احميده الزوفري
احميده كفالعود الخلوي غير مدرم
بلا لجام ولا صفيحه ، سارح يهدم
عايش عيشة يحسب راسو بها فايق
وفياقتو ما نفعات من بحالو سابق
عرفو قبلو ما دايم غير المعقول
وحالة الزوفري طريقها مسقوم
حيث صياد النعام يلقاها يلقاها
واخا فايق تكون الطيحة بشقاها
وربي يستر من طيحة صياد النعامه
يسقط فحفرة التصياد كبيرة مضخامه
مهما اهرب الزوفري من الطاعه حاصل
اللهم ينوي المعقول قبل ما يصير واحل
بشي بيعه وشريه تشيب الصبيان
الله يحفظ منها ذنب كل عصيان
يلا يلقيتي ونويتي هرب لطريق الطاعه
راه الصياد لموسوس قربات ليه الساعه
هي ساعه هيجي من يفهم لذاك الصياد
يقرى ليه سوارو ويكتفو بكل تقياد
وقبل ما تلقى الجوهر حسن فعالك
وتكل عل الله واخرج من هم جهالك
راح حساب صياد النعام خاوي نخاله
واللي بغى عليه بالذهب رباحو مثقاله
العود مهما جرى مطلوق مزعرط
يجري فكل لجواهي ، دابا يتربط
إما هو عاود أصيل راكبو فارس
يدفيه بسرجو من كل برد قارس
وإما يكون عاود مغشوش خطيه
مسروج بالهموم من انوايع البليه
إبداع : محمد الزاكي – سلا
(Tagnaouite)