|
رد: وَ ماااالك مكلخ ، واش أنت إنسان ؟ أين الردود؟ أين التعليقات؟ واقيلا ما عجبكومش الموضوع !!!!!!!! المهم سأتوقف عن إضافة أي مقالات أخرى أو أي صور حتى أرى تفاعلكم... و الله لقد تعبت في تأليف الموضوع و جمع مواده الخامة. شكرا لك أيها الفارس "كاكا" على التشجيع.... |
رد: وَ ماااالك مكلخ ، واش أنت إنسان ؟ إوا شنو دابا كتوجدنا للانتقال من التعبيع للتهرنيط.؟ وداخل دخلة مجهدة، ماعندي مانتسالك ،العدة متكاملة(صور+المواضيع من الداخل ومن الخارج) تكول خدام مع:cnn |
رد: وَ ماااالك مكلخ ، واش أنت إنسان ؟ إيوا هذا هو الإنتقال الديموقراطي السلس للتهرنيط اختي الزرقاء... كيفاش انا داخل مجهد !!! واقيلا نتي لي جديدة هنا أو مازال ما حصلش ليك الشرف تتعرفي على ملك الجان... المهم ما عليناش، بعد التشجيع و المشاركة ديالكوم سأتابع.... ********************************* الموضوع الخامس: حماركوم ف الإدارة المغربية * للإشارة فقط فهو موضوع منقول و ليس من تأليفي، و يعبر عن رأي كاتبه فقط، و قد نقلته لكم بهدف الدعابة فقط http://4.bp.blogspot.com/_jdHXYGuBQs...1600/16639.gif أن تضطرك ظروفك للذهاب إلى إدارة مغربية فتلك لعمري معاناة أكفس من جر عربة مليئة بصناديق القوق والخرشوف من سوق الجملة إلى غاية حانوت الخضار سي البهلول ، واخا تكون باغي غير عقد إزدياد يحمقوك عليه قبل ما تاخذو ، دخل هنا. .خرج من هنا ..سير لهيه ، تسنا يجي مول الستيلو و السْـنية ، أرا هاد الورقة، سير جيب لخرى ، والجميل أنه في إدراتنا تصادفك طرائف ومستملحات غريبة لا يمكن أن تصادفها سوى ف المغريب ، بحال مثلا آخر مرة مشيت للمقاطعة نجيب شي ورقة ومنين دخلت مشيت عند المصلحة المعنية ولقيت الموظفين مريحين مع راسهم شي شاد جورنان ، شي تيقشب مع صاحبو ، وحدة كتنصب الكاميلة ديالها ، وملّي طلبت منهم باش يقضيو لي غراضي قالو لي اسي لحمار را حنا دايريين إضراب ليوم وغدا واخا شفتينا هنا ، وَ سير بدل ساعة بأخرى ، إيوا شتو على إضراب هاذي هي ديال هداك اللي قاليه " أجيني لابس عريان و حْضرني و أنت غايب " ، ومن غير هادي كاينة واحد الورقة ما كاينة حتى شي بلاد من بلاد العباد كتطلبها من غير بلادنا وهي شهادة الحياة الفردية والجماعية ، كتجيبها من المقاطعة وواخا تمشي ليها برجليك وتوقف قدامهم بكمارتك وكتافك لعراض غادي يقولو ليك سير أسي لحمار جيب الشهود باش نعرفوك ونتأكدوا راك حي و عاد نصايبو ليك شهادة الحياة ، أما إذا متي فعلاً كيطلبو لولادك بالاضافة لوثائق أخرى عند التصريح بالوفاة الإدلاء ببطاقة الناخب ديالك ، بصراحة ما عرفتش علاش !؟ ، واخا النص ديال لمغاربة ما مقيدينش ف الانتخابات وما كيصوتوش أصلا من غير إيلا ما ترشح شي حمار بحالي . إيو الحاصول يلا كنتي زربان وباغي مصالحك تقضى بالزربة خاصك تدير قصبة و فراسها علام قرفي و لا زرقي وجيب معاك الغياطة و لا الدقة المراكشية... و الهدية نجرها ليك أنا ف الكروصة ديالي كادو من عندي ، وديك الساعة كلشي يولي ضاحك ف وجهك و حاجتك مقضية ، أما إذا كنتي زربان وجيبك مثقوب فعليك بصبر الحمير ما دامت ليست لديك قوة الخيول أسي أغيول. |
