المشاركة الأصلية كتبت بواسطة علاُم لقبيلة
الدينا غريبة وانت غريب فيها
تعيش حياتك ومهما تعيش ما تخلد فيها
لابد ما يجي يوم وتخليها
وكاع لي جمعتيها ما غادي ديها
هادي هي الدنيا
دنيا البارح ودنيا اليوم ودنيا ديال غدا
دنيا البارح عاش بنادم فيها سارح
ودنيا اليوم تزادت فيها المحان والهموم
أما دنيا غدا محال واش تكون فيها اللذة
الدنيا مثلها مثل الثعلب
اليوم يمرح مع الدجاج
وغدا عليه يتقلب
الدنيا مثلها مثل الديب
داخل للقطيع مغطي بكسات الخرفان
فيه صفات المكر والخديعة وأصلو كديديب
هادي دنيا مكونة من حروف
حل عينيك معايا وشوف
راه كل حرف فيها معروف
بادية بألِفْ السُكون
الى تبعتي طيرقو فالظلام تعيش مغبون
تابعهاه المثنية اللي هي اللام
وما بعد الغبينة غير لسقام
وحرف الدال تصفى بالغربال
وتعزلات الذرية من عظم الكبال
وتزادت علة على علة وعطات فدان العلال
وحرف النون المسكون
شنو الفرق بين العاقل والمجنون
وبجوج فاضحين سر بنادم المخزون
وقبل اما تسالي الدنيا كانت حروفها من اليا
وانا قبل ما نسالي نتمنى من ربي يحقق رجايا
ويشيع النور بعد ما تضلمات سمايا
ويتحقق مرادنا وتكمل الغايا
وكيف قالو زمان اللخر مدخر
سلات الدنيا بألف المد
لازمك يا انسان على نفسك تعتمد
قبل ما الباب عليك يتسد
راه ما ينفع لا نفاق ولا حسد
ما ينفع غير المعقول والجد
علام لقبيلة