منتديات الأستاذ التعليمية التربوية المغربية : فريق واحد لتعليم رائد

الحلقة رقم 4 : سكران ويعرف باب قِسْمو(الجزء الأول)

في هذه الحلقة سنعود من جديد إلى حياتي الشخصية. كيف ما سبق قلت ليكوم خاصني نرحل باش ما كاين. الحمد لله لَوْجيبة جابها الله .واحد الصبحية يا الله فاش خارج تْلاقيتْ مع واحد المعلم سْميتو محمود.ماعمرو ما شفتو حيت هو كيخدم فالفوج الثاني.المهم يمكن أسمع بلخبر ديال المفتش ، جا باش يعرف الحقيقة لأنّه على حساب ما قال لي : المعلم الجديد (اللي هو أنا) ضْربْ المفتش بروسية وْخَلّى نيفو يْسيل بالدم.وراه المفتش مسكين فالسبيطار اُو زيدْ أُو زيد...المهم شي هدَرة خاوية دْيال الأفلام الهندية.
حْكيت لْخونا بالله اللي وْقع بالضّبط.سّي محمود واخّا هَكْدا ما تيَّقْش.ماشي شغلي
لكلام جابْ لكلام وجات الهدْرة على لَكرى .خونا بالله فرّحني مين قال لي باللي هو ساكن فالدار ديال الواليد غير بوحدو وراه ماكرهش يزيد معاه شي واحد يسكن معاه حيت هو ما تيْفيقْش بكري.فْلَبْلاصْ قلت لو انا معاك .مين سوّلتو على لكْرى ، قال لي : بَشْحال كنت كاري ؟
جاوبتو : ب200 درهم .
قال لي : هي اللي غادي تعطيني كل شهر
الدرّي يْبان معقول وْحدّو حدْ راسو.من الفوق كْريم ، قال لي : راه باقي للشهر 10 أيام .أجي تسكن بْلا ما تْخلّص.
جْبَرْتْها من الجِنَّةِ والناس .دغيا قلت لو : غدّا هاني عندك
فْديكْ لعشية ، مْشيتْ جْمعتْ حوايجي .شافني البكاي :
_ اوى خويا واش ناوي تْفارقنا ؟
_ واه أسّي البكاي.ما نقْدرشْ نْبقى معاكوم
_ عْلاش أخويا ؟ واشْ كاينْ شي مشكل ؟
_ نْعامْ .مشكل البيض
_ كيفاش البيض ؟
_ الطبيب قال لي ما خاصنيش ناكول البيض
_ اوى ما تاكلوشْ
_ عندك الحق ولكن انتوما كتاكلوه
_ واشْ دخَّلْنا حْنا مْعاك ؟
كان خاصني نْفَسَّرْ لو باش يقتنع: اللي كاين هو انا ما باغيشْ نجمع لفلوس.انا باغي نتْبرّع مع راسي
_ البكاي ضحك : زعْما حْنا قرْزازة(سقرامين)
_ اسمح لي أخويا البكاي انتوما خاصكوم تدخلو للتاريخ.
بالطبع ، ما بغيتش نزيد معاه فالنقاش.مْشيت في حالاتي للْبيتْ ديالي باش نجمع حْوايجي.
الغد ليه مع ديك العشرة مْشيت للدار الجديدة بعدما أعطاني محمود الساروت وبيّن لي الموقع ديالها.فعلا الَخّوت دار واش من دار.فيها البالكون وفالطابق الأول.لبيوت كاين 3 .كاين الحمّام فيه البانْيو والكوزينة كبيرة تقدر تلعب فيها ماتش ديال الكورة.كاين السطح كبير وواسع
المهم دار مشمسة وتسْتاهل حتى 500 درهم.
االكوزينة مْجهزة حيت فيها الثلاجة والبوطاكاز (المطبخ) وماشينة الصابون.خونا بالله راه بورْجْوا (غني) مع راسو
المهم هدا شجعني باش نْدير لغدا.اللي كان هوأني مْشيت وشْريتْ نصْ كيلو دجاج ، كيلو بْطاطا وشوية بْصل وماطيشة .
اطْبخت ليها واحد المرميطة دايزها لكلام .باش تزيد بنّة على بنّة زدْتْ ليها الزيتون وضامة البنّة كنور
تْغدّيت مع ديك الطْناش .الباقي خلّيتو فالطنجرة وكتبت ورقة لْخونا بالله باللي هدا راه حقو من لَغْدا
هاديك لعشية بحال الى جاني النعاس .يمكن راكو عرفتو علاش ؟ لّا ما شي حيت زَنَّدْتها بطاطا ودجاج .على ودّاش شْربت
اللبن .
مين تشرب اللبن وتضْربْ فيك الشمس راه تْجيب لك النعاس.داك الشي اللي درت فالقسم.
من بعد فقت كانت الساعة الجوج .يعني ما باقي والو باش نخّرْجو
العلاقة مع خونا بالله نقدر نقول باللي مرّاتْ بتْلاتَى ديال المراحل.
المرحلة الاولى دامت تقريبا شهر.سّي محمود كان يْبان عاقل ودريويش .حيت كنا نتلاقاو غير فلعشية مورا المغرب .كان هو اللي يتكلف بْلَعشا.هوخاطيهْ الطْياب (الطبخ) حيت كان يمشي عند واحد صاحبو ويجيب طنجرة كل مرّة واشْ فيها .مرّة الحمّص بالكرعين ، مرة لحريرة ، شي مرّات مْريقة باللحم وحتى شي مرّات أخرين يْجيب كسْكْسو.من بعد قال لي هادي سْميَّتْها "خرْدولة"
