داز من هنا كيف الطيف
راكب على عودو ويشالي
قلنا جاي يدوز معانا الصيف
يطرز لينا الكلام الغالي
++++
اللي شافو قال هذا العلام
واللي ماشافو قال هذا غير كلام
إيوا بان وعليك 66 أمان
حايد علينا هاذ الغمام
اللي ماجايب شتا
جايب غير التخمام
هز ذوك الكمام
وآراك للتزمام
بريشة أو قلام
المهم كتب لينا الكلام
ويكون من عند خونا العلام
باش يطير الحمام
ويعلي ويرقص فوق الغمام
ويحضر العز ويطلع الميزان
وتشعل المجامر ويعلى الدخان
والناس تاكل الزنان
ولجواد تشطح وتضحك بلا سنان
والزحاف ينقز الحيطان
والأعمى يخيط الكتان
وامي عجوز تصيد السمان
وترقص مع القومان
والعلام يصول ويجول فالفدان
يتبورد ويدردك ويكتب حريفات حنان
سير يا العلام راك فنان