منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة - احوال بنادم

سالوني بعض الأغراب
على اعذاب هـمي
جاوبتهم يا ل صحاب
راه جاري من زمان ف دمي
واسبابي شلى احباب
بمعرفتهم كنت غشمي
افتحت ليهم الباب
وعشت معاهم ف حلمي
ما زادوني غير ل عذاب
والنكاد والغبينة على غمي
لكن انا لي ما درت للزمان احساب
وعاشرت ناس ماهم من سهمي
كنت راضي ب المكتاب
صابر ب ضري وسقمي
واخة الزمان غلاٌب
مكمل بالصبر يومي
وزماني اليوم تقلب
نشوف بعيني والشكيمة على فمي
ولي كان حيلة واسباب
لي قلبو مصبوغ كي اضلامي

عاشرت الناس حتى عييت
شلى انواع واشكال
هالي بهبالو تسليت
وزدت على هبالي اهبال
هالي بكلامو ستحليت
يطرز المعنى ويضرب لمثال
هالي ف همومو تلهيت
وبزيادة همومو همي تقال
ها لي بكدوبو مليت
مسكين عايش فعالم لخيال
وهالي ببلاه تبليت
وفرقت معاه شيرة الخال
وهالي بحقدو وشرو معنيت
غدار ما محسوب من لخلال
هالي بنفاقو حسيت
وجهو كل مرة يعرف تبدال
هالي بروال فحالو ما لقيت
ما يستر عيب كي الغربال
وهالي بخاوتو ما نسيت
عز الصحبة ونعم الرجال

شحال قدك تعرف فبنادم
راه شلى اشكال وانواع
كيف السيد كيف الخادم
المكر والخبث والخداع
ولي مكلخ حاسب راسو فاهم
طويل اللسان ماهو كي طويل الدراع
راه المضلوم سامح الضالم
والضالم هاجم عليه شرع
والمتهوم صار هو الحاكم
بالفلس راه من تهمتو طلع
ل قاري حرف رد راسو عالم
وأهل العلم تجبرو متواضع
ظن راسو لكلام المعنى ناظم
وكلامو شاد طريق الضياع
ولي مفرط ماشي كي الغانم
واحد اشرى فيك ولاخر باع
الحال ما بقى يعجب عل الدوام
الهم والغم وكترة الصداع
الشر كاين وكان من هادي اعوام
الخير على السطح والخديعة فالقاع
نتمناو الخير فالجيل لي قادم
واخة الدنيا ما زايدة وتخلع