منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

حريفاتي يا حريفاتي
فين مشيتو يا خوياتي؟
نسيتوا لكلام اللي غزلناه
ونقضتوا السلام اللي تعاهدناه.
فينك يا الباء و فينك يا العين؟
فينك يا التاء و فينك يا الغين؟
فينك يا الراء و فينك يا الشين؟
مال حرفي عليا غضبان؟
شكون طيح ليك الميزان؟
لونك مخطوف و عقلك حيران.
خاصمتي جميع الحروف و شعلتي النيران.
واش ليوم تقاضى بينا الكلام؟
يلا مني غضبان
ناقشني,
وحايد عليك لالة غوباشة وكثرة التخمام.
ويلا مني حشمان
صارحني,
وترجع ليك البشاشة ونحققوا لحلام.
الحرف حايد الحشمة,
احدر عينيه,
انطق و قال :
حبستوني فكتاب
ما يتباع ما يتشرى.
عيشتوني فعذاب
ما ابقى حد يكتب و لا يقرا.
زمان كتبوني الناس على الاوراق
ورسموني على الحجر.
ليوم عز عليا الفراق
ملي اعطاوني بالظهر.
فين لوني الساطع البراق؟
وفين وقوفي على السطر؟
لا حد باغي يكتبني,
أو يديها فيا.
ولا حد باغي يقراني,
أو يسمع ليا.
وليت منبوذ
والريشة و المداد
علينا شهود.
ولى حالي مهدود
وكلامي ولى مردود.