منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

كنا عايشين فالهنا والصفا وراحة البال
سكن احدانا واحد بوصيحة
بنى عشو بين ليلة ونهار
نشر رجليه,ومد يديه
خرج عينيه,وجبد وذنيه
بدا احياتو بيننا بالقيل والقال
تبدلات الوقت وتغير الحال
كل واحد فينا يسأل سؤال
شكون هاذ بوصيحة؟
اللي ريحتو بيننا فايحة
داير فهاذ الدوار فضيحة
ماخدام وماردام
مايسلم مايقول كلام
مايضحك مايتسلى
مايكتب باقلام
مايصلي معانا فجامع
مايكفكف دمعة دامع
علينا طاوي جامع
عاطينا النخال
ولينا ماهو سامع
مع الوقت نسيناه
وحطيناه سطل بلا تقرقيب
وفحالو خليناه
وعاش بيننا ديما غريب
حيدنا علينا التخمام
واحسبناه من اهل المكان
ويلا شفناه فيقظة أو أحلام
نقولوا بسم الله على الرحيم الرحمن
مشات ايام وجات ايام
وفيوم من الايام
جا للجماعة ضارب تحية وسلام
دوا ونطق بهاذ الكلام:
جيتكم ياناس طالب السلام
من اليوم أنا ليكم خدام
مشى الخبز الحافي
والمال الخافي
وجاكم العزالصافي
وأنا هو دواكم الشافي
اللي غاذي يخرجكم من الفيافي
مع حبيبكم بوصيحة
دواركم غاذي يولي ليه شان
نجيب ليكم سيدي مول الطرقان
ندخل ليه الطاكسيات
الطوبيسات والكيران
وتحيدوا الشويهات
ونجيب ليكم الثيران
صوتوا ياناس على بوصيحة
مول الصورة ديال بوصيحة
مايتغالطش ليكم
بوصيحة كتعرفوه مزيان
عايش معاكم من زمان
معروف بكثرة الرجلين
وعندو شلا خيوط
وشلا يدين
وعزيزعليه الشطيح والعيوط
وعندو شلا وذنين
وعزيز عليه البحوط
من الحد حتى الثنين
يلا دار هاذ الشي
راه غير باش يرضيكم
صوتوا على بوصيحة
بوصيحة,بوصيحة,بوصيحة