فالقلب ألف عْلَّة

وعلَّة
ويدي حاملة سلَّة
تفرق علحباب
ألف فُلَّة
وفُلة
هي كل مابقى لينا
من الغَلَّة
أنا ماشي بحال
ذوك الناس
الواكلين
ذيك الغلَّة
واللي ضربوها
بألف سلَّة
وسلَّة
وزايدينها بالدّين
والمْلَّة
مايطلُّوا علينا طَلَّة
ماتصيبهم عْلَّة
ماتهمهم فُلَّة
حياتهم كلها زلَّة
فْزلَّة
هَرّْسْنا عليهم
من زمان
القُلَّة
وماناسين
مول الفْعْلَة
جيت نْطُل عليهم
طَلَّة
يْتْقْطَعْ طَلّي
لاش نْطُل
هاذ الطَّلَّة؟
رْميتْهُمْ ياناس
بألف فُلَّة
وفُلَّة
رْماوني بالحْجَر
شْلاَّ وْشْلاَّ
وعيني دمعات
من الدموع
شْلاَّ وْشْلاَّ
وقُلْتْ بلسان العْلَّة
يابنادم لاتهدي
فيوم فُلَّة
لذوك الواكْلين
الغَلَّة
راه يْرميوْكْ
بالحجر
ويضربوها بسْلَّة
ويخليوك فألف عْلَّة
وعْلَّة