جال خاطري في سما الحروف وطال نجمة تبهر الشوف


جيتكم نشكي
والشكوة لله
فين حقي
القصيدة نفسات
والحريف تالف
شاف السالف
قعد حالف
حتى يسميه
وحدة من الجوج
ياالسيبة واتاي الشيبة
والركدة على الطوبة والجريدة
ولا النخوة والهدرا عل الخوا
معول عل الشواري المقعور
وطعام المحفور
ياكلو ويبقى يدور
ويلالي بالعلالي
راه الحريف دارها بيا
حنى ليا رجليا
وقال ليا
راه الحروف
دبحو خروف
دارو ملفوف
ونسجو زربية
من الصوف
تغناوبها الزجالة
والناس تشوف
وقالوا كلام
رزين بلا خوف
سمعوه العلامة
ودارو لامة
في حومة للاشامة
وحطو النقط
على الحروف
هالقوافي وهالاقوال
حكمة وامثال
في زمان المحال
القلب حار
واحتار بين الجار
ومول الدار
دخلت لحارة الحروف
القلب جفى ورد من الخوف

على الفتيلة الراكبة قردة
من الخف والرعدة
جات تحكي دوا الجوف

على الناموسة
اللي طارت فوق المنحوسة
زادت هم السوسة
يانا يا قبيلة العرقسوسة

على النحلة .
.لي شهدها دوا التايه
في الجوا
واش يخويه...
على الفقيه ..
ويفرش كراصو في الهوا

على النملة الفريدة الوحيدة
تالفة في السمايم
تجمع مونة الحوت العايم
في بحر صافي
فيه من حروف الكتوب القدر الكافي

على الطريق
سلكها العدو والصديق
فرشت الورد والشوك
ودارت تحقيق

وبقيت نجول
كيف المهبول
لا حريف يسول فيا
لا نجمة تطل عليا


ام زين .............السعدية 4/8/2013