الحلقة رقم 2 :حوميدي داكْ البرهوش الصغير الجزء الأول : حوميدي عند الأخوات الراهبات فلوقيتة ديال حوميدي كانو لوْلاد الصغار كيمشيوْ لْمْسيد باشْ يتعلمو ويقْراوْ القرآن.الواليد حيت كان باغيني نكون دكتور دخلني عند الأخوات الراهبات باش نتعلم لقرايا باللغة الفرنسية. نْسيت ما قلتشْ ليكوم أن أخي جمال (الله يرحمو ) ادْزادْ مورايا بعام و3 شْهورا.هي هاديك بْجوج بينا خْدانا الواليد للكنيسة باشْ يسجّلنا .استقبلتنا واحد النصرانية شارفة.الواليد شْحال أُهو يشرح ليها الظروف ديالو .من بعد ، هاد المديرة تْفاهْماتْ مع الواليد باشْ يْخلَّصْ 45 درهم فالشهر علينا بْجوج بدل 50 درهم.كي ما لاحظتو النصرانية ربْحاتْ الواليد 5 ديال الدراهم .هاديك لَمْية دورو (ريال) راها كانت عندها قيمة كبيرة .تصورو انّ بيها تقدر تشري 25 كيلو بطاطا أو 10 ديال العلب ديال السردين .يمكن ليك تشري بيها 10 ديال الكوميرات ونصْ ديال الخبز؛ مع العلم أن الخبز ديك لوقيتة كنّا نْسمّيوه البولانْجي وكانت توْزن 900 غرام.أما الموز يمكن كان هو أغلى فاكهة على الإطلاق ، ما كان ياكلو غير البورجوازي .تصورو أن الثمن ديالو كان 45 ريال للكيلو ؛ أما الجورنال ما كانشْ يتعدّى 25 سنتيم. المهم بقيت أنا والأخ ديالي كنقراوْ عند الأخوات مدة جوج ديال السنوات .كنّا نمشيو فالصباح مع التْمنية .كانت الواليدة هي اللي تْوصّلنا.مع لحِْداشْ و30 دقيقة كانْ العمْ مولود هو اللي يْجي باشْ يْرجّعْنا للدار. لعشية كان الدخول مع الجوج ونْساليوْ مع الخمسة. أخي جمال ما كانشْ معايا فنفْسْ القسم .حيت هو كانت عندو يا الله اربع سْنينْ.بالنسبة للدراسة باقي عاقل كانو بزاف ديال الأنشطة :بالنسبة للقراءة ، كنّا نقراوْ بالبطاقات والمكعبات ونكتبو فْدفاتر شْحالْ فيهوم رسومات وتْصاورْ. زيدو عْليها الأناشيد والمسرحيات والرسم والتلوين . مع ديك العشرة كيخرجونا للساحة باشْ نستْراحو وكانو يعطيوْ لكل تلميذ كاسْ حليبْ مع ميلْفايا (millefeuilles) مع لعشية ، كانو يْسدّو السْراجم ديال القسم ويقولو لينا : نَعْسو ! زعما لاسْييسْتْ (القيلولة) .المشكل ممنوع الهضرة ، ولكن واخّا هكّدا كنّا مْحمْقينْهومْ.غير بيناتْنا نبْقاوْ عاطْيينْها لتْكركيرْ .العجيب فالأمر ما عمْرو ما تْقلْقو منّا. مع ديك الثْلاثة والنّصْ ، نفيقو زعما من النعاس واخّا حْنا ما ناعْسينْ والو .كيْخرجونا للساحة ويعطيونّا كاس حليب مع حلوى ومن بعد نْرجعو للقسم باشْ نلعبو بالمكعبات والأشكال الهندسية . الصراحة على حسب ما قال لي الواليد كنت نتكلم الفرنسية بطلاقة. واحد الحاجة مهمة اكتاشفتها فهاد الروض وهو ان هاد النّاس كانو حريصينْ على حضور الأباء أو أولياء الأمور .مثلا شي أب ما جاشْ ياخودْ ولدو ، اوى هاد الولد يبقى فالمدرسة . ولكن كانت مزيانة للولد حيت كانو يعطيوَهْ يتغدّى ويمكن هداكْ لغدى ما عمرو ما كْلاهْ في حياتو. انا شخصيا والأخ ديالي شْحالْ كلينا معاهوم.ديك لوقيتة ما كنّا نعرفو لا حْلالْ لا حْرامْ.خوكم الحوميدي كانت تعجبو الماكلة ديال النصارى .في نظرْكومْ شكون السبب اللي جعلنا نستافْدو من هاد الخير ؟ عمّي مولود ! هادْ العم المتمرد والمشاكس كان شْحالْ من مرة ما يْجيشْ ياخودنا للدّار حيتْ كان يتلاقى مع صْحابو .ولكن كان يْجي مع الخمسة.هي هاديك يشري لينا المسكة والكاطو ويقول لينا : شوفو الى سوْلاتْكومْ ماماكوم عْلاشْ ما جيتوشْ مع لوقيتة ديال لغدا ، قولو ليها راهوم شدّونا فالمدرسة.انا غادي نتْهلّى فيكوم مزيان. العم مسكين ما كانْشْ عارف باللي أنا وخويا جمال كانت عجْبانا الماكلة ديال المدرسة الجزء الثاني : تصرفات غريبة عند الأخوات الراهبات هاد الأخوات كانو الصراحة غريبات فالتصرفات ديالهوم وكانو يْحاوْلو باشْ يْردّونا نْصارى.انا الصراحة ما كنتشْ نفهم والو .بْحالي بْحال الدراري الصغار كنت نْديرْ داكْ الشّي اللي يْآمْرونا بيه.باقي عاقل كنا نخرجو لْواحد الجهة من الساحة كان فيها صنم كبير هو إمرأة فْيدْها ولد صغير وحْداها صنم آخورْ ديال واحد الراجلْ شعرو طويل ومربوط بواحد جوج خشْباتْ (من بعد عرفت باللي كان مصْلوب) كنّا نْوقفو حْداه وكنْدوزو يدينا على الجبهة ديالنا ومن بعد على الصدر ثمّ على لكتف ديال ليمَنْ (اليمين) وعادْ لكْتفْ ديال ليسَرْ(اليسار).زعما كنا نرسمو علامة الصليب ولكن شكون اللي كان عارف باللي راحنا كنّا كنْديرو الطقوس ديال المسيحيين.هاد الشي ما عرفتو وفهمتو حتى كبرت وكنت نقرى فالقسم الثالث. هاد النصرانيات دابا كنتخايلْهوم كانو لابسين لبيض مع لكحلْ ، كانو يْشبْهو لْتيفْليلَّسْتْ او ما يعرف باللغة العربية بطائر السنونو وبالفرنسية (l'hirondelle) ولكن الحفلة ديال نهاية الدورة كانت رائعة .كانو يلبسونا الكسوة ويعطيوْنا الكادوياتْ.باقي عاقل كانو أعْطاوني قْنيَة (أرنب)مصاوْبةْ بلْكبْصْ .كنت محتافظ بيها سنوات حتى تقريبا مين وْصلت للمستوى الخامس ابتدائي. كانو كيسْتدْعيوْ الآباء باشْ يْشوفو اوْلادهوم يْغنّيو ويرقصو .المهم كان داك الشّي رائع بمعنى الكلمة. الى اللقاء يوم الإثنين مع الحلقة الثالثة : حوميدي والدخول المدرسي (التعليم العمومي)