جزلية جميلة يا علام و تحمل في طياتها حزنا دفينا عن واقعنا المرير وعن ما آل إليه قطاعنا من تقصير .
تقصير أصبح معه المعلم قاب قوسين أو أدنى من الجنون ,بل هناك من جن فعلا وبشهادة أطباء نفسانيين.ومنهم من حامل الدقة فوق كتافو وغاذي مع الحملة .تأخذه تارة إلى اليمين ثم إلى الشمال تارة أخرى.سيحة الزربة جيت نطل تقطع طلي.
أشكرك أخي العلام على موضوعك الذي نعيشه لحظة لحظة و نعاني في صمت.لكن لابد لليل أن ينجلي و لا بد للقيد أن ينكسر.
دمت معطاءاً ومتواجدا.

آجي يا خويا العلام
نجاوبك بطريز الكلام
جاوبتك قبل بكلام عام
حيث كنت شوية زربان

زمان العز هذا يا علام
غير لبارح كنت معلم
ليوم وليت أستاذ
ترقية بلا فلوس يا علام
غير بجرة قلم
ترقية سكتات شلا افَام
فرحوا ليها شلا قومان

يلا بغيتي يا علام
اسمع معايا الكلام
ونفركعوا هاذ الرمان
كلمة معلم يا علام
ليها عز وشان
أما كلمة أستاذ
عند شلا ناس
مقرونة بالتشلهيب
ورديخ البيبان
فيها شلا ضواسا
شوكها بحال الضربان

خليني غير معلم
بغيت نبقى مزيان
مانفتح ضواسا
ما نردخ بيبان

نوضوا يا ذوك العربان
وصل بينا الغيس للركبان
آجي يا زين القبيلة يا علام
نحيدوا علينا شلا تخمام
ويمشي الضباب ويزول الغمام
ونغنيوا يالالي يالالي
مع سرب الحمام

ليك وحشة يا علام
أنا فرحان بيك
وبغزيلك للكلام
مزينك يا علام بكلام
حريفاتي تبعث ليك أحلى سلام
وطيور العز تغني ليك أحلى أنغام