|
قصة بالدارجة : مذكرات معلم فلعروبية شحال من واحد ما يعرفش ايدير شي حاجة ولكن مسكين الله غالب يحشم .النتيجة ما عمرو ما يعرف يدير ديك الحاجة .تلقاه مسكين يقول فنفسو غادي يضحكو عليا الى عرفو باللي ما نعرفش ندير ديك الحاجة .بكل صراحة بحال هاد النوع من البشر يجيبها ديما فراسو ويبقى في نظري كامبو من الدرجة الأولى .المهم هادي واحد القصة في هاد الموضوع هاد القصة وقعات في بداية التمانيات.كنت ياالله فاش تخرّجت من مركز تكوين المعلّمين بالرباط.على كل حال كان التعيين ديالي في نواحي مدينة تاوريرت ، فواحد لعروبية اسميتها أولاد سليمان .خوكم ما عمرو ما أسمع بها.سوّلت شي ناس باش ينعتو لي كي غادي ندير باش نمشي ليها .واحد السيد الله يعمرها دار قال ليا : شوف أخويا أنت باينة عليك برّاني .الحل الوحيد هو تاخود طاكسي كورسة حتى لولاد سليمان .طبعا وصلني حتى لبلاصة الطاكسيات ومشى في حالو.قرّبت من واحد الشيفور كان يقرى واحد الجورنال قديم .هو في الحقيقة جوج وراقي ديال الجورنال .المهم سلّمت عليه وقلتلو : الله يخليك باغي نمشي لولاد سليمان .واش تبغي توصلني؟ شاف فيا مزيان .يمكن خونا بالله بحال الى بانْت لو كامبو .او هو يقول ليا : الطريق شوية بعيدة ومن الفوق مكرفصة حيت نصها بيست .انا صراحة ما نمشيش تمّا الى ماكانو عندي ست بلايص. جاوبتو ما كاين مشكل ، نقدر نخلص هاد الست بلايص.غير اوكان بشحال توصلني؟ فكر شي شوية وقال لي : أخويا عندي المخسور غادي نرجع خاوي . لا لا ما مسلكانيش _ واخا ، وباش تسلك شحال ؟ خونا بالله عجبو الحال أُو هو يقول ليا : دابا تكلمتي .أعطيني 100 درهم نوصلك حتى لباب المدرسة يتبع غدا إن شاء الله |
رد: قصة بالدارجة : مذكرات معلم فلعروبية إخواني الكرام خاصكوم تعرفو باللي 100 درهم ديال ديك لوقيتة عندها قيمة كبيرة .تصورو من وجدة لتاوريرت كان ثمن التذكرة فالكار 5 ديال الدراهم و20 سنتيم والمسافة 110 كيلومتر. هاديك هي خَمّمْتْ مزيان فالأجر اللي طالبو الشيفور .واه هاد المبلغ يوصلني لمراكش قالقطار ويمكن يشيط لي باش نشري كاسكروط او باش نتسارى فالطاكسي.خوكم حوميدي ما شي كامبو لهاد الدرجة باش دغيا يوافق . _ عرفتي آش يجيك مْليح ؟ _ نعم أسيدي آش حاب الخاطر .(خونا بالله يسحاب ليه غادي نتشطر معاه فالركبة ، بحال البرد يقدر يحيّد ليا واحد عشرين درهم) _ زيد كمّل قرايتك فالجورنال وأنا غادي ندير شي دورة ومن بعد غادي نرجع السيد عرف راسو غادي يزكل كْلِيَانْ(client de marque) مهم : _ أجي أصاحبي ...ماتكون غير على خاطرك .غادي نوصلك لولاد سليمان، أعطيني غير ستين درهم بان لي السيد طاح فالشبكة ولكن واخّا هاكدا ، خليتو ومشيت.قبل ما نبعد عليه جاوبتو : _ خليها 40 درهم أنا راجع ليك . المهم باش ما نخليهش يرد علي ، دغيا بعدت عليه.هاديك هي ، قلت مع راسي نمشي لشي قهوة نشرب شي كاس أتاي منعنع. فالشارع الرئيسي كاين بزاف ديال لقهاوي ، اختاريت وحدة فالشوكة كانو بكري يسميوها الكعدة.ريّحت فالكرسي .