منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

الحلقة رقم 20 : ذكرياتي مع أخي جمال الله يرحمو (4)

الجزء السابع : جولة في باريس

هدا خالي بورجوازي.عرفتو فين ساكن ؟ فْ مونْ فيرمايْ (Montfermeuil) هذا فيلاج في ضواحي باريس فيه منازل فاخرة بْحال لقصورا ، زعما مبنية بالقرمود الاحمر.الى ما خفتش نكدب القصة ديال البؤساء وقعت فهاد القرية.
المهم ، غير وصلنا تغدّينا مع أولاد وبنات خالي .من بعد جا خالي وقال لينا غادي تمشيوْ لْبيتْكوم باش ترتاحو شي شوية.
فقنا مع ديك الخمسة ، خرجنا نشوفو باريس .المناظر ديال هاد المدينة رائعة خاصة الى طلعتو لبرج إيفيل .المشكل أنه شْحال ما طْلعتو من طبقة تْخلْصو عليها ثمنْ .ولكن كاين الفابور اللي هو الدروج.بانو لي النصارى مساكين مرخيينْ بزاف.خوكم الحوميدي طلع الدروج حتى وصل تقريا النص ديال البرج ولكن عييتْ.بعدا ربحنا معاهوم هاديك 80 فرنك فرنساوية .
من بعد مشينا لواحد القهوة كولشي فيها نقي.شكون اللي باركين فيها ؟ ماكاين غير أصحاب الماليطاتْ وصْحابِ لكْرافاتا والكوستيم.انا بعدا كنت لابس داك البالطو ديال 10 كيلو .كنت نْبانْ بحال هادوك اللي فالرّوس يْلْغاوْ لهوم التْزارْ (tzar) .من خصوصيات هاد القهوة وهو أنك عندك مدة معينة ، الى دزْتيها خاصّك تهَزْ قلوعكْ أو تطلب شي مشروبات حيت المشروبات اللي طلبتي فالأول صافي تْقاضاوْ مع المدة الزمنية.ولد خالي شْرح لينا هاد الأمر وأمور أخرى للأسف ما رانيش عاقل عليها.
من بعد مْشينا لْشي قنوات تحت الأرض يعني سوتران (soutterrain) زعما بالدارجة بوخْرارب .هادو قوادس كْبار يدخل فيهوم حتى الفيل .فيهوم بزاف ديال الممرات وكل ممر فين يْوصّلْ.المهم تسارينا فيهوم واخّا أنه فْشي وْقيتة هْملْنا.ولكن النصارى مْقوْمين حيت كاين لبْلايكْ (plaques et panneaux) اللي يساعدو الزوار باش يلقاوْ طريقهوم.
هاد الرحلة جوْعاتني .غير قلت لخالي باللي كرشي طالبة المعونة أُو هو يضحك وقال لي : واش تبغي تتعشى فْشي مطعم أو نتعشّاو عند خالتك فطيمة ؟
خوكم الحوميدي باغي غير ياكول حيت جو فرنسا فتح لو الشهية.
اللي كان رجعنا بالزربة للدّار.لقينا عْشى فاعل تارك .
اللي عجبني صراحة ، هنا في باريس الديور فيهوم الشوفلاج والما ديما سخون .يا الله كاشا وحدة تكفي.
هديك الليلة نْعست بكري .جمال الله يرحمو ما كْلا تقريبا والو وكان يْبان بْحال الى خايف .

الجزء الثامن : سبيطار سان لويس

فالصباح وصّلنا خالي لمستشفى سان لويس .واه هدا راه مدينة .آه يا لخّوت باطيمات متراكمة ولكن كولشي منظّم.كاين واحد الكيشيات (guichets) كل واحد باش متكلّف.
خالي كان غير يسوّلْ كل مرّة حتى وصلنا لواحد القاعة كبيرة فيها كراسى طْوالْ يقدر بنادم ينعس فيهوم.جات لعندنا واحد الدكتورة زعْرا وزوينة.قدْمت راسها لينا : الدكتورة .......
جا خالي مسكين بْغى يْبانْ قال ليها بالفرنسية :

je m'appelle monsieur Bouzian et voici mes neveux Abdelhamid et Jamal Eddine

الطبيبة سلْمت علينا وقالت لينا مرحبا بيكوم.خالي عْطاها الضّوصي.لْقات عليه يا الله نضْرة صغيرة .صافي هاد خوتنا بالله دغيا كتفهم.هي هاديك شافت فيا وقالت لي :

C'est vous le donneur ?0

جاوبتها بنعم مادامْ.شافت فالأخ ديالي وقالت لو : ما تْخافش .كولشي غادي يْدوز على أحسن ما يرام
المهم عرضاتْ علينا باش نعسو فهادوك لكراسى.جابو شي آلات باش يحلْبونا.
واخد خوتنا بالله فرْمْلية بْداتْ غير تْعمّر فلقْراعي صغار.واش 20 ..30 40
واحد لوقيتة قلت ليها بالعربية : اسمعي أشْريفة راه الصْطوكْ ديالْ الدم غادي يتْقاضى ليا
المسخوط ديال خالي باغي يلعبها كبير قال ليها :

Mon neveu vous dit que vous l'avez vidé de son sang

الممرضة ابتسْمات.النصارى ما كيضحكوش فهاد المواقف هوما غير يبتاسمو .شافتْ فيا وقال لي :

Pas du tout cher monsieur ;je viens de prélever quelques centilitres de votre sang.C'est pour les analyses.