رد: وَ ماااالك مكلخ ، واش أنت إنسان ؟ الموضوع السادس: حماركوم و السيركولاسيون * للإشارة فقط فهو موضوع منقول و ليس من تأليفي، و يعبر عن رأي كاتبه فقط، و قد نقلته لكم بهدف الدعابة فقط http://4.bp.blogspot.com/_jdHXYGuBQs...600/anepi0.jpg صعيب تسيركيلي ف الطرقان ديال المغريب ، كلشي زربان والعياذ بالله ، ماكاين لا صبر لا تيساع ف الخاطر ، ما تسمع غير طووووط طووووط طووووط ، و كل واحد باغي يوصل غير هو بوحدو الله يجعل السلامة والعافية ، الزحامات بزاف فين ما مشيتي هالطوبيسات ها لكاميونات هالطوموبيلات ها مالين البشكليطات ها مالين لمّاطر ، وزادو كملوها علينا بكرارص الشينوة حتى هوما ، مصيبة وصافي ، انا بعدا ما بقيتش نقدر نخرج بلا كمامة تقهرت بالدخاخن والثلوث ، و يا ويـــلك تدوز من حدا شي طوبيس ولا كاميو و هو تيديماري والله حتى يبوشي ليك الجعابي ديال مناخرك . ف الطرقان ديالنا كتلقى جوج أصناف ديال الحديد ، لحديد ديال الدراوش ولحديد ديال هادوك الواعرين ، الدرويش غالبا كتلقاه سايق شي إير ديزويت تيفرق فيها الخبز ولا شي 507 تيخطف بيها لبلايص وهاد الصنف هو وكانتو ف الطريق يقدر يرحمك يقدر يضرب والديك حتى تشوف النجوم ف النهار ، أما الصنف الثاني من أصحاب الكروش والألبة الشعار ديالو هو اللارحمة وخصوصا مع قبيلة الحمير بحالي ، و يلا كانت عندك بشكليط ودزتي قدامو ولا سببتي ف التعطيل ديالو ما يخلي فيك غير اللي نساه وما تسمع منو غير " اتفو ..وسختو هاد لبلاد أ الحمير " هادي يلا ما نزلش و صرفقك ولا جاب ليك البوليس... ويلا كانت الشتا طايحة والواد حامل و ضاية عوا وأم ربيع ناعسين ف الشارع فديك الساعة نصحك غير هز معاك شامبان و صابونة لحجرة حيث راك مدوش مدوش بغيتي ولا كرهتي. ف المغريب كلشي تيعرف يسوق ، واللي ركبتي معاه تيبان ليك هو الواعر ف السوقان ، الطريق كلها وهو يفوح عليك ، ويسب اللي قدامو ، وناري يلا كنتي عاد خديتي لبيرمي ومعلق التسعين اللور كتولي محقور بيناتهم يجيو حتال حداك وينزلوا الجاج ويسبوك وما تقدرش تهدر حيث غادي يصحاب ليك راهم قدام وواعرين عليك وما غادي يكون الحق إلا معاهم. عرفتي يلا كنتي براني على شي مدينة وبغيتي تشد طاكسي يديك لشي بلاصة ما عارفهاش فين جات ، وركبتي مع مول الطاكسي وقلتيها ليه ، واخا تكون ديك لبلاصة حدا وذنيك غادي يمشي يضرب بيك دورة عاد يجيبك ليها ويحسب عليك 30 درهم ، وملي تنزل من عندو غادي يضحك ويقول " الله يجعل الغفلة بين مول الطاكسي ولحمار " واحد العام كنت غادي مسافر لبني عمار بنواحي مدينة زرهون باش نشارك ف مسابقة ملك جمال الحمير، ومن طبيعة الحال كان خاصني نشد كار حيث المسافة بعيدة ، وحيث المحطة الطرقية بعيدة عليا، مشيت وقفت غير ف جنب الطريق بحالي بحال خوتي المواطنين كنتسناو الكار يدوز ، إيوا الحاصول ملي وقف وطلعنا كان صحابلي غادي نلقى بلاصة فين نجلس بحال شي حمار محترم ما كانش صحابلي غادي نمشي واقف" سيرشارج" ، المهم قلت شي باس ما كان عالله غير نوصل ، ولكن الاهانة ما وقفتش عند هاد الحد حيث ملي قربنا نوصلو لنقطة تفتيش الجدارمية بدا الكريسون تيغوت علينا وطلب منا نهبطو ريوسنا ونجلسو ف الارض حتى يدوز الكار من "الباراج" ، إيوا زوينة هادي نخلص بلاصتي ونمشي مدلول بحال شي شفار ، وملي نهقت على حقي قالو لي يلا ما عجبك حال نهبطو والديك سير شد طاكسي كورصة. إيوا شتو على حكرة لقاوني حمار و بغاو يركبو عليَ..أما كون كان شي نمر كو را ناض الشيفور وعطاه بلاصتو ، ولكن هدا هو المغريب ..الدنيا بلوجوه والاخرة بالزراوط.. |
رد: وَ ماااالك مكلخ ، واش أنت إنسان ؟ لا زلت أنتظر تعليقاتكم حتى اتابع..... |
| الساعة الآن 16:17 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd