منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

شوف يابنادم وزيد شوف

شوف يابنادم وزيد شوف
ناس تزيد الشحمة فكرش لمعلوف
وناس هازَّة لمولاها العالي لكفوف
وناس جالسة... غير كتشوف
دايرة لراسها لجام من الخوف
على فمها كْمامة
وعلى راسها معششة حمامة
حاضنة بيض لحلوف
دايرة بالها مع غمامة
راها جاية على حد الشوف
تترجى منها قطيرة من لْما
تبرد بيها حر الجّوف
لكن هيهات ...هيهات
واش لغمامة تْحْنّْ أو تْروف
فزمان اللهطة وبوهيوف
مالك يابنادم عيونك زايغة
ولونك مخطوف ؟
حتى لين يابنادم ... حتى لين
غاذي تبقى غير تشوف ؟
الشوف يا بنادم مايبرد الجوف
والنعجة القرعة
موحال واش تْنَوّْضْ الصوف
حْنّْ يابنادم وتْحَنْحْنْ وْروف
وحايد عليك سلهام لْخوف
ازرع ليك حرف
احصد ليك حروف
بيها يزيان حالك
بيها يولي كلامك مصفوف
بيها يعلَى شانك
بيها يولي راسك مكشوف
عيش سبع يابنادم
ولاتبقى عايش حلوف
خيرات الله فايضة ويدان
وانت جالس تتحسر وتشوف
مَضّي ليا ذوك النيبان
ونتش لحمك من كرش لمعلوف
بقلم : ابوالعز