منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

اقتباس:

المشاركة الأصلية كتبت بواسطة ابو العز

آجي يا خويا العلام
نجاوبك بطريز الكلام
جاوبتك قبل بكلام عام
حيث كنت شوية زربان

زمان العز هذا يا علام
غير لبارح كنت معلم
ليوم وليت أستاذ
ترقية بلا فلوس يا علام
غير بجرة قلم
ترقية سكتات شلا افَام
فرحوا ليها شلا قومان

يلا بغيتي يا علام
اسمع معايا الكلام
ونفركعوا هاذ الرمان
كلمة معلم يا علام
ليها عز وشان
أما كلمة أستاذ
عند شلا ناس
مقرونة بالتشلهيب
ورديخ البيبان
فيها شلا ضواسا
شوكها بحال الضربان

خليني غير معلم
بغيت نبقى مزيان
مانفتح ضواسا
ما نردخ بيبان

نوضوا يا ذوك العربان
وصل بينا الغيس للركبان
آجي يا زين القبيلة يا علام
نحيدوا علينا شلا تخمام
ويمشي الضباب ويزول الغمام
ونغنيوا يالالي يالالي
مع سرب الحمام

ليك وحشة يا علام
أنا فرحان بيك
وبغزيلك للكلام
مزينك يا علام بكلام
حريفاتي تبعث ليك أحلى سلام
وطيور العز تغني ليك أحلى أنغام

مرحبا بكلامك المطروز
مرحبا بسلامك يا بو العزوز
معاك الكعدة شحال حلات
وشمس الليل راها ضوات
فهمات المغزى من كلامك وروات
وبلسان النور حتى هي دوات
نطقت تكلمت وحكات
وقالت ليك هاد الأبيات:

لا تيأس من مرارة الزمان
ولا تعيّش قلبك ف الكروب
ربي ما يسد باب حتى يحل بيبان
والشمس لابد ترجع بعد الغروب
هذا لينا ما هو إلا امتحان
إوا وياك وياك والرسوب

أبيات قليلة والموضون راه باين
النفس العليلة ما تجيب غير المحاين
والنفس الذليلة خليلة للعفاين
والنفس الكلِّيلة صابرة وتساين
وانت نفسك مثيلة فحالها ما كاين
اجعل الصبر لك وسيلة تربح التالية
أما البالية ما عندك عليها لاين

تحياتي لك يا خليل الحرف المنغوم
لابد ينزل الغيت مهما طال الشوم
والله يبعد علينا لسقام والهموم
ويخلي شملنا مع الأحباب ديما ملموم