النسرين
نفسي تعرف الورد زين التوريده
و ما يغرها تزواق ديال الحريكه
الورده بريحها ونسمتها هي الروح
واللي بلا ريحه غير هم وقروح
الشوفه مع الريحه كتريح وتشافي
واللي بلا زين ولا ريحا غير عوافي
الورد منوع بكل شكال ونوع
والقلب بالنسرين صبح مصروع
سكرت بعطرو لجميل المذيوع فايح
وهمت فهواه وحسنو كيف السايح
قالوا لي لصحاب آشنو شدك ليه
بقيت تالف بلا جواب هنا ولهيه
وملي فقت من تلفاني وهيامي
زاد شوقي ليه وبان سر تيماني
جاوبت لصحاب وانا بالنسرين مملوك
بعدما ظهرات علايمي بطريق مسلوك
قلت ليهم واصف طيبتو وظرافتو
وتعلاقي بحلاوة صوتو ولطافتو
قالوا بالخير والمحبة ناصحين
أنت يافنان تعرف بقيمة النسرين
أنت اللي ملكك وغرقت فهواه
بعدما فاح عطرو وكمل بهاه
آش كتعاين وتخمم يا ذاك الهايم
راه ربيع الورد وربيعك ماشي دايم
نوض غرسو فبيتك وبستان
ورويه بحبك ليه وعشقانك
يطرح ليك من لورود لبديعه
ويكون الله منهم الزرع والزريعه
قبل ما يجي من يقطف ذاك النسرين
من لا يفرق بين المسك وتشواط الكرعين
ذيك الساعات تعود أسفان تتألم
وتقول ضيعت زهري باش نتعلم
إبداع : محمد الزاكي – سلا
tagnaouite