قصة بالدارجة : مذكرات معلم فلعروبية - الصفحة 19 - منتديات الأستاذ التعليمية التربوية المغربية : فريق واحد لتعليم رائد

2013-12-16, 18:45

رقم المشاركة : 91

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

بْقينا فْلبْلاصة ديالنا تقريبا جوج ديال السْوايع.لكن مامْشاتْشْ خْسارة.الحاجة اللّولى كْلينا حتى شْبعنا .خويا ميمون يمكن الى كارنيفور (carnivore) ، كل ما نْحسّو بالجوع يْدومانْدي لبْروشيتْ.خوكم ديما تابعو اللي بْغاها حتى أنا باغيها.شي وقيتة السَّرباي قال لينا : أخوتْنا راه لبروشيت تْقاضى شوفو شي حاجة أخرى.ميمون الجن ماشي من العاكْزين جاوبو : اوى بْغينا لكبدة.
الصراحة عندو (كنتكلّم على السرْباي)الزْهَرْ ، فْديك لوْقيتة جاتْ البركانية.مْشاتْ ديريكت عند السرباي .الظاهرْ خْلعْها .شافت فينا ، فالحقيقة راها خْنْزْراتْ فينا .شي شْوية اعطات للسيد جوج وْراقي ديال 100 درهم.بحال الى فهمتْ بأن ما زال خاصها تْزيدلو ولكن الله غالب
المهم جات لعَنْدنا وقالت لميمون : أخويا واشْ داركوم ما
يْوكْلوكْش ؟
ضحك ميمون وردّْ عليها : يا أختي أنا كتَفْتحْ لي الشهية مين نْسافر .كونْ نجْبر نكول حتى لحجَرْ
_ الله يستر .تاكولْ كي الغول ، كاعْ ما بايناشْ عليك
شافت فيا وانت أخويا اللي طايح عليا كي لبْروصي ؟
_ أنا غير مشجِّعْ
_ تبارك الله جوج بحالك غادي يْسيزيوْ المطعم كامل
المهم ضحْكات وقالت لينا : سَمحو ليا ماكنتش مصْوابة معكوم.يا الله نمشيو للدّار
خْرجنا من المطعم وتمشّينا واحد 100 مترو.شافت فميمون وقالت لو : يمكن ناخْدو طاكسي أحسن
ميمون مسكين الرجل اللي باقا صْحيحة دغيا عْياتْ : واه
أختي راني عْييتْ
هي هاديك ارْكبنا فطاكسي أحمر .تقريبا شي نصْ ساعة ديال الطريق .هد خيْتْنا ساكنة فلْقُنْت الخالي ديال كازا.
ميمون بْحالْ الى دخلو الخوف.هي هاديك قال لي غير بَشْوية باش ما تسمعناشْ: خويا حميد .عالم الله فين غادي تدّينا.يمكن غادي تكْريسينا(تقتلنا).
جاوبتو : ما تْخافش .الى حْماضتْ الدعوة راه عندنا النيميرو (الرقم) ديال الطاكسي ومن الفوق ياك راه شافنا مول المطعم والسرْبايْ.
_ عندك الحق
شي شوية وقفات الطاكسي فواحد الزنقة مظْلامة.نْزلنا .خلْصات مول الطاكسي .وقفات حْدى باب ديال العمارة وقالت لينا : اسمعو يا دوك المساخيط ما تْحشْمونيش مع عمّي.راني تْكلَّمْتْ لو عليكوم .انتوما جيتو من بركان تْقلْبو على الخدمة وانا كنعرفكوم حيت انتوما جيران ديالنا قْدامْ.
ميمون هو للي ردْ عليها ما تقلْقيش .انا وخويا حميد فاهمين
قبل ما ندخلو ، سوَّلْتها : سَمْحي لي الله يخَلّيك .حْنا من المفروض نعَّرْفوك ، ياكْ ؟
_ هادي باينة .ياك ما خويا أنت كامبو؟
_ يمكن أختي على حقّاش لا أنا لا ميمون نَعَّرفو سْميْتك
شافت فيا وهي منداهْشة : اسمح لي أخويا هادي عندك فيها ...أنا سْميْتي زبيدة
_ زوجة هارون الرشيد ، تْبارك الله
شافت زبيدة فميمون ، بْحال الى زعما تقولّو : ياك ما صاحبك زانْزان(أحمق)
حتى ميمون ما فاهم والو .
قالت لي : ما فْهمْتكش أخويا
_ هدا هارون الرشيد خليفة عباسي كان متزوج بزبيدة
_ ايه أخويا أنت قاري
_ نْعامْ أختي : قاري ونْقَرّي
_ زعما أنت معلّم ؟
_ معلّم ومْعَلَّمْ
_ اوى اسْمح لي الى قلت لك كامبو
_ ما كاين مشكل ، راه بعدا كالْها واحد الفيلسوف بْكري
_ أشنو قال أخويا حميد ؟
_ قال الكامبو مينْ يْشوف راسو فْلَمْرايا يَسْحابْ لو راه يتْكلَّمْ مع كانبو
زبيدة التزْمت السْكات ، ميمون الجن هو اللي زاد قال لي : هاد الفيلسوف كي سْميْتو ؟
_ سْميْتو سيدي بَلْيوط
زبيدة شافت فيا بْحال الى ما فاهمة والو .المهم دخلنا واطْلعنا الدروج.الحمد لله ميمون راه عندو الزْهر .غير الطبقة الخامسة .يا الله وْصلْنا ميمون طاح فالعتبة ديال الباب.