قرّب مني واحد البرهوش لابس طابلية ما عمرو ما شافت الماء والصابون. _ آش تشرب أسويدي ؟ شفت فيه : _ جيب لي شي براد أتاي منعنع او شي حاجة ما نكول _ عندنا أسويدي الخبز والكونفتير والزبدة _ مزيان ، ردّيت عليه، جيب لي طبسي كبير مشى الكارسون يجري وانا بقيت نشوف لكليان ديال القهوة.آه يا الخوت وانا لاحظ ما كاين غير بورزة. مشكلة هادي طحنا فقهوة لعروبية .وانا استاذ متعلم ماشي بلاصتي هادي.دغيا غادي يعرغوني برّاني.المهم قلت مع نفسي غير نفطر نخوي لبلاصة . على كل حال ، ياالله أنا نفطر وانا نشوف واحد السيد كان مورايا شاد الركنى داير يدّو على حنكو.راجل مَسْتيكي ( bien stiqué) مزيان .ما تكول عليه غير شي واحد من الطبقة الراقية.واحد لوقيتة شافني .بحال الى هز راسو ، خوكم رد عليه بابتسامة : _ تبارك الله على الأخ ، أجي تشرب معايا شي كاس أتاي. قرّب مني : _ الله يبارك فيك أخي وزاد قال لي : _ حتى أنت يظهر ماشي من هاد لبلاد _ عندك الحق أنا ماشي من بلاد بورزّة اضحك مسكين وقال ليا : _ أنا جيت من مكناس _ شاي الله أسيد التيجاني _ وأنت مين جيتي ؟ _ جيت من الرباط انبهر السيد: _ من العاصمة ؟ أشنو بغيتي من هاد القنت اللي البراني يبان فيه على بعد 100 كيلومتر؟ _ ما بغيتش أخويا ، هوما اللي بغاوني _ كيفاش أخويا ما مفهمتش _ وزارة التربية الوطنية صيفطاتني نقرّي فْشْي أعروبية ديال تاوريرت _ سبحان الله العظيم ...حتى أنا _ غير ما تكوليش صافطوك لولاد سليمان _ والله الى بَصَّح _ إوى آش درتي؟ مسكين شاف فيا بحال إلى بغا يبكي : _ ما عرفتش أخاي .من البارح وانا هنا .ما عرفتش آش ندير .حارت لي واش نرجع ونسمح فالوظيفة او ...؟ _ واه .وفين قضيتي الليلة _ فهادك لوطيل .أخويا الليل كامل وانا فايق _ يا ك ما قوة البشر؟ _ واش من بشر ؟ لفراش كلو بق وبرغوت .والمشكل خدى مني 10 ديال الدراهم بقيت نفكر واحد لوقيتة وانا نقول ليه: أجي نديرو شي دورة ونسولو.الوالدة الله يذكرها بخير ديما تقول ليا اللي ما عندو لسان ما يتلف.أجي نشوفو هاداك مول الحانوت .يمكن يفيدنا اقتربنا من الحانوت.كيفاش غادي نوصفولكم .هدا مولاه يبيع كلشي : لحليب ، الخبز ، ماطيشة ، اللحم ..كولشي حتى لكواش والصنادل هادا عندو سوبر مارشي (super marché) يعني هادا سابق الأروبيين.ماشي بعيد يكونو خداو منو الفكرة المهم قرّبت منو : _ السلام عليكم _ وعليكم السلام أسويدي . _ اسمح لي باغي نسولك : ناويين نمشيو لولاد سليمان شاف فينا بجوج وبدى يضحك : _ ياك ما انتوما لَمْيُوطا الجداد (les nouveaux maitres)؟ شفت فصاحبي ، حتى هو زاد أصفار مسكين: _ بحال داك الشي أخويا.ياك ما أنت المدير ؟ _ آش من مدير .المدير راه راه مْجَلْوَقْ فْشي قُنْتْ _ فين ؟ _ الله أعلم _ ما كاين مشكل .كو ليا لميوطا لقدام فين مشاو ؟ _ ياك انتوما اللي عارفين _ واخّا .كاين شي مركوب لولاد سليمان _ كاين ولكن ماشي اليوم.نهار السبت يجيو هنا الكاميونات ديال ولاد سليمان باش يتسوقو _ وقتاش يرجعو ؟ _ مع العاصر .مورا العاصر ما تلقى حتى كاميو يدور _ مزيان تبارك الله.شحال بعدى يدّيو لبلاصة _ 5 ديال الدراهم....لكن تركب اللور مع (حاشاكم ) لبهايم صاحبي الجديد صافي مسكين بقى غير شوية ويقدر يسكت ليه القلب.بدى يصرخ ويغوّت : _ مصيبة مصيبة كيفاش غادي نديرو.اليوم راحنا يا الله لخميس .باقي يومين.آش صبرني نْبات فداك لوطيل ؟ ما تقلقش كاين المركوب ولكن شوية غالي _ شحال زعما ؟ _ مية درهم _ بزاف ولكن قابل .ياالله نمشيو _ اصبر نمشي نجيب حويجي من لاكار خليتهوم قوسيني _ انا غادي نجيب حوايجي من لوطيل _ وهو كدلك يتبع غدا إن شاء الله |
رد: قصة بالدارجة : مذكرات معلم فلعروبية فالطريق ، قال لي صاحبي المكناسي باش نقلبو على طاكسي.لكن مع الأسف لمدينة صغيرة ما فيهاش الطاكسيات، لكن وجدنا اللي يسلكنا: واحد الولد عندو كروسة.غير شافنا او هو يجي لعندنا : _ بغيتو نوصلكوم شي حاجة للمحطة ؟ وانا نجاوبو : لا أولدي ولكن تجيبنا شي حوايج من محطة القطار. المهم مشينا وحْنا نتحدثو .قال لينا الحمال : راني سمعتكم كتكلمو على الطاكسيات .فتاوريرت كاين غير الطاكسيات البويض.واللي عندو الباكاج كاين أصحاب لكرارس. سَوْلو المكناسي : بشحال كتوصلو لحوايج ؟ ضحك الحمال وقال لينا : داك شي اللي كتّب الله مرة جوج دراهم ، مرة ستين ريال بعدما خديت حوايجي ، رجعنا للفندق باش صاحبي حتى هو ياخود الأمتعة ديالو.بقيت واقف مع الحمال والمكناسي دخل للوطيل.دازت واحد الربع ساعة وصاحبي جا لكن يبان عليه غضبان _ مالك أصاحبي ، ياك ما شفروك؟ _ الحمد لله مادّاولي والو ولكن مول لوطيل شفار كبير _ كيفاش ؟ _ قال لي خاصني نخلصو لَمْبَاتْ ديال اليوم وحتى ديال غدا _ اوى عندو الحق .على حقاش خاصك تديكلاري قبل الطناش.دابا راها الجوج ديال لعشية اقتنع دغيا صاحبي لكن باقي زعفان : _ يا الله نمشيو في حالاتنا لولاد سليمان ابتسمت وردّيت عليه : برّد دمك عندي ليك خبيَر زين.مول الطاكسي اللي غادي يوصلنا نقّص لي من الثمان.اطلب مني غير 60 درهم وانا خليتها لو ف40 درهم. صاحبي فرح : باز أخاي .أنا اللي نخلص ما تضرب هَمْ _ لا لا نتقاسمو الركبا أنت وانا.ياك زعما غادي نديرو عشرة وحدة _ عندك الحق هاديك هي وصلنا لبلاصة الطاكسيات.خونا بالله ما بقاش يقرى الجورنال.كان حاط احداه برّاد أتاي وطبسي فيه حرشة فوق منها السمن ولعسل.اللي شاف هاد الشيفور يكول باللي كان صايم 10 أيام. المهم سلّمت عليه : _ السلام عليكم .هاني جيت رد عليا : _ مرحبا زيد تفضل .الخير موجود _ معايا صاحبي _ حتى هو يزيد ياكول صاحبي ما بغاش : _ انا باغي نمشي لولاد سليمان _ اصبر عليا غير ناكول . ضحك الشيفور وقال لي : ضبّرتي على راسك.ما عندي ما يتسالك.غادي نتخلص منكم غير 50 درهم.واش قابلين ؟ _ نعم قابلين هو يقول لينا : عندي ليكوم واحد الطلب : بغيتكم تكتبو لي واحد لبرية انا الاول اللي تعجّبت : ياك زعما تعرف تقرا؟ _ ما نعرف لا قراية لا كتابة _ لكن شفتك كتقرى الجورنال عاود ضحك خونا بالله : _ خوك غير باغي يلعبها كبير باش ما يبانش قدّام لكليان ما قاريش ردّيت عليه ما كاين موشكيل .انا اللي غادي نكتبها لك. يا الله غير قول لي آش باغي تكتب _ بارك الله فيك أسويدي المهم كتبتلو الرسالة واعطيتهالو .مسكين خداها وبقى يسلّم عليها _ دابا غادي تشري واحد جوى ديال لبرية .خاصك تعطيني العنوان ديال عمّك. جاب الله كنا قراب من الحانوت .هاديك هي دغيا كتبت لو العنوان _ دابا خاصك تشري التامبر وترميها فصندوق البريد هاد المرة ضحك وقال لي : _ هادي نفهم فيها .اليوم مشى الحال .غدّا ان شاء الله نمشي لابوست. يا الله الشرفا نتوكلو على الله باش نوصلو لولاد سليمان قبل ما يطيح الليل. ركبنا فالطاكسي بعدما درنا حوايجنا فالكوفر ديال الطاكسي. الشيفور داز على البومبة ديال ليصانص وقال لبومبيست : دير واحد 10 يطرو ديال المازوت الى ما خفتش نكدب كان التمان دياتلو ما يتعدّاش جوج دراهم المهم خرجنا من تاوريرت شادّين طريق جرسيف بحال الى غاديين لفاس.بعد 17 كيلومتر ديال الطريق ، وصلنا لوحد القرية سميتها سيدي شافي.لكن ما دخلناس للقرية .الشيفور مشى مع واحد البيست .تمّا قال لينا : دابا بدات الطريق الواعرة |
رد: قصة بالدارجة : مذكرات معلم فلعروبية فعلا البيست اللي دخلنا ليها بيست واش من بيست.تصورو كلها حْفاري ومْعمرة حْجر.لدرجة أننا دَرْنا كْروفيزون .واحد لوقيتة بان ليا الشيفور بْحال الى نادم على هاد السفرة.قلت لو : ياك ما ندمتي أسويدي ؟ شاف فيا مسكين ، قال لي : فالحقيقة راني خايف الى شي رويضة أخرى تقولها. قلت لو : ما تقلقش وتوكّل على الله غادي نوصلو فالأمان. المهم دازت واحد الساعة بحال ما يكتبو الأدباء عصيبة شفنا فيها لعجب.شي مرات بحال تيبان ليا تهنا فالطريق.من ما لاحظت أيضا مسالك كثيرة خارجة من الطريق لكبيرة.باينة كتوصَّل لْشي بْلاصة.الشيفور اخبرني أن هاد المسالك كتوصل كل وحدة فيهم لْشي دار. لوقيتة اللي وصلنا لدوار اولاد سلسمان كانت الظلمة طاحت.هاد الدوار عبارة عن مساكن متفرقة وما تقشع والو الا بعض النقيطات ديال الضّو ، مما يعني أن خوتنا كيستعملو الشمع او القناديل.واحد لوقيتة سمعنا نباح الكلاب وحنا كنقتاربو من المدرسة.موراها بشي شوية ، سمعنا شي ناس يغوتو : شكون انتوما؟ رد عليهوم الشيفور : هادو لميوطا . قرّب منا واحد منهوم وقال لينا : مرحبا بالمعلمين ديالنا.اوى راكو تعطلتو علينا. خونا بالله عيّط على اصحابو وقال ليهم : يا الله جيبو لعشا لميوطا وما تنساوش أتاي. شفت فصاحبي وقلت لو : عندك السْوارتْ ؟ رد علي : ما عندي سوارت وأنت ؟ قلت لو : كون كانو عندي كاع ما نْسَوْلكش. يمكن سمعنا شي حد من الجماعة .هاديك هي اخبرنا بأن السوارت راهم عند لمقدم وغادي يجيبوهوم فالحال بواسطة قنديل قدرت نشوف المدرسة : بانو لي ثلاثة ديال البنايات وحدة فيهم قديمة بزاف على حقاش مبنية بْلَحْنِيَة.شي واحد من السكان اخبرني بأن المعلمين كانو يسكنو فيها ولكن فهاد لوقيتة راها شوية مخربة وخاصها الاصلاح.