...........شهوة الضو..................


هذ اللحظَه الهابطَه عليَّ نسمات
هذ اللحظه الطالع منها شهْوات
ورا خطواتي مدفونَه ادررها
قدّام لهاتي نابتَه *****ها
أنا المجني منها حبّات
المزروع فيها مرّات

هي تحت نفسي
هي فوق حسِّي
الماضي يجرني لها جرّات
المستقبل يجبدني منها جبدات
أنا المقصود القاصد زينةْ اللحظات

الساعه ف ضوِّي تفصَّل
اللحظه من يدي تتنصَّل
الحاضر سفينَه توصَّل لأم الغايات

طلقوني نرجع لْ غدا نلحق بطير الحلمات
اللغه لمعنِّي بها ف كبدتي خمرت
الثقَه لمدصراني ف خطوتي شعلت


هذ اللحظه الفالتَه من عمر الزمان
هذ الزمان الذايب ف كَف لمكان
هذ لمكان الخارج بإنسان الروح الداخل بحس الإنسان
ينبش على مادَّه يفتَّش على وجدان
فاللحظه الحيَّه الهاربَه الغابرَه ف تاريخ الزمان
...إلى كان للزمان تاريخ . . . إلى كان ؟
قولوا له يعرِّي على نهارُه يبان
نقراوه ع لفْصول جْبال سْهول ويدان

• • •

الحاضر فلتَه
الحاضر قبضَه
الحاضر باب اوسع من اكتافنا
اللحظه زلڤَه
اللحظه وقفَه
اللحظه خلعَه محت هتافنا

بين الحركَه والسكون شاهَد لقبر تايقرا بَالمقلوب كْفوفنا
بين الحياة والموت تايطوالوا رجلين خوفنا

شكون يدوَّر الزمان فالجهَه اللي بغينا نطلُّوا على اهدافنا ؟
شكون يدوَّر المغزل ف يد الشمس تعاود غزيل اوصافنا ؟

!الساعه ما عرفناها مطلقانا ولاَّ غير مخاصمانا
للسؤال ما لقت ركوب بلا مقص تقطَّع ف جوفنا

• ••

للسّاري فالكون
للجاري فاللون
ذاك الشاربني مَح الواكلني مخ
انت زماني بالصَّح ولاَّ غير بَّخْ على بَّخ ؟

تتلوَّى بين النجوم
تتوَّم لغيوم تزوَّج لكروم
تحسَّسني بقيمةْ اللحظه
ندرك الهم المشروك
نكون فيه أنا المقيوم
نلقى الوقت فات عليَّ
هو اللي كان تسابيح بين يديَّ
"نتسائل "مال النهار ما وقفشِ ياخذني له أَوْ ليَّ ؟
نبرَّد على قلبي "وَ قِيلَ ما شافنيش
"!لوكان شافني كان رمقنني بعينيَّ

نجمع اطرافي منَّهنا و الهيهْ
نرقَّع دماغي بين كان و يكون له
أنا الكاين المتحَوَّل بين السابق واللاّحق
المخدوع بطيف اللحظه المقطوع من ضو شجرَه
الوقت وقتي أنا السايل فيه
.الَعْمر عمري أنا الناقص منه ونا الزايد عليه

•• •

الوهم بلا رجلين يجري ورايا
الحقيقَه بلا جنحين تطير قدّامي
ونا
براس قدُّه قدْ آش
نتكركب بين الشك واليقين
نوقف وقفةْ الكاف
نقول لراسي " شاك لا يكون الزمان غير ف عقلي
"...شاك ف عقلي لا يكون ما سمع ما شاف

•• •

رجعت من كل جهَه
.ونا ليَّ جهات ف كون حلمتي
غدا يومي
نحضرُه فين ما كان
.نعرَّس له بشهوتي

نمد عيني القدَّام
نسرَّح شوفتي فالسراب
المنشور بين الوجود والعدم
"نقول " ابْلَى سْوادك يا موتي قدّام حركتي

نهز رجل نحط قدم
.نشق السور الواقف قبالتي
نقول حتى لو تهبط عليَّ قبَّة ليلتي
.تبقى سحابتي حبلى ب لمعاني تزيد ف عنايتي

نغطس جسدي ف بحر كياني
نغمَّس حدسي ف ضي اعياني
نقول " أنا من تحت نفسي
أنا من فوق حسي
."..نجني لْطايف لمعاني نقاد اكتاف ميزاني

• • •

سكران
و ما شارب غير الضو
عمروا لي من روح مجاجُه كاس ورا كاس
حتى تبرز عروسَةْ الشتا بحروف زيني

اسقوني بكفوف لَبْها سَقيَه على سقيَه
حتى تخضَر اليابسَه ف طيني

ارموني فجَذْبةْ ريح حالكم نقطَّر جبيني
حتى يشطح واد الوجد بينكم وبيني

زيدوني من ضوكم
أَوْ لضوكم فوق لهوى زيدوني
حتى تشرق عين السما من عيني


اروِوْني
من حلاوة ريي ترواوْا

ضوِّوْني
من غلاوة ضيي تضواوْا

امرِوْني
ف صفاوة مرايتي تمراوْا

نتمراوْا ... نتمراوا ...
حتى نوصلوا للمقام العالي فالإنسان نتخاواوْا
( الإنسان مجمع لمعاني )
معاني
ف بروق شموسهم
نقراوا اللوح الساني نتداواوْا


الزين حَيْ و حي حي فكل ابراج
الضو فَيْض وفيض فيض فاض امواج
ع البيضَه الكونيَّه طلع اهداج
دار ع لمزاج تاج
!يا ما هُو من تاج
• • •

يـا صبحيَّةْ إيماني
قولي لمولاتي الشمس تدوز منَّهنا
ايلا بغت تلقاني

...أنا هنا . . . . هاني

اللي شافني من اڤراني
يفرَّك الذَّرَّه لحبّات
...يفرَّك الحبَّه لحبيبات
...يفرَّك الحبِيْبَه لجزئيات
يفرَّك فيهم وحدانيتي لكثيرتي
يفرَّك كثيرتي لوحدانيات
يفرَّك ويفرَّك من هذي لذك
...حتى يطيح على إنساني

إنساني نفس نفسي
إنساني حس حسي
إنساني سفَر ذاتي لكياني
...إنساني خمرة كياني ف كياني



إدريس المسناوي

أشكرك على اختيارك الغالي أستاذتي ، لمبدع اسمه يكفي للدلالة على حسنات قلمه .

شكرا جزيلا .