اللي حلْ لينا الباب عمْها.واحد بولحية يمكن الى عندو ديك التْمانين عام.رَحَّبْ بينا.دخَّلْنا للصالون.بْقيتْ أنا وميمون غير بوحْديتنا تقريبا شي نصْ ساعة ، لأن زبيدة دغيا خرجات .عمْها دْخلْ لواحد البيت وسَدْ على راسو.
ميمون زاد خاف : اوى خويا حميد زبيدة سمْحات فينا ومْشات .عالم الله فين طحْنا
_ ما تْخافش .ياك هداك غير شيباني .ما غاديش نْحيرو مْعاه.
المهم أحْضي راسك وكون موجود الى وقعت شي حاجة
_ واه خوك ما عندو ما ينفعك حتى الى هْرب غادي يْديرْ لك المشاكل
_ ما تخافش وتْوكّلْ على الله
هي هاديك ، ربي ديما مع الناس اللي يتوكلو عليه.شي شْوية دخْلو جوج شُبّان عندهوم ما بين 18 و20 عام.غير شافونا ، رَحبو بينا وقالو لينا : باينا أنْتوما جيران زبيدة ؟
رد عليهوم ميمون : نْعام أخويا ونْتوما أوْلاد عمْها ، ياكْ ؟
لكْبير فيهم جاوبنا : أنا عبد القادر(*) وهدا خويا عبد الباسط (*)حْنا من بركان ورْحلنا هادي فايتا 15 عام .انا ما نعقلْ والو على بركان
_ بركان راه زعما عاصمة ...العاصمة ديال لكْليمانْتين
_ تبارك الله
بْقينا نتْكلْمو على بركان وعلى مَّاليهْ.دازت تقريبا ساعة .جات زبيدة وْحطّو لعْشا.كْلينا وشْبعنا.
المهم قالت لينا زبيدة : واش جاكوم النعاس حيت شافت ميمون بْحال الى كان يْغَمَّضْ عينيه
جاوبناها باللي فعلا راحنا عيّانين
قالت لينا تَبْعوني .مْشات للبيت اللي كان فيها عمْها وحلّأتْها وقالت لينا : دخْلو هنا تْنَعسو .هاهو لفراش .
سدّات الباب .
ميمون حيت كان فيه لعيا دغيا طاح فالسَدّاري اللي حْداه ونْعَسْ.
خوكم الحوميدي ما جاهش النعاس .عْرفتو عْلاش ؟ خونا بالله عمْ زبيدة موتور ديال الشخير ، يمكن الى ديزيل (diezel). الحاجة التانية ، الضّو ما كاينش .عْييتْ نْشوف ما قْشَعْتْ والو.الحاجة التالتة مْشيتْ نْحلْ الباب لْقيتْها مشْدودة بالساروت.
دار غريبة يا لخّوت واصْحابها حتى هوما.شي شوية سْمعت خوتنا بالله كتضحك هي ووْلاد عمها .إيه ناشطين لك مع ريوسْهوم.
شي شوية الشيباني بْحال الى بْغى يْجيف : الشخير ديالو تْبَدّلْ .الصراحة خْلَعْني..قلْتْ مع راسي : صافي خيْنا يقدر يعْكُلْها (يْموت) واللي فالدار يَتَّهْمونا باللي حْنا اللي قتلناه.
مْشيتْ عند ميمون وهَزّيتو باش يْفيق.والو ميمون كي الحجرة يتْكَرْكبْ ، بْلا ما يْفيقْ.
المهم بْقيت عاسْ شي جوج سْوايع.شي شْوية زبيدة مْشات تنْعس ، اولاد عمْها طْفاو الضو ديال البيت .حتى هوما نَعْسو.
من بعد ما تسمع غير لَمّاتر (les moteurs)ديال الشخير : الشيباني من جهة معاه ميمون ومن الجهة لخْرى لبْراكْنة بْجوجهوم.
الى بْقيت هاكدا غادي نتْصَطّى.وْأنا تْجيني فكرة واعرة كنت قْريتها فواحد المجلة وهي ان بنادم اللي يشْخر ما عليك سوى تْحط لو أصبَاع يَديه فالما.دغْيا يسْكت .
الحمد لله زبيدة كانت اعطاتنا قرعة ديال الما مع كاس.
جرَّبت العملية مع الشيبوخ (الشيباني) فْلَبْلاصْ سْكَتْ.حتى مع ميمون نجْحت
بقى لي غير دوك الجوج شْخيرهوم كان شوية بْعيد عليا ، يعني نقدر ننعس
شي شوية كنت نحسب الخرفان (compter les moutons)، هي هديك طَحْت كاوْ
الصباح ميمون هو اللي فاق بكري .هو اللي فيّقْني : نوض أخويا حميد واش ولّيتي شْكارة ؟
زبيدة حتى هي فاقت مع النبّوري.حلّتْ علينا الباب وقالت لينا : صباح الخير.
حْنا نشَّربو القهوة ، اعتدرت لينا : سَمْحو لي الى سَدّيت عليكوم الباب .على حقّاش ما كنتش تايقة فيكوم
_ حتى يا أختي ما نعستش مزيان على ودّاش ما كنتش تايق فيكوم
_ اوى بجوج عندنا الحق
_ يمكن أختي ولكن كولشي من راس ميمون الجن
_ مالك خويا حميد أنا واشتا (أشنو) درْت
_ لا والو أنت بركاني وأنا بركاني (يعني باركة علي)

