الفقر يشطح ليا وانا نغني ليه - منتديات الأستاذ التعليمية التربوية المغربية : فريق واحد لتعليم رائد

2014-11-09, 22:34

رقم المشاركة : 1

ابو العز

نائب مدير الأفكار والمشاريع الأستاذية

إحصائية العضو

ابو العز غير متواجد حالياً

الفقر يشطح ليا وانا نغني ليه

الفقر يشطح ليا وانا نغني ليه

نبكي أنا على حقوقي

اللي ضاعت بين يديا

جمد الدم فعروقي

وبرد الما فركابيا

شكون يداوي حروقي

ويبرّد الصهد اللي فيا

ندافع أنا على حقوقي

واخا الزمان خوا بيا

نبكي أنا على ذوقي

اللي تلفوه شي ناس ليا

ضاع ليا راس الخيط

وضيعت حياتي نقلب عليه

وليت فهاذ الدنيا شايط

بوهالي لعقل هارب ليه

وليت ك ذاك اللي مسند الحايط

وخايف شي نهار يطيح عليه

غير لبارح كنت راجل مزيان

جميع الناس ترحب بيه

واليوم وليت عيان

كلشي يتغامز عليه

طاح ليا ياناس الميزان

لاتديروا ياناس الثقة فيه

لبحر حدايا وانا عطشان

لبحر ماشي ليا

لبحر ديال مواليه

الغلة تفرقات وانا جيعان

لفقر يغني ليا

وانا نشطح ليه

واكل الغلة يجود علينا

غير باللي شاط عليه

والبوهالي بحالي

على قد لحافو يمد رجليه

اللي دارها بيديه يفكها بسنّيه

وانوض يابنادم تحزم

ويكون حزامك من حديد

ناخذو خيرنا اللي ادّاوه غيرنا

واخا هاذ الخير مايواتيه

نوض يابنادم تْرَجّْل

هذا راه عهد جديد

عضّْ بسنانك

نهش بنيابك

وحقك ماتسامح فيه

لاتبقى يابنادم

عويناتك يشوفو

وفمك محلول

وخيرك ...

شي قومان تتمَرْمْدْ فيه

تتسنى فيهم يروفوا

وانت عايش بينهم مذلول

وخيرك ...

داروا ليه طرقان

وانت جالس تتحسر عليه

بوكريشة

يهز عليك فْنيوفو

وانت ملجّْم مشلول

يعوم فخيرك عومان

وانت جالس تصفق ليه

الواكل الغلّة

ياكل خيرك

ويتصدق عليك بجْلوفو

وانت سيفك مغلول

تنش فالذبان

وتطلب الله يسمح ليه

بقلم : ابو العز

: منتديات الأستاذ التعليمية التربوية المغربية : فريق واحد لتعليم رائد https://www.profvb.com/vb/showthread.php?p=785485

التوقيع

أينكم يا غايبين ؟؟؟؟
آش بيكم دارت لقدار مابان ليكم أثر ولا خبروا بيكم البشارة

آخر تعديل ابو العز يوم 2015-05-22 في 15:27.

2014-12-02, 09:05

رقم المشاركة : 2