2013-08-08, 01:24
|
رقم المشاركة : 1 |
إحصائية
العضو | | | مَلّي بْغيتْ سعْدي | ---------------مَلّي بْغيتْ سعْدي ----------------------------------------------- حطّيتْ مْرِوَدْ حنّه و سْواكْ
عرّيتْ شعري و عيّطتْ أفينكْ أَسعدي
...
تْشظّاتْ لمْرايا من هولْ ماشافتْ فيّا
تْقطّعْ خيطْ الرّوح و تْسرّبْ لْويزْ لقصيده بين يدِيّا
مّي يا مّي لمّن نشكي و شْكون يْهزْ هْبالي ...
--------
يَحْسنْ عَوْنكْ يا قلبي و شْحال مْخبّي
لقلوبْ تْحَجْراتْ ما نْفعْ فيها قولْ ربّي
لا حَسّاكْ كْلامي...
--------
تالْفينْ شَغْلاتْهم لْفانْيه
شي يْغرّقْ فْ السّاسْ وِ يْعلّي
شي يتْناحرْ عْلى كمْشه مَنْ تْرابْ أ بْلكْدوبْ يْداوي
و شي جارّو لخْوا لْخاوي
و شي بْروحو ما داري...
--------
ياكْ غيرْ يامسْ لخيامْ تْوَتْقاتْ و لخيلْ تْسرْجاتْ
أُ قالو أراكْ لْحركة...أُ حلْفاتْ لْفرحه عندي ماتْمسّي
نِيلاتْني رْحاكْ يالِيّامْ أُ مَنْ فوقْ لْعُرّامْ درّاتْني
عوّلْتْ عْليكْ يا الصوفْ لْمغْزولْ
حْزمْتْ بيكْ يّامِي أُسَدّيتْ بيك همّي و حْزاني
و نْتَ وكْلاكْ التّونيه يا قنَّبْ راشي...
--------
خْلاصْ جْفاكْ لْقلبْ لا عادْ تْولّي ثاني
شْحالْ قدّكْ مَتْفَتّشْ عْلى لبنْ لعتْروسْ فجْيابي
يا السعدْ لمنْحوسْ لمْسرّبْ مَنْ جْنابي
عْلاهْ حْليبْ مّي مازالْ تْجَبْرُ بينْ ضْراسي ؟... -------بقلم :شامة المؤذن
-------اسفي في :2013/07/22
-------س00د05 منقول | : منتديات الأستاذ التعليمية التربوية المغربية : فريق واحد لتعليم رائد https://www.profvb.com/vb/showthread.php?p=671458 التوقيع | أينكم يا غايبين ؟؟؟؟
آش بيكم دارت لقدار مابان ليكم أثر ولا خبروا بيكم البشارة | |
| |