علمتني الايام ما نحدر الراس
والى وقفت نوقف وراسي مرفوع
نخضتني الايام ف شكوة المحاين
وصار الخوف تحت رجلي موضوع
باسم الخاوة والصحبة تغريت
وخلاوها كية آثرها فيا مطبوع
بالنية زدت عطيت ولا خديت
وحسبت نفسي الرابح وأنا المخدوع
***********
كسبت ف دواير الزمان غير العداوة
ولا عزاني ف الغبينة خل و حبيب
طعم السم مزيناه الحلاوة
وجافاني وقت المحنة لي حسبتو طبيب
وضعت المحبة ف الميزان و قست
قلوب الناس و ما وجدت غير الذيب
دفيتهم ف برد الليالي وجدت
بالغالي وما جنيت غير العيب
***********
طبطبت عليهم ف ضربة الاحزان
ولا قلت ياراسي خليك بعيد
هديت بالصدق من عيوني جمان
ودرت ايامهم ف حياتي عيد
ثقت ف الزمان و دار الميزان
ولا وجدت يوم ظلام الحال وقيد
قلت اللهم البعد وغربة الاوطان
ولا نظرة تشفي وتزيد ف القيد
************
كتفتني الحيرة و قلة الحيلة
وزاد البعد بالهم غطاني
النفس ف الوحدة تعود ذليلة
ومهما شقيت ف بلاد الناس براني
ايامي ف الفرح عادت قليلة
دفنتها وهزيت على اكتافي احزاني
لا صاحب و لا خو ولا قبيلة
باعني الفرح والحزن بالرخص شراني