يتبع غدا إن شاء الله

التوقيع

2013-12-16, 20:08

رقم المشاركة : 92

a.khouya

مراقب عام

إحصائية العضو

a.khouya غير متواجد حالياً

رد: قصة بالدارجة : مذكرات معلم فلعروبية

مغامر,لو كنت مكانك لقضيت ليلتي في كراج علال لأن محطة اولاد زيان لاتزال غير موجودة.ياك شاد معاك الخط بعدا اخويا الحميدي.؟

2013-12-16, 20:49

رقم المشاركة : 93

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

اقتباس:

المشاركة الأصلية كتبت بواسطة a.khouya

معايا فالخط cinq sur cinq
فعلا أخي في تلك الفترة لم يكن لمحطة اولاد زيان وجود
اوى تبارك الله عليك ، كما نقول بالوجدية "راكْ تمّا"
ههههه

التوقيع

2013-12-16, 21:00

رقم المشاركة : 94

أم علاء وعمر

المديرة القانـونية

إحصائية العضو

أم علاء وعمر غير متواجد حالياً

رد: قصة بالدارجة : مذكرات معلم فلعروبية

أخي الحوميدي
بما انك راجع بالذاكرة لمايزيد عن العشرين عاما
لو وقع معك نفس الموقف الاخير حاليا
واش تييييق ؟؟؟؟؟
بااااااااااااااااااااااااااز اخويا بااااااااااااااز
أنا غي نقرا و خفت عليكم
هههههههههههههههه

تحيتي و التقدير الكبير

التوقيع

اللهم بارك لي في أولادي ووفقهم لطاعتك واهديهم وخذ بأيديهم إليك

وارزقهم النجاح والفلاح فى الدنيا والآخرة وأولاد المسلمين أجمعين

ربي أرزق ذريتي صحبة الأخياروخصال الأطهار وتوكل الأطيار

ربي بلغني فيهم غاية أمالي ومناي وارزقني برهم بحولك وقوتك

ربي متعني ببرهم في حياتي وأسعدني بدعائهم بعد مماتي

2013-12-16, 21:52

رقم المشاركة : 95

houmidi59

بروفســــــــور

إحصائية العضو

houmidi59 غير متواجد حالياً

رد: قصة بالدارجة : مذكرات معلم فلعروبية

اقتباس:

المشاركة الأصلية كتبت بواسطة أم علاء وعمر

أبدا يا أختي أم علاء وعمر ، ما يمكنش أنْتيق.هادي باينة.عرفتي علاش ؟ لوقيتة اللي كنت نحكي فيها كنت باقي شاب وطائش لأن الشاب يحب المغامرة من طبعه وانا صراحة كنت مغامر
تصوري يا أم علاء انا كنت جريء بزاف .فالعام الاول اللي دخلت نقرّي فلمدينة ، جاني مفتش ولْقاني جالس على الكرسي.طبعا ما عجبوش الحال وبْدى ينكر علي بديك الهدرة المعروفة عند المفتشين.
عرفتي أشنو ردّيت عليه؟
" شوف اداك بْنادم غادي تمشي تْبعّد والّا غدي نعطيك شي سلْخة حْدى التلاميذ
اقسم لك بالله العظيم الى هرب عند المدير
آش عندو يْدير ؟ والو
مشى ولكن من بعد جا فتشني وجمّد لي النقطة
بالطبع اضحكت عليه وقلت لو العام الجاي غادي ناخود النقطة وبالسيف عليك.
فعلا العام اللي موراه قرّيت الفرنسية حيت داك العام كنت شادْ العربية غير مؤقتا
المفتش اللي فتشني اعطاني نقطة خدمات علي فايت 4 سنوات يعني زادني جوج نقط على اللي خاص تكون عندي
هذا من فضل الله والحمد لله
شكر لك أختي ام علاء على اهتمامك وانا أقول لك : اطمئني لا تقلقي على الانسان الذي ينوي الخير ويتسلّح بالإيمان وعندو ثقة كبيرة فاللي خلقو
ليلتك مباركة سعيدة

التوقيع


	للتوصل بجديد الموقع أدخل بريدك الإلكتروني ثم فعل اشتراكك من علبة رسائلك :