منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

مذكرات الطفولة : حوميدي داكْ البرهوش الصغيرْ

الحلقة رقم 6 : ذكريات لا تنسى (1)

الجزء الأول : صباط الشّيكولا شْحالْ بنينْ

هادْ الدرب اللي كنت ساكن فيه كان نْقي وساكنين فيه النصارى وليهود وحتى لمغاربة.سبحان الله العظيم كان واحد التعايش ما تقدروشْ تتْصوروه.باقي عاقل واحد ليهودية كان عندها حانوت .كنت أنا وخويا حسن نمشيو لعندها باشْ نشريوْ عليها النّوكا (nougat) .هادْ خيّتْنا ما كانتشْ تحل الحانوت .كنّا نْدقّو عندها فالدار.هي هاديك تخرج وتقول لينا : واشْتي (أشنو) بْغيتو ؟ نقولو ليها بْغينا النّوكا.
تدخل وتْخلّي مسكينة الباب مفتوح .
واه ياخّوتي كنت نْشمْ الله يستر شي ريحة عندها خانزة فالدار.شي مرات كيْبانْ لينا واحد الشيباني فالكرّوسة ديالو .
المهم غير ناخْدوالنوكة نمشيوْ دغيا باش ناكلوها .
بالنسبة لنْصارى كانو جيرانّا .باقي عاقل واحد الشينوي متزوج فرانسوية.هدا كان يتْهلّى فينا مزيان .واحد النهار عيّطْ على واحد الأخت ديالي .فْديك لوقيتة كان فعمرها يمكن 6 ديال السنوات واعطاها صبّاط .بالحقْ غير فردة وحدة .الاخت ديالي لبسات الفردة ديال الصباط جاتها كبيرة ولكن لفْصالة ديال الصبّاط عجباتها بزاف.المهم بقات تلعب بيه.شي وقيتة خْداهْ خويا حسن وبْغى يضْربها بيه أُو هو يتهرّس على جوجْ
فاتحة شْحالْ بْكاتْ.هي هاديكْ مْشينا للدار باشْ زعما أختي تشكي للوالدة.من الزْهر كان عمّي مولود فالدار .قال لأختي : أرايْ الصباطْ غادي نْردّو ليك جديد.
يا الله خْدى الصبّاط ، بْدى يضْحكْ وقال لينا : شْحالْ تْخلْصوني الى كْليتْ شْوية من الصبّاطْ.
فعلا عضْ عضّة كبيرة.فتيحة زادت فلبْكا.من بعد قال ليها عمّي : البَهْلة هدا راه صباط ديال الشيكولا.
المهم تْقاسمناه وكْلينا.كانت شيكولا رائعة ما عمرو ما ننْسى المذاق ديالها.
كانت واحدة الفاسية جارتنا من الجهة التانية.كانت مسكينة ساكنة غير بوحديتها.هادي كانت تْسخّرْنا للحانوت باشْ نشريوْ ليها التْقَضْيا اللّي تحتاج.الصراحة هاد خوتنا بالله كنت ديما نسبق باشْ نتْسخَّرْ ليها ، حيت كانت تتْهلّى فيا مزيانْ.تْصورو الصرف اللي يْشيطْ كانتْ تقولْ لي غير خودو .كل نهار برزقو : مرة دورو(ريال) ، شي مرات جوج دورو وكان الصرف يقدر يكون 4 دورو !!!!!

الجزء الثاني : شْكون هْرفْ على الحوتة

من ذكريات هاد الدرب أن البيبان كانو النهار كامل مفتوحين.تقدر تدخل لْأَيْ منزل ، تلقاهوم مثلا يشَّربو أتاي ...إوى تشرب وتاكول معاهوم بْحالْ الى زعما راكْ فْداركومْ. باقي عاقل واحد النهار دخلت لْشي دار كانت محلولة .وْصلت للكوزينة وما لْقيتْ حتى واحد.هي هاديك شمّيتْ شي ريحة عجْباتْني وْأنا نمشي ديريكتْ لواحد الطبسي مْغطّي .حَيَّدْتْ لغطى وْأنا نلْقى حوتة كبيرة كتعوم فالرْوى ومْغطْية بلبْطاطا والزيتون.خوكم الحوميدي بْيدّو خْدى طرف كبير ديال الحوتة وهْربْ قبل ما يْفيقو بيه .يا الله خْرجتْ طْلعتْ لواحد الشجرة باشْ نْزرّدْ بالمورْسو ديالْ الحوت ، لقيتْ خويا حسن كان سابقني للشجرة.المهم اعطيتو شوية باشْ يْدوقْ .هي هاديكْ ، قال لي : هادْ الحوتْ بْنينْ.واشْ الواليدة راها دايْراتو لغْدى ؟
قلت لو : لّا ولكن راها عْطاتو لي واحد لمْرى كنت تْسخّرْت ليها.
خويا حسن ما تاقْنيشْ: ما تكدبشْ علي .الفاسية هي الوحيدة اللي تتهلّى فينا مزيان.
المهم أخبرتو بالدار وقلت لو : راه الطبسي فوق البوطاجي ديال الكوزينة.
فعلا رْجعنا للدار.كانت الباب باقية محلولة .خويا حسن دخل .دازت 10 مينوت خويا حسن ما بانْشْ.قلت مع راسي : صافي راهوم شدّوه وما يْكونو غير يعْطيوهْ فالغَرْدْ (العصا)
هي هاديك مشيت لْدارنا باشْ نخبر الواليدة باللي كاين.يا الله فاشْ وصلت ، قالت لي الواليدة : فينْ مْشى خوكْ حسن ؟
بْغيتْ نقولْ ليها : راه محبوس فواحد الدار ....
جا داخل حسن يضحك .سَوْلاتو الواليدة : تْبانْ فرحانْ
ردْ عليها : واهْ أمّا راني كْليتْ الحوتْ حتى شْبعتْ
الواليدة ما عجبْ هاشْ الحال: يا داكْ المسخوط واشْ ما بْغيتْشْ تْفارق التْشَمْشيمْ على الطناجرْ ؟
من بعد واحد من أصحاب الدرب قال لينا : واحد المشْ سرق لينا حوتة كبيرة .
بالطبع راكو عارفين المش .أنا غير شفت فيه وقلت لصاحبنا : واشْ كْلاها بالخبز أو بْلا خبز ؟
ضحك خونا بالله وردْ عليا : واه هادي ما طاحتْشْ لي على البال.والله الى عندك الحق .جوج خبزات حتى هوما ما لْقيناهومش .
شوفو بنادم شْحالْ نية .خونا بالله ما نْوى والو .

