منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

غادي نسرد عليكم وبإيجاز كيفاش كانت كتمرّ العطلة الصيفية عندي!!!
ما كنسافر لا للخارج ولا للداخل .غير ادخل ماي ويبدا والدي يرسل في طلبي ,بطبيعة الحال خاصني اللبّي الرغبة انتعت الوالد..كندوز لجامع الفنا كان فهداك الوقت لكيوسكات فيهم ما الذ وطاب من الكتب والمجلات :خوكم ضروري خاصو يقتني حسب الدريهمات لفي جيبو بعض الروايات والقصص بالعربية والفرنسية وضروري شي مجلات *العربي لأحمد زكي* لباقي كنحتفظ على البعض منها اكثر من 40سنة:
الليلة فاش نرجع من مراكش وبعد مرور ساعات قليلة ينادي عليّ الوالد أُكيقرع ليا راسي بالموسى اعرفتوا اعلاش باش تنسى بأنك طالب وتصبح عامل كيتقاضى التفركيس وابدا الغيس...خوكم كيصبح راسو مثل الدلاحة!!!!!!!
وعلى ذكر الدلاح الوالد كان من الهواة انتاع لبحاير يعني في القطعة الارضية كتوجد كولشي :النعناع البصل الفلافل القزابر الطماطم الجزر خاص غير الكميلة واللحيمة والزيت.ابصراحة كانت الكميلة ممتازة ابلا لحم كلشي طبيعي ..ايه على ايام !!!
وفي الجانب الآخر بالقرب من اشجار الزيتون لبحيرة! اش فيها :البطيخ بأنواعه والقرع والبادنجان وعندما نجد الفرصة مواتية ار برّع :المشكل ما كنعرفو من الدلاح لي طابت ملي ما طابت : كنفتحوا الدلاحة اذا كانت ناضجة نقطعوها والا نقلبوها على وجهها الآخر اما انقطعوش ليها الحبل السري ولكن الوالد كان ادكى منا كان كيعرف كل دلاحة على حدة كما كيعرف كل نعجة...........كان كيسبطنا ولكن بلسانو.
ومن كرم الوالد :كانت البحيرة ملك للكل ،لي مرّ من جانب لبحيرة له نصيبه :النعناع الخضر أو الدلاح والبطيخ الأصفر ابالمجان......
أما العمل لكنا انقوموا به انا واخي الاصغر :توصيل الطعام للعمال، سقي لبحيرة، نقل القمح الى البيدر والدراس وهكذا..........
اهذي هي العطلة والمخيم عند خوكم لعمّرو ما شاف شي مخيّام ولا امشى في الطفولة لشي رحلة ..العمل ثم العمل اما اتقول الاّ راه انزل اعليك ا لبلاء
ما أجمل ايام الطفولة البريئة رغم المحن

ياك ما زلّ لساني عاود ثاني؟
اعذروني راه كيهرب بيا العود كيرجع بيا ليام زمان مرة مرة