منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

شيخ الصواني

بجرة قلم
للشارع رماني
بجرة قلم
قطع رزقي
ورزق الدراري
الله كساني
وهو عراني
خلاني الله رحيم
مابين اقراني
مابين ليلة ونهار
وليت بين احبابي
غريب براني
وقلت فدواخلي
لاش تليق يابنادم
ياشيخ الصواني
بعدما خاصمك الفلس
وتهرست الكيسان
وتفرقت لمة لحباب
والحرف تلف عْلْمْعاني
فين رزة الكاس لمشحر؟
وفين مذاق الشاي لمعطر؟
وفين ذاك الحرف لمخنتر؟
كلشي مشى بجرة قلم
طاحوا لكتاف
ورموا لقدام
دارها الشاف
بجرة قلم
طَيّْح العلام
خلاني بين اصحابي عريان
لاخدمة بقات
لاحرف, لاميزان
لالمة احباب
لاصينية ,لاكيسان
مابقى غير الشيح
تابعاه الريح
وانا نلالي حيران
نشالي بكمامي
جيعان
شكون يشوف من حالي ؟
وشكون يدْري بعذابي ؟
أنا لمكوي بجرة قلم
لاثقة فمول النعمة
يلا كان من صنف الإنسان
يحايد ليك الدغمة
من الفم المليان
دعيتك لله الواحد المنان
الله ياخذ فيك الحق
يا عديم الحكمة
يا مول جرة القلم
دابا السوايع تدور
وتلقى راسك بحالي كَتْدور
تبحث على الفلس
وسط سبع بحور
يلا لبارح كانت نوبتي
غذا يكون عليك الدور
يلا كنتي لبارح جار
غذا تصبح مجرور
خوفي عليك يابنادم
لاترفضك لقبور
ويهجرك النور
بعدما درتي بينك
وبين ربنا
العالي
ألف سور وسور