خونا بالله وكّال كبير يصلاح يسكنن مع بركاش (الله يرحمو)
المهم كنّا نْرِيْحوفالبيت التالت باش نْوجدوالتحاضير أو نْصَحّوالدفاتر .فالحقيقة انا اللي كنت نْدير هاد الشي ، هو كان غير يحكي لي المغامرات ديالو.
المرحلة التانية ، خونا بالله ما بقاش يْبان فلعشية واخّا أنا جاتني مزيانة حيت كنت كنْديرْ الخدمة ديالي بلا ما يْبرزطني .ولكن اكتشفت انّ خونا بالله يدخل للدار مع ديك العشرة ديال الليل يتْمايل وجْهو أحْمر.سّي محمود كان سكران بالمعقول.غير يشوفني يبْدى يضحك ويكول شي كلام ما عندو حتى معنى.كنت نْوصلو للبيت ديالو ونقولو : نْعس اخويا محمود راك باين خابطها .
مسكين كان بعدا يسمع .هاديك هي يْطيح كاوْ.
فالصباح نمشي للخدمة وخونا بالله باقي ناعس ، نرجع من الخدمة ما زال خيْنا ناعس .مين نْفيْقو يْنوضْ كي المدعور ويمشي هاكدا بلا ما يفطر.ولكن من بعد قالو لي شي ناس (بركاكة صْحاح) باللي خونا بالله كيفطر فالقسم.
المرحلة التالثة صافي السيد أدْصَرْ، بْدى يْجيبْ صْحابو للدار باش يْقَصْرو.كنت واحد لوقيتة نكْلسْ معاهوم وكنْشوف فهاد البشر اللي بارك يْعَمَّر كرشو بْلحْرام.
العجيب فالأمر كنت نْشوفهوم يْرِيْحوعلى شكل دائرة .يْجي اللّوّل يْعَمَّر كاس ديال الرّوج (كاس صغير )
يشربو فْجُغْمة وحْدة.من بعد يْدوّزْ القرعة والكاس للتاني.هداك التاني يْديرْ بْحال اللّوّل .من بعد تمشي للتالت وهكدا حتى يْدوزو كاملين.ما كاين لا هدْرة لاكلام ، غير مرّة مرّة شي واحد يضحك ، يتبعوه اصحابو بلا ما يعرفو أعلاش راه ضْحك
بان لي هاد السكايرية ما فيهوم خير.هي هاديك بْقيت نمشي لْبيتي ونْسَدْ على راسي
خونا بالله عاقْ باللي ما عْجبنيش الحال.بقى شي مرّات يسكر برّا .
المهم واحد النهار جاب واحد السيد يخدم فالبنك الشعبي .السيد باين عليه محترام بزاف ولكن زايد فيها شي شوية ديال النخوة والبُخْ.تصورو مين سلَّمت عليه ، دغيا مشى يغسل يدّيه بالما والصابون.زعما راه فيا الميكروبات.هادا باينا كون شاف لمْرامط ديال خونا بالله غادي يقدر يسكت ليه القلب.
واخّا هكدا بعدا هادا خاطيه الشراب.
المهم شوية شوية بْقينا أنا ويّاه صْحاب .كنا كنخرجونتعشاو برّا اِمّا اللحم مفور او الكفتة
حتى هوما عجبوش المنظر ديال خونا بالله والسكايرية اللي كان يْجيب والمشكل زادوفيها حتى لبْنات
صافي هدا باغي يْشوّهنا .صاحبي الجديد (سميتو البركة) قال لي انا ما نقدرش نسكن مع هاد السكايري .السمعة ديالي راها في خطر .راه البنك الى ساقو لي لخبار يقدرو يجْريوْ علي من الخدمة
المهم قلت لو :
غير صْبر حتى لآخر الشهر راه كاينة واحد الدار زينة لكْرى ديالها غير 500درهم.
فعلا بْقينا صابرين ولكن انا واحد الحاجة بْقيت نْديرها مع خيْنا.النهار اللي يسْكرْ فيه، فْداك الصباح ما نرجعش للدار باش نْفيْقو، نمشي نيشان عند صاحبي مول الحانوت ونبقى عندو حتى لْديكْ الطناش عاد نرجع للدار غير باش نتوضى ونصلّي الظْهور.شي خاطرات نلقاه ، يا الله فاش فاق.زعما خونا باغي يْلومني : حْشومة عليك خويا حميد .علاش ما فيَّقتْنيش؟
انا نْرد عليه : واش أخويا أنا لمْرى ديالك ؟
ما يلقى ما يْرد
بالنسبة للمدرسة المدير صافي طْلع لو الدم معى خيْنا وجاب لو واحد النهار المفتش.
فلوقيتة اللي جا المفتش ، لْقاه يفطر فالقسم.المشكل ماشي لفطور : ما لقى عندولامدكرة يومية لا تحاضير وحتى الدفاتر ماشي مْصَحّين.
خونا بالله بْدى يبْكي ويرغب.المفتش شاف من حالو وقالو غادي نرجع ليك بعد أسبوع وخاصّك تكون واجد.
هداك الاسبوع خونا بالله زاد دُوزَا فالنشاط والتقصار.فالنهار اللي يْجي المفتش دار شهادة طبية واعطاهالي باش نْوصّلها للمدير

