منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

الحلقة رقم 18 : ذكرياتي مع أخي جمال الله يرحمو (2)

الجزء الثالث : مينْ المرض بانْ وظْهرْ

نتائج التحاليل كانت عجيبة وغريبة.ياالله جمال فاش دخل للمستشفى، شدّوه الفرْمْليات وْحطّوه فالناموسية .بقاوْ يْشوفو فيه ويْقولو : سبحان الله العطيم.
الأخ ديالي حيت كيعرف الاغلبية ديالهوم ، بْدى يضحك وْ قال ليهوم : مالْكوم مع هاد الخلعة ؟ ياكْ ما لْقيتو باللي الدّم ديالي ولّى أخضر؟
جاوْ الدكاترة حتى هوما.واحد فيهوم قال للأخ ديالي : سّي جمال .كيفاشْ تْحسْ بْراسك ؟ واشْ تْجيكْ شي دوخا ؟ واشْ كترْعف ؟
جمال ما لْقى ما يقول حيتْ هاد الأسئلة بانتْ لو فْشي شْكل.
واخّا هكْدا من الأدب والصْواب ردْ على الدكتور : الحمد لله أنا بخير وعلى خير.
الدّكاترة بْداوْ يتْهامسو بيناتهوم.فلْخَّرْ ديسيداوْ يَخَّبْرو خونا بالله اللي بانْ باللي راه فْدار غفْلونْ
_ شوف أولدي أنت راها حالتك جد خطيرة
صافي جمال ما بْقاشْ يْضحكْ .بْحال والو يْكون أرْجعْ أصْفر كي الليمة (الحامض)
_ واه أدكتور واشْتا (أشْنو) عندي بالضبط ؟
_ الحالة اللي عندك كونْ جاتْ لْشي حدْ من غيركْ كونْ راهْ ماتْ شْحال هادي
_ دكتور راك خْلَعْتني واشْتا عندي ؟
_ شوف أولدي ماغاديش تقدر تفهم ولكن أنا غادي نْبَسَّطْ لك الحالة ديالك
الانسان عندو فالدم الكريّات البيضاء والحمراء .المشكل انت عندك فالكريّات البيضاء.عندك واحد العدد منها ما يمكنش يتصورو أي واحد
_ شحال أدكتور عندي منهوم ؟
_ عندك أكثر من 100.000 كريّة بيضا في اللتر.
_ واه ؟ من المفروض شْحال خاص يْكونو ؟
_ ما بين 6000 و11.000 كريّة
_ واخّا أدكتور زعما أنا راني قاري .بْغيتْ نعرف المرض ديالي كي سْميْتو ؟
_ la leucémie
_ هادا راه سرطان ؟
_ اوى بْحالْ داك الشي.سرطان ديال مخ العظام.
_ واش بعدا عندو شي علاج ؟
_ عندو ولكن فالمغرب ما كاينش .خاصك تمشي لفرنسا الى بغيتي تعالج
_ الله يخلّيك بْغيتْ نعرف العلاج كيفاشْ دايرْ
_ خاصّك عملية ديال زرع مخ العظام (greffe de la moelle osseuse)
جمال بْغى يعرف كولشي ولكن الأطباء قالو لو : كولْ حاجة بْوقتها.دابا أنت غادي تبقى مْعانا تحت المراقبة الطبية لمدّة 3 أيام.من بعد غادي نْشوفو آش يمكن نْديرو ؟
المهم هوما عيْطو على الواليد والواليدة.مْساكين الوالدين جاوْ مخلوعينْ ولكن الطّبّا (الاطباء) طماْنوهوم : ما تقلقوش ما يكون غير الخير
بعد 3 أيام بانْ عْجبْ آخورْ.قبل ما يخرج تْقيّى جمال الدم أحمر يمكن تقريبا دايزة لتر ، الله يستر على ما حْكاوْلي دمْ مْكبَّدْ (sang coagulé)
من هنا بداَتْ معاناته مع المرض الخبيت
باشْ ما نطوّلْشْ عليكوم ، كان خاصْ أفراد العائلة باش يْديرو التحاليل ديال الدم ويْشوفو الفصيلة المطابقة في كل مكونات الدم مع الفصيلة ديالو.الاخوان ديالي كولهوم والاخوات والواليد والواليدة وعمّي ...المهم تقريبا العائلة كاملة ، ناقصها غير الحوميدي على حقّاش كنت فتاوريرت
الواليد اتصل بيا باش يخبرني باللي كاين وطْلبْ مني نْجي فْاَقربْ وقت ممكن
خوكوم الحوميدي فالغد ليه سافر مع زوْجتو للرباط.
في اليوم الموالي ، مْشيتْ درتْ التحاليل.من بعد رْجعت لتاوريرت حيت كانت عندي رخصة طبية ديال 3 أيام فقط.
داز أسبوع وطهْرات النتائج : دم الحوميدي هو اللي يصلح .لهادا هو اللي يمكن يعطيه من المخ ديال العمود الفقري ديالو .خوكم الحوميدي مين وصلو لخْبار تَخْلعْ.اما فالرباط كولشي فْرحْ.

الجزء الرابع : الحوميدي بين ناريْنْ : الانتقام أو التضحية

جمال الله يْرحمو حسْ بأن هداك اللي كان يحتاقرو هو اللي بْيَديه لعْمرْ ديالو.سبحان الله يا إخواني كان الله يرحمو يقول أنت ما فيك فايْدة.ربّ العالمين هو المطّلَعْ على كل شيء.هاهو يبرهن لو باللي الى الحوميدي ما بْغاش ، صافي غيرْ شهّدْ : راها الموت جايَّتَكْ
كانت لي اشكالية : واشْ نقبل ؟ واش نرفض ؟
الى قْبلت ، العملية راها خطيرة وفي طور التجربة.يعني تقدر تنجح وتقدر تفشل.أضف الى هدا راها يمكن تعْدمني.اوى آشْ المعمول ؟
الصراحة كنت متردّد .بْلا ما نكدب عليكوم كنت ما باغيشْ نعّتقو .كل ما نفكّر داكْ الشّي اللي دار مْعايا ، نقول مع راسي : هدا واخّا خويا ما يستاهلْشْ نْضحّي من أجْلو.
الفكرة ديال الرفض كانت ولكن كنت نفكّر فالوالدين ، آشْ غادي يقولو علي ؟ موحال الى غادي يْسامحولي الى ولدهوم مات.
الصراحة شهر وْأنا تنْفكّرْ
فْداكْ الشهر رَسْلو الدم ديالي وديال أخي جمال الى فرنسا بالضّبْط مستشفى سان لويز ( Hopital Saint LOUIS)
حالة جمال زادت من سيء الى أسوء.المشكل أنه جاتو حالات ديال التقيّء ديال الدم.الى زاد على هاد الحالة صافي غادي يْموت
الواليد والواليدة بْداوْ كل يوم يتّاصلو بيا عند واحد مول الحانوت باشْ يتْكلمو معايا.كانو يْرغْبوني : أولدي الله يرضي عليك خاصّك تعّتْقو ، راه زعما خوك
الواليد مسكين الله يدكرو بخير كان ديما يقول ليا : أولدي حميد أنا حاسْ باللي أنت حاسْ بيه.انا عارف داكْ الشّي اللي دار فيك ولكن راها ماشي لافوطْ ديالو راها ديالي .أنا اللي كان خاصْني نْوَقْفو عند حدّو.دابا ها هو البرهان ديال الله .غادي تْشوف أولدي الى تْكَتْباتْ ليه عْمورْ جديدة راك بالفضل ديالك .عنداك أضَّيَعْ هاد لاجَرْ
فعلا قْبلتْ.الواليد كيعرفني ديما كلمة وحدة.هي هاديك مْشى باشْ يعلم السْبيطار ديال فرنسا بالقدوم ديالنا.
باقي عاقل كان الموعد اللي عْطاوْنا هو 18 دجنبر .يعني نكونو باقيين ما شدّينا العطلة.العطلة كانت ديك لوقيتة ف22 دجنبر.
هادي قصة أخرى من مدكرات معلم فالمدينة

تابعوا البقية مع الجزء الخامس والسادس يوم غد إن شاء الله.