قصة بالدارجة : مذكرات معلم فلعروبية - الصفحة 21 - منتديات الأستاذ التعليمية التربوية المغربية : فريق واحد لتعليم رائد

2013-12-19, 14:51

رقم المشاركة : 101

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

اقتباس:

المشاركة الأصلية كتبت بواسطة a.khouya

احداث متسلسلة ومشوقة ,تبارك الله عليك
على ذكر درس النقود .قال ليك واحد زوج معلمين,معاشرين واحد فيهم ديما زاوي زعما ماعندو فلوس.المعلم صاحبو عندو اناكر.هذا الاخير كان داير الدرس انتاع النقود ابغا زعما يستعمل الوراق المالية افين دايرهم في التقاشر غير ابغا يخرج مائة درهم من التقاشر اهو يوقف عليه صاحبو المزلوط.اهو اقول للتلاميذ...يقولون والله اعلم ان هناك ورقة مالية من فئة مائة درهم.زعما راه عمرو ما شافها.اضحك المزلوط اقال له اجبد اصاحبي قاليك الله اعلم.ايوا كيف جاتك هذي؟

لفلوس واعرين وشحال من واحدحْماق مين كترو عليه وشحال من واحد تْسطّى مين مشاو عليه
على كل حال هادي راها100 درهم اخويا واش بغيتي المزلوط يزْرمها لو (يخطفها بالوجدية)

هاك وحدة أخرى على لفلوس ولكن مع البراهش

هدو جوج تلاميذ دخلو مْعطْلين للمدرسة
سوّل الأستذ التلميذ الأول :
_ آش هاد التعطيلة أولدي
_ أستاذ طاحت لي 4 دريال
سوّل التلميذ الثاني :
_ وأنت أولدي علاش تعطّلتي ؟ واش كنتي كتْقلّب معاه على 4 دريال ؟
_ لا يا أستاذ كنت حاط عليها رجلي

