|
امعايط يا امعايط مالك مسند الحايط امعايط يا امعايط النهار وما طال مسند الحايط ولى عند اهلو واحبابو شايط قالوا والله اعلم تقطع ليه الخيط فواحد النهار ركبوه على حمار ساقوه مكبل بالسلاسل يا حضار لزاوية بويا عمر الصكع يغوت ربي اللي خلقو ها العار يا ناس آجيوا عتقوا لاحوه فواحد الغار بقى المسكين مبهوض ومحتار واش احبابي هاذو اللي لاحوني؟ ولا أنا تالف فالدار واش اخوتي هاذو اللي باعوني؟ ولا أنا مجنون يا حضار واش كع وليت هكذا مشرار؟ آش درت لهاذ الناس؟ ياك أنا غير امعايط واحل فراسي وفحالي ديما محتاس مانهش مانش مانجبد احنش ناكل غير اللي على اخوتي شاط ماندي اخبار ما انجيب اخبار والنحس ديما عليا حاط داخل سوق راسي يا ناسي وما هامني أمر الدوار ياك عايش ديما جنب الحايط؟ وحافظ لجميع الأسرار كنشوف ناس تريش فناس وناس حاظية شي ناس ونقول فراسي ماكاين باس هذا هو حال الناس بقيت ديما ساكت محتاس ما ندخل سواق ماندير بواق كلامي فخاطري مخزون وراسي فالرمل مدفون نهار يا ناس نطق لساني بالجهار: يا احبابي اموالين الدار بغيت من حقي جوج قطار امعايط ولى مجنون ديما مريض معفون هو الشيطان الملعون ورثي ضاع يا ناس بين الخوت جاني صداع الراس واش أنا نموت؟ قالوا ناس زمان: يلا فاتك الكار شد فالمزرار يا هاذ الخوت شحال عندكم من امعايط؟ الورث يديه فيوم الريح ويبقى امعايط خرجوا خوكم من ذاك الغار فكوا سلاسلو لا تخليوه محتار دمكم يا الخوت دم مشروك لا تخليوا الناس فاخباركم تلوك ولا تخليوا امعايط ديما متروك راه يلا زرعتوا الشوك ماتحصدوا غير زريعتو ويلا زرعتوا الخير تلقاوا غلتو عند الغير |
رد: امعايط يا امعايط مالك مسند الحايط كلام منظوم كالعقد الفريد قصة معايط تكرر يوميا في كل زمان وفي كل مكان... بات زجلك يكتسي خصائص تميزه عن غيره. |
رد: امعايط يا امعايط مالك مسند الحايط اقتباس:
وردك أخي أحمد منظوم و زين باهي ومكمول: الجاه يلا جاه سيدنا محمد ياالله معاه جاه العالي فينكم يا الزغرتات؟ سعدت بردك أخي حقيقة ماشي مجاملة. فعلا هاذ لمعايط كاين فين ما مشيتي. يلا احنا عندنا بويا عمر هوما عندهم مصحات على شكل asiles psychiatriques واسمحوا لي على استخدام الفرنسية في منتدانا الذي اختار العربية لغة للخطاب .هذا الاختيار الذي أحترمه جدا لأنني من المحبين للغتنا الضادية الجميلة. زجلياتي المتواضعة كلها لكم أحبائي, وإن كنت قد تميزت فالتميز فقط لإرضائكم . دمت بالجوار أخي أحمد أمين المغربي حتى النخاع. |
رد: امعايط يا امعايط مالك مسند الحايط انت فينا شخص محبوب وجميل ههههه العززززززززززز يا ابا العز. |
رد: امعايط يا امعايط مالك مسند الحايط اقتباس:
الله يعزك يا أحمدنا العزيز علينا. حريفات العز وطيور العز ودار العز كلهم ضاحكين ولاعبين وناشطين معاكم يا ناس العز عاش العز عاش منتدى العز عاش أعضاء العز اللي أنت واحد منهم يا أحمد أمين. انت هو لبرو أي الأول. هههههههههه! عقلتي على لبرو؟قديييييييييييييييييييييييييييييييمة. ابحث معي أخي عن الدو أي الثاني. أضحكك الله أخي. العز ماكاين غير العز. |
| الساعة الآن 22:02 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd