منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

بغاونا نبقاو ملهيين في الملاهي
الشباب مخضّر والشعب ساهي
يشوف الفساد بعينيه ويبقى فاهي
ما عارف أش جاري فأيامو
ما بغاوناش نزيدو للقدّام
بغاو المسكين يبقى تحت الأقدام
يشوف بعينيه ويحبس الكلام
يشكّم العين ويدير للسان لجامو
لاهاونا بالفيستيفالات وموازين
يتخسرو فيه الملاير والملايين
كون غير عطاوهم للمساكين
يزول الفقر ويتقاضى تخمامو
ولفّو العصا فينا على الظهر
على مطرح يكزرونا بحال البقر
الهضرة كثيرة والسكات اخيَر
امتى يطلع الصبح والليل يزول ظلامو