التوقيع

2013-12-19, 18:18

رقم المشاركة : 102

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

دازت العطلة الصيفية شبه عادية الله مّا حدثان مهمّان (بالنسبة ليا) الأول وْقع أثناء التواجد ديالي بشاطئ المهدية.كنت مشيت رفقة العائلة باش نتبحْرو ونبدلو الجو.هناك تْلاقينا بواحد الجار قديم ديالنا.كان مع الزوجة ديالو.من خلال الهضْرة مْعه عرفنا بأنه حارس عام بواحد الاعدادية بوجدة.
الهضْرة جابت الهضرة ووصلنا للموضوع ديالي : زعما خوكم باغي ينتقل لوجدة.السيد الحارس العام فرّحنا وقال لينا : ساهلة ماهلة .
فهمنا بأن السيد يقدر يْنقّلني فرمشة عين.لكن ماشي دابا حيت راحنا فشهر غشت والادارات معروف عليها فهاد الشهر تكون عطلة والبيرمنونس(permanence) ماعندها ماتقضي.
على هاد الشي خونا بالله اتّافق معايا باش نْجي عندو فالبداية ديال شهر شتنبر وغادي يْطرّق هاد المسمار غير بمكالمة هاتفية.
الواليدة هي اللي فرحات بزاف .مسكينة ما خلّات ما شكراتهوم ودْعات معاهوم.الواليد عرض عليهوم ياكلو الحوت فواحد المطعم مختص فالأسماك.يمكن الى تْقامت عليه لعْراضة بغْسيل الفندق.
المهم رجعنا وكلنا فرحانين
الحدث الثاني هوالرابيل اللي جاني .الصراحة تقرقيبة كبيرة .حيت انا مرضي الوالدين أعطيت للواليد النص ديالها ودوّرت مع الواليدة والأخوات والاخوان واحد عمي حتى هو واللي بقا تكّسيت بيه .
فبداية شهر شتنبر مْشيت لوجدة وانا راشقة لي حيت غادي نخدم فوجدة. المهم مشيت عند خونا بالله بعدما شْريت حلويات .اوى الخوت ما خاصنيش ندخل بْيدّي خاويين
خونا بالله استقبلني فدارو .بعد الاسئلة على أحوال العائلة قدّم كاس عصير مع حلويات (ماشي للي جبت لو )
المشكل خونا بالله ما بغاش يدخل فالموضوع. انا غير صابر .شي وقيتة صافي : ديسيديتْ (قرّرْت).
_ أخي البكاي راني جيتك على الانتقال ديالي لوجدة
_ الانتقال ؟
_ راك كنت كولت لي غادي نّقْلك لوجدة
_ اسمح لي هاد شي صعيب ومن الفوق خاصو الوقت
_ ولكن ....
_ شوف أسي عبد الحميد خلّيلي المعلومات ديالك وانا غادي نْشوف.ما يْكون غير الخير ان شاء الله
سبحان الله العظيم السيد الحارس العام ما بقاش عاقل داك الشي اللي قال للواليد.عّرفتو كانت تبان لي نقْلب عليه الطابلة أو ندْفلْ عليه.
تصورو السيد ضَار فيا بْلا حْيا بْلا حشمة .
المهم لْعَنْت الشيطان(فالحقيقة لعنت جوج شْياطن هو وابليس) ومْشيت في حالاتي.
فين يمكن لي نمشي ؟ عند صحابي ؟ ما يمكنش حيت راني معصَّب.الحل هو نمشي عند خالي الحاج .هو ولمرى ديالو ينعسو بكري .هي هاديك ما كاينش اللي غادي يبرزطني.
لْغدْ ليه صونيت للواليد فالكوميسارية فين هو خدّام.اخْبرتو بالأمر اللي وقع.
الواليد بْحال الى زْعف ولكن ما قال لي والو من غير غادي يشوف شي ناس يمكن يقدرو يديرو شي حاجة فالانتقال ديالي.
جا ت 16 شتنبر اليوم ديال توقيع المحضر مْشيت لتاوريرت.كان عندنا اجتماع مع المدير.الاخوان كلهوم كانو حاضرين.السيد المدير افْتتح الاجتماع بالترحيب ومن بعد قْرى علينا التنظيم التربوي الجديد.التعيين ديالو كيف ما كنت قلت ليكوم ولّى فرعية سْميتها اولاد زايد.هاد الفرعية ماشي بعيدة على تاوريرت ، يا الله 15 كيلومتر.حتى هي يْدوز عليها الواد.
فالنهار التاني قرّرْت ندير شي دورة لعين المكان.مْشيت فالموطور.بعدما قطعت الواد وصلت لواحد القرية صغيرة .اول حاجة هي زيارة المدرسة.
المدرسة أحسن من ديال ولاد سليمان هادي لبْني ديالها واخّا قديم ولكن نقية وواسعة.زعما هادي ديال الاستعمار.شفت الحجرات بانو لي مْتيسْعين ونْقيّين.
شي شوية جا عندي واحد الرجل كبير ، باين عليه الوقار.قدّم لي نفسو باللي هو الحاج عبد الرحمان.
قال لي : واش أنت هو الاستاذ الجديد؟
مين عْرفْ باللي أنا هو، قال لي : تْفضَّلْ نْورّيك السكنى ديالك.
اتْبعتو .تْمشينا واحد ال200 متر ، وصلنا لواحد الدار فيها جوج بيوت وكوزينة ومْراحْ (ساحة)
دخلت وتْفرّجت على الدار.الصراحة عجباتني بزاف.
_ كي جتك الدار يا أستاذ؟
_ دار ما بيهاش
_ لكن راه الضو ماكينش
_ ما عْليهش
_ الماكلة غادي تْوصلك كل نهار فالطناش والنص مين تخرج من الخدمة وفلعشية مورا المغرب
_ الله يخْلف عليكوم
_ هاد النهار غادي تتغدّى مْعايا
_ ان شاء الله
لَغْدا عند الحاج عبد الرحمان كان رائع .كنت غير أنا وهو.ماكان حدْ معانا.
ليامات لْوالى كنت نمشي للمدرسة باش نستقبل التلاميذ وفلعشية نمشي نقصّر عند الحاج عبد الرحمن ونْباتْ عندو
الصراحة الحاج عبد الرحمان رجل ديال الخير
شي يوماينْ جا استاذ خور .هاد الاستذ كان عندو المستوى الاول والثاني وْانا كان عندي الثالث والرابع والخامس فرنسية.كان خاص يلتحق بينا الاستاذ ديال العربية. المهم الشهر تقريبا غادي يموت والاستاذ ما بانش.
واحد النهار جا عندنا المدير وقال لي : سّي عبد الحميد غادي تشد العربية والفرنسية
ردّيت عليه : ولكن بزاف عليا .التلامد هنا كْتارْ ماشي بْحال فأولاد سليمان
_ انا عارف وخاصك تقبل والا يمكن لك ترجع لأولاد سليمان
هادي هي الهضْرة اللي ما تعجبنيش
_ شوف أسّي الصغير (اسم المدير) انا غادي نبقى هنا .غادي نقرّي غير الفرنسية.بالنسبة للعربية ، شوف اللي يقرّيه لك هنا
المهم تْزايدنا فالهضرة.خونا بالله هدّدْني باش يكتب بيا.انا مْعاند أكتر منّو ، جاوبتو : اكتب وما تقصّرش
سبحان الله العظيم حدث مهم وقع واحد3 أيام مورا زيارة المدير.جا عندي معلم وقال لي سير دغيا لعند لمدير راه جاك انتقال
خوكم بالله سمح فكولشي لحوايج ديالو الحاجة اللي أدّى معاه هي الحبيبة ديالو اسمهان
ركبت فالموطور ومشيت ديريكت عند المدير
_ مبروك عليك اسّي عبد الحميد راهوم عينوك فتاوريرت
الصراحة بْحال الى تصْدمت شي شوية.خوكم كان عوّال يخدم في وجدة وما عمرو ما كان ينوي يخدم فتاوريرت
المهم شدّيت التعيين وقريتْ سْميَتْ المدرسة: مدرسة الرازي المختلطة.
من عجيب الصدف الادارة متْلاصقة معاها ما علي غير نْدير 10 ديال الخطوات وْانا راني فيها
مْشيت دخلت للمدرسة الجديدة.استقبلني واحد المدير شوية كبير فالسن.بعدما رحّب بيا قال لي راه عندك المستوى الأول هو اللي باقي
قْبلت وْأنا ما عارفش بأن هاد القسم فيه 55 تلميد وكولهوم مْكلْخين.حيت خوتنا فالله اختارو التلاميذ النجباء ورْماوْ لي الديشي(déchets).
هادي قصة أخرى ديال معلم لمدينة.ما غاديش نْزيدْ اكثر .فقط غادي نقول ليكوم اني أخبرت الواليد اللي قال لي : دابا تهنّيتي من تكرفيصْ لعروبية.اوى اجمع شوية لفلوس باش حتى انت أدّير دارك

