انت كل البنان
واحنا نزلقوا فقشورو
انت ذبح الجّْديان
واحنا عينينا عليهم يدوروا
انت شوي الزنان
واحنا نتبخروا ببخورو
انت عيش فخير هاذ الزمان
واحنا نعيشو فشرورو
احنا نشعلوا الشمعدان
وانت تضوي بنورو
خدودك حمرة بلعمان
واحنا خدودنا بحال جدورو
انت ذوق حب الرمان
واحنا نمصّوا غير قشورو
فدادنك تصب فيها الويدان
واحنا فدادنا سايرين يبوروا
عايشين عيشة الذبان
اللي تهرس ها الكرارص
واللي مات حافرين ليه قبورو
اعطيتونا غير النشان
وبقينا احداكم ندوروا
قرينا دستور هاذ البلاد
وفهمنا مابين سطورو
حلف هو ما بغا يتقاد
وحلفنا احنا تنقطعوا بحورو
هاذ بنادم خدم معانا العناد
حتى حلف النعاس مايزورو
بقى على فلوسو ديما عساس
واحنا عينينا عليهم يدوروا
لابد يتهرس ليه الساس
وفلوسنا عليه يثوروا
اليوم يلا كان الرّيزو لينا هربان
غذا لابد يشعشع نورو
ويرجع المال لجميع الناس
وخدودهم يولّيوا ينوروا
مالك ديما فينا شمتان
شحال من واحد بحالك كان غلطان
وفالأخر رابوا عليه قصورو
لاتدير ثقة فهاذ الزمان
راه ديما غدار وسوايعو يدوروا
اليوم انت واحد من لعيان
وغذا لابد عليك يجوروا
وتولي بحال شي قومان
تْلاَّ بيهم الزمان
حتى اصبح فمهم محلول
وعينيهم يدوروا