بالنسبة للأقسام راهم مجهزين من كل شي.قلت لو : فيهم الضو ؟ ضحك وقال ليا : الضو لقيناه لراسنا بعدا.اسويدي ماكاين غير الشمع والقنديل. باش نبين لو بأني حتى انا عشت فلعروبية قلت لو : ما كاين مشكيل حتى حنا غير مْخيْمين . المهم فتحو القسم وجابو لعشا وأتاي .كلينا غير أنا وصاحبي ، هوما غير يتفرجو فينا .شي مرات كانو تيْسَْولونا وصاحبي كان يجاوبهوم.انا صراحة ماشي عزيز عليا بحال هاد لفضول حيت من طبعي ما عمرو ما سوّلت شي واحد بحال هاد الأسئلة الشخصية.شي وقيتة واحد فيهم قال ليا : شفنا غير صاحبك اللي تيتكلّم.أنت بعدا مين من لخّوت ردّيت عليه وانا كنشرب أتاي : من ليهود .شافو فيا كولهوم : من ليهووووووووود قال ليا واحد فيهم : واش راك تهدر بنيتك ؟ قلتلو : داخلنا عليك بالله واش ما بايناش عليا مغرابي؟ مالكوم اصاحبي مع هاد العنصرية القبلية ؟ واش غي حنا رماونا عندوكم بقيتو معانا فالتحقيقات؟ الشاف ديالهوم قرّب مني وقال لي: اسمح لي أسويدي ما تدّيهاش منّا من قلة الصواب.غير اوكان قالو لينا بأن واحد من المعلمين جاي من الرباط .واش هاد الشي بصّاح؟ قلت لو : انا اللي من الرباط .واش كاين شي موشكيل؟ رد بالزربة : لا أسويدي بالعكس حنا فرحانين مين جانا واحد من العاصمة. تصورو هاد الكلمة خدمات علينا بزاف.هي هاديك قالو لينا : هاد الليلة راكو ضيوفنا .غادي تباتو عندي أنا الشيخ قدور معززين مكرّمين. آه ، نسيت نتكلم ليكوم على الشيفور .فديك لوقيتة اللي وصلنا فيها قال لي : خويا اعطيني رزقي انا راجع دابا لتاوريرت. ماكان عليا الا دفعت لو الثمن اللي اتفقنا عليه، لكن زدت اعطيتو عشرة ديال الدراهم : هادي حق الديرانجمو ديالك.شدها مني وركب فالطاكسي ديالو ومشى في حالاتو.اللي بان ليا ان هاد الشيفور ما عندوش مع هاد القوم أو ربما هوما اللي ما عندهومش معاه. على كل حال ، مشينا عند الشيخ قدور.دار واش من دار عندو ولكن خسارة ما فيهاش الضو.طبعا لاحظتها عليه او هو يقول لينا : غادي نشري ان شاء الله موتور ديال المازوط باش يكون عندي الضو بحال لمدينة.ما قالش ليا وقتاش وعرفت أن الشيخ يقدر يموت قبل ما يوصلو الضو. من قضية الضيافة ، تهلاو فينا مزيان .جابو لينا شي كْواش باقيين فميكتهوم يعني جْداد. يتبع غدا إن شاء الله |
رد: قصة بالدارجة : مذكرات معلم فلعروبية فقنا فالصباح بكري.كانت يا الله الساعة الستّة.لعروبية معروفين بلفياق بكري بلا ما يشريوه بالذهب (ههههه).جا الحاج قدّور وقال لينا : صباح الخير سيادنا لميوطا.ياك أنعستو مزيان؟ ما بردتوش هاد الليل؟ شَفْت فيه واحد الشوفا واعرة، بحال الى باغي نضّارب معاه.قلت لو بما معناه : هاد كلمة لميوطا ما كتعجبنيش او فيها شوية ديال الاحتقار.عنداك يتسحاب ليك حنا ضياف وتبقى تسبنا. مول الدار صفارمسكين لدرجة أنه مابقاتش نقطة الدم تْبان فوجهو.مسكين تلفات ليه الهدرة على حقاش ما كانش ينتظر بحال هاد الرد.بغيت نقول ليكم أنني فالشباب ديالي كنت ديريكت مع البشر : كنت نقول الرأي ديالي بصراحة وبدون اختيار الكلمات المناسبة.