الجزء الثالث : سباق الدبّانْ

من مغامراتي مع خويا حسن .هادي فلوقيتة ديال الصيف.باقي عاقل يا الله فاشْ نتغدّاوْ ، الواليد يمشي ينعس .كان تقريبا يْفيق مع ديك التلاتة والنَّصْ باش يمشي للخدمة.الواليدة كانت حتى هي تمشي تسْتْراح.خّوتي وخْواتاتي كانو يمشيو لْبيتهوم باشْ يلعبو ولكن غير بالسْكات ، حيتْ الى سْمعهومْ الواليد راه غادي يجْبدْ
لكْرافاشْ ويبْدى يضرب فين مّا جاتْ الضربا.
خويا حسن وْ أنا كانت عندنا هواية فريدة من نوعها.كنّا نْصيْدو الدّبّان .نْحَيْدولو الجْناحْ ديالو باشْ ما يْطيرْشْ.من بعد كل واحد يْحطْ الدبّانة ديالو فالحيطْ .شي شوية الدّبّانة تبْدى تطلع الحيط .باغية مسكينة تهرب للفوقْ.حيتْ هوما جوج دبّاناتْ غادي وحدة تسبق صاحبتها.بالنسبة لينا أحْنا هدا راه سباق الدّبابْ.
المشكل خويا حسن كان غشّاش كبير.بعض المرّات الدّبّانة ديالي تسبقْ الدبّانة ديالو .حسن يْجيبْ شي سرْبيتة (قطعة توب) ويرمي بيها الدّبّانة ديالي.بالطبع يْطيّحْها.خوكم الحوميدي حتى هو يْديرْ بْحالْ خوه.الدّبّانة ديال حسن تلْقى راسها فالأرض.
هاد خويا حسن كان غْواتو يتسْمع على بعد مئاتْ الأمتار.يا الله يسمعو الواليد يْجي يجْري.انا دغيا نسلت ونتْكمّشْ فْشي قُنْتْ ونْديرْ راسي ناعسْ.خويا حسن (كان سمين) ما يقدرشْ يهرب .هي هاديكْ يلحق عليه الواليد ويبْدى عليه فالمسْلوتْ : هاكْ ، هاكْ ، هاكْ.
حسن زايد فلغوات .الواليد يسمح ويمشي في حالاتو.
يا الله فاشْ الواليد يْسد الباب ، يْجي عندي حسن : يا الله نْكمْلو السباق ديال الذّبّانْ
نْعاودو السباق ولكن عاود تاني نْصيْدو جوج دبّانات حيت هادوك يْكونو هربو وما بْقاوشْ يبانو.

الجزء الرابع : ليهودي وموموت

من قبل تكلّمت ليكوم على ليهود .كانو حْدانا مجموعة كبيرة .الصراحة تقال كانو مْعانا مزيانين.واحد من هاد ليهود كان الهضرة ديالو تقتل بالضحك.هادا مسكين تقدرو تقولو ما زايدشْ فالمغرب ، حيت كان يتكلم بالعبرية ومْخلطة بالدارجة المغربية.
المهم كانت عندو خروفة ديما تابعاه فين ما مْشى .كانْ مْسمّيها موموتْ.
غير يلْغى ليها : موموتْ أجي !
تجي دغيا لْعندو
واحد النهار قلنا لو حْنا فالعيد لكبير ندبحولكباشْ وراه موموت تصلح للْعيدْ لكبيرْ.خونا بالله خافْ ومسكينْ غْبر شي 3 شهورا حتى داز العيد ويمكن حتى عاشورا.
هاد موموت كان يلبسها جاكيطا فوقت البرد وكان يْحوّقْ ليها راسْها.زعما كان مْهلّي فيها بالمعقول.أنا صراحة ما عمّرني شفت شي واحد يتْهلّى فْشي حيوان بْحالْ هادْ خيْنا.

الى اللقاء مع الحلقة رقم 7 من مذكرات الطفولة .هذه الحلقة مع حوميدي في المستوى الرابع