منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

بنادم ياكحل الراس

مالك يابنادم
قصاح ليك الراس
تحجرت ليك لقلوب
صاحبتي القرعة والكاس
نسيتي اهلك واحبابك
وساير تجمع فالدنوب
حالك مابقى عاجبني
يابنادم ياكحل الراس
دير بكلامي وطاوعني
وآجي نبنيوا الساس
طوبة طوبة نغيروا الحال
وخطوة خطوة نعمروا الدار
ونبعدوا على القيل والقال
ونطفيوا من قلوبنا النار
يابنادم ياكحل الراس
يامصاحب القرعة والكاس
رُدبالك من الدنيا رُدبالك
را لعمر يجري من بين اصباعك
فرمشة عين تتهرّْس القرعة
ويتبعها الكاس
وتلقى راسك محتاس
ويدور بيك الزمان
ويتهرس ليك الراس
ويتفرقوا عليك الصحاب
وينساوك لحباب
وتولي ذايع فالزناقي
منبوذ بحال المجراب
لادويرة لا اولاد
لاصدر حنين
لاخيمة لا اوتاد
لا حال زين
تولي تايه وتابعك غراب
وتمشي احياتك سراب
بعدما كنتي راس
تولّي وذنين
بنادم ياكحل الراس
رُدبالكْ... رُدبالك... رُدبالك...