نهاية القصة الأولى : مذكرات معلم فلعروبية

التوقيع

2013-12-19, 19:39

رقم المشاركة : 103

a.khouya

مراقب عام

إحصائية العضو

a.khouya غير متواجد حالياً

رد: قصة بالدارجة : مذكرات معلم فلعروبية

انتهت المحن بالانتقال الى المدينة.هل تدخل حارس العام هو السبب في هذا الانتقال المفاجئ؟اما قضية غربلة القسم من التلاميذ النجباء وترك الضعاف
للأستاذ الجديد,شيئ مشين, وقد عانيت منه كثيرا.الله اسامحهم.
شكرا اخي الحوميدي امتعتنا حقا بيومياتك.

آخر تعديل a.khouya يوم 2013-12-20 في 20:42.

2013-12-19, 21:20

رقم المشاركة : 104

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

اقتباس:

المشاركة الأصلية كتبت بواسطة a.khouya

انتهت المحن بالانتقال الى المدينة.هل تدخل حارس العام هو السبب في هذا الانتقال المفاجئ؟اما قضيت غربلة القسم من التلاميذ النجباء وترك الضعاف
للأستاذ الجديد,شيئ مشين, وقد عانيت منه كثيرا.الله اسامحهم.
شكرا اخي الحوميدي امتعتنا حقا بيومياتك.

لا يا أخي صاحبنا الحارس العام ما عندو حتى دخل في الانتقال ديالي.هاداك الواليد ديالي هو اللي دار واحد التدخل باش دخلت لتاوريرت
كولشي مكاتيب اخويا
شكرا لك اخي خويا على المتابعة
نلتقي ان شاء الله في مذكراتي بالمدينة
ياك راك معايا ؟

التوقيع