كنت أريد أن أكون عفويا بمعنى الكلمة.حاليا ما بقيتش تنْفاعل دغيا وبعض المرات نْدير عين ميكة . المهم الحاج قدّور شاف في وانا كنبتسم .هي هاديك بدا يضحك وقال ليا : اسمح لينا يا أستاذ حنا موالفين ديما تنعيطو على المعلمين لميوطا ولكن أنت جاينا من الرباط .أنت أستاذ كبير وغادي نتهالّاو فيك مزيان.... قاطعتو : ربّي هو اللي يتهلّى.انا اللي باغي الأساتذة كولهوم كيف كيف .ما بغيتش نسمع كلمة لميوطا من اليوم ردّ علي : ما يكون غير خاطرك جابو لينا لما وتوضّينا وصلّينا الصبح.من بعد جابو لينا الطبْلة فيها صينية ديال أتاي معها شي طباسل ديال السمن ولعسل فوق من واحد لحرشة ياكول فيها شعب. افطرنا مزيان انا وصديقي علي وحمدنا الله وقلنا لمول الدار : لله يخلف. ثم طلبنا منو السماح للذهاب الى المدرسة لاستقبال التلاميذ. فالنهار تبان المدرسة بحال شي فاكُوَات ديال التْران بالعربية عربات القطار .بانو التلاميذ يكونو شي عشرين واحد : بنات وولاد.غير شافونا ، جاو لعندنا يجريو باس يبوسو لينا يدّينا.صاحبي علي كان يرد على كل بوسة فاليد : استغفر الله العظيم ، استغفر الله العظيم. أنا فقط اكتفيت بمصافحتهم بعد ما قلت ليهم : شوفو اوليداتي سلّمو باليد بحال الناس لكبار. المهم وزعنا التلاميذ بيناتنا هو خْدى التلاميذ ديال التحضيري والقسم الثاني وانا خْديت باقي التلاميذ.دخَّلْنا كل فوج للقسم .هاديك هي سجّلت الأسماء ديالهوم وديال الآباء ديالهوم والاسم ديال خوتهوم .المهم سجلت كل المعلومات المتعلقة بهم.من بعد كتبت لكل واحد اللائحة ديال الكتب والأدوات المدرسية اللي خاصو يشريها .من بعد اختبرتهوم فالقراية ، لقيتهوم ربنا خلقتنا : والو انيقشيعابل يعني هاد لبراهش ما قراو تقريبا والو . مشيت عند صاحبي ، قلت لو : _ اوى منضْرى كيدايرين التلاميذ اللي عندك ؟ _ وا لعجب هادو ما عمرو ما قراو. _ ولكن أصاحبي هادو يا الله فاش داخلين للمدرسة _ عنداك الحق .غادي نبدّي معاهم من لَوَّل _ داك الشي اللي غادي نْدير حتى أنا رجعت للقسم ديالي .كان عدد التلاميذ عندي 12 فيهم 5 ديال لبنات. قلت ليهم : اليوم الجمعة ما كاينش لقراية ولكن ما فيها باس اليوما جيت غير باش نتعرّف عليكم.غدا ان شاء الله تمشيو لتاوريرت باش تشريو الأدوات والكتب ويوم الإثنين تبدى الدراسة. يا الله راكوم محرّين التلاميذ خرجو يجريو شاد كل واحد فيهم الورقة اللي عطيت لو . رجعت عند صاحبي : اوى اصاحبي واش ما باغيش تتفاك مع هاد البزاقيل (لبراهش) ؟ جاوبني : خويا الساعة راها يا الله العشرة ديال الصباح.الوقت عندنا حتى لطناش قلت لو : خرّج التلاميذ ،نشوفو آش نديرو _ عنداك الحق .أنّيت خاصنا نْخمْلو ديك البيت بش نسكنو فيها _ أخويا أسكن فيه أنت أنا بعدى غادي نسْطالي فالقسم ديالي حيت مهبّب وداخلو الضو _ الضو ؟ _ الضو ديال الشمس أ صاحبي يتبع غدا إن شاء الله |
| الساعة الآن 07:48 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd