منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

الحلقة رقم 16 : حوميدي بن بطوطة في الترحال وموليير فلقراية

الجزء الأول : حوميدي ديما حاصل مع لكّرى

هاد الحلقة غادي نتكلّم فيها عن جوانب من حياتي الشخصية (1987).العام الذي غادي خوكم يدخل فالقفص الذهبي، كنت كْريت دار عند صاحبي أستاذ .كان باقي لكْرى رخيص حيت يا الله كنت نْخلّص 350 درهم.المهم قبل نهاية السنة الدراسية شْريتْ بعض اللوازم اللي خاص مولات الدار غير تدخل تلْقاها.فالصيف وبالضبط فشهر يوليوز كان العرس .المهم شهر العسل قْضيتو في الرباط.
فشهر شتنبر مشيت رفقة الزوجة ديالي الى تاوريرت قصد الاستقرار.المشكل ديال السكنى دائما كاين.هاد الدار كان فيها الصْداع حيت اللي ساكنين فوق منّا ديما الموسيقى على فور جهدها.لذلك رحلت من جديد الى منزل آخور.هاد المرة لكْرى كان 450 درهم للشهر.هاد الدار يمكن بقينا فيها حتى لمتمْ السنة الدراسية.حتى هي اضْطرّيتْ نرحل منها لسبب واحد .الفاتورة ديال الما كانت ديما مرتفعة على ودّاش الما كان مشروك بين الجيران.تصورو أني كنت نْخلّص فالشهر ما مقداره 400 درهم.ثمن كراء منزل بتاوريرت
للمرة الثالثة رحلْت الى منزل آخور .هاد المنزل وقع لي فيه مشكلان .المشكل الأول أنه كان مغْموم ، يعني ديما الضو شاعل لأن الشمس كانت تحشمْ تدخل ليه والمشكل الثاني هاد المرة الضو هو اللي كان مشروك.هنا الفضيحة الكبرى كنت نْخلص تقريبا 500 درهم كل شهر.
بالطبع رحلت من جديد الى منزل خامس يمكن هاد المنزل بْقيت فيه تقريبا 3 سنين متتالية .في هاد المرحلة كانت بيني وبين صديقي لمفضل علاقة وطيدة .كنّا كنتبادلو الزيارات بيناتنا.فهاد البيت ازدادت بنتي عفاف وكان ذلك سنة 1991 .
باقي عاقل يوم ديال السبوع (العقيقة) عْرضْت على كل المعلمين والمعلمات بالمدرسة.المعلمات جاوْ فالنهار والمعلمين جاوْ بالليل.
الاساتذة الله يكتَّر خيرهوم جمعو لفلوسْ وشْراوْ ليا كادو معتابرْ : 3 ديال لكْواش ، هي فالحقيقة 2 كواش كبار وكاشة صغيرة على حسلب عفاف.من الفوق كاين اللي عْطاوْ للْمَدامْ لفلوس.المهم يمكن تكون جمْعات واحد 800 درهم أو أكثر .

الجزء الثاني : إداعة الجزائر كتستهْلكْ بزّاف ديالْ الضّو

حتى فهاد المنزل كان عندي مشاكل مع مول الدار ولكن هاد المرة استطعت باش نْحلْ المشكل ديال مثلا الضّو والماء .خونا بالله كان عندو حانوت وساكن هو ومْراتو والوالدة ديالو وجوج خْواتاتو.لهادا فْرضْت عليه باشْ يخلّصْ جوج ثلث ، أمّا أنا فقط الثلث.
ولكن واحد النهار ، جا عندي وقال لي :
_ سّي حميد راك تضحك علي
_ كيفاش ما فهمتش ؟
_ اوى خاصّك تْخلّص معايا الفاتورة ديال الضّو بالنَّصْ
_ ولكن حْنا متّافقين شْحال هادي باللي أنتَ تْخلَّصْ جوج ثلثْ وْ أنا غير الثُّلُثْ حيت أنت عندك ثلّاجة كبيرة فالحانوت وْكتاكولْ بزّافْ الضّو
_ واخّا ولكن أنت راك تْشدْ لانْجيري (بالعربية الجزائر)
جواب غريب وعجيب .خونا بالله كيْظنْ باللي راني نتفرّجْ فالتلفزة ديال الجزائر كنستهلك الكهرباء اكتر من القانون.طلبت منّو يشرح لي حيت انا ما فاهم والو.
خونا بالله قال لي : تاوريرت بعيدة على الجزائر ما يمكنش تْشَدْ التلفزة ديالهوم .هو كيْشوف باللي راني شْريت هداك الجهاز اللي ساعدني باش نلْتقَطْ البرامج ديال الاداعة والتلفزة الجزائرية ، زعما هداك الجهاز كيْسْتهْلك الضّو بكتْرة.
هدا هو الكلخ والا فلا.
باش نْحل المشكل عْطيتو خيط دايزْ من التلفزة ديالي للتّلفزة ديالو باش حتى هو يتمتع بالاداعة الجزائرية.من بعد خونا بالله اكتشف باللي كاين قنوات ديال اسْبَنْيول والبرتْقيزْ (اسبانيا والبرتغال)
هاد خونا بالله سْميتو عبد الرحمان كان قاري مسكين حتى للرابع وخارج كسول يمكن كان هو التّالي ديال القسم.كان مسكين بعض المرات تْجيه شي رسالة كنقْراها لو ونشرحها لو.باش يشكرني اما يعْطيني موناضا أو كاس حليب.
كانت عندي معاه علاقة محدودة .ما عمرو شريت عليه شي حاجة من غير الخبز ولحليب.

