حوت بلادي
حار لساني من خيورات لسواحل
فبلادي حوت متنوع عدادو واحل
حوت بلغ من لعداد وحير بشكلو
وزاد طراوه زاهيه ترضي واكلو
نبدا بيه سردين وكله لكل الناس
دراوش وميسورين كول بلا قياس
و فبحور بلادي لذه شهوه طري
تواتيه الشوايه لمن يشريه بكري
يتبعو بني عمو لشطون شاطني
سميه لانشوبه لحمو راه يفتني
ويلا وقفت عل لشرن اسمعني
شويه وقليه وتذوق وافهمني
والكبايلا كثير من الناس حكروها
قالو عليها فهامات كعما فهموها
يلا تعرف جيبها طريه تبرق
بحال النقره مع خضورا تزرق
عطرها بكثير لحامض مقيومه
بزعتر وفلافل تصير مضخومه
أو قليها ساعة ما تجيبها برقه
وحطها مجفف زيتها على ورقه
ساعتها تعرفها يا من حقرتيها
وتغير عليها كلام البارح ذيعتيه
وتمتع ليك يا ذواق بلحم البارجو
عرفوه وقدر قيمتو مع الشارجو
و لا تنسى حبيبتك لحبيبه حلامه
وروبيو عزيز يفتن ناس بنهامه
ومعزه وسمطه ناسبها القليان
ودورادا تقلى بزيت حميان
وطيب الفرخ بقوام مقوم
تاكل مويكله مبرعة منعم
فطاجين وضعو من بعد السلخ
يحلالك السنور يتسمى الفرخ
وحط تحتو قصب ضد لحراق
وما نسال الفاخر زادو التعراق
واش من صوالي بنواع تهبل
نكهه على نكهه تنسي وتخبل
واراك من بوري بحري وسركانه
وطون تقوت بيه ، يرفع ليك الكانه
واياك تدوز لعزيزه الكوربينه
قدروها لبحاره بكل تحنينه
واحيانا عل الميرنا وما فعلات
غلات على الدراوش وتمنعات
يعاينو وقت ترخاص ويشريوها
شريان همزه ولو مره يقليوها
ولا تهمل من لسماك حرتوكه
نسيانها حقره كبيره وهتوكه
ورخويات بكل شكل من لشكال
كالامار وروطال وصفها تطوال
ومن فواكه لسواحل لفريده
طعوم واقوات حلات لذيذه
القيمرون لوز الحوت فالقاع
وسلطانو لكبير روايال الباع
ولانكوست ما تقدر تشريه
تصور معاه ، وانت مشهيه
وزيد وزيد من اشكال لسماكي
وفواكه لبحور وخير الشباكي
هذا حوت بلادي وخيورها
نفخر بيه وندافع على بحورها
إبداع : محمد الزاكي – سلا
(Tagnaouite )
فعاليات صيف 2011 على منتديات الأستاذ :
مسابقة استوقفتني آية
|
ورشة : نحو مفهوم أمثل للزواج
2012-02-24, 16:05
حوت بلادي 
