فينا .. وفينا
شحال من عارف فخدمتو واحل
وشحال من جاهل بجتهتو كاسب گمرة
فينا اللي ما عندو فلوس وقانع بقليل النعمة
وفينا اللي كيف الطبل جوفو خاوي
وفينا اللي عايش بالصدق والنية الصافية
راسو شامخ وكلمتو ديما عالية
وفينا مول الجبروت والطغيان واليد الخْفية
وفينا المهموم والمبرع شاكي
وفينا اللي ناقص دفا فنعاسو
قدامو فالأرض ثابتة ومرصي ساسو
ويدو تسلب حق الغير بلا رحمة
فينا العاقل مظهرو مبهدل وراضي بالقسمة
يا صاح! لا تلوم الدنيا على هاد الناس ..
الفاهمين فيها قلال
والجاهلين منهم شلا، وبلا قياس
مسبقين الرجلين، وديما ناسيين الراس
يا صاح! لا تلوم الدنيا على قلة لمان
ديما هي هكذا من قديم الزمان:
فيها اللي طالع للسحاب وناسي راسو
ديما مرفه، وما جايب للدنيا خبار
وفينا اللي ساكن في الحداري
ما يبالي بهم، وما ليه راحة
وفينا الجيعان والمزلوط يتوجع
وفينا الشبعان بلا ماكلة يتگـرع
يا صاح! شوف الدنيا مثل الشمعة
تعطي لصاحب الطمع بلا قياس
حتى توقف الأرواح عند مولاها
لكن مولانا حنين قادر يحمينا
من شرور الدنيا والناس اللي تآذينا
سبحان ربنا الكريم يجود علينا
ويغفر ويتوب ويسمح لينا
عذبة كلام
03/01/2010