يتبع الجزء الثاني غدا ان شاء

الحلقة رقم 5 : سكران وْيَعرف داري الجْديدة(الجزء الثاني)

فالنهار اللي يْجي المفتش دار شهادة طبية واعطاهالي باش نْوصّلها للمدير
المدير غير شاف الشهادة الطبية ، قال لي : هاد المسخوط غادي يفضحنا مع المفتش
أنا ردّيت : لّا والله الى مسكين راه مريض
_ مريض ؟ واش هو ديما خابطها ويْجي للمدرسة سكران...
_ نْعام أالسيد المدير ولكن يعرف الباب ديال قسمو
المدير ضحكاتو هاد العبارة .بْحال الى برْداتو ، أُهو يقول لي : غير الله يْسلّك هاد النهار على خير.
المشكل أن الله ما استاجبش .المفتش جا وقلّبْ على خونا بالله .حيت ما لْقاهش ، رجع زعفان بعدما أخبر المدير باللي غادي يتّاخد الإجرائات القانونية ضد المعني بالأمر.
هاديك هي ، المدير عيّطْ لي باش يعلمني باللي كاين.زاد قال لي : كولْ لصاحبك يمشي يْشوف كيفاش يْديرْ مع المفتش .راه مْحمَّضْها بالمعقول
المهم مين ارْجعت للدار ، لقيت خونا بالله مع شي اصحابو باركين يشربو وناشطين مع ريسانهوم.غير شافني ، قال لي : جيتْ أخويا حميد...اوى المفتش جا بعد ؟
_ جا او سوّلْ عليك
_ ياك بعدا ؟
_ ايه أخويا وراني شمّيت فيك ريحة لحْموضية
_ باينة حيت راني كنشْرب
قبل ما نْخليه ، جاوبتو : قضيتك حامضة وماشي بعيد يجريو عليك من الخدمة