الجزء الثالث : حوميدي والمختصر المفيد

من بعد 3 سنين كانت عفاف عندها عام ، رحلت من عندو باش نسكن حْدى المدرسة .الصراحة كنت نمشي للخدمة حتى نسمع جرس الدخول وفالاستراحة ديما راني فالدار باش نشرب الشاي أو كأس قهوة بلحليب.
فهداك العام كنت مْشيت لْفاس باشْ ندوَّزْ الامتحان ديال السلّم 10.باقي عاقل واحد المعلمة فاسية كانت تخدم معايا ، كانت هي المقابلة ديالي فالقسم الثالث هي شادّة العربية وْانا الفرنسية.
في فاس ماكانش عندي شي واحد فالفاميلة .لهادا كان خاصني نكْري فالأوطيل.المشكل لكبير اللي عرفتو من بعد ان المرشحين ديال وجدة وبركان وتاوريرت والناضور كولهوم خاصهوم يمشيو لفاس.يعني فاس واخّا مدينة كبيرة موحال الى هاد البشر غادي يلقاوْ سرير لكل واحد.تصورو ان شي صحابي خلْصو الليلة ب400 درهم .
المهم خوكم الحوميدي جاه لْخير حتى للدار.المعلمة الفاسية اتاصلت بالواليد ديالها وقالت لو باش ينتضَرْني فمحطة القطار.قالت لي غادي يلقاكْ بابا وتمشي مْعاه عندنا للدّار حتّى تْسالي الامتحانات.مازالْ عاقل الامتحانات دوّزْناهوم فيومينْ.
الصراحة الوالد ديال الأستادة سعاد كان فالمستوى.كان مسكين فالمحطة كينتاضرني .الحمد لله كانت عندي التصْويرة ديالو .غير شفتو عيَّطْتْ لو.هي هاديك مْشينا فالطوموبيل ديالو للدار.كان ساكن فواحد الفيلا تبارك الله كبيرة وفيها حتى لابيسينْ.(المسبح)هاد السيد كان عايش غير بوحديتو.الزوجة ديالو على ما حْكالي تْوفّات مين كان عند بنتو هي الصغيرة يا الله 3 سنوات.ربّاها كيف ما ربّى جوج خوتّها اللي كان عندهوم الاول 7 سنوات والثاني 4 سنوات.هدا أب ضحّى بالشباب ديالو وما بغاش يتزوج وحْنا كنعّرفو أن الرجل يا الله تموت لمْرى ديالو غير يْقبَّرها (يدفنها) يمشي دغيا ياخود ليه شي وحدة باقية عندها سْنانْ لحليبْ
هاد خونا بالله الدار عندو نقية ومنضْمة بْحال الى عندو لمْرى فالدار.قال لي باللي هو كيعتمد على الخادمات .يمكن عندو جوج أو 3 ديال الخادمات : وحدة مكلّفْها غير بالنظافة ديال البيت ، الثانية كل اللي يهم الأكل والشراب والثالثة كل مسائل التصبين والكسوة
ولكن هاد السيد راه بورجوازي كبير.
اليوم الأول اللي وصلت عندو لْقيتْ طابلة مْعمْرة مأكولات وشروبات.قال لي : كول أولدي باشْ تْركّزْ مزيان فالامتحان.
فالصباح بكري بعدما فْطرْنا هو اللي وصّلني للمدرسة فين خاصني نْدوّز الامتحان.قبل ما يْخلّيني قال لي : غادي نرجع مع الطْناشْ باش نمشيوْ نتغدّاو فْشي مطعم فخْم.
فالامتحان كان الرقم ديالي هو 20 .يعني الأخير فالقسم.خوكم بالله يعني أنا .قرّرْت باش نكتب باللغة الفرنسية المواضيع ديالي كاملين .تْصوْرو حتى مادة التشريع دوّزْتها باللغة الفرنسية.باشْ تعَّرفو باللي الحوميدي راه فرانْساوي ديال
بصّاح .
حاجة أخرى بْغيتكوم تستافدو بيها وهي أني يمكن كتبت ما كاملاش 15 سطر .ماكاينش بْحالْ ما قلَّ ودلَّ.باقي عاقل كانو جوج أساتدة يحرسونا : استاد مع أستادة.
انا كنت ساليت تقريبا فساعة .مين بْغيتْ نمشي فْحالي ، جا عندي واحد من اللي كانو يحّرسونا وقال لي :
_ زيد شوية راجع يا أستاد راك ما كتبتي والو
شفت فيه وردّيت عليه : ما تقلقش عليا راني كاتب بين السطور.
مسكين تْمعّن فالورقة.باينة ما فْهمْ والو
خلّيتو ومْشيت في حالاتي.سْمعتهوم وْأنا حْدى الباب الأستاد يتكلم مع الأستادة : بْقى فيا مسكين ما كاتب والو.
المهم فْلعشية بعدما تغدّينا مزيان .الصراحة غّدى ديال الأمراء.استعملت نفس الطريقة : الاختصار المفيد.هاد المرّة كانو جوج اساتدة كْبارْ فالسن ما تقولو عليهوم غير فَقْها فالدين.
واحد فيهوم قال لي مين اعْطيتو الورقة : زيدْ شوية راجع أأستاد راك ما كاتب والو.
جاوبتو غير ما تقلّقْشْ راني كتبت داكْ شي بلغة موليير
_ شكون موليير ؟ قال لي مسكين : ما عمّرْني ما سمعت بيه
_ موليير كاتب فرنساوي كبير عندو مع المسرح والشعر والكوميديا.
_ اوى آشْ دخّلْو مع الامتحان ؟
_ والو غير كتبْتْ باللغة ديالو
_ واه ؟
_ واه.
حتى هو خلّيتو ما فاههم كيف ماتقولو حتى زفّتة
لْغدْ ليه كانت عندي غير الصباح اللي ندوْزو فيه الامتحان .دائما خوكم الحوميدي شوية فيها البركة.
فلعشية وصّلني الواليد ديال سعاد لمحطة القطار .فوق هاد الشي خلّصْ لي التدكرة وعْطاني شي حْويج ليا وحوايج نْوصّلهوم لبنتو سعاد
قبل ما نْودعو طْلبْ مني باش نعطيه رقم الامتحان حيت يعرف شي ناس يقدرو زعما يْشوفو شي لْعيبة باشْ ننجح.
الحوميدي ديما يبغي ينجح بدْراعو ماشي بدْراع عباد الله، جاوبتو اسمح لي الحاج أنا جيتْ بْحالي بْحال عباد الله .الى نْجحت ، داك الشي اللي بْغيتْ.الى جبْتها فالطْبَكْ (يعني خسرت) غادي تكون تجربة نستافدْ منها للعام الجايْ
ما لْقى ما يْردْ غيرْ :
_ اوى خاطرك أولدي

يتبع غدا إن شاء الله