتاب .
المهم كان خاص حلْ والحل دائما كيْجي من لعْيالاتْ :
_ أخويا راني قْنطْتْ ، خاصّك تشوفْ ليا شي حلْ
_ يا الله نْديرو البولفارْ(boulevard)
_ واشْ راكْ تضحكْ علي .تاوريرت فيها شارع واحد ويمكن تقطعو فخمسة مينوت
_ عندك الحق .صافي لقيتها ، يا الله نمشيوْ للسينيما
_ انا ما عمرو مْشيتْ ليها
_ واخّا أجي كتبي معايا لي فيشْ (les fiches)
_ لا أسيدي هاداك الشّي عندك واعر ، أنا ما قادّة عليه
_ اوى عندك شي حلْ ؟
_ شْري لي الله يْخلّيك تلفزة ...آه وتْكون كولورْ
_ مزيان تبارك الله
تلفزة كولور كتسْوى 4000 درهم وخوكم الحوميدي يا الله كيتخلَّصْ 1500 درهم .باش نشري بْحالْ هادي خاصني نصوم 3 ديال الشهورا على الماكلة وهدا ما كافيشْ حيت يلزم علي ناكول مول الدار اللي كان كاري ليا.
_ شوفي يا ديكْ لوْلية المتعوسة راه ما عندي فلوس للتلفزة .الى عندك شي ذهب أرايْ نبيعوه
_ ذهبي ما نفرّطْ فيه ما نْبيعو .
بْديتْ فعلا نْفكَّر فهاد المشروع.فعلا خاصنا شي تلفزة ولكن على قدْ الحال : شي تلفزة بالابيض ولكْحلْ ..باراكا علينا.
المشكل أن الدّاخلية (الزوجة المحترمة) والو ما بغاتش .قالت لك أنا باغية التلفزة كولور
المهم انْهيتْ هاد الموضوع وقلت ليها : يكون خير إن شاء الله.
فعلا واحد النهار تْلاقيت صاحبي سعيد وحْكيتْ لو اللي صارْ أُو هو يقول لي : عندي ليك الحل.الميلود يقدر يْبيع لك تلفزة كْريدي وبالتقسيط المريح
_ واه ! يا الله نمشيوْ دابا عندو
فعلا وصلنا عند الميلود.هاد خونا بالله كبير وصحيح وعندو لحية نازلة حتى للأرض .هادا يشبه للخوميني.سعيد تْكلّم لو على الرغبة ديالي.بولحية قال لو ما كاين مشكل .وقتاش ما بْغيتْ نجي ناخود التلفزة.
خوكم الحوميدي ردْ عليه : راني باغي غير شي تلفزة صغيرة
_ موجودة وعندي منها 3 ديال الأنواع
_ شْحال بعدا كتسْوى الله يرحم الوالدين ؟
_ والدينا وواليديك أسيدي ، الثمن ديالها غير 3000 درهم.
_ تبارك الله .اوى شحال نقدر نعطيك فالشهر ؟
_ أنت معلم ياك ؟ المانضة عندك شوية ضعيفة .شوف غادي تعطيني 300 درهم فالشهر حتى تْساليها إن شاء الله.
_ الله يْكثرْ خيرك.
المهم رْجعت للدار وخْبرتْ المدامْ باللي راني لْقيتْ التلفزة.
لعْشية مْشينا عند الميلود باشْ نختارو التلفزة.فعلا لْقينا واحد النوع رائع .المهم فْديكْ الساعة ، دخل واحد الإخواني للمحال ديال الميلود.فْديكْ الساعة كان خونا بالله كيْجرّبْ التلفزة.
هاد بولحية شافْ فيا وقال لي :
_ اسمح لي يا أستاذ بْغيتْ انّصْحكْ واشْ تقبل بالنصيحة
_ نعامْ سيدي
_ وايّكْ دّخّلْ هاد لحرامْ للدار.راه غادي يلهيك على العبادة وراه كلّو منكر
خونا بالله كيتكلّم على التلفزة
_ ولكن أسيدنا بْغينا فاشْ نتْلهّاوْ
_ كاين ما يدّارْ ! قْرى أولدي القرآن وكثّرْ من الصلاة
الميلود كان ساكت .غير سالا بولحية ، قال ليه : أنت باينة مفتي مجهد .زعما التلفزة في نظرك حرام ؟
خونا بالله جاوبو :
_ بكلْ تأكيد نعمْ
_ واخّا الله يرحم الوالدين هاد الكاس واشْ حلالْ أو حْرامْ ؟
بولحية ضْحكْ وردْ : واشْ هادا سؤالْ ؟ راه باين حْلال
الميلود هو اللي ضْحك :
_ اوى راك غالطْ.هاد الكاس الى عمّرْناهْ بالخمر راه حْرام والى كان فيه لحليب حلال.