دازت أيامات وجا آخر الشهر .صاحبي البركة مْشى معيا للدار الجديدة اللي كْرينا.حتى هي فيها 3 بيوت وْكوزينة.الكرْيَة ديالها كيف ما سْبقْ قلت ليكوم : 500 درهم للشهر.
البركة شد بيتو أطَّلْ على البالكون وانا خْديت بيت عندها جوج ديال الفاصاداتْ.بالنسبة للأكل خونا بالله حيتْ نْقي بزاف ما بغاش يعاشرني فالماكلة.قال لك أسيدي هو كيبغي ياكول فالريسطورا (المطعم).خليتو على هْواه.
واحد الْحَدْ كنت جاي فالتْران من وجدة لتاوريرت ، تْلاقيتْ مع واحد المعلم .غير شفتو عرفتو.كان مسكين هازْ فْيدّو التوزيع السنوي .
وْأنا نْخاطْبو : أنت باينة معلم ؟
جاوبني : وحتى أنت باينة عليك معلم؟
_ واه كي درتي باش عْرفتيها ؟
_ ما يْسوَّلْ فالمعلّم غير المعلّم
هي هاديك ولّينا أصحاب.الصراحة كان نعم الصديق.راه مازال صديق ديالي لحد الساعة
من العجيب الصدف كنت نكتب فهاد الحلقة مين جا لعندي للدار .هاد صاحبي سعيد عزيزة عليه اللوبيا.تْصورو انه يقدر ما يمشيش للخدمة الى عرضو عليه ياكول اللوبيا.
من الزهر ديالوهاد النهار لَوْلية (الزوجة) كانت طابخة اللوبيا.
المهم مين وصلنا لتاوريرت ، سوّلتو واش عندو فيت يْباتْ .ردْ عليا باللي غادي يْشوف شي أوطيل على قد الحال.خوكم كريم ، أعْرض عليه باش يْبات عندو حيت الدار كبيرة
خونا بالله فْرح ومشى معايا.
مين دْخلنا للدار ، كان البركة كيشرب القهوة.
بْحال الى البَنْكاوي ما عجبوش الحال ولكن جاوبني (زعما يدفع الهدْرة) واش هاد السيد باغي يكْري معانا الدار ؟
صاحبي سعيد هو اللي جاوبو : أنا خو مول الدار
البركة صْفار ودْبال : اسمح لي أسيدي ما تدّيهاش مني قلة صواب.
_ ما كاين مشكل
هاديك هي انا اللي ادَّخَّلْت : شوف البركة هدا ضيفي وماشي شغلك فيه.
_ صافي اخويا غير اسمح لي
المهم مشينا للبيت ديالي باش نستراحو من بعد خرجنا باش نتعشاو .كاين واحد السيد يلْغاوْ لو الشريف كيتْقنْ الكفتة.تعشّينا عندو.سعيد هو الّي خلّصْ
فالغد ليه صاحبي سعيد مشى للفرعية ديالو بعدما وعدني يْجي نهار الجمعة القادمة.
بالنسبة لخونا السكايري بعدما خلّيناه بوحدو، جا واحد النهار أبّاه ولقاه مع أصحابو يْطَوْسو (يشربو الشراب) زْعفْ وغضب واجْرى عليه من الدار.خونا بالله بقى متْشرَّدْ بين الدروبا والزناقي.
واحد الليلة جا لعندنا يبكي ويشكي .حْنا مين يدق علينا شي واحد نمْشيوْ نشوفو شكون من البالكون.البركة هو اللي شافو ، قال لي خْطيك منو .هدا مولا صْداعات ومشاكل.
واخّا هكدا جاوبتو : أهلا خويا محمود .شكون اللي جابك عندنا فهاد الليل ؟
جاوبني او هو يبكي : آه يا خويا حميد.راني تْبهدلْت
رد عليه البركة : أنت راك مْبهْدل هادي شْحال
محمود مسكين ما علّق والو على الهدْرة ولكن زاد أكَّدْ اللي قالو البنْكاوي : واه أخويا البركة راني حطّمت الروكور (الرقم القياسي) فالتبهديل
هي هاديك بْدى يبكي ويْنَوَّح بحال داك البرهوش اللي خاصّو يرضع لحليب ديال أمّو.
البركة دغيا شَفّو قال لي : سّي حميد ها العار الى ما تْحلّو الباب.
دخلناه للدار والدموع باقية تْسيل من عينو.السيد نْدم على كل ما دارو وقال لينا راني تُبْتْ لله وما بقيتش نشرب الشراب.
باش يْبرهن على كلامو ، شي شوية قال لينا : الله يْخليكوم أعطيوْني السجادة ، راني باقي ما ممْصلّيش المغرب.
المهم كلام يجيبْ كلام حْكى لينا آش وْقع ليه مع الواليد .دابا راه حاصل.ما عندو فين يْبات.
البركة اقترح عليه يسكن معانا فالدار ولكن بشرط يْخلّص لكرى .
محمود ما كانش ناوي بْحال هاد الاقتراح، دغيا قال لي : شحال حقي فلكْرى ؟
جاوبو البنكاوي : خاصك تعطينا 200 درهم.
خونا بالله جبد لفلوس كاش وقال لينا : ها لكرى ديال هاد الشهر ولكرى ديال اللي من بعدو.
البركة خْطف لفلوس أو دارهوم فجيبو .
فلْغدْ ليه محمود جاب حْوايجوباش يسكن.
العجيب فالأمر أنه ما بْقاش يْجيب صحابو ولكن مرة مرة يْغيب ومين يدخل للدار ريحة الشراب تعطي من فمو.
المشكل كان يحاول ما يتْلاقاش معانا ولكن حْنا كنّا عارفينو
واحد النهار ، جا لعندي للبيت وقال لي : خويا حميد أنا قاصدك ونتمنى ما تْخيبْ نيش
_ جاوبتو : اللي قْدرنا عليه نْديروه
المهم خونا بالله كان باغي يْسلَّفْ مني 300 درهم.
انا صراحة ما بغيتش حيت هاد المبلغ راه كبير بالنسبة لْديك لوقيتة.خونا بالله استعمل جميع الطرق باش يقْنعني وفعلا نْجح مين أعطاني شيك كتب فيه اسْميْتي
واخا قلت لو انا موافق ولكن فلوسي غادي نْخرّجها فآخر هاد الشهر

يتبع غدا الجزء الثالث