منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

من عيني طاحت دمعة

من عيني طاحت دمعة
ودمعي ديما طياح
على لّي مات بلا مايدير الحْس
عاش حياتو جنب الحايط
تابعو ديما النّحس
من عيني طاحت دمعة
ودمعي ديما طياح
على لي مفرش الضّس
عايش غير شايط
حابس فيه النفس
من عيني طاحت دمعة
ودمعي ديما طياح
على لّي تْلفْ ليه راس الخيط
وعاش حياتو يقَلّْبْ عليه
بقى المسكين مسند الحايط
وخايف شي نهار يطيح عليه
من عيني طاحت دمعة
ودمعي ديما طياح
على لي مات جيعان
حيث حَقُّو كْلاوْهْ ليه
مشى المسكين فْكْعان
فْحَلْقو غُصَّة واحلة ليه
من عيني طاحت دمعة
ودمعي ديما طياح
على لي عايش بالصبر
حتى فاض عليه
يتغذى بيه ويفطر
ولي شاط يتصدق بيه
من عيني طاحت دمعة
ودمعي ديما طياح
على لي مفرش الضَّس
ومْتْوسّْدْ لحجر
يحلم بالكلاب يعضُّوا فيه
حياتو كلها مشات هدر
والدّْكّاكة دايزة عليه
من عيني طاحت دمعة
ودمعي ديما طياح
على لي غاذي ويْتْلفّْتْ
غاذي ويْتْقَفّْزْ
خايف من لعصا
تنزل عليه
من عيني طاحت دمعة
ودمعي ديما طياح
على لي عايش فْ خربة
مْعَرّْشَة عليها موكة
والغربان تحوم عليه
من عيني طاحت دمعة
ودمعي ديما طياح
على لي هجر وْكارو
وماشْدّوه حْجارو
وماجاب حَدّْ اخْبارو
من عيني طاحت دمعة
ودمعي ديما طياح
على لي دار النية
ونعس مع الحية
ومانقولش ليكم ياسيادي
آش دارت ليه

بقلم : ابو العز