حتى هاد التلفزة الى بنا دمْ استغلْها باشْ يتفرّج الحاجة المفيدة ليه فالدنيا والآخرة راها حْلالْ والى كانت تْلهّيه على الدين ديالو وفيها المنكر ، راها حْرام
بولحية ما صابْ ما يْقولْ واعْترفْ من بعد باللي هاد التلفزة ما هي الا وسيلة والانسان هو اللي يمكن يْردها أداة ديال لحْلالْ أو لحرام
الجزء الثاني : الكولور فالتلفزة يقدر يتْقاضى
فالدار كنا نتفرجو فالتلفزة واللي كان يْبانْ فيها كان يعجبنا.الصراحة تقال قليل اللي كان عندو التلفزة بالألوان فْديكْ لوْقيتة.
واحد الجارة ديالنا ساقتْ لخبرْ .بْقاتْ تْجي كل ليلة حيتْ كانتْ مْتبْعة شي مسلسل مصري وْدابا اكتاشفات ان البطلة عندها ملابس زوينة مْلوْنة.كل نهار كانت تْجي باشْ تتفرج معانا.غيرْ يبدى المسلسل وهي تْعلّقْ : ياهْ مازال لابسة غير الكسْوة ديال البارح.يا طوموبيلا خضرى.سبحان الله اللون لزْرق جا معاها.
المهم خوتنا بالله قلْباتْ ليا راسي.تْصورو بْقيت نسمح ونمشي للقهوة باشْ نتفرّجْ التلفزة واخّا حتى أنا عندي فالدار.
لمرى ديالي حتى هي كرْهاتْ.واحد النهار قالت لي : آشْ دّاني نقول ليك اشري لي تلفزة كولور
_ ياكْ ما نْدمتي ؟
_ كون غي ردّيتيها لو
_ واشْ حْماقيتي ؟ ما يمكنش ومن الفوق راني عاطيلو الشيكانْ.
_ ولكن أخويا هاد لللّا تورية ديما جايّة لعندي باشْ تتفرّج.المشكل ما تسكتشْ من الهضْرة.دابا راني ما بقيتْشْ نتفرج المسلسل ديالي على خاطْري
_ ساهلة مين تسمعي الدّقْ ديالها ، ما تْردّيشْ عليها
_ ولكن الى خلّيتها غادي تفرع علي الباب
مشكيلة فعلا هاد خوتنا بالله لصْقة واشْ من لصقة !
_ صافي ، يمكن لْقيتْ الحلْ
هي هاديك شْعلتْ التلفزة .شي شْوية بالبوطونْ (الزر) حيّدْتْ الالوان والتلفزة رجعات بالأبيض والأسود
الزوجة ديالي تْخلْعاتْ : أويلي ياكْ ما التلفزة ضاعتْ
_ لا ما تقتْقيشْ.راني رجّعتها عادية
دابا مين جارتك غادي تْجي وتشوف باللي ماكاينشْ الألوان ، قولي ليها راه الألوانْ تْقاضاوْ
داك الشّي اللي كان .الجارة جاها لعجب.أنا كنت فالبيت ديالي.غير سْمعتها تتعجب ، قلت ليها : راه الألوان تْقاضاوْ ليها.
_ لعجب هدا !
_ الألوان غاليين على داكْ الشّي دغيا يتقاضاو
مسكينة كانت مكلْخة: دابا فهمت علاشْ أم متولّي ضاعت ليها الكسوة ديالها ، كانت كتْبدّلْ كل نهار الكسوة ديالها وكتصبغها بالألوان
_ شفتي كتفهمي دغْيا
الجزء الثالث : حوميدي وشرارة
من بعد رحلنا لواحد الدار واستقرّينا فالطابق الأول .هاد العمارة فيها غير الموظفين.المهم ما كانشْ اللي يْجي لعندنا.
كانت الزوجة ديالي هي اللي محتاكْرة التلفزة .أنا فْديكْ لوقيتة كنت غيّرْت المستوى وكنت متابع بالتحاضير .على داك الشي ماكانشْ عندي الوقت باشْ نتفرّج على التلفزة.
واحد النهار زاروني 3 ديال الأساتذة باشْ زعما يْعزّيوْني فالوفاة ديال أخي جمال.
المهم دخلو للبيت .واحد فيهوم شاف التلفزة ونقْدر نقول ليكوم اول مرّة هاد خونا بالله يْشوف تلفزة بالألوان.
_ يااااااااا ألوان شْحالْ زينين !!!!!!!!!!!!!!!!!!!!!!!
الأستاد التاني ضارْ فصاحبو : الله يْخلّيكْ كولْ تْبارك الله
ولكن خونا بالله زاد بيّنْ باللي راه مبهوضْ : شوف على الألوان وهاد الطوموبيل ما تْكولْ غيرْ ديالْ مْبصّحْ
الاستاذ الثالث هو اللي تْدخَّلْ: سّي عبد الحميد الله يْخليك لا ما تطْفي هاد الصندوق.