اوى الى كانو التحاليل بحال هاكدا خومكم الحوميدي موحال الى غادي تبقى فيه شي قطرة ديال الدم
على كل حال مرة تانية جات الطبيبة وبْدات تْسوّلْ فيا شي أسئلة عادية : واش تكْمي ؟ واش تشرب الشراب ؟ واش تمشي لْدور البغاء ؟ واش تلعب الكرة .الأغلبية ديال الاسئلة ديالها كان جوابي عليها لا.
بان لي باللي عجْبها الحال.قالت لخالي : هادا متبرّع مثالي .دابا نقدر نقول ليكوم أن العملية غادي تنجح غير خاصنا نتْأكدو باللي مكوّنات الدم كلها مْطابقة مع مكونات الدم ديال جمال الدين.
قبل ما نمشيو عرضات علي لواحد البيفي (buffet) فيه ما لذّ وطاب من مأكولات وحلويات.خوكم بالله اللي هو أنا طاح عليها بْحال شي صومالي داخل للسوق ديال الخضر فالمغرب .
جمال الله يرحمو مسكين مين حيْدو لو الدم أرْجع صْفر بحال الليمة (الحامض)
من بعد ودْعتنا الطبيبة وقالت لينا غدّا خاصكوم تْجيوْ تاخْدو النتائج ديال التحاليل .
فعلا الغد ليه مْشينا ديريكتْ لعندها.بعد السلام والكلام اللي لابد منّو، دْعاتنا نمشيوْ معاها للمختبر .
فالمختبر ، الطبيبة قْراتْ النتائج وقالت لجمال :

Félicitations ; votre sang est compatible avec celui de votre frère Abdelhamid.Donc la greffe de la moelle osseuse est faisable

من بعد ، مْشينا لواحد القاعة كبيرة فيها تلفزة كبيرة وقالت لينا غادي تْشوفو عملية ديال زرع مخ العظام مرحلة مرحلة .فعلا على ما شفت داك الشي بان لي ما يخْلعْشْ.خوكم بالله الآن اطمئَنْ .
من بعد شفنا لمريض حتى هو فواحد البيت بلاستيكي ما يدخل عندو حتى واحد .الماكلة ديالو كدّوز ليه غير بالأنبوب .المهم داك الشي اللي شفناه ما نقدرش نحكيه ليكوم .الصراحة تقريبا ما عاقل على والو.
من بعد رجعنا للدار ولكن هاد المرة جمال دخْلوه للمستشفى .صافي هو غادي يبقى باش يتبّع المرحلة الاولى ديال العلاج .هاد المرحلة غادي تستمر تقريبا شي 70 يوم.الحمد الله كولشي خالص من عند لاميتيالْ ديال المغرب.
اسمحو لي ما غاديش نحكي ليكوم على هاد العلاج ، راه شوية صعيب باش نحكيه.كل ما يمكن نقول ليكم أن جمال الله يرحمو دوّزْ أيام عصيبة.كنت كل يوم نْزورو فالمستشفى قبل ما نمشي نتْسارى.

الجزء التاسع : لمسارية في باريس

واحد النهار مْشيت عند واحد نْسيبي ساكن في سانْ دونيس (Saint Denis) خوكم الحوميدى مشى غير بوحدو فالميترو .شوفو راه اللي قاري ما عمرو ما يتلف.الصراحة اكتشفت شي بْلايصْ بحال تاتي (tati).هادا محال كبير بحال ألفا 55 ديال الدار البيضاء غير اوكان شحال كبير .فيه كولشي .الرْخا لله.تْقَضّيتْ منّو شحال من حاجة.
مْشيتْ من بعد لواحد الزنقة فيها البياعا تقريبا غير لعرب كيْبيعو النعناع القسبور الخبز .ولكن زنقة موسخة ومعفونة .لعرب فين ما مْشاو ماشيينْ مع لوْسوخاتْ ديالهوم. هاد الزنقة سميتها باربيسْ(barbes).كاينة واحد السوق ديال الخوردة .هادي فيها لعجب .باش تمشي ليها خاصك تْفيق بكري.مامْشيتش ليها بوحدي حيت هي بعيدة.كان خالي معايا مين زرتها وطبعا شْريتْ شي كاسيطات ديال القرآن الكريم.
باريس مدينة كبيرة وفيها ما يتْشاف.البشر هنا كل واحد أدّايْها فْسوقْ راسو.ماكاينْشْ اللي يهضَرْ معاك أو يْقولْ ليك "فين غادي ؟"
الواليد كان يتكلّم معانا تقريبا كل يوم.جمال كان عندو التيليفون باش يتكلم معاهوم.كولشي فابور.كان عندو التلفزة باش يتفرّج .المهم واخّا هكدا ما كان خاصّو والو.
ماسْخيتش بهاد لبلاد ولكن لابد من الرجوع .طبعا جبت معايا الموعد على ود العملية ديال زرع المخ. الموعد كان فالبداية ديال أبريل ، يعني فالعطلة الربيعية.هادا موضوع آخور .

انتهى هاد الموضوع .سيليه في ما بعد الأجزاء المتبقية

غدا تابعوا مذكرات معلم في المدينة : حوميدي والمستوى السادس