فعلا طْفيتو وبْركنا نتكلمو على الموت والحياة والصبر عند الشدائد.المهم استافدت.
من بعد شْربنا القهوة وخْرجتْ معاهوم .
مع ديكْ التَّسْعة ديالْ الليل ، لْقيتْ لمرى ديالي كتسمع لرّاديو
_ واه ياكْ ما التلفزة كولور طلْعاتْ ليك فالرّاسْ
_ حْنا اللي يمكن طْلعنا ليها فالرّاسْ
_ كيفاشْ.ياكْ ما راها خاسْرة؟
_ إوى قْشعْها (اشعلها) أو شوف.
فعلا بعدما شعلتها : والو غير التْشاشْ
_ ياكْ كانت خدّامة .ياكْ ما المسخوطة حْرقْتيها؟
_ والله ما درتْ لْها والو .يا الله فاشْ شعلتها ما بانت ليا التصويرة وْأنا نطفيها
_ ما كاين مشكل غادي ندّيها غدّا اللي كيصلاحْهومْ.
كاين واحد كيصايبهوم جاي حْدى المدرسة ديالي ومن الصدف أن ولدو كيقرى عندي.موحال اللى غادي يتخلّصْ منّي.
خلّيتْها لو وقلت لو غادي نْدوزْ مع الطْناشْ باشْ ناخودها
فعلا غير خْرجت من الخدمة ، مْشيتْ لعندو
_ أمنْضْرى أمْعلّمْ ؟ لقيتي الدّيفو ؟
لمعلّم جاوبني جواب جْعلْني نْشكْ فراسي
_ التلفزة ديالك ما عندها والو .شوف هاهي خدّامة في أمان الله وحفظه
_ واه والله الى عندك الحق!
خْديتْ التلفزة ديالي ورجعْتْ للدّار.
بْرانْشيتْ (هدا من فعل brancher) الضّو .آشْ ضْهر ليكوم الى قلت ليكوم التلفزة ما بْغاتشْ تخدم .ديما ما يْبانْ غير التْشاشْ
لوْلية قالت لي : ياكْ ما دارْها بيكْ ؟
_ واشْ أنت حْماقيتي؟ راني بْعينيا شَفْتْ التلفزة خدّامة
_ اوى وعْلاشْ ما راهاشْ خدّامة ؟
_ الله أعلم .غادي نْسَوْلو.
فعلا مْشيتْ وحْكيتْ لو لي صار.قال لي : انا دابا عرفت المشكل ديالك : راه عندك السلك اللي يْدوز من لانْتينْ (l'antenne) لتلفزة مْقطّعْ فْشي بْلاصة.خاصّك تْصاوْبو
فالدار ما لْقيتْ حتى ديفو فالسلك.خْديتو مْعايا ودّيتو للمصلح ديال التلفزاتْ.
خونا بالله حتى هو حار لو لعجب : هاد السلك ما زال جديد وهاهو خدّام
_ اوى خويا هاد التلفزة آشْ عندها ؟
_ شوف رجّعها ليا ، ربما فالطريق تكون شي بولة تْحرقاتْ ليها
خوكم الحوميدي خْدى التلفزة للمحالْ.خونا بالله شْعلْها : راها خدّامة
_ صافي راه عندك الدّيفو فلانْطينْ
_ ما يمكنش راه عندي جديدْ
_ اوى خويا هاد التلفزة ديالك خاصّكْ تْزوّرْها راها قاستها العين.
دازت 3 ديال الأيام من داك الحدث المشؤوم كنت راجع من الخدمة ، لْقيتْ التلفزة خدّامة
_ تبارك الله كي درتي ليها باشْ خدْماتْ
_ والو غيرْ شْعلتها وهاهي خدّامة
_ سبحان الله العظيم !
_ هادي راها تقويسة عين
_ عندك الحق وراه قالها ليا صاحبي اللي يصلح التلفزات
من بعد تْأكّدْت باللي العين كاينة وهاد العين لعْيادو بالله شحالْ مشْرارة!!!!!!!!!!!!!!!!!!!!!!!!!!!!!!!
عودة لمذكرات معلم في الوسط الحضري مع ما تبقى من الحلقات
يوم الثلاثاء 21 يناير: حوميدي والخزانة المدرسية
يوم الأربعاء 22 يناير: حوميدي ومعلمة بنتو عفاف
يوم الخميس 23 يناير: حوميدي وصديقي السقرام نبيل (1)
يوم الجمعة 24 يناير: حوميدي وصديقي السقرام نبيل (2)
يوم السبت 25 يناير: حوميدي والإنتقال إلى وجدة (نهاية المذكرات)
|
|
|
|  |
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
455الشكر 
